མཱར་ཀུ་ལེའུ་ 1

ཁྲུས་གསོལ་བྱིན་མི་ཡོ་ཧ་ནཱན་གྱིས་ཆོས་བཤད་པའི་སྐོར།

1དཀོན་མཆོག་གི་སྲས་ ཡེ་ཤུ་ཁིརཱིས་ཀྱི་གཏམ་བཟང་གི་སྐོར་ལས་ འགོ་བཙུགསཔ་ཨིན། 2དང་པར་ལུང་སྟོན་པ་ ཨའི་ཟ་ཡ་ཟེར་མི་གིས་ གསུང་རབ་ནང་བྲིས་བཞག་དོཝ་བཟུམ་སྦེ་རང་།

དཀོན་མཆོག་གིས་གསུངས་དོ་ བལྟ་ཤིག་ ང་གིས་ངེ་གི་ཁ་འཐེན་འབག་མི་ ཁྱོད་ཀྱི་ཧེ་མ་གཏང་ནི་ཨིན་ ཁོ་གིས་ཁྱོད་ཀྱི་ལམ་གྲ་སྒྲིག་བཟོ་འོང་ཟེར་#༡:༢། མ་ལི་ཀའི་ ༣:༡། 3གཙོ་བོ་གི་འབྱོན་ལམ་གྲ་སྒྲིག་རྐྱབས་ ཁོ་གི་འབྱོན་ལམ་འདི་ཕྲང་ཏང་ཏ་བཟོ་ཟེར་ རི་སྟོང་ནང་ལས་སྐད་གཅིག་བརྐྱབ་འོང་ཟེར་གསུངས་ནུག#༡:༣། ཨའི་ཟ་ཡ་ ༤༠:༣། 4འདི་བཟུམ་སྦེ་རང་ ཁྲུས་གསོལ་བྱིན་མི་ ཡོ་ཧ་ནཱན་གྱིས་ སྡིག་པ་བཤགས་པ་བཞེས་ནིའི་དོན་ལུ་ སེམས་འགྱུར་ཏེ་ཁྲུས་གསོལ་ཞུ་ནི་གི་ཆོས་བཤད་དེ་ རི་སྟོང་ནང་ལྷོད་ཅི། 5ཡུ་དེ་ཡ་ལུང་ཕྱོགས་དང་ རྒྱལ་ས་ ཡེ་རུ་ཤ་ལེམ་ལས་ མི་ག་ར་ཁོ་སྡོད་སར་ཆོས་ཉན་པ་སོང་ནུག་ དེ་ཚུ་གིས་ཁོང་རང་གི་སྡིག་པའི་མཐོལ་བཤགས་ཕུལ་ཏེ་ གཙང་ཆུ་ ཡཱོར་དཱན་གྱི་ནང་ལུ་ཁོ་ལས་ཁྲུས་གསོལ་ཞུ་ནུག 6ཡོ་ཧ་ནཱན་འདི་ རྔ་མོང་གི་བལ་གྱིས་འཐག་འཐག་པའི་བགོ་ལ་གྱོན་ ཀོའི་ཐག་ལེབ་བཅིངས་ཏེ་སྡོད་ནུག་ དེ་ལས་བཞེས་སྒོ་ཡང་ སྤྱིའུ་ལྟགཔ་དང་ནགས་ཚལ་ནང་གི་སྦྱང་ཟ་སྟེ་སྡོད་ནུག 7ཁོ་གིས་ཆོས་དེ་སྦེ་བཤད་ནུག་ ངེ་གི་ཤུལ་ལས་འབྱོན་ནི་འབད་མི་འདི་ ང་ལས་ཡང་དབང་ཤུགས་ཅན་གཅིག་ཨིན་ ང་གིས་མར་གུག་སྟེ་ ཁོ་གི་ལྷམ་སྒྲོག་འཁྱོལ་མི་གཅིག་གི་འོས་འབབ་ཡང་མེད། 8ང་གིས་ཁྱེད་ལུ་ཆུའི་ཁྲུས་གསོལ་བྱིནམ་ཨིན་ དེ་འབདཝ་ད་ ཁོ་གིས་ཁྱེད་ལུ་དམ་པའི་ཐུགས་ཉིད་ཀྱི་ཁྲུས་གསོལ་གནང་འོང་།།

ཡེ་ཤུ་ལུ་བདུད་ཀྱིས་བར་ཆད་རྐྱབ་པའི་སྐོར།

9དེའི་ཚེ་ ག་ལི་ལི་ལུང་ཕྱོགས་ཀྱི་ཁྲོམ་ ན་ཟ་རཱེད་ལས་ ཡེ་ཤུ་བྱོན་ཏེ་ གཙང་ཆུ་ ཡཱོར་དཱན་ནང་ལུ་ ཡོ་ཧ་ནཱན་ལས་ཁྲུས་གསོལ་བཞེས་ནུག 10དེ་ལས་ཁོ་ཆུའི་ནང་ལས་ཡར་བཞེངསམ་ཅིག་ ཡར་གནམ་ཁ་ཕྱེ་སྟེ་ དམ་པའི་ཐུགས་ཉིད་འདི་བྱ་ཐི་ལི་རྒྱལམོ་བཟུམ་སྦེ་ ཁོ་གི་གུ་ཆགས་ས་ཁོ་རང་གིས་གཟིགས་ནུག 11དེ་ལས་ཡར་གནམ་ཁ་ལས་ གསུང་སྐད་གཅིག་གིས་དེ་སྦེ་གསུངས་ནུག་ ཁྱོད་ངེ་གི་བུ་གཅེས་ཤོས་ཕངས་ཤོས་གཅིག་ཨིན་ ཁྱོད་ལུ་བལྟ་སྟེ་ ང་གནམ་མེད་ས་མེད་སེམས་དགའ་ཡི་ཟེར་གསུངས་ནུག 12དེ་འཕྲོ་ལས་དམ་པའི་ཐུགས་ཉིད་ཀྱིས་རྒྱུད་བསྐུལ་བརྐྱབས་ཏེ་ ཁོ་རི་སྟོང་ནང་འཁྱིད་བྱོན་ཞིནམ་ད། 13རི་སྟོང་ནང་ཉིན་ཞག་བཞི་བཅུ་ཚུན་ཚོད་ བདུད་ སེ་ཏཱན་གྱིས་ ཁོ་ལུ་ཐུགས་ཚོད་བལྟ་ནུག་ ཁོ་གཅན་གཟན་ཚུ་དང་གཅིག་ཁར་བཞུགས་ནུག་ དེ་ལས་ཕོ་ཉ་ཚུ་གིས་ཡང་ཁོ་གི་ཕྱག་ཞུ་ནུག།

ཡེ་ཤུ་གིས་སློབ་མ་དང་པ་འབོ་པའི་སྐོར།

14ཡོ་ཧ་ནཱན་བཙོན་ནང་བཙུགས་ཚར་བའི་ཤུལ་ལས་ ཡེ་ཤུ་ ག་ལི་ལི་གི་ལུང་ཕྱོགས་ལུ་བྱོན་ཏེ་ དཀོན་མཆོག་གི་གཏམ་བཟང་གསུངས་ནུག 15ད་དུས་ཚོད་རནམ་ལས་ དཀོན་མཆོག་གི་རྒྱལ་སྲིད་འདི་ནཱ་སྦོ་ལོགས་ཁར་ལྷོད་ཅི་ སྡིག་པ་སྤང་ སེམས་འགྱུར་ཏེ་ གཏམ་བཟང་ལུ་དད་པ་བསྐྱེད་ཟེར་ ཡེ་ཤུ་གིས་གསུངས་ནུག 16ཡེ་ཤུ་ ག་ལི་ལི་གི་མཚོའི་མཐའམ་བདའ་འབྱོནམ་ད་ ཉ་རོགསཔ་ སི་མཱོན་ཟེར་མི་དང་ཁོ་གི་ནུ་གཅུང་ ཨཱན་དྲུ་མཚོ་ནང་ལུ་དྲྭཝ་རྐྱབ་སྡོད་ས་གཟིགས་ཏེ། 17ཡེ་ཤུ་གིས་ཁོང་གཉིས་ལུ་ ང་དང་མཉམ་གཅིག་ཤོག་ ང་གིས་ཁྱེད་ལུ་མི་བཟུང་ནི་སྟོན་བྱིན་འོང་ཟེར་གསུངསམ་ད།#༡:༡༧། འདི་གི་དོན་དག་ངོ་མ་དེ་ ཉ་རོགསཔ་གིས་ཉ་བཟུང་དོཝ་བཟུམ་སྦེ་ ཁོང་སློབ་མ་ཚུ་གིས་མི་ཚུ་ལུ་དཀོན་མཆོག་གི་ཁ་ཐུག་ལུ་སེམས་འགྱུར་ཏེ་འཁྱིད་འོང་ནིའི་ཆོས་ ག་དེ་སྦེ་སྟོན་དགོ་ག་ འདི་གི་སྐོར་ལས་གསུངསམ་ཨིན་མས། 18ཁོང་གཉིས་ཀྱིས་དེ་འཕྲོ་ལས་རང་ དྲྭཝ་དེ་ཚུ་བཀོག་བཞག་སྦེ་ ཡེ་ཤུ་གི་སློབ་མ་སྦེ་སོང་ནུག 19དེ་ལས་ཨ་ཙི་ཕར་འབྱོནམ་ད་ ཡེ་ཤུ་གིས་ ཟེ་བེ་དི་གི་བུ་ ཡ་ཀོབ་དང་ ཁོ་གི་ནུ་གཅུང་ ཡོ་ཧ་ནཱན་གཉིས་གྲུ་གི་ནང་ན་ དྲྭཝ་གྲ་སྒྲིག་རྐྱབ་སྡོད་ས་གཟིགསཔ་ད། 20ཡེ་ཤུ་གིས་དེ་འཕྲོ་ལས་ཁོང་ཆ་ཁྱབ་ལུ་ཤོག་ཟེར་གསུངས་ནུག་ དེ་ལས་ཁོང་གཉིས་ཀྱིས་ཡང་ ཨ་པ་ ཟེ་བེ་དི་ ལས་མི་ཚུ་དང་གཅིག་ཁར་གྲུ་ནང་བཞག་སྦེ་ ཁོང་རང་ཡེ་ཤུ་གི་སློབ་མ་སྦེ་སོང་ནུག།

ཡེ་ཤུ་གིས་འདྲེ་གདོན་བཏོན་བདའ་བའི་སྐོར།

21ཡེ་ཤུ་དང་ཁོ་རང་གི་སློབ་མ་ཚུ་ ཁྲོམ་ ཀ་ཕཱར་ནུམ་ལུ་བྱོན་ཏེ་ ཤུལ་མ་གི་ངལ་འཚོ་བའི་ཉིནམ་ལུ་ ཡེ་ཤུ་ཚོགས་ཁང་ནང་བྱོན་ཏེ་ཆོས་སྟོནམ་ད། 22ཁོ་གིས་གསུངས་མི་ཆོས་འདི་ བཀའ་ཁྲིམས་ཀྱི་སློབ་དཔོན་དེ་ཚུ་བཟུམ་སྦེ་མེན་པར་ དབང་ཚད་ཅན་སྦེ་ ཆོས་སྟོན་གནང་སྟེ་ མི་ག་ར་ཧ་ལས་ནུག 23འདི་བསྒང་ སི་ན་གོག་དེ་ནང་ལུ་ འདྲེ་འཛུལ་མིའི་མི་གཅིག་འོངས་ཏེ། 24ཁོ་གིས་སྐད་བརྐྱབས་ཏེ་སླབ་ཅི་ ན་ཟ་རཱེད་ཀྱི་ཡེ་ཤུ་ ནཱ་ང་བཅས་ལས་ག་ཅི་དགོ་ནི་སྨོ་ ང་བཅས་ལུ་རྩ་མེད་གཏང་པ་བྱོནམ་ཨིན་ན་ ནཱ་ག་ཨིན་ན་ང་གིས་ཤེས་ ནཱ་དཀོན་མཆོག་ལས་བྱོན་མིའི་ དམ་པ་གཅིག་ཨིན་ཟེར་ཞུ་ནུག 25དེ་འབདཝ་ད་ ཡེ་ཤུ་གིས་འདྲེ་གདོན་འདི་ལུ་ བཀའ་བཀྱོན་གནང་སྟེ་ ཁ་བཙུམ་སྦེ་ཁོ་གི་ནང་ལས་ཐོན་སོང་ཟེར་གསུངསམ་ད། 26འདྲེ་འཛུལ་མི་དེ་གཟའ་ཕོགཔ་བཟུམ་སྦེ་མར་འགྱེལ་ཏེ་ གནམ་མེད་ས་མེད་སྐད་སྦོམ་བརྐྱབས་ཏེ་ འདྲེ་གདོན་འདི་ཐོན་སོང་ནུག 27འདི་ནང་མཐོང་མིའི་མི་ཚུ་ག་ར་ཧ་ལས་ཏེ་ ཁོང་རང་གི་སྦུག་ལུ་གཅིག་གིས་གཅིག་ལུ་དྲིས་ནུག་ འདི་ག་དེ་སྦེ་ཨིན་ན་ སྟོན་ཐངས་གསརཔ་གཅིག་ཨིན་མས་ ཁོ་དང་གཅིག་ཁར་དབང་ཚད་ཡོདཔ་མ་ཚད་ ཁོ་གིས་བཀའ་གནངམ་ད་ འདྲེ་གདོན་དེ་ཚུ་གིས་ཡང་ ཁོ་གི་བཀའ་ལུ་ཉན་བཏུབ་པས་ཟེར་སླབ་ནུག 28དེ་ལས་ཡེ་ཤུ་གི་གཏམ་སྙན་བསྒྲགས་དེ་ ག་ལི་ལི་ལུང་ཕྱོགས་ག་ར་ནང་ཁྱབ་སོང་ནུག།

ཡེ་ཤུ་གིས་འདྲེ་གདོན་འཛུལ་ཏེ་ན་མི་དང་ནདཔ་ལེ་ཤ་ལུ་དྲགཔ་མཛད་པའི་སྐོར།

29དེ་ལས་ཡེ་ཤུ་དང་ཁོ་རང་གི་སློབ་མ་ཚུ་ སི་ན་གོག་ནང་ལས་ཐོན་བྱོན་ཏེ་ ཡ་ཀོབ་དང་ ཡོ་ཧ་ནཱན་གཉིས་དང་གཅིག་ཁར་ སི་མཱོན་དང་ ཨཱན་དྲུ་གི་ཁྱིམ་ནང་བྱོན་ནུག 30འདིའི་སྐབས་ལུ་ སི་མཱོན་གྱི་སྒྱུགམོ་འདི་ དྲོད་འབར་རྐྱབ་ན་སྟེ་ མོ་གི་སྐོར་ལས་ཁོང་གིས་ཡེ་ཤུ་ལུ་ཞུཝ་ད། 31ཁོ་མོ་གི་སྦོ་ལོགས་ཁར་བྱོན་སྦེ་ ལག་པའི་གུ་བཤེད་དེ་ཡར་ལྷོངམ་ད་ དེ་འཕྲོ་ལས་དྲོད་འབར་སངས་ཏེ་ མོ་གིས་ཡེ་ཤུ་གི་ཕྱག་ཞུ་ནུག 32དེ་ལས་ནམ་སྲོ་པའི་བསྒང་ལས་ མི་ཚུ་གིས་མི་ནདཔ་དེ་ཚུ་དང་ འདྲེ་གདོན་འཛུལ་མི་ག་ར་ ཡེ་ཤུ་གི་སྐུ་མདུན་ལུ་འཁྱིད་བཀལ་ཏེ། 33ཁྲོམ་གྱི་མི་ག་ར་སྒོ་གི་རྩ་བར་སྤུངས་ནུག 34ནད་མ་གཅིགཔ་ན་སྡོད་མིའི་ལེ་ཤ་ ཡེ་ཤུ་གིས་དྲགཔ་མཛདཔ་མ་ཚད་ འདྲེ་གདོན་འཛུལ་མི་ལེ་ཤ་གི་ནང་ལས་ འདྲེ་གདོན་བཏོན་བདའ་ནུག་ འདྲེ་གདོན་དེ་ཚུ་གིས་ ཁོ་ག་ཨིན་ན་ངོ་ཤེས་ནུག་ དེ་འབདཝ་ད་ ཁོ་གིས་ཁོང་ལུ་ག་ནི་ཡང་སླབ་མ་སྟེར་བས།།

ཡེ་ཤུ་ ག་ལི་ལི་གི་ སི་ན་གོག་ནང་ཆོས་སྟོན་གནང་བའི་སྐོར།

35འདི་གི་ནངས་པ་དྲོ་པ་ ཡེ་ཤུ་གནམ་མ་ནངསམ་ལས་ཡར་བཞེངས་ཏེ་ ཕྱི་ཁར་རི་ཙག་ས་གཅིག་ཁར་བྱོན་ཏེ་ སྨོན་ལམ་བཏབ་སྟེ་བཞུགས་ནུག

36སི་མཱོན་དང་ཁོ་དང་མཉམ་གཅིག་ཡོད་མི་ཚུ་གིས་ ཁོ་ལུ་འཚོལ་བ་སོང་སྟེ། 37ཁོ་དང་མཇལཝ་ད་ཁོང་གིས་ མི་ག་ར་གིས་ནཱ་ལུ་འཚོལ་དོ་ཟེར་ཞུ་ནུག 38ཁོང་ལུ་ ང་བཅས་ནཱ་སྦོ་ལོགས་ཁར་ཡོད་མིའི་ཁྲོམ་དེ་ཚུ་ནང་ཡང་འགྱོ་གེ་ ཁྲོམ་དེ་ནང་ཡང་ང་ཆོས་བཤད་དགོ་ ག་ཅི་སྨོ་ཟེར་བ་ཅིན་ ང་དེ་གི་དོན་ལུ་འོང་ཡི་ཟེར་གསུངས་ནུག 39དེ་ལས་ཁོ་ ག་ལི་ལི་གི་ སི་ན་གོག་ག་ར་ནང་ཆོས་གསུངས་སྦེ་ འདྲེ་ཚུ་བཏོན་བདའ་སྟེ་བྱོན་ནུག།

ཡེ་ཤུ་གིས་མི་གཅིག་ལུ་དྲགཔ་མཛད་པའི་སྐོར།

40མཛེ་ནད་ན་མི་གཅིག་འོང་སྦེ་ ཡེ་ཤུ་ལུ་ཕྱག་འཚལ་ཏེ་ ནཱ་གི་ཐུགས་དགོངས་ཡོད་པ་ཅིན་ ང་ལུ་དྲགཔ་མཛད་གནང་ཚུགས་ཟེར་གསོལཝ་བཏབ་ད། 41ཡེ་ཤུ་གིས་མི་དེ་ལུ་སྙིང་རྗེ་གཟིགས་ཏེ་ ཕྱག་ཕར་ཁོ་གི་གུ་བཀལ་ཏེ་ ང་གིས་ཁྱོད་དྲགཔ་བཟོ་ནི་ཨིན་ དྲག་ཤིག་ཟེར་གསུངསམ་ད། 42དེ་འཕྲོ་ལས་ཁོ་གི་མཛེ་ནད་དེ་དྲག་སོང་ནུག 43-44དེ་ལས་ཡེ་ཤུ་གིས་ཁོ་ལུ་བཀའ་དམ་དམ་སྦེ་གནང་སྟེ་ ནཱ་བལྟ་ཞིག་ ཁྱོད་ཀྱིས་ཨ་ནི་ལོ་རྒྱུས་འདི་ག་ལུ་ཡང་མ་སླབ་ དེ་འབདཝ་ད་ བླམ་འབད་སར་འགྱོ་ཞིནམ་ད་ རང་གི་གཟུགས་འདི་ཁོ་ལུ་བཏོན་ དེ་ལས་ཁྱོད་དྲག་ཅི་ཟེར་ འཛོམ་དཔང་འབད་ནིའི་དོན་ལུ་ མོ་སཱེས་ཀྱི་བཀའ་ཁྲིམས་དང་བསྟུན་ཏེ་ མཆོད་པ་ཕུལ་ཞིག་ཟེར་ ཁོ་ལུ་གསུངས་ཏེ་བཏང་ནུག 45དེ་འབདཝ་ད་ མི་འདི་སོང་སྟེ་ ཁོ་ལུ་ག་བྱུང་མིའི་གནས་ཚུལ་དེ་གི་སྐོར་ལས་ ག་ར་ལུ་ཁྱབ་བསྒྲགས་བཏང་ནུག་ དེ་གིས་འབད་ཡེ་ཤུ་ཁྲོམ་ཁར་ལུ་ རོགས་ཀྱི་མཐོང་སར་བྱོན་མ་ཚུགས་པར་ རི་ཙག་ས་ལུ་བཞུགས་ནུག་ ཨིན་རུང་ ཕྱོགས་བཞི་ལས་མི་དེ་ཚུ་ཁོ་གི་སྐུ་མདུན་ལུ་བཅར་ནུག།

Currently Selected:

མཱར་ཀུ་ལེའུ་ 1: dzoD

Highlight

Copy