Yuhana 10

Bazlam minew makəva gà təmaŋ

1Yesuw a tsik a tar bazlam minew asa, a gwaɗa a tar: «Iye ihər i tsik a kurum a nda ndzer, pàrsa iɗəm tsa: Ama wur ana a de a a dagara gà təmaŋ ndaka biye hərmaga tsa, a de a ka, ndaka vatwa ŋgiɗ a ka, ŋgat a ne ka, mala akəl, à kìzele a mburma. 2Ama wur ana a de aɗəm a ndaka biye hərmaga ya ka, ŋgat ka, mala makəva gà təmaŋ. 3Na bəla wele ana a kesle a biye hərmaga ya ka, à hìndìk a i ga a mala makəva gà təmaŋ ata ya, a de aɗəmiŋa. A zel a a gà təmaŋ ŋgar nda zləm tar ilik ilik tserdze. Ti tserekiŋa, dite à kìvere a tar a bəra ya. 4Na aka kə̀vara tar a bəra ya ka, a ndze a ter a aka miɗ, dite gà təmaŋ ti zezemehe a ŋgat i dəba ya, aɗaba tə sər biye ɗa ŋgar. 5Ama ti sle aà mezezeme a wur ana tə sər ŋgat tsiye tsa. Ta vel a ihər a, aɗaba ana tə sər biye ɗa ŋgar tsiye.»

6Yesuw a tsik a tar guma ata ka, ndaka bazlam minew, ama tàa tsaraka bazlam ata a tsik ana, aka gər là ka, tə sər tsa, dèrze ikəka.

Yesuw a ne ka, mala makəva gà dukw ana ŋgwal ŋa ya

7I dəba ŋa ya, Yesuw a gwaɗa a tar asa: «Iye ihər i gweɗe a kurum a nda ndzer, pàrsa iɗəm tsa: Iye i ne hərmaga dagara gà təmaŋ. 8Gà mburma ana ti lìhiŋara tserdze ya ka, ti ne gà ɓəzla akəl, tàa kə̀zala mburma, ama gà təmaŋ tàa dza zləm a mifefile tar tsa. 9Iye na i ne biye hərmaga ya. Wele ana a de a a dagara ata nda təv ga ya ka, a mbiliŋa. A ŋget a vatwa mada aɗəm, nda madàra iɗəm a. Ŋgat ka, barbararra, kuɗa duwa a ger a tsa. 10Aɗaba mala akəl a dere a ka, aà mege akəl, aà makə̀ɗà mburma, dite aà manəsa à duwa ndzàɗak ndzàɗak a bəɗ. Ama iye i dara ka, dite gà mburma tə ndza barbararra, ta ŋgat mesife ana à ndìv a tsa aà biybiy a.

11Iye i ne ka, mala makəva gà dukw ana ŋgwal ŋa ya. Mala makəva gà dukw ata ŋgwal ŋa ya ka, aka hadzal ba aà medzeye à mesife ŋgar, agəra gà təmaŋ ŋgar. 12Wur ana a ge a megemir siŋgwe ya ka, ŋgat ka, mala makəva gà dukw ana ndzer a tsa, aɗaba gà təmaŋ tekeɗe, gà biy ŋgar tsa. Bəla kəra dala aka hitse aà tar ka, a miyek a à tar, a velebiŋa. Dite kəra dala ata a dehe a, à gese a tar. Gà asiŋ ŋa aaha ta gwitse a aba sweyèh sweyèh a dala a təv ŋa. 13A vel a ka, aɗaba ana madzala gà gər ŋgar ka, aka dukw maya ba ŋgar ɗekɗek, a dzele a gà təmaŋ tsiye. 14Iye ka, i ne mala makəva gà dukw ana ŋgwal ŋa ya. I sər gà təmaŋ gà. Gà təmaŋ gà tekeɗe, tə sər iye mbaŋa, 15kamala ana Tsir gà a sər iye ya, dite iye tekeɗe, i sər ŋgat mbaŋa ya. Yàa hadzal ba aà medzeye à mesife gà agəra tar. 16Gà təmaŋ gà ŋgiɗ a riŋ i dagara aaha zukw tsa. Ama say i yehere a tar a mbaŋa. Ti ti dze a zləm a mifefile gà. Ta gew a ba a təv ilik ŋa. Ti ne akaba a palam ilik, mala makəva tar tekeɗe, ilik mbaŋa.

17Tsir gà a weye iye ka, aɗaba ana Yàa hadzal ba aà medzeye à mesife gà ya. Dite i sər ka, i ŋget a mesife ata asa. 18Wura a sle a aà mezle aà iye mesife gà ata ya nda ndzəɗa tsa. Ama iye ŋa i dzeye a à mesife gà. Dite ndzəɗa gà a riŋ aà maŋgata aɗəm asa. Kamala taŋa ya, i ge a ka, dukw ana Tsir gà a gweɗiŋ, ge ya.»

19Gà mburma ata tə tsaraka bazlam minew Yesuw ata ka, bazlam a da a tar aaba tsa, tə ndzaka ba ikaba ya təv pampam asa. 20Gà asiŋ gà mìsle ŋgiɗ hinne ta gwa: «Sitene na i ba ŋgar a. Aàmala na ki dzèkwe a zləm a mifefile mala mibe a dala ya?» 21Gà mìsle ŋgiɗ ta gwa asa: «Wele ana sitene i ba ŋgar a ka, a sle aà mifefile a kataya tsa. Wànà sitene a sle a aà mahə̀ndə̀kà ika are ya a mala guluf a?»

Gà Yahuda ta gəs bazlam Yesuw tsa

22Akahər ata ka, gà Yahuda ti tìkir a megirive məma à batsah ga Mbulum ana ta mà dər aà mbulum a, i Yeruzalem. Ta gewa megirive ata ka, akahər mə̀tasl. 23Yesuw a riŋ i megirive ata mbaŋa. A riŋ à sìweye a aà huɗ màsàpàr ana tə zalar màsàpàr Salumun a, aà batsah ga Mbulum ata. 24Gà Yahuda ata ta ŋgatar ka, ti yaha ba gər a təv ŋgar, ta gwaɗar: «Ki ti ɗif a mər a aba, kər ana kà dara i ŋga ya ana, ndeɗime? Na kər *Kiristi, mala məmbàlà à mburma ana Mbulum a gwa, i ti slir a kurumehe a ya ka, tsik a mər lele.»

25Yesuw a gwaɗa a tar aaka: «Yàa tsik a kurum aka ndəv, ama a sàs a kurum megìse bazlam gà tsa. Gà megemir ŋgwal ŋa ana i ge a nda ndzəɗa Tsir gà ya na à pèt a kurum a dər ka, iye ana, weke ya mbaŋa. 26Ama a sàs a kurum megìse nda gəzləŋ tsəka, aɗaba ana kàa nwim gà mburma gà tsiye. 27Gà mburma gà ka, tì dze a zləm a mifefile gà. Ti ne kamala gà təmaŋ ana tì dze a zləm a mifefile mala makəva tar a. I sər tar, dite tar tekeɗe, tar riŋ ti zezem a iye mbaŋa. 28I vile a ter a mesife ana à ndìv a tsa aà biybiy a, ta mete a tsidze, dite wura a sle aà mekìzelere a tar i ahər gà ya asa tsa. 29Tsir gà na a dziŋ tar a ahər a ka, a za gà dukw ana tserdze ya. Aɗaba taŋa na wura a sle aà mekìzele a tar i ahər ŋgar a tsidze ya. 30Mər ka, ilik nda Tsir gà.»

31Gà Yahuda ata tə tsaraka bazlam ŋgar ata kataya ka, tə ndzək kur a ahər, ta waya makàlàwà ŋgat asa. 32Ama Yesuw a gwaɗa a tar: «Yàa ge gà megemir ŋgwal ŋa hinne ika miɗ kurum nda ndzəɗa Tsir gà. Ika magər gà dukw ata i ge tserdze ya ana, agəra awara ilik a na a sàs a kurum ki kelewwim ahər a iye nda kur a?» 33Gà Yahuda ata ta gwaɗar aaka: «A sàs a mər makàlàwà kər ka, agəra ana ki ge gà megemir ŋgwal ŋa ya tsa. Ama aɗaba ana ka ne bakal à Mbulum, kà tsik ahər dukw ana ŋgwal ŋa tsiye ya. Kər ka, mburma məfara ŋa, tsəka, Mbulum tsa. Ama ka, a sàsak mene à ba yak Mbulum.»*fa*

34Yesuw a gwaɗa tar aaka asa: «A riŋ mewetse ŋa i wakita məpala ahəm kurum ka, Mbulum a gwa: <Yàa tsik a kurum, kurum ka, ku weke a ne kamala Mbulum a.>*fb* 35Kà sərakwa ka, ki slekwe a mimbete à dukw ana wakita Mbulum a tsik a tsa. Ama Mbulum a zal a gà mburma ana a tsik a tar bazlam ŋgar akahər ata ya ka, ku weke a ne kamala Mbulum a. 36Iye kinehe tekeɗe, ŋgat na a zla iye, a slərra iye aka gər ahəɗ a. Dite ka, meme na ki slwim aà megweɗe a, i ne a dər bakal, agəra ana i gwa, iye Kəla Mbulum a? 37Na i ge a ka, megemir Tsir gà tsəka, taŋa ka, wura mà gəs mifefile gà ɓav tsa. 38Ama na bəla iye riŋ i ge a megemir ŋgar ka, ku mege kàa gəsum bazlam gà tsa tekeɗe, gəsum iye, aɗaba megemir ana iye ihər i ge a ya, na dite ki sirwim a dər parakkà ka, Tsir gà a riŋ mandza ŋa i təv ilik ŋa nda iye, iye tekeɗe, iye riŋ mandza ŋa i təv ilik nda ŋgat mbaŋa ya.»

39I fataya tsara ka, ti yaha vatwa aà magəsa ŋgat asa. Ama ka, a be aà tar a.

40I dəba ŋa ya, Yesuw a mbəɗ gər aka lìdè dulwa Yurdan asa, a təv ana Yuhana a tsilwiɓewa iɗəm à mburma a yam akahər ata ya. A daha, a ndza riŋ i fata zaakwa. 41Gà mburma hinne tə daha a təv ŋgar. Tə daha ka, ta gwa: «Yuhana ka, aka ge dukw mene aà mburma ilik tsidze, ama dukw ana a tsik nda təv wele aaha fit a ka, ndzer kaɗəŋ.» 42Aɗaba taŋa gà mburma ana i fataya hinne, ta gəs ŋgat nda gəzləŋ.

Currently Selected:

Yuhana 10: gnd

Highlight

Copy