Matiye 6
6
Ɗəw kun ne karə dəw
Lug 11.2-4
1Jeju təl pa ja cibi, ꞌngomje rɔ-si dɔ neɗa gə gadə-gadə gə ꞌɗaje mba kəm dəwje, mba kar d-o ne si ja baa, be nama Bɔ-sijee gə isi dara le a kuga dɔ ji-si ang baa.
2Lo gə un ne ar dəw ɗaa, uru ꞌkuwi dɔ-ɛ gə ang, to gə njetar mulaje d-aw ɗa mə kəy nendoje gə lə Jiibije, gə dan ɗəw booje gə, mba kar d-ɔsə ne gaji-je. Tar gə tɔgərɔ ja m-ula-si to gə d-inga kug-ɛ nam ngaa. 3Ngaa logə un ne ar dəw, nama ar ji gəl-i gərə ne gə ji kɔl-i ɗa ang. 4Be ɓa Luba gə o ne gə ar lokiya gə le a kuga dɔ ji-i.
5Logə aw dəji-je Luba nama, əwje rɔ-si ɗaje to gə njetar mulaje be, mba ꞌjeje le ꞌnjigi kar taar mə kəy nendo gə lə Jiibije, gə kar taar mbɔr ɗəw boo ɓa dəji Luba mba tɔji ne rɔ-je kəm dəwje gə. M-pa tar gə tɔgərɔ ja m-ar-si to gə d-inga kuga lə-je nam ngaa. 6Ngaa ꞌi le logə a kaw dəji Luba nama, andə kəy lə-i, kudu ta ɗəw ta-i gə bugum, ngaɓa dəji bɔ-ije Luba lokiya gə, ɗaa bɔ-ije gə to nje ko neje lokiya gə le a kuga dɔ ji-i.
7Logə aw dəji-je Luba nama, tura-je tar baa rad-rad to gə dəwje gə ꞌgərə Luba ang, gə d-əji mə-je gə to gə tar gə pa ya̰ ɓa Luba a ko ne dəji lə-je be. 8ꞌNdəjije kəm-je ang, mba Bɔ-sijee Luba gərə ne gə sisəy awje ndoo-e le kede nam ɓa ꞌdəj-eje ɓi. 9Oje pa dəji Luba gə a dəji-je le ɓa nee:
Bɔ-sijee gə isi mə dara gə,
May kar ri-i to ɓədə gə losang-ɛ;
10May kar ɗe o̰ ɓe dɔ si gə
Kar dəwje gə dɔ nangə nee ꞌɗa mə njigi lə-i to gə ꞌɗa ne dara be.
11Ar-si nekusa ta-si gə ɓogəne,
12Kɔgərɔ ja ɔr tar neɗa gə kṵra̰y dɔ si gə, to gə sijee kara j-ɔr tar-ɛ dɔ nje gə ɗa gə sijee kṵra̰y be tɔ.
13ꞌTa-si ji Njekṵra̰y gə, ɓo iya̰ si ar j-oso dan nekərə gə ang.
Mba ꞌi ja ɓa ɓeko̰, gə singamongə gə rɔnduba,
To kar-i gə ɓal-ɓal, saar gə no. Oyo!
14To gə ɓo ɔrəje tar kal tar lə dəwje dɔ-je gə nama, Bɔ-sijee gə isi dara kara a kɔr tar kal tar dɔ sisəy gə tɔ. 15Ngaa to gə ɓo ꞌmbadə-je kɔrəje tar kal tar dɔ dəwje gə nama Luba kara a mbadə kɔr tar kal tar dɔ sisəy gə tɔ.
16Logə ꞌtɔlje mə-si ɓo ɗaa, ꞌɗaje kəm-si to ndoo ang, to gə njetar mulaje gə ɗa kəm-je to ndoo ɓa gə mba tɔji ne dəwje to gə ꞌtɔl mə-je ɓo. Tɔgərɔ ja, m-pa m-ar-si to gə d-inga nekuga dɔ ji-je nam. 17Ngaa ꞌi le, logə ꞌtɔl mə-i ɓo ɗaa, ꞌndəm ubu gə əndə ngaɓa togo kəm-i, 18mba kar dəwje ꞌgərə to gə ꞌtɔl mə-i ɓo ang, ngaa mba Bɔ-ije gə isi lokiya gə, be ɓa Bɔ-ije Luba gə o-i lokiya gə le, a kuga dɔ ji-i.
Ɓər nekinga
Lug 12.33-34
19ꞌƁərəje nekingaje lə-si umje dɔ nangə nee ang, na to lo gə sɔlɔlɔje gə ɔgəɓar d-aw tuji neje kəne nəm ɓa nje ɓogoje kara d-aw cɛdə ta kəyje d-aw ɓogo nəm tɔ, 20be ɓa may kar-si ꞌɓərəje nekingaje lə-si umje dara, lo gə sɔlɔlɔ ose ɓɔgəɓar a tuji ne kəne ang, ngaɓa nje ɓogoje kara d-a kasə cɛdə ta kəyje kəne ang nəm tɔ. 21Mba lo gə nekinga lə-i to kəne ja ɓa, mə-i a to kəne.
22Kəm dəw to lambe lə darɔ-ɛ. To gə ɓo kəm-i to gə maj-ɛ nama darɔ-i a nja dan lokarə gə tɔ. 23Ngaa ɓo kəm-i ja tuji nam ɗaa darɔ-i tɔ̰y a kisi dan cil ciməri gə. To gə ɓo lambe gə to rɔ-i ja təl cil ciməri nama, ꞌi a kisi dan cil ciməri gə gə al dɔ lo!
Ɗa kula kar Luba ja kara baa
Lug 16.13
24Dəw gə gə kar-ɛ baa ja ꞌɓəə-eje d-a kḭ joo ang, mba n-a njigi dəw gə kara ang gə kɔrɔ ɗaa, dəw gə kara ɓa n-a njigi-e ose n-a kiyi rɔ-ɛ rɔ dəw gə kara gə ɗaa n-a dabə dəw gə kara dasəra. Sisəy a poloje Luba je gə lar joo kɛm ang.
25Gəl-e gə ne ɓa m-pa m-ar-si na: ꞌNoje rɔ-si mba kisi kəm baa ɔji dɔ nekusa ta-si ang nəm ɓa, mba kubuje gə a kulaje rɔ-si gə ang tɔ. Kaw kəm baa nday nekusa nəm, darɔ dəw kara nday kubu nəm tɔ. 26Oje əlje gə d-aw d-ḭ gə bagəje taar ngaa ꞌdubu ne ang nəm, d-unja ne ang nəm, ngaɓa dam lə-je kara godo nəm ja, ngaa Bɔ-sijee gə dara ar-je ne d-usa. Sisəy ꞌmayje undaje əlje ang wa? 27Na ɓa horo-si əng asə no rɔ-ɛ kar ndɔ-ɛ oso dɔ mar-ɛ gə njɛ̰ be wa? 28Ngaa se mba ɗi ɓa ꞌnoje rɔ-si mba kubu kula-si wa? Aje lo oje pudu kiro gə aw uba mə ndɔɔ gə: ꞌƊa kula ang nəm, d-uji kubu ang nəm; 29ngaa m-a pa kar-si to gə Salomo gə riɓar lə-a tɔ̰y ja kara ula kubu to gə ꞌjee be ang. 30To gə ɓo mu gə to ne gə ce mə ndɔɔ gə ɓogəne baa ngaɓa bara nama a pər a ko̰ ɓa ɓo Luba ula-a kubu le se, Luba asə kula sisəy kubu ang wa? Njeməkəngəje! 31ꞌNoje rɔ-si ang ngaɓa ꞌpaje na: Ɗi ɓa ja kusa wa? Ose j-a kinga man ɗa ɓa ja kay wa? Ose ɗi ɓa ja kula kar-si gə wa? 32Mba neje gə to gə be le, dəwje gə ꞌgərə Luba ang ɓa ꞌsangə. Ngaa Bɔ-sijee gə dara gərə neje gə aw-je ndoo-e. 33ꞌSangəje ɓeko̰ lə Luba gə gadə-gadə ja dɔngɔr ɗaa neje gə sisəy aw-je ndoo-e nee le, Luba a kar-si dɔ-ɛ gə. 34ꞌNoje rɔ-si mba ndɔ gə bara ang mba ndɔ gə bara to gə lo-e dang ja tɔ. Ngaɓa kɔr gə ɓogəne asə kəm ndɔ gə ɓogəne ja tɔ.
Currently Selected:
Matiye 6: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved