Lugu 16

Gusutar gə ɔji dɔ dəw gərə ngom ne ang

1Ngaɓa Jeju pa ar ngan njenendoje lə-a ja cibi na: Dəw kara to gə njenekinga gə aw gə ngon njekula kara gə to gə njengom neje lə-a. ꞌPa d-ar-ɛ to gə njengom neje lə-a le tuji nekingaje lə-a le pugudu-pugudu. 2N-ɓar njengom neje lə-a le ɗaa n-pa n-ar-ɛ na: Tar ɗi ɓa m-o dɔ-i gə ne wa? ꞌƊe ꞌpa tar kula lə-i gə ɔji dɔ ngom neje le ar-m m-o ɓa, mba a kasə to njengom ne lə-m ang saar gə dɔbo̰. 3Njengom ne nee le pa gə m-e gə na: ꞌƁəə-mje ɔr kula le ji-m gə, ngaa se ɗi ɓa m-a ɗa wa? Ɗa kula ndɔ kara, singa-m asə ang. Kaw pɛlɛ kara, to rɔ kul lə-m ya̰. 4M-gərə ne gə m-a ɗa mba kar ndɔ gə ꞌɓəə-mje tɔbə-m lo kula ngom neje gə lə-a nama dəwje d-a kuwa-m ne gə rɔ-je gə gə maj-ɛ. 5Be ɓa n-ɓar nje gə ɓangə lə ꞌɓəə-eje to dɔ-je gə kara-kara tɔ̰y. ꞌN-dəji dəw gə dɔngɔr na: Ɓangə lə ꞌɓəə-mje kandə ɓa to dɔ-i gə wa? 6Dəw le ila-a kəne na: Ubu ku tɔl. Njengom neje le pa ar-ɛ na: Mbede gə ꞌɗa kɔr ɓangə lə-i kəne le ɓa nee, ꞌta, ɓo isi nangə gə tɔg-ɛ, ꞌɗa kəne dɔg mi. 7N-pa n-ar dəw gə ɗangə cibi na: ngaa ꞌI, ka-i kandə wa? N-ila kəne na: Waa ɓɔl tɔl. Njengom neje le pa ar-ɛ na: A o, mbede lə-i ɓa nee. ꞌTa ɓo ꞌɗa dɔg gə ji nay joo. 8Ɗaa ꞌɓəə njengom neje gə to njembɔlɛ ne nee le pid-e mba n-unda kəm karə dɔ rɔ-ɛ. To gə be ɓa, dəwje gə dɔ nangə nee d-unda kəm karə dɔ rɔ-je gə ya̰ ɔji dɔ ngan marəje-je d-unda ngan lokarəje.

9Ngaa ꞌma ɗaa, m-pa m-ar-si: Uwaje kura gə dəwje, gə nekingaje gə dɔ buguru mba kar ndɔ gə a godo ji-si gə nama njekuraje lə-si nee le d-a kuwa-si gə rɔ-je gə mə kəy kisije gə a to saar-saar gə no.

10Dəw gə to ngon kuji ɔji dɔ ne gə njɛ̰ gə nama a to ngon kuji ɔji dɔ ne gə bo ja tɔ, a ɓo dəw gə to nje ɗa ne dɔ buguru ɔji dɔ ne gə njɛ̰ ang nama, a to nje ɗa ne dɔ buguru ɔji dɔ ye gə bo ang tɔ. 11Ngaa to gə ɓo ꞌtoje ngon kuji dɔ nekinga gə dɔ buguru gə dɔ nangə nee ang nama naa ɓa a kum nekinga gə tɔgərɔ mə ji-si gə wa? 12Ngaa to gə ɓo ꞌtoje ngon kuji dɔ ne gə to kar dəw gə ɗangə ang le se na ɓa a kar-si nekinga gə ɔji dɔ si wa?

13Ngon njekula kara baa ja ꞌɓəə-ejeje d-a kḭ joo ang, mba n-a njigi dəw gə kara ang gə kɔrɔ ɗaa dəw gə kara ɓa n-a njigi-e, ose n-a kiyi rɔ-ɛ rɔ dəw gə kara gə ɗaa n-a dabə dəw gə kara dasəra. Sisəy a poloje Luba je gə lar joo kɛm ang baa. 14Parijiyɛ̰je gə ꞌnjigi lar ya̰ le, d-o neje ne tɔ̰y ɗaa d-unda Jeju ꞌkogo-e. 15Jeju pa ar-je na: Sisəy ꞌtɔjije neɗa gə gadə-gadə lə-si gə ɗaga kəm dəwje gə baa, ngaa Luba gərə tar gə mə-si gə tɔ̰y: mba ne gə dəwje d-o gə ne gə to ɓəəl ya̰ ta kəm-je gə le to ne gə mina ta kəm Luba gə.

16Un kud-e dɔ torondu gə lə Moyiji gə pajambərəje saar ce ne dɔ kar-ɛ gə lə Ja̰ Njeɗabatɛm gə əng le, Tar gə May gə ɔji dɔ ɓeko̰ lə Luba le d-ila mbər-e, ɗaa dəw gə ɗa-ɗa ja kara unda singa-a dɔ rɔ-ɛ gə mba kandə kəne.

17To kədərə ang baa kar dara gə nangə d-a nday, ta torondu a ti ɓɛdə koso nangə ang.

18Na-na ɓa tɔbə jene lə-a ngaɓa təl ta ye gə ɗangə ɗaa ɓogo lo to. Ngaɓa, dəw gə ta jene gə ngab-ɛje tɔb-ɛ kara ɓogo lo to.

Gusutar gə ɔji dɔ njenekinga je gə Lawjar

Lug 12.15-21; 6.20-21,24-25

19Dəw kara gə njenekinga gə ula kubu gə kasə rog-rog gə kubu gə nda kələw-kələw gə lar-ɛ ya̰ ngaɓa gə ndɔ-ndɔ ja ɗa nekusa unda rad-rad. 20Njendoo kara, ri-a na Lawjar, rɔ-ɛ tila do, to ta kəy gə lə-a. 21M-e njinga mba njaa bum neje gə um nangə gəl yira nekusa gə lə njenekinga mba kusa. Ngaa bisije ɓa ꞌɗe ꞌton do gə rɔ-ɛ gə.

22Logə njendoo le uy ɗaa anjije d-un-e d-aw sə-a mbɔr Abəraham gə. Njenekinga kara uy tɔ ɗaa ꞌdub-e. 23Logə n-aw n-o ꞌməsərə jabaw nu, ngaɓa, n-un kəm-e gə tar ɗaa n-o Abəraham je gə Lawjar gə isi mbɔr Abəraham gə. 24Be ɓa, n-uru ꞌkuwi ɓolong na: Abəraham, bɔy, o kəmtondoo lə-m ɓo ula Lawjar ar-ɛ ula ngaw ji-a man ɗe yom ne ndo̰-m. Mba, m-o ꞌməsərə dan pər gə o̰ bilim-bilim. 25Abəraham pa ar-ɛ na: Ngon-m ar mə-i ole to gə inga rɔləl dɔ ndɔ kisi kəm baa gə lə-i le, Lawjar ɗaa o ꞌməsərə; ngaa ɓogəne ɗaa ꞌi ngaa o ꞌməsərə, a ꞌne n-isi gə rɔləl. 26Cibi ɓa wəəl gə boy kay horo-sijee gə sisəy mba kar nje gə ꞌnjigi kḭ nee kaw dɔ-je gə ɓe lə-sisəy nu nama d-a kasə ang ngaɓa kḭ ɓe lə-sisəy gə nee kara to gə bənəng tɔ.

27Njenekinga pa na: M-ɗa-i kɔgərɔ ja, bɔy, ula Lawjar ar-ɛ aw mə kəy gə lə bɔy; 28mba m-aw gə ngan ko̰-mje mi d-isi kəne əng. Kəm kar n-aw n-pa n-ar-je kede nam ɓa, mba kar ꞌjeje kara, ꞌɗe lo ko ꞌməsərə gə m-ar kəne nee ang. 29Abəraham pa ar-ɛ na: Ngan ko̰-i le torondu lə Moyiji gə mbede gə Pajambərəje ꞌɗa le to ji-je əng ɗaa may kar d-ila kuji kəne. 30Njenekinga təl pa na: Əy Bɔy Abəraham, to gə ɓo dəw ḭ jabaw nee ɓa aw pa ar-je nama d-a turu kəji lə-je. 31Abəraham pa ar-ɛ na: To gə ɓo d-o torondu lə Moyiji ang nəm, gə pajambərəje ang nama, to gə ɓo dəw ḭ jabaw nee ja ɓa aw pa ar-je kara d-a turu kəji lə-je ang.

Currently Selected:

Lugu 16: lap

Highlight

Copy