Yuhana 8

Məkəs duwa tə tats à ŋgat aka mege muva

1Ama Yesuw a da aà kwite ana tə zalar dìyes Ndzendzebire ya. 2Ndidwe ŋana i mèkwède hedwe ka, a mbəɗ gər a batsah ga Mbulum ata. A daha, a ndza a bəɗ. Gà mburma tserdze tə daha a təv ŋgar. Dite a dza ba aà metsike a tar guma ŋgar. 3I təv ana a riŋ a tsik a ter a ya ka, gà ɓəzla medzeŋge məpala ahəm Mbulum nda gà *Farisa ta gə̀saraha məkəs duwa, tə tats dər aka mege muva. Ta hitse dər aka miɗ mburma tserdze, 4ta gwaɗa a Yesuw: «Əbay, araha, mì tats à məkəs duwa naha aka mege muva. 5Ama Musa a gwaɗa a mər i təv məpala ahəm Mbulum a ka, na kàa lwim aà wura kataya ka, say makə̀ɗà ŋgat nda kur ana, dite kər dze ana, kù gwa aaka ana, meme?»*fa*

6Ti tsikar kataya ka, a sàs a tar magəsa ŋgat a gedzewe, dite ka, ta ŋget a vatwa aà məmàr à bakal mbaŋa. Ama Yesuw a tsaraka taŋa ka, luz a kal à gər ŋgar a bəɗ, a dza ba aà mewetse duwa aka ahəɗ nda kəla ahər.*fb* 7Tar riŋ ta wiz ihər a bazlam ata hiywe. I dəba ŋa ya, Yesuw a zla gər aà Mbulum, a gwaɗa a tar: «Wur ana ika magər kurum aka ge bakal ilik tsiye ka, mà làhar à kur dzekwiŋ.» 8I dəba ŋa ya, a mbə̀ɗaba gər aka mewetse dukw ŋgar ata a bəɗ asa. 9Tə tsaraka bazlam Yesuw ata kataya tsara ka, sùtùtùtwa ti lèlekweye fit. Na a lah aà medeye ka, gà bàba ŋana dzekwiŋ. Gà Yesuw ti zeha riŋ à gər tar nda məkəs ata ika miɗ ŋgar a.

10I dəba ŋa ya, a zla gər aà mbulum asa, a gwaɗar: «Məkəs aaha, gà mburma ana ta gəsara kər a ana, tar i ŋga? Seriye aka gəs kər tsa seyiŋ a?» 11Məkəs ata a gwaɗar aaka: «Awaŋ, Əbay gà.» Yesuw a gwaɗar asa: «Iye tekeɗe ka, seriye ga à gis a kər ɓav tsa. Daba dukw yak, ama kəla ka, ka ta mà aka mege bakal asa tsa.»}

Yesuw ka, dzaydzay gər ahəɗ

12I dəba ŋa ya, Yesuw a fàfəl a gà mburma asa. A gwaɗa a tar: «Iye ka, dzaydzay gər ahəɗ. Wur ana a zezem a iye ya ka, a ti ndze a i luvuŋ asa tsa. Ama a ŋget a dzaydzay ŋa ana a vile a mesife a mburma ya.»

13Gà *Farisa a riŋ i fata, tə tsaraka kataya ka, ta gwaɗar: «Kər ki gebe a sida ba yak nda ahər yak pəra ana, meme na mìi sir a dər, ka tsik ka, ndzer ŋa ya?» 14Yesuw a gwaɗa a tar aaka: «Ku mege i ge ba sida nda ahər gà ŋa tekeɗe ka, ndzer hiywe, aɗaba iye ka, i səraba təv ana i dara iɗəm a, kige tsa, təv ana i de aɗəm a ya asa. Ama kurum kà sərum təv gà ana i dara iɗəm a, kige tsa, təv ana i de aɗəm a ya tsa. 15Ki gwim a seriye ka, biy gà mburma gər ahəɗ, kamala ana ki dzelwim a nda gər kurum a pəra. Ama iye ka, i ge a seriye aka gər wura tsidze. 16Ku mege i ge a seriye tekeɗe ka, seriye ga ka, ndaka vatwa ŋa, aɗaba i ge a seriye ata ka, nda mezìwè gər gà tsa. Mìi ge a ka, nda Tsir gà ana a slərra iye ya məma. 17Aɗaba kà sərum, mewetse ŋa a riŋ i wakita məpala ahəm kurum ka: <Na gà wura sula tàa tsik i sida ya, bazlam ŋa ilik ka, taŋa ka, ndzer kaɗəŋ.>*fd* 18Kamala taŋa ya, iye ŋa ka, i gebe a sida ba gà, dite Tsir gà ana a slərra iye ya tekeɗe, a riŋ a ge a sida gà asa mbaŋa.» 19Ta gwaɗar: «Tsir yak ŋa ana, i ŋga?» Yesuw a gwaɗa a tar aaka: «Kà sərum iye tsa, dite kà sərum Tsir gà ɓav tsa asa. Na mege kà sərum iye ka, ana ka, ki sirwim a Tsir gà mbaŋa.»

20Yesuw a tsik bazlam ata ka, i təv ana a riŋ a tsik a guma ŋgar a mburma i batsah ga Mbulum, bise nda təv ana tə dzawa aɗəm dukw taf ana aɗaba Mbulum a. Ama wura aka gəs ŋgat tsidze, aɗaba məpàslà ahər ŋa ana Mbulum a tiker a ka, aka ndze aɗəm zukw tsa.

Yesuw a be aà ɗaf a gà na tàa gəs ŋgat nda gəzləŋ tsiye

21I dəba ŋa ya, Yesuw a gwaɗa a tar asa: «I debiŋa. Na Yàa da ka, ki ti yehwim a iye tekeɗe, taf masakəŋa. Ama kurum ka, ki metwim a i bakal kurum. Ki slwim a aà mede a təv ana i de aɗəm a ya tsa.»

22Gà bàba gà Yahuda tə tsaraka kataya ka, ta gwaɗaba ika magər tar: «Wànà à kiɗ a ba ŋgar a, na a gwa ka, ki slwim a aà mede a təv ŋgar ana a de aɗəm a ya tsiye?» 23Yesuw a gwaɗa a tar aaka asa: «Kurum kà wum ɗa ba ka, ika gər ahəɗ. Ama iye i dara ka, i gər ŋa ya. Kurum ka, gà mburma gər ahəɗ. Ama iye ka, mburma gər ahəɗ tətsà. 24Aɗaba taŋa na i gwaɗa a kurum ka, ki ta metwim a i bakal kurum a. Aɗaba na kàa gəsum iye, <Wele ana iye ŋgat ŋa ya>*fe* nda gəzləŋ kurum tsəka, ki metwim a i bakal kaɗəŋ ndzer.» 25Ta gwaɗar: «Kər ana, weke?» Yesuw a gwaɗa a tar aaka: «Iye ka, wele ana i tsikewa a kurum daga piŋŋe ya. 26Taŋa gà bazlam aà iye i gà gər pampam hinne, na i tsik a kurum a zləmana, dite seriye à gis a dər kurum a. Ama i me a kurum a à bazlam wele ana a slərra iye ya ivaɗ. Ŋgat ka, mala ndzer ŋa. I me a dər a mburma ka, dukw ana i tsarakara i təv ŋgar a ɗekɗek, tsəka, i zle ahər a biy ga tsa.»

27A tsik a tar bazlam ata ka, aà Tsir ŋgar, ama ka, tə sər tsa. 28Aɗaba taŋa, Yesuw a gwaɗa a tar asa: «Na kàa kəɗum iye, *wur ana a dara i təv Mbulum a ka, ki sirwim a dər, iye ka, <Wele ana iye ŋgat ŋa ya> kuɗa. Dite ki sirwim a dər mbaŋa ka, i ge a duwa ilik nda ahər gà tsa, ama i me a ka, à dukw ana i tsarakara i təv Tsir gà ya. 29Wele ana a slərra iye ya ka, a riŋ i təv ga. Aka miyak à iye à gər gà tsa, aɗaba iye ihər i ge a ka, dukw ana a dar a gər a ɗekɗek.» 30I fataya tsara ka, gà mburma hinne ta gəs ŋgat nda gəzləŋ tar, aɗaba bazlam ŋgar ata a tsik a.

Wur ana a ge a bakal a ka, ŋgat ka, ɓele bakal

31I dəba ŋa ya, Yesuw a gwaɗa a gà Yahuda ana ta gəs ŋgat nda gəzləŋ a: «Na ki giswim a ahəm aà guma gà ka, kàa nwim gà ɓəzla mazazama iye nda ndzer. 32Dite ki ti sirwim a ndzer ŋana. I dəba ŋa ya ka, ndzer ŋa ata a be a à kurum i ɓele ata ya.»

33Gà asiŋ gà mìsle ŋgiɗ ta gwaɗar aaka: «Mər ka, gà gwala Abəraham. Ama ka, maa ne ɓele wura ilik tsidze. Dite meme na ki gweɗe a mər a ka, mìi ta be a i ɓele ya ya?» 34Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ku weke na a ge a bakal ka, ŋgat ka, i ɓele bakal pəra. 35Ama ɓele ka, a ndze a i bəra mala ga ŋgar aà biybiy tsa, say kəla mala ga ana ti tike a aà ahər i təv maɗàmà ba tar aà biybiy a. 36Kamala taŋa ya, na iye, Kəla Mbulum, Yàa be à kurum i ɓele ya ka, ki ziwwim a gər kurum ndzer. 37I sər kurum. Kurum ka, gà ɓəza Abəraham seyiŋ. Ama kurum riŋ ihər ka, ki yehwim a vatwa aà makə̀ɗà iye, aɗaba ana kàa gəsum bazlam gà tsiye. 38Iye ihər i tsik a kurum a ka, dukw ana Tsir gà ɗifiŋ dər a. Ama kurum ka, ki gwim a dukw ana tsir kurum a ɗif a kurum dər a mbaŋa.»

39Ta gwaɗar aaka: «Na a ne batsah tsir mər ka, Abəraham.» Yesuw a gwaɗar: «Na mege kurum gà ɓəza Abəraham nda ndzer ka, ana ka, ki gwim a megemir ŋgar ana a ge akahər ata ya mbaŋa. 40Ama iye ka, i tsikewa a kurum ndzer ŋa ana i tsarakara i təv Mbulum a. Ku mege kataya tekeɗe ibam ka, kurum riŋ ihər ki yehwim a vatwa aà mekìɗe iye dər akaba ivaɗ. Medzìbe dukw ata ki wìsehwim a ya ka, Abəraham aka ge ilik tsa. 41Kurum ihər ki meswim a ka, à dukw ana tsir kurum ata a gewa ya.»

Ta gwaɗar aaka: «Tsir mər ka, Mbulum ilik. Mər ka, gà madazla tsa.» 42Yesuw a gwaɗa a tar: «Na Mbulum Tsir kurum ndzer ka, ana ki weywim a iye mbaŋa, aɗaba iye Kəla ŋgar. I dara ka, i təv ŋgar a. I dara ka, nda gər gà ya tsa, ŋgat na a slərra iye ya ivaɗ. 43Aàmala na kà tsarakum dukw ana i tsik a kurum a ya tsiye? Aɗaba kàa slwim medzè zləm a bazlam gà tsa. 44Tsir kurum ka, Əbay sitene. Ki gwim a tekeɗe ka, dukw ana a sasar a. Ŋgat mala makə̀ɗà mburma daga piŋŋe. Aka tsik dukw ana ndzer a ilik tsidze, aɗaba ana ndzer ŋgar a riŋ tsiye. I təv pàrsa ŋgar ata a sasa ya ka, hiywe a mətsawa i ŋgar ka, aà taŋa pəra, aɗaba ana ŋgat mala pàrsa, dite ŋgat tsir gà pàrsa ya asa.

45Ama iye ka, iye ihər i tsik a ndzer. Aɗaba taŋa na kə̀ gəsum iye nda gəzləŋ tsiye. 46Weke na ika magər kurum ka, a sle aà megweɗe a, Yàa ge bakal a? A riŋ tsa. Na iye ihər i tsik a ka, dukw ana ndzer ana, dite aàmala na kə̀ gəsum iye nda gəzləŋ tsiye? 47Wur ana mburma Mbulum a ka, à dze a zləm a bazlam Mbulum. Ama kurum ka, gà ɓəza Mbulum tsa, aɗaba taŋa na kàa dzum zləm a bazlam ata tsiye.»

Aka ana tàa wa Abəraham zukw tsiye ka,

Yesuw a riŋ dukw ŋgar

48Gà mburma ata ta gwaɗa a Yesuw: «Yawwa, maa gwaɗak tsiye, kər ka, gà Samariya, sitene i ba yak a?» 49A gwaɗa a tar aaka: «Sitene i ba gà tsa, i zlibe a ka, aà Tsir gà. Ama kurum ka, ki fìrwim aà iye a kamala dukw taf masakəŋa ya. 50Ama iye ka, i yehe a mezlibe ana gà mburma tì zlibe a à iye ya tsa. Wele ŋgiɗ a riŋ ilik na a waya mezlibe ata gà mburma tì zlibe a à iye ya. Wele ata na a ne mala masàsà ikaba seriye bazlam aaha ya. 51Iye ihər i gweɗe a kurum a nda ndzer, pàrsa iɗəm tsa: Wele ana aka gəs bazlam gà ya ka, à mìt a tsa, a ndze a aà biybiy.»

52Gà mburma ata ta gwaɗar: «Ama mì sər kinehe ka, sitene i ba yak ndzer kuɗa. Akahər ata Abəraham aka mət, gà ɓəzla məma à guma Mbulum tekeɗe, tàa mata kuɗa ka, dite kər ki gweɗe a ka, wur ana aka gəs ahəm aà bazlam yak a ka, à mìt a tsidze ana, meme? 53Na Abəraham tsir mər aka mət seyiŋ ana, wànà kər kà dzala ana, kà za ŋgat a? Dite gà ɓəzla məma à guma Mbulum tekeɗe, tàa mata asa ana, kər ana, weke?»

54Yesuw a gwaɗa a tar aaka: «Na iye ŋa i zlibe a à ba ŋa ka, a ge a ŋgulum tsa. Ama Tsir gà ana a tike iye a təv mezlibe ana tì zlibe a à iye ya. Ŋgat ka, wele ana kù gwaɗum, Mbulum kurum a. 55Ama ku mege kù gwaɗum ahər kataya tekeɗe ka, kà sərum ŋgat tsa. Iye ka, i sər ŋgat lele dukw ŋgar. Na bəla i gwa, i sər ŋgat tsəka, i ti ne a mala pàrsa kamala kurum a mbaŋa. Ama i sər ŋgat, dite i gis a ahəm ŋgar asa. 56Batsah tsir kurum Abəraham aka ŋgaya ba hinne, i təv ana Mbulum a tsikar i sida ya, a ta ŋget a a pat gà ana i dere a ya. Aka ŋgatar, dite a ŋgaya ba hinne kaɗəŋ.»

57Gà mburma ata ta gwaɗar: «Mive yak aka sle dzik ə̀zləm zukw tsəka, ki gweɗe a ka, Yàa ŋgat a Abəraham dze ana, meme?» 58Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Aka ana tàa wa Abəraham zukw tsiye ka, iye riŋ.» 59Tə tsaraka kataya ka, ta pala kur i bəɗ a, ta kelewa a dər ŋgat. Ama Yesuw a kaha ba aà tar a, ta ŋgatar asa tsa. I dəba ŋa ya ka, a dara aà tar i ga Mbulum batsah ŋa ata ya.

Currently Selected:

Yuhana 8: gnd

Highlight

Copy