Mata 19

Guma Yesuw ana a tsik agəra məmìyàkà aba gà zal

nda məkəs a

Markus 10:1-12; Luka 16:18

1I dəba ŋa ya, Yesuw a ndəv à mifefile ŋgar ata ka, a hitsera ika ahəɗ Galile ya, a da ndàra aka ahəɗ Yuda, aka lìdè dulwa Yurdan. 2Gà mburma hinne tə zazamaha ŋgat a fata. A daha, a mbala à gà ɓəzla dukw məməta ana i liwiŋ tar a.

3Aləka i dəba ŋa ya, gà *Farisa duwa tə daha a təv ŋgar, aɗaba a sàs a tar maslàlà à ŋgat i yam a. Ta gwaɗar: «Məpala ahəm kwa dze ana, aka vəl vatwa a mburma aà madalawa məkəs, agəra gà dukw ana a ge ŋgwala tsa tserdze ya ya?» 4Yesuw a gwaɗa a tar aaka: «Kàa dzeŋgwim dukw ana mewetse ŋa i wakita Mbulum a te tsiye? Aɗaba akahər ana Mbulum a ge gà dukw tserdze ya ka, a ge gà asləka nda məkəs,*fa* 5dite a gwaɗa a tar: <Aɗaba taŋa na kinehe, asləka a miyek a à gà tsir ŋgar nda mama ŋgar, dite ti ndze a nda məkəs ŋgar a. Tar ata sula ya ka, ti ne a ba ilik.>*fb* 6Kərga taŋa ya kaɗəŋ, ba tar ka, sula asa tsa. Ama ba tar ka, aka ne ba ilik kuɗa. Aɗaba taŋa, dukw ana Mbulum a gaw akaba kamala taŋa ya ka, wura ma ta kurə̀zl dər iba ya asa tsa.»

7Gà Farisa ata tə tsaraka kataya ka, ta gwaɗar: «Na kataya ana, aàla na Musa a gwa ka, na aka sàs a wura aà madalawa məkəs ŋgar ka, ma wetser wakita madalawa ŋgat, mə vəlar ahər, dite na a delewe a ya ya?»*fc* 8Yesuw a gwaɗa a tar aaka asa: «Musa a vəl a kurum vatwa ka, aɗaba ana gəzləŋ kurum manəsa ŋa, matsəɓatsəɓ iɗəm hinne ya pəra, dite na ka dalawum gà məkəs kurum a, tsəka, akahər ana piŋŋe Mbulum a ge gà dukw tserdze ya ka, kataya tsa. 9Iye ihər i gweɗe a kurum a nda ndzer: Ku weke na aka miyak à məkəs ŋgar ze melè ahər aka mege muva, dite aka zla aɗəm biy ŋgiɗ ka, taŋa ka, a ge muva.»

10I dəba ŋa ya, gà ɓəzla mazazama ŋgat ta gwaɗar: «Na bazlam gà zal nda məkəs kamala taŋa ya ka, mazla məkəs a ge a ŋgulum tsa.» 11Ama Yesuw a gwaɗa a tar aaka asa: «Aɗaba mburma tserdze ka, ti sle aà metsereke a bazlam aaha i waya i tsik a kurum a ya tsa. Say gà na Mbulum a vəl a tar metsehe ya dukw tar. 12Aɗaba i təv gà dukw ŋgiɗ a riŋ pampam na mburma a sle a aà mazla daala tsiye. Gà mìsle ŋgiɗ ka, daga i təv mewe tar a, ba tar a waya mazla məkəs tsa. Gà mìsle ŋgiɗ asa ka, mburma tə dadaɗaya tar. Dite gà mìsle ŋgiɗ asa ka, ti zle a məkəs tsa, kige tsa ti de a a zal tsa, aɗaba a sàs a tar ka, mege meslire Mbulum ɗekɗek. Wur ana aka ŋgat metsehe aà matsaraka bazlam aaha ya ka, mà dzar zləm lele.»

Yesuw a pise ahəm a gà ɓəza ndirkiz

Markus 10:13-16; Luka 18:15-17

13Aləka i dəba ŋa ya, gà mburma tə daha à gà ɓəza ndirkiz a təv Yesuw, dite ma tike aka tar ahər te, ma hama a Mbulum ka, dite mi pise a tar ahəm. Gà ɓəzla mazazama ŋgat ata ta ŋgat a gà mburma ata ti dehe a à gà ɓəza ya ka, ta pala a tar ahəm, a sàs a tar na ti dehe a à gà ɓəza ata ya tsa. 14Ama Yesuw a tsaraka məpala ahəm gà mburma ŋgar ata ta pele a a gà tsir gà ɓəza ya ka, a gwaɗa a tar: «Mandza, ka palum a tar ahəm tsa, tə dara à gà ɓəza a təv ga ya. Aɗaba mekwere Əbay Mbulum a waya ka, medzibe gà mburma ana kamala gà ɓəza aaha ya, na ti de aɗəm a ya.» 15Dite i dəba ŋa ya, a daha, a tike ahər aka gà ɓəza ata, a pise a tar ahəm. I dəba ŋa ya asa, a hitse i fataya, a daba kuɗa.

Mege metsehe a mazazama Mbulum agəra

limana ana hinne ya

Markus 10:17-31; Luka 18:18-30

16Aləka i dəba ŋa ya, wele duwa gawla ŋa a daha a təv Yesuw, a gwaɗar: «Əbay ga, i ge a dze ana, meme, na dite i ŋget a mesife ana à ndìv a tsa aà biybiy a?» 17Yesuw a gwaɗar aaka: «Aàmala na ki wiz a aà iye a dukw ana ŋgwal ŋa ya? Ama wura a riŋ ilik na ŋgwal ŋa ya tsa, say Mbulum ilik. Na a sàsak mesife ana à ndìv a tsiye ka, say ki gis a məpala ahəm ŋgar.» 18Aləka wele ata a tsaraka kataya ka, a gwaɗar: «I gis a dze ana, məpala ahəm awara?» Yesuw a gwaɗar aaka: «Məpala ahəm Mbulum ka, araha. A gwa ka: <Kə̀ kəɗ mburma tsa, ki ge muva tsa, ki ge akəl tsa, ka tə sàs pàrsa aà mburma tsa. 19Ama zàmbaɗa à gà dede yak nda mama yak. Dite ka waya mburma kamala ana kà waya ba yak a.> «*fd* 20Wele ata a gwaɗar aaka: «Iye ka, Yàa mbər megìse gà dukw ata kà tsikiŋ a tserdze, dite dukùla na a ziŋaha asa ya?» 21Yesuw a gwaɗar: «Na a sàsak magəsa Mbulum nda ndzer ka, daha, ka dzawa à gà dukw yak fit, dite kà dzaya siŋgwe ŋa a gà ɓəzla matawak. Na kàa ge dər kataya ka, ki ŋget a limana ana batsah ŋa, à ndìv a tsa i təv Mbulum a. I dəba ŋa ya ka dara, ka zezem iye kuɗa.» 22Ama wele ata a tsaraka bazlam ŋgar ata tsara ka, tsùkwaɗ a daba i fataya tsara nda gà matsəɓatsəɓ, aɗaba ana ŋgat Əbay ŋa hinne ya.

23Aləka i dəba ŋa ya, Yesuw a gwaɗa a gà ɓəzla mazazama ŋgat: «Iye ihər i tsik a kurum a nda ndzer: Mawùràba aà mada a mekwere Əbay Mbulum gà ɓəzla limana kaɗəŋ. 24Kinehe iye ihər i tsik a kurum a asa: Ndəna gà ɓəzla limana ti de a mekwere Əbay Mbulum a ka, ŋgulum zlìgwèmè ma da nda biye lepìrè.» 25Gà ɓəzla mazazama ŋgat ata tə tsaraka bazlam ŋgar ata tsara ka, dùwaɗ a zla aà tar arəv a hinne. Ta gwa: «Na kataya ana, weke a sle a aà mimbile i təv Mbulum a?» 26Ama Yesuw a fə̀r aà tar, a gwaɗa a tar: «I təv mburma ka, mawùràba ŋa, ama i təv Mbulum ka, mawùràba ŋa tsa, a sle a aà duwa tserdze.»

27I dəba ŋa ya, Piyer a gwaɗar aaka tsara: «Araha, mər ka, maa miyak aba à gà dukw mər a tserdze, maa dara, maa zazam kər ana, dukùla na a ge a mər a ŋgulum kuɗa ya?» 28Yesuw a gwaɗa a tar: «Iye ihər i tsik a kurum a nda ndzer, iye, *wur ana a dara i təv Mbulum a ka, a pat ana Yàa ŋgat Əbay nda ndzəɗa gà ana ti zlibe a dər à iye, i kwere a dər gər ahəɗ ana awiya ŋa ya ka, kurum ana kà zazamum iye ya tekeɗe, ki ŋgetwim a Əbay mbaŋa, na kurum aaha kurwa gəra sula ya. Ki ta ŋgetwim a təv mendze Əbay. Dite ki gwim a seriye a gà gwala gà Isərayel ana kurwa gəra sula ya mbaŋa.» 29Yesuw a gwaɗa a tar asa: «Ku weke na aka miyak aba à ga ŋgar a, kige tsa à gà damər ŋgar, nda gà tsir ŋgar, nda gà mama ŋgar, nda gà ɓəza ŋgar, dite nda gà gùvàh ŋgar agəra iye ka, a ŋget aɗəm a, à zè a taŋa a miyak dər aba kinehe ya medzige dərməka. Dite a ta ŋget a mesife ana à ndìv a tsa aà biybiy a asa mbaŋa. 30Ama gà mburma ana kinehe ta gwa, gà mər ŋa ya ka, gà asiŋ ŋa hinne ti ti ne a gà ɓəzla dəba mba ika miɗ Mbulum. Dite gà na kinehe ti tike tar aà ahər tsiye ka, gà asiŋ ŋa ibam hinne, ti ti ne a gà ɓəzla aka miɗ mbaŋa asa.»

Currently Selected:

Mata 19: gnd

Highlight

Copy