Lugu 4

ꞌSɛ̰ngərɛ̰ na Jeju

Mat 4.1-11; Mrk 1.12-13

1 Njil Njerɔsangə ɗusu mə Jeju tubu, logə Jeju ce mə babo Jurədɛ̰ gə, cibi Njil lə Luba le ɔr no-ɛ aw sə-a ndag lo gə. 2ꞌSɛ̰ngərɛ̰ ɗe n-ɛ ndɔ dɔg sɔɔ. Ngaɓa n-usa ne dɔ kar-ɛ gə əng ang, ɗaa ɓo ɔr-ɛ. 3Be ɓa ꞌSɛ̰ngərɛ̰ pa ar-ɛ na: To gə ɓo ꞌto ngon lə Luba nama ꞌpa ar kɔr ər nee le təl mbə ar-i usa. 4Jeju ila kəne na: ꞌƊa mə mbede gə na: Dəw a kaw kəm baa mba mbə ja baa ang.

5ꞌSɛ̰ngərɛ̰ ɔr-ɛ aw sə-a dɔ ər gə ndə̰w̰ ya̰ gə ɗaa, kəm naa gə nee ja tɔj-ɛ ɓeko̰je tɔ̰y gə dɔ nangə nee. 6Ɗaa n-pa n-ar-ɛ na: M-a kar-i singa ko̰ dɔ ɓeko̰je ne tɔ̰y ngaɓa gə riɓar lə-je tɔ, mba d-iya̰ mə ji-m gə, dəw gə mə-m njigi ja nama m-ar-ɛ. 7To gə ɓo ꞌpolo-m nama neje tɔ̰y ja a to kar-i. 8Jeju ila-a kəne na: ꞌƊa mbede gə na: ꞌI a polo Mbayɓe Luba lə-i, ꞌne ja gə kar-ɛ baa.

9Cibi ꞌSɛ̰ngərɛ̰ ɔr no-ɛ aw sə-a mə ɓe gə Jerujalɛm, dɔ sam kəy gə lə Luba ngaɓa pa ar-ɛ na: To gə ɓo ꞌto Ngon lə Luba nama ḭ taar ꞌce oso nangə, mba ꞌɗa mbede gə na:

10 Luba a kun ndu kar anjije lə-a

mba kar-je ꞌngom-i,

11Ngaɓa

anjije le d-a kunda ji-je ta-i ne.

Mba kar gɔl-i dar ər ang.

12Jeju ila-a kəne na: ꞌPa na: ꞌI a na Mbayɓe Luba lə-i ang.

13Logə ꞌSɛ̰ngərɛ̰ na gə Jeju pḭ ɗaa, ḭya̰-a ɔdə aw lo lə-a saar ndɔ gə ɗangə.

KUN KUDU KULA LƏ JEJU DƆ NANGƏ GƏ GALILE

Jeju ila mbərə mə ɓe gə Najarɛd

14Jeju təl aw gugu dɔ nangə gə Galile gə singamongə lə Njil. Ri-a ɓar ula lo wur-wur dɔ nangə gə nee le tɔ̰y. 15Cibi, n-tɔji ne mə kəy nendoje gə, ngaɓa dəwje tɔ̰y d-ila riɓar dɔ-ɛ gə.

16Jeju ɗe mə ɓe gə Najarɛd, logə n-tɔgə kəne, gə go nejiɓe ɗaa n-andə mə kəy nendo gə gə ndɔ kuwa kɔr, n-ḭ taar mba tura mbede, 17ɗaa d-ula mbede lə pajambərə Ejay ji-a gə; logə n-tudu mbede le ɗaa, n-ila kəm-e dɔ bar-ɛ gə ꞌɗa na:

18 Njil lə Mbayɓe isi dɔ-m gə,

Mba n-um ubu dɔ-m gə.

Mba kar m-aji nje gə ɓəngərə-je ti mbidi

Mba kar m-ila mbərə Tar gə May m-ar njendooje.

D-ula-m mba kar m-ta nje gə d-ula kəm-je ndoo m-um-je taar,

Nje kəm tɔje kar d-a ko lo,

Nje gə d-ula kəmje ndoo kar d-inga dɔ to ləl pɛ.

19 Mba kar m-ila mbərə mənuji lə Mbayɓe. # 4.19 Eja 61.1-2

20Logə Jeju kə mbede le, iya̰ ar njengom-ɛ, ɗaa kəm dəwje tɔ̰y gə d-isi mə kəy nendo gə le to gə dɔ-ɛ gə.

21Be ɓa, n-pa n-ar-je na: Tar gə mə mbede nee gə oje gə mbi-si nee le, ɓogəne ja aw lo-e gə yɛrɛrɛ ngaa. 22Dəwje tɔ̰y ꞌpa tar naji lə-a ngaɓa lo tar igi-je sɛl ɔji dɔ tar mənuji gə ce t-ɛ gə. Ɗaa, ꞌpa na: Dəw nee le, se n-to ngon lə Jəjəb ang ja wa? 23Jeju pa ar-je na: Gə kən ɗaa, a paje gusutar gə nee: Dɔgətoro, aji rɔ-i ꞌi ja. Neje tɔ̰y gə ꞌɗa mə ɓe gə Kapɛrənom gə j-o tar-ɛ le, ꞌɗa ɗəw kara baa mə ɓe kuji-i gə nee tɔ. 24N-təl pa n-ar-je ja cibi na: M-pa tar gə tɔgərɔ m-ar-si, pajambərə le, d-ila kuji dɔ-ɛ gə mə ɓe kuj-e gə ang. 25Tɔgərɔ, m-pa m-ar-si, dɔ ndɔ gə lə Eli, logə man nji oso nangə ang ɓal munda gə nay misa̰, ngaɓa ɓo bo oso gə dɔ nangə tɔ̰y le, jene ndubaje ꞌbula ya̰ dɔ nangə gə Ijirayɛl ja, 26ngaa Luba ula Eli ɓə lə jene ndubaje gə nee le kara ang, ɗaa n-ula-a ɓə lə jene nduba gə mə ɓe gə Sarepəta dɔ nangə gə Sido̰. 27Njebənjije kara ꞌbula ya̰ dɔ nangə gə Ijirayɛl, dɔ ndɔ gə lə pajambərə Elijee; ngaa njebənji kara baa ja kara rɔ-ɛ arə ngadə ang, ɗaa Naama, dəw gə Siri gə to njebənji ja gə kar-ɛ baa rɔ-ɛ arə ngadə.

28Logə dəwje gə d-isi mə kəy nendo gə d-o tar nee le ɗaa, ɓəngərə-je ti ndɔyi. 29D-uba nangə d-ḭ ꞌtɔb-ɛ d-aw sə-a ngangə ɓe gə, mə wəəl gə to mbɔr dɔ ər gə, gə ꞌɗa ɓe kəne ɓa gə mba kɔs-ɛ kila-a kəne. 30Ngaa Jeju riya horo-je, ɗaa un ɗəw lə-a aw.

Jeju tɔbə njil gə kṵra̰y mə dəw gə

31Jeju aw Kapɛrənom, ɓe gə dɔ nangə gə Galile, ɗaa n-tɔji dəwje tar lə Luba gə ndɔ kuwa kɔr. 32Netɔji lə-a uwa-je gə singa mba tar lə-a le uway ya̰. 33Dəw gə njil gə kṵra̰y uba dɔ-ɛ ga̰ mə kəy nendo gə le tɔ, n-uru ꞌkuwi gə ndu-e gə bɔy na: 34Ee, Jeju Dəw gə Najarɛd, ɗi ɓa ꞋI njigi wa? Se ꞌi ɗe mba tuji-si ngaa wa? M-gər-i, ꞌto Njerɔsangə lə Luba! 35Jeju ḭ sə-a gə tar na: Udu ta-i ɓo ꞌce mə dəw gə nee le. Njil gə kṵra̰y uwa dəw le ila-a nangə, ngaɓa ɔsə lo ce ɗaa ɗa sə-a ne kara ang. 36Lo tar igi dəwje tɔ̰y, ngaɓa ꞌdəji rɔ-je tar na: Tar gə ban ɓa to gə be wa? N-un ndu gə singamongə n-ar njilje gə kṵra̰y ɗaa, ꞌce səmə! 37Be ɓa, ri Jeju ɓar ula lo tɔ̰y dɔ nangə gə nee le.

38Logə Jeju ḭ taar ngaɓa ɔdə mə kəy nendo gə, ɗaa aw kəy lə Simo. Rɔ mum Simo-je ta pər lam-lam, ɗaa ꞌɗa Jeju kɔgərɔ kar o kəmtondoo lə-a. 39Jeju ɗəm yəng gə dɔ-ɛ gə ɗaa, n-ndangə rɔ-ɛ gə ta pər lam-lam le, ɗaa təl kul mbɔ̰y. Lo-e gə nee ja, mum Simo-je le uba nangə ḭ taar ar-je nekusa.

40Logə kar andə sɔlɔgə ɗaa, dəwje d-aw gə njerɔtoje dang-dang rɔ Jeju gə. N-ila ji-a dɔ-je gə kara kara tɔ̰y, n-aji-je tɔ. 41Njilje gə kṵra̰y gə ce mə dəwje gə bula le d-uru ꞌkuwi na: ꞌI to ngon lə Luba. Ngaa Jeju ḭ gə je gə singa, ɗaa un ɗəw ar-je kar ꞌpa tar ang mba ꞌgərə som to gə n-to Kirisi.

42Logə lo ar ɗaa, Jeju ɔsə lo ce mə ɓe gə, aw ndag lo gə. Bula dəwje d-aw sang-ɛ, logə d-inga-a ɗaa, ꞌnjigi kar n-ɔdə n-iya̰-je ang. 43Ngaa Jeju pa ar-je na: To tar lə-m kar m-aw m-ila mbərə Tar gə May lə ɓeko̰ lə Luba m-ar ɓeboje gə kɛm tɔ ɓa, mba ye ja ɓa Luba ula-m mb-ɛ. 44N-ila mbərə mə kəy nendoje gə to dɔ nangə gə Jude.

Currently Selected:

Lugu 4: lap

Highlight

Copy