Yeso‑ka yo‑yose mai tamine 12
12
Tiyako‑ya Erodi nanahabe, Bedoro‑ya kadeya‑ya nawaane
1Fara‑ya mai‑ka hidi i‑di Erodi ati ene Yeso‑ka mai one‑ya sodado mai waratoneni, mai‑ya mai nanahababonehe,
2Yowaho anidi i‑di Tiyako namidi‑ya mai tiinakosineni.
3Mai marina, baho femeto kihara‑ya mai kaba, Tiyako abi tamine‑ya Yodeo mai mita, mai ya‑yaina, mai ya‑yaini‑ya Erodi awe, Bedoro‑ya waratonane.
4Kadeya‑ya hinafoye, ati ene sodado mai 16 kana Bedoro‑ya mai nawadaboneni. Marina hawa tohiya, Yodeo mai‑ya daahinebonaha.
5Kadeya‑ya i‑di Bedoro waiya sodado mai dabineni, tokarebonaha. Yeso‑ka mai Bedoro tamine‑ya mai hiyari nafineni, Deoso‑ya.
6“Yodeo mai‑ya Bedoro daa·onaminaboneni.” Erodi atibodi ati ne.
Koheti fama‑ya mai yadihine, yama soki‑ya sodado mai fama mai bai‑ya Bedoro amone, nokobi kowani‑kaya sodado mai one yoronineni.
7Kadeya dori‑ya i‑di Bedoro amoneya, Deoso‑ka yo‑yose kobone ene kadeya dori‑ya yama wahi kita, Deoso‑ka yo‑yose Bedoro fowari‑ya wai, fai‑ya mowakanebona, fai‑ya boyone,
“Bedoro, waamisa kanibote tinahi.” Deoso‑ka yo‑yose ati ne.
Bedoro waamise, koheti hini‑ya kasoneni.
8“Tika bora bodi‑ka sakotinama, tika sanidariya tikawatama, tika bora mese‑ka weyetinama tiniya, owa‑ya tisawiyahi.” Deoso‑ka yo‑yose ati ne.
Ati‑nima Bedoro nane.
9Deoso‑ka yo‑yose‑ya i‑di Bedoro tosawime,
“Wada amanikani.” Atibodi ati nemonane.
10Nokobi‑ya Sodado wai‑ya mai fiyakana, nokobi one‑ya sodado owa wai‑ya mai fiyakana na, nokobi feho wamani‑ya mai kobokana, nokobi feho hini‑ya seekana, mai towakama, hawi ohare‑ya mai fiyakaniya, Deoso‑ka yo‑yose toke, Bedoro ohari waane.
11Bedoro yama‑ya watowame, hini‑ya hiyare,
“Se! Yodeo mai‑ya Erodi owa‑ya daanaminebona ati ne, Deoso‑ka yo‑yose owa‑ya seekane, Yodeo owa‑ya mai ihi tohabone mai ati na, Deoso‑ka yo‑yose owa‑ya kasomene, owa‑ya mai watarabonehe.” Bedoro atibodi ati nemonane.
12Yama‑ya Bedoro atibodi watowame, Yowaho Maroko madi i‑di Mariya‑ka yobe‑ya tokome, Mariya‑ka yobe‑ya Yeso‑ka mai yorotokana, Deoso‑ya Bedoro tamine‑ya mai hiyara,
13Bedoro nokobi‑ya baane, moni‑ya mai mita, Mariya‑ka yo‑yose i‑di Hode nokobi‑ya seekanabone tokoma,
14Bedoro ati‑ya Hode mita, ya‑yaina, nokobi‑ya seekara, hiniya kanani winitonama, mai‑ya haana,
“Nokobi‑ya Bedoro ati waine.” Ati na.
15“Ka‑kana tineni.” Mai ati na.
“Ka‑kana oni awirini. Bedoro nokobi‑ya ati waine.” Hode ati na.
“Se! Bedoro korimari tohe awane.” Mai ati na.
16Mai hiyariya, nokobi‑ya Bedoro baanamatase, nokobi‑ya mai seekana, Bedoro‑ya mai awa, mai habi siitona,
17Bedoro yehe‑ya mai‑ya ati barine, mai‑ya hiyarawahe, kadeya‑ya wai Deoso hikasome, hini tamine‑ya kamine, i‑di Tiyako toha, Yeso ati‑ya mai no‑nofa mai one‑ya mai hikaminamakebone ati ne, tabora bara‑kaya tokane.
18Yama wahabisari‑ya Bedoro amone tabaro‑ya sodado mai awa, mai habi siitona,
“Ka! Hini yamata‑nima yama naba? Bedoro ebeni‑kaya tokati?” Mai ibi hiyara mai ati namoneni.
19Bedoro‑ya sodado mai kakamabone Erodi ati ne, Bedoro fawane tamine‑ya Erodi mite, yawe, mai tabori dami‑ya Bedoro‑ya sibane, Bedoro‑ya wasire, sodado Bedoro‑ya mai nawada mai‑ya nanahabane. Makobote Sesareya‑ya Erodi toke, winawahemonane.
Erodi abawahane
20Tiro‑ya mai wi‑wina Sidoho‑ya mai wi‑wina mai na, i‑di Erodi mai‑ya ati yawe, Erodi ati tamine‑ya mai mita, Sesareya‑ya mai tokineni, Erodi‑ya mai hiyarabonehe. Erodi‑ka yo‑yose i‑di Rasito mai‑ya nofe‑ya mai hiyara,
“Rasito, tiwati ihi oda‑ya i‑di Erodi ati somawamaho. Oda‑ya ati somawami awireya, oda‑ka yamata‑ba‑ya daareba awane.” Mai ati namoneni.
21Mahi owa‑ya Erodi mai‑ya hiyarebona, bora amosabote‑ya weyene, kadera amosa‑ya itari, mai‑ya hiyaremonane.
22Erodi ati‑ya mai mita,
“Maki ati tohi awire, deoso ati amane.” Mai ati na, mai ati kitamoneni.
23“Hehe, deoso‑nima ona ama·oni.” Erodi atibodi ati ne.
Deoso yokana‑ya Erodi kahiyari awire, hini‑ya kahiyarabise, Deoso‑ka yo‑yose ene toha kanibote ne, Erodi‑ya yo‑yori mai kaba, abawahane.
24Yeso ati‑ya mai no‑nofa mai tabori dami‑ya mai toka, Deoso ati‑ya mai kamina, mai ati ihi Yeso ati‑ya mai dami nofawahamoneni.
25Yerosare‑ya mai‑ka yama anini hawa tohiya, Banabe, Saoro mai fama Atioki‑ya mai towakama, mai‑ya Yowaho Maroko dabemonane.
Currently Selected:
Yeso‑ka yo‑yose mai tamine 12: jaaNT
Highlight
Share
Copy
Want to have your highlights saved across all your devices? Sign up or sign in
