Yuhana 6

Yesuw a vəl dukw mezime a gà mburma hinne, ti ze a

dəbuw ə̀zləm

Mata 14:13-21; Markus 6:30-44; Luka 9:10-17

1Aləka i dəba ŋa ya, Yesuw a mah ba i fataya, a daba aka lìdè duluv Galile. Tə zal a zləm duluv ata ka, Tiberiyas asa mbaŋa. 2Gà mburma hinne tə zazam ŋgat, aɗaba ana tàa ŋgat a dukw mene aà mburma ana a ge, a mbala à gà mburma i dukw məməta ya ya. 3Aləka ti ndzeha a fata ka, gà Yesuw nda gà ɓəzla mazazama ŋgat tə daha, tə tsala aka dìyes duwa, tə ndza riŋ a bəɗ a fata. 4Akahər ata ka, megirive gà Yahuda ana tə zalar Paska ya, aka à mendze aɗəm. 5Yesuw a fə̀r ikaba ya ka, gà mburma a riŋ ti dehe a a təv ŋgar hinne. Aɗaba taŋa, a gwaɗa a a Filip: «Ki slekwe aà mesìkimere a dukw mezime aaha ana, i ŋga ya, na aà mivile a gà mburma aaha ide ya?» 6A tsiker kataya ka, aà mesèmete dər, meme na Filip a gweɗe aaka a ya. Aɗaba ŋgat ŋa ka, aka səraba dukw ana a ge a ya. 7Filip a gwaɗar aaka: «Ku mege kà sə̀kəmakwara dukw mezime ŋa biy kur siŋgwe dərməka sula tekeɗe ka, a sle a ter a tsa, na dite bəla ku weke a ŋget a zaakwa zaakwa tekeɗe ya.» 8Mìsle ŋgiɗ ilik ika magər gà ɓəzla mazazama Yesuw ata ya, zləm ŋgar Andire, damər Simun Piyer, a gwaɗar: 9«Kəla duwa naha i faha ka, tapa ɗaf ihər ə̀zləm, nda kilif sula mbaŋa dze ana, taŋa na a ge a ŋgulum a gà mburma aaha hinne ya ya?»

10Yesuw a gwaɗa a gà ɓəzla mazazama ŋgat ata: «Gwaɗum a gà mburma tə ndzaya a bəɗ tserdze.» Gà mburma tə tsaraka kataya ka, tə ndzaya a bəɗ aka kwizir a riŋ mbèffe i bəɗ i fata hinne. Ama gà mburma ana i fataya, gà ɓəzla ga ɗekɗek ka, ti sle dəbuw ə̀zləm. 11Yesuw a daha, a ndzək tapa ɗaf ata, a ge dərraha kəkaaha a Mbulum, dite a dzaya a ba a gà mburma ata mandza ŋa i bəɗ a. I dəba ŋa ya, a ndzək kilif ata, a ge dər kamala taŋa ya asa mbaŋa, dite ku weke a zəm dukw mezime ata ka, a sler kamala ana gəzləŋ ŋgar a waya ya. 12Tə zəm ɗaf ata a sleye a tar lele ka, Yesuw a gwaɗa a gà ɓəzla mazazama ŋgat ata: «Yahum akaba gər a gà asiŋ ŋa ana a zeha ya, kwizikw ma ze a bəɗ tsa.» 13Tə tsaraka kataya ka, tə daha, ti yaha gər a gà mezehe tapa ɗaf ata ə̀zləm ŋa, gà mburma tə zəm ihər a. Ti yahar gər ka, a raha a gà tàkwasa kurwa gəra sula.

14Gà mburma ata i fataya, ta ŋgat a dukw mene aà mburma ata Yesuw a ge ya ka, ta gwa: «Wele aaha ka, mala məma à guma Mbulum ana ta gwa, a dere a aka gər ahəɗ a ndzer kaɗəŋ.» 15Yesuw a səraba, gà mburma ata ti dere a, ti tike a ŋgat aà mene Əbay tar nda ndzəɗa ka, a mbəɗ gər, a tsəlaba aka dìyes ata à gər ŋgar.

Yesuw a de a ika gər yam a nda sik

Mata 14:22-33; Markus 6:45-52

16Aləka hawa a ge ka, gà ɓəzla mazazama Yesuw tə tarra aà sik kwite ata ya, aà gùva duluv a. 17Tə tsala a slə̀làh yam. Ta waya ti de a dər aka lìdè duluv ata, a Kafarnahum. I təv ana ti de a ya ka, həvəɗ a gəs tar aà vatwa, Yesuw aka ndze a təv tar zukw tsa. 18Duluv yam ata a dza ba aà miɓezle wàkit wàkit hinne, aɗaba himbiɗ a riŋ ihər a ge a nda ndzəɗa. 19I təv mede tar ata ya ka, tàa da ka, kiliwmeter ə̀zləm, kige tsa ndilik. Aləka ta fə̀r ikaba ya ka, ta ŋgataha a Yesuw a riŋ a de a ika gər yam a nda sik tsə̀pàk tsə̀pàk, bise aka à mendzeha a təv tar. Ta ŋgatar kataya ka, ta ge magəɗa hinne. 20Ama Yesuw a gwaɗa a tar: «Ki gwim magəɗa tsa, iye na naha ya.» 21Ta waya magə̀saha ŋgat a slə̀làh yam a təv tar a fata zləmana ya. Tsam ka, tàa ndze aà gìgìze tsara, a təv ana a sàs a tar aà mede aɗəm a.

Gà mburma hinne ti yehe a Yesuw

22Ndidwe ŋana ka, gà asiŋ gà mburma ana ti zeha i dəba i fataya, ti yehe a Yesuw. Tə dzala ka, ta gwa: Slə̀làh yam a da ka, ilik pəra ka, kwets Yesuw iɗəm ɓav tsa, gà ɓəzla mazazama ŋgat ɗekɗek na tə da dər ana, Yesuw dze ana, i ŋga? 23Ama gà asiŋ gà slə̀làh yam ŋgiɗ tə dara i kwite Tiberiyas a bise nda təv ana ndeɗiŋa BATSAH kwa ŋa a zla dukw mezime, a ge dərraha kəkaaha a Mbulum, dite a vəl a mburma, tə zəm a. 24Aləka gà mburma ata ta fə̀r ka, ku gà Yesuw nda gà ɓəzla mazazama ŋgat tekeɗe, tar riŋ i fata asa tsəka, tə tsala a gà slə̀làh yam ata, tə da a kwite Kafarnahum, a mayaha Yesuw a fata.

Yesuw a ne dukw mezime ana a vile a mesife a mburma ya

25Ti ndze aka lìdè duluv ŋgiɗ ka, ti le aà Yesuw a fata kaɗəŋ. Ta gwaɗar: «Mala medzeŋge a mburma, kà dara a faha ya ana, ndeɗime?» 26Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ki yehwim a iye ka, aɗaba na kàa zəmum ɗaf, a sle a kurum a ɗekɗek pəra, tsəka, kàa tikwim dukw mene aà mburma gà ana i ge ya aà ahər tsa. 27Ka ta gwim megemir aɗaba dukw mezime ana ika gər ahəɗ, a ndze a hinne tsiye tsa. Ama gwim ka, aɗaba dukw mezime ana, a ndze a hinne, à ndìv a tsa aà biybiy, a vile a mesife a mburma ya ivaɗ. Dukw mezime ata a ndze a hinne, à ndìv a tsiye ka, iye, *wur ana a dara i təv Mbulum a, na a ta vile a a mburma ya. Aɗaba Mbulum Tsir gà na a viliŋ ndzəɗa aà mege dukw ata ya.»

28I fataya ka, gà mburma ata tə tsam aà Yesuw, ta gwaɗar: «Mìi ge a dze ana, meme, na dite mìi ge a gà mege megemir ata a sàs a Mbulum a?» 29Yesuw a gwaɗa a tar aaka: «Mege megemir ana Mbulum a veve a i təv kurum a ka, magəsa iye, iye wele ana Mbulum a slərra iye ya, nda gəzləŋ.» 30Ta gwaɗar aaka: «Na kataya ana, ki ge a ana, medzibe dukw mene aà mburma awara, na mìi ŋgeter a ka, dite mìi gis a dər kər nda ndzer a? Ɗe a mər dər te. 31Aɗaba akahər ata i təv ana gà tsir kwa tə ndzawa i kusak, ti de a aka ahəɗ Kanan a ka, tàa zəm dukw mezime ana a dara i gər ŋa, tə zalar *mana ya, kamala ana ta wetse i wakita Mbulum, ta gwa ka: <Mbulum aka vəl a tar dukw mezime ana a dara i gər ŋa ya, tə zəm.> «*fa*

32Yesuw a gwaɗa a tar aaka: «Iye ihər i tsik a kurum a nda ndzer, pàrsa iɗəm tsa: Dukw mezime ata akahər ata Musa a vəl a kurum i kusak a ka, na a dara i mbulum a nda ndzer a tsa. Ama dukw mezime ana Mbulum Tsir gà a vile a kurumara a i gər ŋa ya, na ndzer a. 33Aɗaba dukw mezime ata Mbulum a vile a a mburma ya ka, nda ahər wur ana a tarra i gər ŋa ya. Ŋgat na a ne dukw mezime ata, a vile a mesife a mburma ya.» 34Ta gwaɗar: «Əbay, vəl a mèr slala dukw mezime ata kəla pat te.» 35Yesuw a gwaɗa a tar: «Iye na a ne dukw mezime ata a vile a mesife a mburma ya. Wur ana a dere a a təv ga ya ka, may a wir ahər a tsa, dite wur ana à gis a iye nda gəzləŋ ŋgar a tekeɗe ka, yam à kiɗ a ŋgat asa tsa mbaŋa.

36Ama ar ka, kamala ana i lah metsike a kurum a, kàa ŋgetwimiŋ, dite kwets kàa gəsum iye nda gəzləŋ ɓav tsa. 37Gà mburma ana Tsir gà a dziŋ tar tserdze ya ka, ti dere a a təv gà ya, dite iye tekeɗe ka, wur ana aka dara a təv ga ya ka, i niw a ŋgat tsa. 38Aɗaba i tarra i gər ŋa ya ka, aà mege dukw ana a sèsiŋ a tsa. Ama i dara, i ge a ka, dukw wele ana a slər aakara iye ya. 39Dukw ana a sàs a wele ana a slərra iye ya ka, araha: Gà mburma gà ana a dziŋ tar a ahər a ka, ilik ma dzeye tsa. Ama ka, i mbele a à tar i məməta ya, a pat mandəvandəv gər ahəɗ ivaɗ. 40Dukw ana a sàs a Tsir gà ya ka, araha: Gà mburma ana tàa ŋgetiŋ, a iye, Kəla Mbulum, dite tàa gəs iye nda gəzləŋ tar a ka, ta ŋget a mesife ana à ndìv a tsa aà biybiy a, dite ka, i mbele a à tar i məməta ya, a pat ana gər ahəɗ à ndìv a ya.»

41I dəba bazlam ata Yesuw a tsik a tar a ka, gà mburma ata tə dza ba aà masàyà ahəm aka gər Yesuw hinne, a tsəɓ a tar, aɗaba ana a gwa: «Iye ka, i ne dukw mezime ana a tarra i gər ŋa ya» ya. 42Ti tsik akaba ika magər tar, ta gwa: «Abaya ŋgat ka, mì sər gà tsir ŋgar nda mama ŋgar. Ŋgat ka, Yesuw, kəla Yasufa dze ana, meme na a gweɗe a ka, i tarra i gər ŋa ya ya?» 43Yesuw a sər a taraha aka dukw ana tə dzala ya, a gwaɗa a tar: «Aàmala na ki seywim a aka iye ahəm kataya dze ya? Miyakum à mege arəv ana ki gwim aka iye a ika magər kurum a. 44Aɗaba wura a sle a aà medera a təv ga ya tsa, say na Tsir gà ana a slərra iye ya, aka gəsara ŋgat a tsiye. Ama ku weke na aka dara a təv ga ya ka, i ta mbil a à ŋgat i məməta ya, a pat ana gər ahəɗ à ndìv a ya. 45Akahər ata gà ɓəzla məma à guma Mbulum ta wetse i wakita, ta gwa ka: <Gà mburma tserdze ka, Mbulum nda gər ŋgar na a ɗif a ter a à guma ŋgar a.> Aɗaba taŋa, wur ana aka dza zləm a guma Tsir gà, dite aka gəs a ka, a dere a a təv ga ya.*fb* 46Taŋa ka, kərga megweɗe ya, wura aka ŋgat a Tsir gà ilik ɓav tsa. Say iye, wur ana a dara i təv ŋgar a ilik na a ŋgatar a.

47Iye ihər i gweɗe a kurum a nda ndzer, pàrsa iɗəm tsa: Wur ana aka gəs iye ya ka, aka ŋgat mesife ana à ndìv a tsa aà biybiy a. 48Iye ka, i ne dukw mezime ana a vile a mesife a mburma ya. 49Gà bàba gà tsir kurum ata akahər ata tə ndzawa i kusak a ka, tàa zəm dukw mezime ata tə zalar mana ya. Ama ku mege kataya tekeɗe, tàa mata. 50Ama wur ana aka zəm dukw mezime ata ndzer, a dara i gər ŋa ya ka, à mìt a tsidze. 51Iye ka, i ne dukw mezime ana a tarra i gər ŋa ya. Na wura aka zəm dukw mezime ata ka, a ndze a birek birek aà biybiy, à mìt a tsa. Dukw mezime ata i vile a a mburma, dite na ta ŋget a dər mesife ya ka, slu ba gà.»

52Agəra bazlam ata Yesuw a tsik a tar a ka, a vəl mimbètsè ahəm a gà mburma ata ika magər tar wuràpə̀ppa, ta gwa: «Wànà meme na wele aaha a sle a aà mivile a kwe a ba ŋgar ka, a ne a dukw mezime, ki zimekwe a ya?» 53Aɗaba taŋa Yesuw a gwaɗa a tar: «Iye ihər i gweɗe a kurum a nda ndzer, pàrsa iɗəm tsa: Na kàa zəmum slu ba gà, iye, wur ana i dara i təv Mbulum a tsa, nda gà bəla kàa sum məmbəz ga tsəka, ki ŋgetwim a mesife ndzer ŋana tsa. 54Ama wur ana a zim a slu ba gà, dite a se a məmbəz ga asa ya ka, aka ŋgat mesife ana à ndìv a tsa aà biybiy a. Dite i mbil a à ŋgat i məməta ya, a pat ana gər ahəɗ à ndìv a ya mbaŋa. 55Aɗaba slu ba gà ka, dukw mezime ana ndzer ŋa ya, dite məmbəz ga ibam ka, dukw mese ana ndzer ŋa ya mbaŋa. 56Wele ana a zim a slu ba gà, dite a se a məmbəz ga asa ya ka, ŋgat a ndze a i təv ga, dite iye tekeɗe, i ndze a i təv ŋgar mbaŋa. 57Tsir gà, mala məvəla mesife na a slərra iye ya. Iye ihər i ndze a ka, aɗaba ŋgat. Kamala taŋa ya, ku weke na aka zəm slu ba gà ka, a ndze a aɗaba iye mbaŋa. 58Aɗaba taŋa, iye ihər i tsik a kurum a asa: Taŋa na a ne dukw mezime ana ndzer ŋa, a dara i gər ŋa ya ya. Ama ar ka, kamala biy na gà tsir kurum tə zəm akahər ata, dite ta mata ya tsa. Ama ku weke na aka zəm dukw mezime ata i viler a ya ka, à mìt a tsa, a ndze a aà biybiy.» 59Yesuw a tsik guma ŋgar ata ka, i ga mahàmà a Mbulum gà Yahuda ana i kwite Kafarnahum a.

Bazlam Yesuw ana a vile a mesife a mburma, à ndìv a tsa

aà biybiy a

Mata 16:13-20; Markus 8:27-30; Luka 9:18-21

60Gà ɓəzla mazazama Yesuw tə tsaraka bazlam ŋgar ata tsara ka, gà asiŋ ŋa i liwiŋ tar hinne ta gwa: «Bazlam aaha ka, kuɗa ihər, weke na a sle a aà megìse ya?» 61Yesuw a səraha aka dukw ana i gər gà ɓəzla mazazama ŋgat ata tə dzala ya. A sər ka, a wir a ter a i gəzləŋ hinne. Aɗaba taŋa a gwaɗa a tar: «Wànà bazlam ata dze ana, a tsəɓ a kurum a? 62Dite meme seyiŋ a, na ki ŋgetwimiŋ a a pat ŋgiɗ, a iye, wur ana i dara i təv Mbulum a, i ti tsil a a təv ana i dara iɗəm piŋŋe ya. 63Mezite Mesife Mbulum na a vile a mesife a mburma ya, tsəka, ndzəɗa mburma a sle a duwa tsa. Gà bazlam ana i tsik a kurum a ka, na a vile a kurum a mesife ndzer ŋana, a dara i təv Mezite Mesife Mbulum a. 64Ama ka, gà mìsle ŋgiɗ ika magər kurum tàa gəs iye nda gəzləŋ tar tsa.» Aɗaba Yesuw a sər gà mburma ana ta gis a ŋgat tsiye, nda wele ana a ta ge aà ŋget a ɗaf a daga piŋŋe. 65Yesuw a səkah dər aaka asa, a gwaɗa a tar: «Aɗaba taŋa na i gwaɗa a kurum ka: Wura a sle a aà medere a a təv ga ya tsa, na Mbulum Tsir gà aka vəlarra vatwa ya tsiye.»

66I təv ana gà ɓəzla mazazama ŋgat tə tsaraka bazlam ŋgar ata ya ka, gà asiŋ ŋa i magər tar hinne, ta məsak à mazazama ŋgat, ta mbəɗ gər a dəba. 67I dəba ŋa ya, Yesuw a tsam aà gà ɓəzla mazazama ŋgat ana kurwa gəra sula a pala tar a, a gwaɗa a tar: «Kurum dze ana, wànà a sàs a kurum mede mbaŋa ya?» 68Simun Piyer a gwaɗar aaka: «Batsah mər ŋa, mìi de a dze ana, a ŋga, mìi zezem a weke asa ya? Kər na kà vəl a mər bazlam ana a vile a mesife a mburma, à ndìv a tsa aà biybiy a. 69Kinehe ka, maa gəs kuɗa, mì sər ka, kər ka, wele ana tsəɗaŋŋa, kà dara i təv Mbulum a.» 70Yesuw a gwaɗa a tar aaka: «Wànà iye tsiye na a pala kurum kurwa gəra sula ya? Ama mìsle ŋgiɗ ilik ika magər kurum a ka, sitene.» 71A tsik taŋa ka, aà Yudas ana kəla Simun Iskariyut a. Aɗaba Yudas ka, ku mege ŋgat i liwiŋ gà mburma kurwa gəra sula ŋa aaha tekeɗe ka, a ta ge aà ŋgat a ɗaf.

Currently Selected:

Yuhana 6: gnd

Highlight

Copy