Luka 15

Bazlam minew təmaŋ ana a dzeye ya

Mata 18:12-14

1A pat duwa ka, gà ɓəzla duwan nda gà asiŋ gà mburma ana i liwiŋ tar, meɗè zləm tar ŋgwala tsiye hinne, tə daha a təv Yesuw. Tə daha ka, aà medzè zləm a dukw ana a tsik a ya. 2Aləka gà *Farisa nda gà ɓəzla medzeŋge məpala ahəm Mbulum ta ŋgat a tar kataya tsara ka, ta ge arəv hinne, tə dza akaba bazlam ŋgùra ŋgùra ŋgùra hinne ika magər tar. Ta gwa: «Wele aaha à gis a aba gà ɓəzla bakal lele, naha ti zim akaba a dukw mezime ana, meme?» 3I dəba ŋa ya, Yesuw a sər a taraha aka bazlam ata ka, a fàfəl a tar ndaka bazlam minew. A gwaɗa a tar: 4«Na bəla wura ika magər kurum aaha kinehe ya, gà təmaŋ ŋgar a riŋ dərməka, i dəba ŋa ya, ilik aka dzeye ana, a ge a ana, meme? A miyek a à gà dzik tswiɗ gəra tswiɗ ŋa aaha à gər tar tə̀ma, dite a de a a mayaha ilik ŋa aaha a dzeye ya, haa a təv ana aka ŋgat a dzekwiŋ tsiye? 5Na bəla aka ŋgat ka, a ŋgeye a ba hinne kuɗa. A tikere a təmaŋ ata aka ɗa ya, 6a de a dərra a ma ya. Aka dara ka, a zelewe a a gà masla ŋgar, nda gà ɓəzla hərmaga ŋgar, a gweɗe a ter a: <Ŋgayakwa ba, aɗaba Yàa ŋgat təmaŋ gà ata a dzeye ya kuɗa.> 7Iye ihər i gweɗe a kurum ŋa: Kamala taŋa ya mbaŋa, maŋgayaba a ta ge a i təv Mbulum i gər ŋa hinne, agəra wur ana a miyak à bakal ŋgar, a mbəɗ à gəzləŋ ŋgar a. Maŋgayaba ka, a zè a biy gà mburma ana dzik tswiɗ gəra tswiɗ, ta fə̀r aaba ka, kamala ana bakal i təv tar tsa, tsaatsa tàa mbəɗ à gəzləŋ tar tsidze ya.»

Bazlam minew kur siŋgwe ana a dzeye ya

8I dəba ŋa ya, Yesuw a gwaɗa a tar asa: «Kige tsa kamala məkəs ŋa a riŋ kur siŋgwe ŋgar a riŋ hinne. Ama ka, aka dzeye ihər a ilik dze ana, a ge a ana, meme? A dehe a, à vèt a akwa a lalampa ŋgar, a feɗere a i ga ya fit, dite a yehe a iɗəm a, haa a təv ana aka ŋgat a dzekwiŋ tsiye? 9Na bəla aka ŋgat ka, a zele a a gà masla ŋgar, nda gà məkəs ana ta mberehe ya, a gweɗe a ter a: <Ŋgayakwa ba, aɗaba Yàa ŋgat kur siŋgwe ga ana a dzeye ya kuɗa.> 10Kamala taŋa ya mbaŋa, iye ihər i gweɗe a kurum ŋa: Maŋgayaba a ta ge a riŋ ika magər gà gawla Mbulum i gər ŋa, agəra wur ana ilik a miyak à bakal ŋgar, a mbəɗ à gəzləŋ ŋgar a.»

Bazlam minew kəla ana a dzeye ya

11I dəba taŋa ya ka, Yesuw a gwaɗa a tar: «Wele duwa, gà ɓəza ŋgar a riŋ sula. 12Dìy kəla ŋana a daha, a gwaɗa a tsir ŋgar: <Tsir gà, dziŋ ihər limana gà ana, zləmana ki ti dze a mər a aba ya.> Tsir tar ata a daha, a dza a tar aba limana ata. 13I dəba mehinne zaakwa ya ka, kəla ata a daha, a dzawa à gà dukw ata fit, a yaha gər a siŋgwe ŋa. A mah ba tsara, a da a kwite ana diriŋ a. A daha a fata ka, a dza dər ba aà mege dukw ana gəzləŋ ŋgar a waya ya, a gwitse à dukw ata fit. 14I təv ana siŋgwe ŋgar ata a ndəv ihər a ka, batsah may a dza ba aà mege ika ahəɗ ata asa. Gərəŋ gərəŋ a səraha dukw ana a ge a ya asa tsa. 15I dəba ŋa ya, aka ŋgat megemir i təv wele duwa a riŋ i fataya. Wele ata a slər ŋgat aà makəva gà wèdèlìŋ ŋgar a dala. 16I təv ana a de a à tar a dala mba ya ka, tə dzawa a tar dukw mezime a bəɗ dzekwiŋ, ti zimiŋa. Kəla aaha ka, a waya mazəma dukw ana gà wèdèlìŋ aaha ti zim a ya mbaŋa, aɗaba may ana a wir ahər a ya. Ama wura a gəs miviler ɓav tsa asa. 17I fataya ka, a dza ba aà madzala gà gər aka mendze ŋgar ana a ndzawa i təv tsir ŋgar a. A gwa: <Ama gà ɓəzla meslire tsir gà ka, tar riŋ ti zim a dukw mezime lele, a sle a ter a hinne, dite a zehe aà ter a asa. Ama iye kuɗa ka, i mìt a ɗa aà may i faha. 18Ŋgulum kinehe ka, i meh a ba, i diŋa, i mbìɗ a gər a təv tsir gà. Yàa da ka, i gweɗere a: Tsir gà, Yàa ge bakal ika miɗ Mbulum a, dite ika miɗ yak a asa. 19Ama iye ka, kamala na kəla yak a asa tsa. Ne à iye ka, kamala gà ɓəzla megemir yak a pəra.>

20I dəba ŋa ya, a mah ba, a da, à mbìɗ a gər a təv tsir ŋgar. I təv ana a ndze aà vatwa, aka à mendze a ma, a riŋ diriŋ aà ga ya mba ya ka, tsir ŋgar a ŋgataraha tsara ka, a valaha a təv ŋgar. A daha, a samata ka, a ndzer are tsehe hinne. A yàb aaka. A ger wusa, a gəs aaba ŋgat nda gəzləŋ ilik. 21Kəla ŋgar ata a gwaɗar: <Tsir gà, Yàa ge bakal ika miɗ Mbulum a, ika miɗ yak a asa mbaŋa. Iye kinehe ka, kamala ana kəla yak a asa tsa.> 22Ama tsir ŋgar a zalaha a gà ɓəzla meslire ŋgar a təv ŋgar. Tə daha ka, a gwaɗa a tar: <Dumaha tsəma, zlumara ŋgwal andiw ana a tsahən lele ya, ma tike akaba. Dite ka zlumara matsərəɗ a, ka tikwimer a kəla ahər. I dəba ŋa ya, kà ndzəkumara tsàpà ya, kà dzùmar a sik. 23Kə̀ gə̀sumara sla ana magəla ŋa lele, məŋgəl ihər a, kə̀ kə̀ɗumar. Dite ki dekwe a ala ŋa, ki gìrìvekwe a dər, ki ŋgeyekwe a ba. 24Aɗaba kəla gà aaha ka, kamala ana aka mət a, ama kinehe ka, aka mbəlara a riŋ nda mesife. Aka dzeye kweleŋ, ama kinehe ka, Yàa ŋgat asa.> I dəba ŋa ya, tə dza ba aà megirive nda maŋgayaba hinne kuɗa.

25I təv ana tar riŋ ta gìrìv a i ma ya ka, batsah kəla wele ata ŋgat a riŋ i dala i gùvàh. A màharaba i dala ata ya. I təv ana a ndze aà vatwa, a de a a ma ya ka, aka tsarakara megirive ata mburma ta gìrìv a i ma ya. 26Kəla ata a zal a mala meslire tsir ŋgar ilik, a wiz ahər. A gwaɗar: <Dukùla na ti ɗeme a i ma huwwa dze ya?> 27Mala meslire ata a gwaɗar: <Ta gìrìv a ka, a damər yak ana a màra a ma ya. Tsir ŋgar a gəs sla ana magəla ŋa lele ya, a kə̀ɗar, aɗaba ana aka ŋgat kəla ŋgar nda mesife lele ya.> 28Kəla batsah ŋa ata a tsaraka kataya ka, a dza ba aà mege arəv hinne. A sasar məpə̀ts a ga asa tsa. I dəba ŋa ya, tsir ŋgar a dara a bəra ya. A dara, a hamar hinne. A waya ma da a ga. 29Ama kəla ata a gwaɗar: <Tsaraka dukw ana i tsikik a ya. Ama kinehe Yàa ge ka, mive diŋ, na iye ihər i gek a mege megemir a, Yàa niw mifefile yak ilik tsidze. Ka viliŋ dze ana, là, na a iye ɗara? Ku mege kəla vugul zaakwa, aà maŋgayaba nda gà masla gà tekeɗe ka, kàa viliŋ tsiye? 30Araha kəla yak ana a gwitsek à limana yak fit a mege muva nda gà məkəs a, a màra ka, kə̀ kə̀ɗar sla ana kə̀ gəlakwa, məŋgəl ihər hinne ya tsəna?>

31Ama tsir ŋgar a gwaɗar aaka: <Kəla gà, aɗaba kər ka, mandza ŋa ɗa i təv ga, gà dukw ana i ga i ma gà tserdze ya ka, gà biy yak. 32A da dər na ki gìrìvekwe a nda maŋgayaba ya tsəna, aɗaba damər yak aaha ka, kamala ana aka mət a, ama kinehe ka, aka mbəlara i məməta ya. Aka dzeye kweleŋ, ama kinehe ka, aka ŋgat ba asa.> «

Currently Selected:

Luka 15: gnd

Highlight

Copy