Mata 20

Bazlam minew wele duwa a ndzək mburma a gùvàh ŋgar

1«Aɗaba taŋa, mekwere Əbay Mbulum ana a ta kwere a mba ya ka, a ndzikiɗ ba nda wele duwa ga. Wele ata ka, a wilera i ga ya i mèkwède hedwe aka tuwa guŋgwazl. Aɗaba a yehe a mburma aà megemir a gùvàh ŋgar. 2Aləka ka, ta ge tsakala mifìte ŋgar ata nda gà ɓəzla megemir ŋa. A gwaɗa a tar: <I vile a kurum a siŋgwe miveke kamala ana ta pə̀lawa ya.> I dəba ŋa ya, a slər tar aà məfə̀tà gùvàh ŋgar ata kuɗa. 3Aləka nda ndzemde tswiɗ ŋa ka, a da a kwaskwa. A daha, a fə̀r ikaba ya ka, aka le aà gà asiŋ gà mburma ŋgiɗ dzìrìkke mehìtsè ŋa, ti ndze a taf masakəŋa, megemir tar a riŋ tsa mbaŋa. 4Wele ata a gwaɗa a gà mburma ata: <Kurum tekeɗe, dumara, dwimiŋ a gùvàh ga, i vile a kurum a dukw maya ba kurum lele.> 5Gà wele ata tə tsaraka kataya ka, tə daha a gùvàh ŋgar ata. I dəba ŋa ya, mala gùvàh aaha a mbəɗ gər a kwaskwa nda magər pat asa. Aləka a ge ndzemde makər asa ka, a tsik a gà mìsle ŋgiɗ kamala taŋa ya asa mbaŋa. A ndzəkara tar a. 6I dəba ŋa ya, ndzemde ə̀zləm a ge ka, a mbəɗ gər asa. A daha ka, aka le aà gà mìsle ŋgiɗ i kwaskwa, tar riŋ mehìtsè ŋa, megemir tar a riŋ ɓav tsa asa. A gwaɗa a tar: <Aàla na ki ndzwim a ŋgìɓɓìtte wurwas ka, kwets mege megemir kurum a riŋ tsiye?> 7Gà mburma ata ta gwaɗar aaka: <Mìi hitse a məfara ŋa ka, aɗaba ana wura aka wiz mər aà megemir tsiye.> Dite a gwaɗa a tar: <Kurum tekeɗe, dumara, dwimiŋ a gùvàh ga, i vile a kurum a dukw maya ba kurum.>

8Aləka i dəba ŋa ya, pat a dəɗ ka, mala gùvàh aaha a gwaɗa a mala megemir ŋgar ana i ga i ma ŋgar batsah ŋa ya: <Zal a gà ɓəzla megemir ata ndeɗiŋa ya tserdze, tə dara, ka vəl a tar dukw maya ba tar. Ki dze ahər a ba ka, nda gà mburma ana tə dara i dəba ya, dite tsikw aà gà mburma ana tə làhara ya.> 9Zàmma tsəka, gà mburma ana tə da a gùvàh nda ndzemde ə̀zləm ŋa ya, tə daha ka, ku weke a ŋgat dukw maya ba ŋgar kamala ana a vàk i dala ya. 10I dəba ŋa ya asa ka, gà mburma ata tə làhəha i mèkwède hedwe ya, tə daha, i tar tə dzala ka, ta gwa: <Mìi ŋget a siŋgwe hinne, à zè a biy gà mburma aaha tə dara i dəba ya.> Ama tsaatsa, tar tekeɗe, ta ŋgat ka, kalkal kamala ana mala gùvàh aaha a tsik a tar a mbaŋa. 11Aləka ta fə̀r, tàa ŋgat siŋgwe hinne tsəka, ta ge arəv aà mala gùvàh aaha hinne nda masàyà ahəm. 12Ta gwaɗar: <Gà mburma aaha tə dara, tə dza ba aà megemir ka, nda ndzemde ilik pəra ka, kà geye a mər dər akaba kalkal nda gà mər ana, mì sèwèr are ndassà i pat, àvùkw hinne asa ana, meme?> 13Ama mala gùvàh aaha a gwaɗa a mìsle ŋgiɗ ilik ika magər tar ata ya: <Masla gà, iye ka, Yàa gik bakal tsa, aɗaba ka tsikema dukw maya ba yak i huɗ miveke ya ana, kataya tsiye? 14Ama kinehe ka, zla dukw maya ba yak, ka daba a ma. Aɗaba i waya ka, i vile a a wele ana a dara i dəba yak a ka, kalkal kamala ana i vəlak a mbaŋa.> 15Dite a gwaɗar asa: <Kù gwa ana, i sle a aà megemir nda siŋgwe ga kamala ana gəzləŋ ga a waya ya tsiye? Ki ge are aka dukw ana i zlak aɗəm ŋgat, i ger ŋgwal ŋa ya kəla ya?> «

16Yesuw a gwaɗa a tar asa: «Kamala taŋa ya, gà mburma ana kinehe ti tike tar aà ahər tsiye ka, ti ti ne a gà ɓəzla aka miɗ mba ika miɗ Mbulum. Dite gà na kinehe ta gwa, gà mər ŋa ya ka, ti ti ne a gà ɓəzla dəba ika miɗ Mbulum mbaŋa asa.»

Yesuw a ɗif à məməta ŋgar ana a ta mbilere a i biye ya,

məmakər ŋa ya

Markus 10:32-34; Luka 18:31-34

17Aləka i təv ana gà Yesuw tar riŋ ika vatwa ti de a Yeruzalem a ka, a zalawa iɗəm a gà ɓəzla mazazama ŋgat ata kurwa gəra sula ya, aà ta mberaha. A gwaɗa a tar: 18«Tsarakum, araha, kwa ihər ki tèkwe a a Yeruzalem. Aləka, aka təv ana kàa ndzekwaha a fataya ka, iye, *wur ana a dara i təv Mbulum a, ti ta gis a iye, dite ta vile a iye a ahər a gà bàba gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum. Ta giŋ a seriye mekìɗe. 19Ama ta vile a iye a ahər a gà slele ana i fata tə sər Mbulum tsiye. Gà mburma ata ti sewle aà ìyeŋa, ta gìzl a iye nda megwiymbiɗ hinne mbaŋa asa. Dite ti ndwendwey a iye aà dizl magə̀làwà ŋa kuɗa. Ama i huɗ mehinne makər a ka, i mbilere a i məməta ya.»

Gà Zakup nda Yuhana ta wiz təv mendze aà Yesuw zləmana

Markus 10:35-45; Luka 22:24-27

20I dəba ŋa ya, məkəs Zebede a da a təv Yesuw, tar nda gà ɓəza ŋgar. A daha ka, a dza gurmits a bəɗ aka miɗ ŋgar, a hamar hinne, a sasar mewize ahər duwa. 21Yesuw a gwaɗar: «Ki wiz a dze ana, là?» Məkəs aaha a gwaɗar aaka: «I wiz aà kər a ka, aləka aka təv ana kàa da a Əbay a ya ka, ka vəl vatwa a gà ɓəza gà aaha, ta mbekehe a ilik aka tsèke ahər mezime yak, dite ilik ŋa aaha aka tsèke ahər gùla yak, ti ne a gà ɓəzla sik yak te, na i gwa ya.» 22Ama Yesuw a gwaɗa a tar aaka: «Kurum ka, kà sərum dukw ana ki wizwim a ya tsa. Wànà ki slwim a aà masà mesewere are gà ana i ti sèwèr a mba ya ya?» Ta gwaɗar aaka: «Haya, mìi sliŋa.» 23Yesuw a gwaɗa a tar: «Kaɗəŋ ndzer, kurum ka, ki ti sèwèrwim a are kamala ana i ti sèwèr a are ya mbaŋa. Ama kəla ka, mandza aka tsèke ahər mezime gà, kige tsa aka tsèke ahər gùla gà ka, iye tsa na i tsik a taŋa ya. Aɗaba təv mendze ata ka, biy gà mburma ana Mbulum Tsir gà a pala tar a dukw tar.»

24Aləka gà asiŋ gà ɓəzla mazazama Yesuw kurwa ŋa aaha tə tsaraka bazlam ata ka, ta ge arəv aà gà damər tar aaha sula ya. 25I dəba ŋa ya, Yesuw a zal a tar akabaha a təv ŋgar tserdze. A gwaɗa a tar: «Kurum kà sərum ka, gà bàba gà Əbay gər ahəɗ na tar riŋ ta kwere a mburma nda ndzəɗa, ta ge a ter a magəɗa ya. Gà wele ana mburma a ge a ter a magəɗa, ti slir a mburma ka, ti niw a tsiye. 26Ama taŋa ka, a de a tsa na ika magər kurum a. Na aka sàs a wura aà mene batsah Əbay i təv Mbulum ka, say ma ne mala meslire i liwiŋ kurum ivaɗ. 27Na aka sàs a wura i liwiŋ kurum mene mala aka miɗ ka, say ma ne ɓele ika miɗ kurum tserdze i təv magəsa ahəm a. 28Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Yesuw a mbala à gà ɓəzla guluf duwa sula

Markus 10:46-52; Luka 18:35-43

29Aləka i təv ana gà Yesuw nda gà ɓəzla mazazama ŋgat, ti dere a i kwite Yeriko ya ka, gà mburma hinne tə dəɗ aakara i fataya. 30I təv ana ti dere a ya ka, tàa le aà gà ɓəzla guluf duwa sula, mandza ŋa aà gùva vatwa. Tə tsaraka miɓizle Yesuw ana a riŋ a dere a ndaka vatwa ata ya ka, tə dza ba aà Mewideye hinne, nda magala. Ta gwa i huɗ Mewideye tar ata ya ka: «Əbay Yesuw, gwala Dawda, mì ndzek are tsehe te tsiye? Zlak mər te.» 31Ama mayahaba gər gà mburma ata dìhhwe, ti de a ya ka, ta pala a tar ahəm. Ta gwaɗa a tar: «Ndzum ɗikɗik.» Ama gà wele ata ta gəs bazlam tar ata tsa. Tə səkah à Mewideye hinne nda magala ŋgəlakəkka ivaɗ asa. Ta gwa: «Əbay Yesuw, gwala Dawda, mì ndzek are tsehe te tsiye?» 32Yesuw a tsaraka bazlam tar ata ka, a hitse dzeŋ, a zal a tar. A gwaɗa a tar: «I ge a kurum dze ana, dukùla, na a sàs a kurum a?» 33Ta gwaɗar aaka: «Əbay, a sàs a mər ka, hə̀ndə̀k a mər ika are ya te.» 34Yesuw a tsaraka taŋa ka, ti ndzer aɗəm are tsehe hinne. A daha, a ləm aà are tar, dite are tar a handaka ba tsara. I dəba ŋa ya ka, gà wele ata tə dəɗ aka Yesuw.

Currently Selected:

Mata 20: gnd

Highlight

Copy