Mata 8

Yesuw a mbəl à mala vèdègwè duwa

Markus 1:40-45; Luka 5:12-16

1Aləka i təv ana gà Yesuw tə tarra i kwite ata ya tsara ka, gà mburma hinne tə dəɗ aaka. 2I təv ana ti de a ya ka, mala vèdègwè duwa a riŋ, a daha a təv ŋgar. A ndzeha a təv ŋgar tsara ka, a dzar gurmits a bəɗ, a gwaɗar: «Əbay, na mege kà waya ka, ki sle a aà mimbile à iye te.» 3Yesuw a tsaraka kataya ka, a daha a təv ŋgar, a ləm ahər, a gwaɗar: «Haya, a sèsiŋ na ki mbil a ya. Kinehe ka, mbəl i dukw məməta yak a.» I fataya tsara ka, mbəlak ba wele ata a ndala ihər a suwuɗ tsara. Ba ŋgar a làmbaɗa ba nawat nawat lele kuɗa. 4I dəba ŋa ya, Yesuw a gwaɗa a wele ata: «Kinehe ka, ge metsehe lele, ka ti tsik a wura tsa. Ama kəla ka, da, ka ta pàt à ba yak a mala mandəva kuɗa a Mbulum, dite mà samata kər, ma sər dər ka, meme na kàa ndza kinehe kuɗa ya. I dəba ŋa ya, ka vəl dukw masakəŋana Musa a gwa i wakita ka, ki vilwim a a Mbulum a, dite na gà mburma ta ŋgeteke a, ti sir a dər ka, kàa mbəl kaɗəŋ a.»

Yesuw a mbəl à mala meslire Əbay gà sliwdze gà Ruma duwa

Luka 7:1-10; 13:28-30; Yuhana 4:46-53

5I dəba ŋa, Yesuw a da a kwite Kafarnahum. Zàmma tsəka, batsah gà sliwdze gà Ruma duwa a daha a təv ŋgar, a hamar hinne. 6A gwaɗar: «Əbay, i dara a təv yak a ka, aɗaba mala meslire gà duwa a riŋ mahə̀nà ŋa magàha a bəɗ ŋa i ma, ŋgwala tsa, a wir ahər a hinne.» 7Yesuw a tsaraka kataya tsara ka, a gwaɗar aaka: «Haya, i dehe a, i mbil a dər.» 8Əbay gà sliwdze ata a gwaɗar: «Əbay gà, aɗaba iye kəla ka, i sle biy na ki dere a a ma gà ya tsik a tsa. Ama tsikera bazlam ilik i faka ya pəra ka, mala meslire gà aaha a mbiliŋa. 9Aɗaba iye tekeɗe, gà bàba gà ŋa a riŋ mbaŋa, dite i kwere a gà sliwdze mbaŋa asa. I sle aà megweɗe a a biy ŋgiɗ ilik <Da a faka> ka, a diŋa. Dite i gweɗe a a biy ŋgiɗ asa <Dara> ka, a deriŋa. Dite bəla i gweɗe a a mala meslire gà <Giŋ naha> ka, a giŋ a mbaŋa asa.»

10Yesuw a tsaraka bazlam ŋgar ata ka, a ge ahər kamala dukw mene aà mburma ya. Dite a gwaɗa a gà mburma ana ti zezem a ŋgat a: Iye ihər i gweɗe a kurum a nda ndzer, pàrsa iɗəm tsa, Yàa ŋgat a wura aka gis iye nda gəzləŋ, ku mege i gwala Isərayel tekeɗe, kamala wele aaha ya ilik tsidze. 11Iye ihər i gweɗe a kurum a nda ndzer ŋa asa: «A pat ana Mbulum aka da a mekwere ŋgar a ka, a ta ge a ba kamala taŋa ya mbaŋa. Gà mìsle ŋgiɗ hinne ti deyere a i təv pat ana à mbizere a ya, nda gà i təv ana à dìɗ aɗəm a ya. Ti ti zim akaba a ɗaf nda gà Abəraham, nda gà Izak, nda gà Zakup. 12Ama gà mburma ana zləmana a sàs a Mbulum ti ti ndze a i mekwere ŋgar a ka, ti dzewere a à tar a luvuŋ a bəra ya. I fata ka, ti tiwe a hinne, ta pèpìɗ a dər zlir asa mbaŋa.»

13I dəba ŋa ya, Yesuw a gwaɗa a Əbay gà sliwdze ata: «Daba a ma, aɗaba megìse yak ana kə̀ gəs iye nda gəzləŋ a ka, a ge a ba kamala ana kà wiz aà iye ya.» I dəba mifefile ŋgar ata ya tsara ka, tsèkwìr mala meslire Əbay sliwdze ata aka mbəl kaɗəŋ.

Yesuw a mbala à gà ɓəzla dukw məməta hinne

Markus 1:29-34; Luka 4:38-41

14I dəba ŋa ya, Yesuw a da a bəra Piyer. A daha ka, a leha aà dzìdze Piyer ata a riŋ mahə̀nà ŋa, ŋgwala tsa, a dzedzeriŋa ika slə̀làh ŋgar i ga. 15Yesuw a daha a təv ŋgar, a daha, a ləm aà ahər ŋgar, tsam ka, tsèkwìr a hitse aà mbulum, màràɓàraɓ ŋgar ata a ndala ihər a tsara. I dəba ŋa ya, a sle aà mege mbəlakw a Yesuw lele kuɗa.

16Aləka hawa a ge ka, gà mburma ata i fataya, tə ndzakaha gà ɓəzla sitene hinne a təv Yesuw, dite ma dalawa aà tar a. I dəba ŋa ya, a dalawa aà tar gà sitene ata ya nda ndzəɗa bazlam ŋgar, dite a mbala à gà ɓəzla dukw məməta tserdze asa mbaŋa. 17A ge kataya ka, kamala ana Ezaya, mala məma à guma Mbulum a tsik akahər ata ya kaɗəŋ. A gwa ka: «Ŋgat nda gər ŋgar a dara ka, a zla ika kwa dukw məməta ya nda dukw ana a za ndzəɗa kwa hinne ya.»*fa*

Gà mburma ana a sàs a tar mazazama Yesuw nda ndzer tsiye

Luka 9:57-62

18Aləka Yesuw a samata gà mburma a riŋ hinne i təv ŋgar ka, a gwaɗa a gà ɓəzla mazazama ŋgat: «Tàkwa aka lìdè duluv aka gìgìze ŋgiɗ.» 19Zàmma tsa i təv ana ta meh a ba, ti tsele a a slə̀làh yam a ka, pəzlàŋ mala medzeŋge məpala ahəm Mbulum duwa a riŋ a daha, a gwaɗa a Yesuw: «Əbay, i waya ka, i zezem a kər a təv ana ki de aɗəm a ya, ku mege a ŋga.» 20Yesuw a tsaraka kataya ka, a gwaɗar: «Dzala dzekwiŋ, aɗaba ŋgulum gà mbayakà ka, biye tar a riŋ, gà ɗiyeŋ tekeɗe ibam, ga tar a riŋ mbaŋa, na ta hinne a iɗəm a. Ama iye, *wur ana a dara i təv Mbulum a ka, ga gà a riŋ, na i hinne a iɗəm, dite i sifik a ba ya tsa.»

21I dəba ŋa ya, mìsle ŋgiɗ ilik i liwiŋ gà mburma ana ti zezem a ŋgat a, a gwaɗar asa: «Əbay, iye ka, viliŋ vatwa a təv ana tsir gà aka mət a ka, i le a aba ya dzekwiŋ.» 22Yesuw a gwaɗar aaka: «Kər ka, dara, zazam iye, sifek məsak à gà məməta, ti leye ba tar dukw tar.»

Yesuw a kwara akaba gà himbiɗ nda yam

Markus 4:35-41; Luka 8:22-25

23I dəba ŋa ya, Yesuw a tsəl a slə̀làh yam, gà ɓəzla mazazama ŋgat tə dəɗ aaka, ti de a aka lìdè duluv ŋgiɗ. 24I təv ana ti de a ya, ti ndze aka magər duluv ka, himbiɗ batsah ŋa slizze a dza ba aà mege, yam a tsele akaba a hinne. A pìts a à slə̀làh yam ata a huɗ ŋa. Ama Yesuw ka, ŋgat riŋ ika mendze are. 25Gà ɓəzla mazazama ŋgat tə daha a təv ŋgar, ta piɗeke à ŋgat, ta gwaɗar: «Əbay, mbəl mər te, aɗaba kwa ihər ki dzèkwe a a yam.» 26Yesuw a gwaɗa a tar: «Aɗaba la na ki gwim a magəɗa dze ya? Kurum ka, kàa gəsum iye a gəzləŋ kurum lele tsa.» I dəba ŋa ya, Yesuw a hitse aà mbulum, a kwara akaba gà himbiɗ ata nda yam a, a gwaɗa a tar: «Ndzum ɗikɗik.» Tsam ka, tə ndza ɗikɗik kaɗəŋ, kislef tàa ɓə̀zl aba asa tsa. 27Gà mburma ata tserdze ya, tə samata gà dukw ata kataya ka, a ge a tar kamala dukw mene à mburma ya. Ta gwa: «Naha dze ana, weke ɗara, na a kwere akaba a gà himbiɗ nda yam ka, ta gis ahər a ahəm a?»

Yesuw a mbala à gà ɓəzla sitene duwa sula

Markus 5:1-20; Luka 8:26-39

28I dəba ŋa ya, gà Yesuw ti ndze aka lìdè duluv ŋgiɗ aka ahəɗ gà Gadara tsara ka, gà wele duwa sula, duwa a gasawa tar, mburma a ge a tar magəɗa hìriɓiɓɓe hinne, wura a sle a aà mede ndaka vatwa ata tsa. Tə dara ika magər gà dive ya, aà malə̀mà nda gà Yesuw. 29Aləka ti ndzeha a təv Yesuw ka, tə dza ba aà Mewideye hinne, ta gwaɗar: «Əla a ləm akaba à kwa nda gà kər Yesuw, Kəla Mbulum a? Kà dara ana, aà mesewere a mər are daga aà kinehe ya tsara, tə̀vəməŋa aka ndze aɗəm zukw tsiye?» 30Ama i fata ka, palam gà wèdèlìŋ duwa a riŋ ika gìgìze diriŋ nda təv ata zaakwa, ta kiv a tar. 31Kamala taŋa ya, gà sitene ata i ba gà wele ata ya, ta hama a Yesuw, ta gwaɗar: «Kamkam, na a sàsak madalawa mər ka, ŋgulum slər mər a ba gà wèdèlìŋ aaka, mìi petse aɗəm a te.» 32A tsaraka kataya ka, a gwaɗa a tar: «Dum aɗəm.» Tə dara i ba gà mburma ata ya, silit ta patsa aɗəm. I dəba ŋa ya, palam gà wèdèlìŋ ata i fata tserdze ya, ta wiyera ba ya, bìrìm tə dzara a yam ika gìgìze ya, a duluv ata ya, ta mata aɗəm fit.

33Gà ɓəzla makəva gà wèdèlìŋ ata ibam, swiyèh tə tə̀z a huɗ kwite. Tə daha ka, tə ɗama labara ana a ge ba nda gà wèdèlìŋ ana ta mata a yam a, dite i dəba ŋa ya, tə ɗama dukw ana a ge ba nda gà wele aaha sitene a gasawa tar a mbaŋa. 34I fataya ka, gà mburma ana i huɗ kwite ya tserdze, tə dara aà melime nda gà Yesuw. Aləka tə dara, ta ŋgatar tsara ka, tə dza ba aà mahàmàr hinne, dite ma da ika ahəɗ tar a te.

Currently Selected:

Mata 8: gnd

Highlight

Copy