Markus 9

1Yesuw a gwaɗa a tar asa: «Iye ihər i gweɗe a kurum a nda ndzer: Gà mìsle ŋgiɗ ɗa ika magər kurum aaha kinehe ya ka, ta mete a zukw tsa, say ta ŋget a a *mekwere Mbulum ana a kwere a ya fit dzekwiŋ.»

Yesuw a mbəɗ ba ŋgiɗ pam

Mata 17:1-13; Luka 9:28-36

2I dəba mehinne ndilik a ka, Yesuw a ndzək gà Piyer nda Zakup, nda gà Yuhana. Tə tsəl a gər kwite zùbəl ŋa duwa à gər tar. Ti ndzeha a fata ka, Yesuw a mbəɗ ba ŋgiɗ pam. 3Petek ŋgar a mbəɗ dər herrè tizlzlè, a za dər madə̀và gà dukw ana ika gər ahəɗ, mburma a ŋgeter a herrè ya tserdze. 4I dəba ŋa ya, gà ɓəzla mazazama ŋgat aaha makər ŋa ya, ta fə̀r ikaba ya tsara ka, ta ŋgat a gà Iliya nda Musa ana tar riŋ ta fèfil a nda gà Yesuw a. 5Piyer a ŋgatar kataya ka, a gwaɗa a Yesuw: «Lele Əbay gà, na kwa ɗa i faha ya. Mìi kiriw a kurum a ga makər a faha: ilik biy yak, ilik biy Musa, dite ilik ŋa aaha biy Iliya.» 6A tsiker kataya ka, a sər dukw ana a tsik a ya tsa. Aɗaba gà asiŋ gà mburma aaha nda gà ŋgat ŋa ti zezem a Yesuw a ka, tə dzadzar hinne, metsehe tar a riŋ asa tsa. 7Ta fə̀r ikaba ya ka, magùdwagùdwa a tarra aka gər tar a, tits a le a tar. Tə tsarakara iɗəm mifefile i fataya. Mbulum a gwaɗa a tarra: «Naha ka, Kəla gà mandərkwasla gà ana i waya hinne ya. Dzum zləm a dukw ana a tsik a kurum a ya.» 8Aləka gà mburma ata ta fə̀r ikaba ya ka, wura a riŋ i təv tar asa tsa, say Yesuw ilik.

9I təv ana tar riŋ ti terre a i gər kwite ata ya ka, Yesuw a gwaɗa a tar: «Ka ti tsikwim dukw ana kə̀ ŋgatumar mbakum a, a wura tsidze, haa a pat ana iye, *wur ana a dara i təv Mbulum a, i hitsere a i məməta ya dzekwiŋ.» 10Gà ɓəzla mazazama Yesuw ata ta gəs bazlam ŋgar ata. Ama ka, ta gwaɗaba ika magər tar: «Na a ne mehitsera i məməta ya dze ana, là?» 11I dəba ŋa ya, ta gwaɗar asa: «Aàmala na gà ɓəzla medzeŋge məpala ahəm Mbulum ta gwa, dukw ata a ge a ba kataya ka, say Iliya à mère a dzekwiŋ a?» 12Yesuw a gwaɗa a tar: «Iliya à mère a dzekwiŋ kaɗəŋ. Aɗaba à mère a ka, à lèmbeɗe a à gà dukw ana ti de a ndaka vatwa Mbulum tsiye tserdze.» Yesuw a gwaɗa a tar asa: «Aàmala na mewetse ŋa a riŋ i wakita Mbulum mbaŋa ka, wur ana a dara i təv Mbulum a, à sèwèr a are hinne, dite gà mìsle ŋgiɗ ta ger a matawak hinne asa ya? 13Seyiŋ tsa, iye ihər i gweɗe a kurum ŋa: Iliya ka, aka mbər medera. Ama tàa sèwèrer are hinne, kamala ana gəzləŋ tar a waya ya. Ta ge dər kamala ana gà ɓəzla məma à guma Mbulum ta wetse aba a wakita ya kaɗəŋ.»

Yesuw a mbəl à kəla duwa mahuruvuv a gasawa ŋgat

Mata 17:14-21; Luka 9:37-43

14Aləka ti ndze a təv gà asiŋ gà ɓəzla mazazama Yesuw ŋgiɗ ka, ta ŋgat a gà mburma a riŋ hinne i təv tar. Gà ɓəzla medzeŋge məpala ahəm Mbulum duwa tar riŋ ta mbetsebe a ahəm nda gà ɓəzla mazazama Yesuw ata hinne ika magər tar. 15Gà mburma ata ta ŋgat a Yesuw tsara ka, tə dzar ba a bəɗ lele, ta ŋgayar ba hinne. Ta valaha a təv ŋgar. Tə daha, ta geyer wusa. 16Yesuw a gwaɗa a gà ɓəzla mazazama ŋgat ata: «Ki tsikwim a aàla, nda gà tar dze ya?» 17Wele duwa a riŋ ika magər gà mburma ata a gwaɗaraha: «Iye na i zlakara kəla gà ya, aɗaba mahuruvuv a riŋ a gasawa ŋgat. A dànawar aka bazlam. 18I təv ana aka dza ahər ba ya ka, a dzawuwa à ŋgat a bəɗ, mazlə̀mbats pàrpàrpàr a dawarra i bazlam a, à pèpìɗ a dər zlir, dite ba ŋgar fit a kwiliŋa. I gwaɗa a gà ɓəzla mazazama kər aaha, delewimiŋ ihər a te ka, ti sle tsa.»

19Yesuw a gwaɗa a tar akaba tserdze: «A kurum gà mburma ana kì giswim iye nda gəzləŋ kurum tsiye. Wànà iye dze ana, i gesl a aà metsike a kurum dze ana, hilè, na dite ki giswim a iye ya? I ndze a dze ana, hilè ɓav a, na i təv kurum a? A za dumaha, ka zlwimiŋara kəla ŋa a faha ya kwaŋ.» 20I dəba ŋa ya, gà mburma ata tə daha, tə zlaraha kəla ata. Sitene ata a ŋgat a Yesuw tsara ka, a dzadzar à kəla ata nda magala hinne. Kəla ata a dəɗ dər a bəɗ, a mbaɗa aba ika ahəɗ, mazlə̀mbats pàrpàrpàr a dara ihər i bazlam a. 21Yesuw a gwaɗa a tsir ŋa: «Dukuməŋa aka ndza ihər dze ana, hilè?» Tsir kəla ata a gwaɗar: «Aka ndza ihər ka, daga aà gər kəla ndirkiz a. 22Kəla pat sitene ata a sasar makə̀ɗà ŋgat. A kalawa à ŋgat a akwa nda yam, aka à mimìte dər. Aɗaba na kà sle aà mege duwa ka, zlak mər te. Mì ndzek are tsehe te tsiye?» 23Yesuw a gwaɗar aaka: «Aàmala na kù gwa ka, kà sle aà mege duwa ka, zlak mər te ya? Ama dukw tserdze ka, mawùràba ŋa tsa, na kər riŋ kàa gəs iye nda gəzləŋ yak a.» 24Tsir kəla ata a ndə̀var kuɗa ŋgar, a gwaɗar tsara: «A sèsiŋ magəsa kər te ibam, aɗaba i sle aà magəsa kər nda ndzəɗa gà tsa, zlak iye te.»

25Yesuw a fə̀r ka, gà mburma a riŋ ihər ti dehe a a təv tar, tì sìkèhihe a hinne. A kwara akaba sitene ata nda magala hinne, a gwaɗar: «Sitene, kər ana kà sle mehìndìkè aka bazlam nda zləm a mburma ya. Iye ihər i kwere a kər: Dara i ba kəla aaha ya tsəma kinehe, ka da. Kà ləm ahər asa tsidze.» 26Sitene ata a tsaraka kataya tsara ka, a dza ba aà Mewideye. A dzadzar à kəla ata nda magala hinne asa, dite a dara i ba ŋgar a, a daba. Kəla ata a wiye ba nday miɓìrìzle. Gà mburma ata i fataya ka, ta gwa: «Aka mət.» 27Ama Yesuw a daha, a gəs ŋgat i ahər a, a hitse dər aà mbulum.

28Aləka gà Yesuw nda gà ɓəzla mazazama ŋgat aaha ta mah ba, tə da a ma. I təv ana ti ndze a ma à gər tar a ka, ta gwaɗa a Yesuw: «Aɗaba la na mər ka, mì sle aà madalawa gà sitene à kəla ata ya te tsiye?» 29Yesuw a gwaɗa a tar aaka: «Say na ki hemwim a a Mbulum a dzekwiŋ, na dite ki slwim a aà madalawa magwàlà gà sitene ata ya.»

Yesuw a ɗif à məməta ŋgar ana a ta mbilere a i biye ya,

masula ŋa

Mata 17:22-23; Luka 9:43-45

30Aləka i dəba ŋa ya, gà Yesuw nda gà ɓəzla mazazama ŋgat, ta hitse i fataya, tə da ndaka ahəɗ Galile. A sàs a Yesuw ka, gà mburma tə sər ahər a riŋ i fata, ŋgat ana, i ŋga tsa. 31Aɗaba a tsikewa bazlam a gà ɓəzla mazazama ŋgat ata ka, dukw ana a ta ger a ba gər aka miɗ mba ya. A gwaɗawa a tar ka: «Iye, *wur ana a dara i təv Mbulum a ka, ta gis iye mba. Ta vile a iye a ahər a gà mburma, dite ta kiɗ a iye. Ama i huɗ mehinne makər a ka, i ta hitsere a i məməta ya a mesife asa.» 32Ama gà ɓəzla mazazama ŋgat ata, tə tsaraka dzəba bazlam ata kataya ya tsa, magəɗa a ge a tar aà mewize ahər hinne asa.

Meme na mene batsah ŋa ika miɗ Mbulum a?

Mata 18:1-5; Luka 9:46-48

33Aləka gà Yesuw nda gà ɓəzla mazazama ŋgat ti de a a Kafarnahum. I təv ana ti ndzeha a fataya ka, tə dza ba a ga duwa a riŋ i fata. Yesuw a gwaɗa a tar: «Kà tsikwim ndeɗiŋa aà vatwa dze ana, əla?» 34Gà mburma ata ta gəs mifèfiler aaka tsa, aɗaba mimbètsèba ahəm tar ata ta mbetseba, ta gwa: «Weke na batsah ŋa ika magər kwa ya ya?» 35Yaw, Yesuw a ndza a bəɗ. A zal a gà ɓəzla mazazama ŋgat aaha kurwa gəra sula ya. A gwaɗa a tar: «Na aka sàs a wura aà mene mala aka miɗ i magər mburma ka, say ma ne à ba ŋgar mala dəba mburma tserdze, dite ma ne mala meslire tar asa. Wur ana aka ge dər kataya ya ka, a sir a dər, aka ne mala aka miɗ ndzer ŋa ana ika miɗ Mbulum a.» 36I dəba ŋa ya, Yesuw a zal a kəla ndirkiz ana kwizikw a. A hitse dər aka magər tar. A gəs aaba ə̀ŋgəts. A gwaɗa a gà ɓəzla mazazama ŋgat ata: 37«Ku weke na aka gəs aà mege gər a kəla ndirkiz kamala kəla aaha ya aɗaba iye ya ka, a ge gər taŋa ka, a iye. Ama ka, a iye ɗekɗek tsa. A ge gər ka, a wur ana a slərra iye ya mbaŋa.»

Wur ana a ge aà kwe a gùvəl tsiye ka, wur kwa

Mata 10:42; Luka 9:49-50

38I dəba ŋa ya, Yuhana a gwaɗa a Yesuw: «Əbay, maa le aà wele duwa, a delewe a gà sitene i ba mburma ya nda zləm yak. Ama mì palar ahəm, aɗaba ana ŋgat ka, mburma kwa tsiye.» 39Yesuw a tsaraka kataya ka, a gwaɗa a tar aaka: «Ka palumar ahəm tsa, aɗaba wura a ge a dukw mene aà mburma nda zləm gà ka, aləka aka miɗ ka, a sle a aà metsike aà iye dukw ana ŋgwala tsiye tsa. 40Aɗaba taŋa, wur ana a ge aà kwa a gùvəl tsiye ka, wur kwa. 41Iye ihər i gweɗe a kurum a nda ndzer: Ku weke na aka tə̀f a kurum yam, aɗaba ana kurum gà mburma gà ya ka, a ta ŋget a dukw maya ba ŋgar ndzer, a dzeye a tsidze.»

Mege metsehe a dukw bakal

Mata 5:13; 18:6-9; Luka 14:34-35; 17:1-2

42Yesuw a gwaɗa a tar asa: «Wur ana a bene a medzibe gà ɓəza aaha ta gəs iye ya, a bakal ka, ŋgulum tə̀ danar batsah zal kur a ɗa, dite tì yè a dər akaba ŋgat a duluv batsah ŋana, ndəna seriye Mbulum a le ahər a ya. 43-44Na ahər yak à gis a kər a bakal ka, ə̀ndats sàs aba ya. Ŋgulum na ki ŋget a mesife i təv Mbulum nda gà ahər yak ilik a, na ndəna ki de a akwa ana ŋgarŋgar a mbete a tsa aà biybiy nda gà ahər yak sula ya. 45-46Kige tsa na sik yak a de a à kər a bakal ka, sàs aba ya. Ŋgulum na ki ŋget a mesife i təv Mbulum nda gà sik yak ilik a, na ndəna tì yè a kər a akwa nda gà sik yak sula ya. 47Kige tsa asa, na are yak a bene a kər a bakal ka, ùndzuɗ ndzàhara aba ya. Ŋgulum ki de a, ki ndze a ika gər ahəɗ ana Mbulum a ge awiya ŋa ya, nda gà are yak ilik a tsiye, ndəna ti ye a kər a akwa nda gà are sula ya, 48i təv mawùràba ana à ndìv a tsa, metinwe mazəma mburma à mìt a tsiye, dite zlirkwa a mbete a tsa asa ya.*fa*

49Ku weke a simehe a a mesewere are kamala sluwəl ana a dəɗ a gəzləŋ a tsəka, a miyek a à bazlam gà.»*fb* 50Dite a gwaɗa a tar asa: «Liwir ka, dukw ŋgwal ŋa. Ama na aka və̀ɗ tsəna, ki ge a dər ana, meme na dite à vìɗ a ya? Say nwim ka, kamala ana a və̀ɗ a. Metsehe kurum ŋgwal ŋana mə̀ pàt à ba lele. Ndzum zayzay ilik ilik tserdze.»

Currently Selected:

Markus 9: gnd

Highlight

Copy