Yeso‑ka yo‑yose mai tamine 14
14
Ikoniyo‑ya mai kobokana
1Ikoniyo‑ya Baoro mai kobokana, Yodeo mai hi‑hiyara‑ke yobe‑ya mai towakiyoma, mai‑ya mai hiyara, mai ati ihi Yeso ati‑ya mai dama mai nofawahamoneni. Yodeo mai toha, Bara mai toha, mai naro.
2Yodeo mai one Yeso ati‑ya mai nofara, iha‑nima mai ati toha, Baoro mai tamine‑ya keyehe‑ya mai hirina, mai ati ihi Baoro mai ati‑ya Bara mai nofaramoneni.
3Ikoniyo‑ya mai wina mai amoni dami‑ya, Yeso tamine‑ya mai hiyara, Deoso mai‑ya kasome, Baoro mai ihi kita‑ya mai awa, mai‑ya mai nakitamineni. Deoso ene tohe‑ya mai watowahamoneni.
4Mai dama, mai one Baoro mai ati‑ya mai nofa, mai one Yodeo mai ati‑ya mai nofa, mai nineni.
5Bara mai one toha, Yodeo mai one toha, mai‑ka hidi mai one toha na, i‑di Baoro, i‑di Banabe, mai‑ya mai ati bisina, mai‑ya mai ati nanahababoneni, yati‑ya.
6Mai tamine‑ya i‑di Baoro mai mita, tabora webote oni Rika·oni‑kaya mai kanani towaka, Rika·oni‑ka tabora bi‑bidi na oni Derebi toha, Risita toha na‑ya mai towakani.
7Fara‑ya Yeso Ati Amosabote‑ya mai kamineni.
Risita, Derebi na‑ya mai wina
8Maki wade‑ya ka‑kakone‑mata, yakatere, bote tohe, Risita‑ya wine, itarine.
9Ka‑kakone Baoro ati‑ya mite, Baoro‑ya kakatome,
“Deoso ati‑ya nofe awane, Deoso hinakitamebonane.” Baoro atibodi ati nane, hiwakatomeri.
10Baoro ati mai himitebona ati yanane ati kite,
“Tiwaamisiya, tiwa teme‑kaya tiwaawahi.” Baoro ati ne.
Ka‑kakone yoranimise, waane, yakatere yakanawahemonane.
11Baoro ene‑ya mai awa, hini mai ati‑ya mai ibi haana,
“Deoso mai amani, ai tabora‑ya deoso mai kobokana, ai awi‑nima mai awinineni.” Mai ati namoneni.
12I‑di Banabe‑ya mai awa,
“Ai‑ka deoso owa i‑di Yobita tohe awane.” Mai ati na.
Baoro tamine‑ya mai ibi hiyara,
“Ai‑ka deoso owa i‑di Mekoriyo tohe awane.” Mai ati na.
Baoro mai‑ya hiyari ba‑basi ne ene i‑di Mekoriyo tohemona mai ati namoneni.
13Yama yakari‑ya, i‑di Yobita‑ya mai hi‑hiyara‑ke yobe waane, Yobita‑ka mai kamineni. Bowi‑ya mai kakama, bowi‑ya mai nabohaboneni, Banabe‑ka bani‑bonaha. Banabe‑ka awa mowe‑bone toha na‑ya mai weyekana, mai kamineni.
“Ai‑ka deoso amane.” Mai ati namoneni.
14Mai ihi‑ya i‑di Banabe i‑di Baoro mai awa, mai ati yawa, mai‑ka bora‑ya mai sibina, mai yorotokana, mai‑ya mai kanani towaka.
15“Haa‑nima dai riyahi, deoso oda tohi awirini. Dai one oda amani. Deoso yokana Ati Amosabote oda kaminabone oda kakamani. Dai‑ka deoso bara hini mai tohiya, dai‑ya mai kasomara, mai‑ya dai kahiyarariyahi. Deoso yokana‑ta dai nofabisahi. Deoso yokana neme‑ya wama, bofe‑ya wama, faha webote‑ya wama, faha abe na, yama nafi‑ya Deoso yokana wama nibisane.
16Hibati‑ya mai tabori dami‑ya mai wi‑wina Deoso yokana mai atibodi‑ya barikare, hini mai atibodi ati‑nima mai nineni.
17Deoso yokana ene dai awateni. Deoso ene faha kaki, awa bono hada na‑ya dai kaba dai ya‑yainineni.” Baoro mai ati namoneni.
18Baoro mai ati fawana, Banabe mai‑ka bowi‑bona mai ati nanahabanasa na,
“Deoso mai toha awineni.” Mai ati na.
I‑di Baoro mai‑ya ati barinane.
Baoro‑ya mai naboha
19Atioki‑ka mai toha, Ikoniyo‑ka mai toha na, mai kamake, mai‑ya mai hiyara,
“Baoro mai ati kasira, mai ati dai mitariyahi.” Mai ati na,
mai ati‑ya mai mita, yati‑ya i‑di Baoro‑ya mai baana, mai hinahabe,
“Abe amanakani.” Mai ati na,
tabora awiri‑kaya Baoro horoniya mai tokamoneni.
20Yeso ati‑ya mai no‑nofa Baoro home‑ya mai kakatoma, mai yorona, Baoro kitame waamisame, mai tabori‑kaya mai‑ya tosawime, mahi owa‑ya Banabe eyehe Derebi‑kaya mai towakamamoneni.
21Derebi‑kaya Yeso Ati Amosabote‑ya mai kamina, mai ati ihi, Yeso ati‑ya mai dami nofawaha, makobote Risita‑ya mai tokomatasa, Ikoniyo‑ya mai tokomatasa, Atioki‑ya mai tokomatasa, mai namoneni.
22Baoro mai ati ihi Yeso ati‑ya mai nofa mai atibodi kitamamoneni. Mai‑ya hiyare,
“Dai‑ya mai bisina, Yeso ati‑ya dai nofasa nahi, Deoso hawine‑ya ai sawe, ai‑ya mai bisina, ai habo siitoriyahi.” Mai ati namoneni.
23Sidadi‑nima Kirisito‑ka mai toha, mai‑ka webote mai‑bone mai‑ya Baoro mai kadika, mai eyehe Deoso‑ya mai hiyara, mahi owa‑ya Baoro mai tokabone, mai tafarani, Deoso‑ya mai kahiyarabonehe. Mai‑ya Baoro mai hiyara,
“Yeso ati dai no‑nofa Deoso dai‑ya kasomayaho.” Mai ati namoneni.
Mai‑ya mai yose‑maro mai‑ya mai towakamatasa
24Mai towaka, tabora webote oni Bisidiya‑ya mai fiyakana, tabora webote one Banafiriya‑ya mai kobokana,
25Banafiriya‑ka tabora bide oni Beki toha‑ya, Yeso tamine‑ya mai hiyara, mai hiyari hawa toha, mai towakamatasa, tabora bide one oni Atariya toha‑kaya mai towakama,
26Atariya‑ya maboro‑ya mai foya, tabora webote Siriya‑ka tabora bide oni Atioki‑ya mai towakamaboneni. Hibati‑ya Atioki‑ya mai mai hiyose, Deoso tamine‑ya mai hiyarabone mai towakamete mai hiyari hawa toha, mai winitokanamamoneni.
27Mai kobokanama, mai ati ihi Kirisito‑ka mai‑ya mai yorotokana, Deoso mai‑ya kasome tamine‑ya mai kamina,
“Yeso ati‑ya Bara mai nofawahineni, Deoso ene.” Mai ati namoneni.
28Abariko dameya, Kirisito‑ka mai eyehe mai winamoneni.
Currently Selected:
Yeso‑ka yo‑yose mai tamine 14: jaaNT
Highlight
Share
Copy
Want to have your highlights saved across all your devices? Sign up or sign in
