Gà Ɓəzla Meslire 2

Mezite Mesife Mbulum ana a dara ya

1A pat Pantakwasta *megirive gà Yahuda ana a ndzera ya ka, gà ɓəzla magəsa Yesuw nda gəzləŋ mayahaba gər ŋa i təv ilik ŋa asa mbaŋa. 2Zàmma tsəka, meɗè zləm duwa a ɗera i gəza mbulum a. Dukuməŋa a ɗe ka, kamala himbiɗ ana a ge a nda ndzəɗa ya. A daha, a rah à miɓizle ŋgar a ga ana gà mburma ata iɗəm a hinne. 3Ta ŋgat a dukuməŋa i fata kamala arah akwa ya. Gà dukw ata tə da ikaba ya, tə daha, tə ndzaya aka gà mburma ilik ilik tserdze. 4Gà mburma ata tserdze ya, Mezite Mesife Mbulum a rah a tar a gəzləŋ. Tə dza ba aà mifefile, ku weke ndaka ahəm ŋgiɗ pampam, kərga na Mezite Mesife Mbulum ata a gwaɗa a tar, tsikwim a.

5Ama gà Yahuda a riŋ, tə ndzawa i Yeruzalem. Tə zazamawa fəla gà Yahuda ka, nda ndzer. Tə dayara ika gà ahəɗ ana tserdze ika gər ahəɗ fit a. 6Tə tsaraka miɓizle dukw ata ka, ti yaha ba gər hinne. A ge aà tar ata tserdze ya ka, kamala sunwa ya, aɗaba na tə tsaraka mifefile gà ɓəzla magəsa Yesuw ata ndaka ahəm ŋgiɗ pampam, ku weke a tsarakara iɗəm i ŋgar a. 7I dəba ŋa ya, ta gwa: «Yweh, yweh, naha ana, meme na tar gà Galile ka, 8ku weke, ta fèfil a i magər tar ka, ndaka ahəm kwite kwa ya? 9Aɗaba araha, gà asiŋ ŋa ɗa i liwiŋ kwa ka, tə dayara ka, ika gà ahəɗ Partiya ya, nda Mediya ya, nda gà Ilam a, dite ika ahəɗ Mezapitamiya, ika gà ahəɗ Yuda nda Kapadukiya ya, ika gà ahəɗ Pwantus nda gà ika ahəɗ gà Ruma ana i Asiya ya, 10ika gà ahəɗ Firigiya nda Pamfiliya, ika gà ahəɗ Ezipt nda biy Libiya ana bise nda Kirene. Gà mburma ana tə dara i Ruma ya, tar ɗa i faha mbaŋa. 11Dite gà na ika ahəɗ Kereta, nda Arabiya ya tekeɗe, tar ɗa iɗəm i faha mbaŋa asa. Ama gà asiŋ ŋa ɗa i liwiŋ kwa ka, gà na gà wur gà Yahuda ndzer a, gà asiŋ ŋa ibam, gà slele ana ti ne gà Yahuda ya. Magwàɗà ŋa tar ka, gà Galile, tsaatsa kà tsarakwa mezlibe tar ana tì zlibe a à Mbulum ndaka ahəm kwa pampam agəra ŋgwal ŋgar ana a ge a ya.» 12A ge a tar tserdze kamala sunwa ya, tə sər dukw ana ti dzele a ya tsa. Ta gwaɗaba ika magər tar: «Taŋa dze ana, dukùla na kamala megweɗe ya?» 13Ama gà mìsle ŋgiɗ pam ka, tə dza ba aà masàwlà aà gà ɓəzla magəsa Yesuw ata. Ta gwa: «Tar ka, gà ɓəzla mekweye.»

Bazlam Piyer a pat Pantakwasta

14I dəba ŋa ya, gà Piyer nda gà asiŋ gà ɓəzla meslire Mbulum ata kurwa gəra ilik a, ta hitse aà mbulum, dite Piyer a dza ba aà mifefile a gà mburma ana i fataya, ŋgəlakəkka nda ndzəɗa. A gwaɗa a tar: «A kurum gà Yahuda nda gà mburma ana ɗa mandza ŋa i Yeruzalem tserdze ya. Tsarakum, dite kà dzum zləm a dukw ana i tsik a kurum a ya lele: 15Gà mburma aaha ka, gà makwàyà ŋa kamala ana kà dzalum a tsa, aɗaba ar ka, ndzemde tswiɗ biy mèkwède pəra, a sle mekweye ɓav tsa asa. 16Ama kinehe ka, dukw ana Mbulum a tsik piŋŋe nda ahər mala məma à guma ŋgar Ziwel a ka, aka sle kuɗa. 17Aɗaba Mbulum a gwa ka:

<A pat mandəvandəv gər ahəɗ ka,

i dzèye a Mezite Mesife gà a gà mburma tserdze.

Gà ɓəza kurum nda gà dəm kurum

ti ta me a à gùma gà.

Gà ɓəza kurum gà gawla ŋana ti ta ŋget a vatwa

i sunwa ya, tar riŋ nda are lele, tàa ndze are tsa.

Dite sunwa a ta ge a a gà mburma kurum ana

gà màndawal ŋa ya.

18I ti dzeye a Mezite Mesife gà

a gà ɓəzla megemir gà, ku mege

a gà asləka ŋana nda gà dəm ŋana tserdze.

Dite ti ta me a à guma gà.

19I ta ge a gà dukw gà bàba ŋa na hinne

i gər ŋa i mbulum.

Dite i ta ge a gà dukw mene à mburma i bəɗ

ika gər ahəɗ asa: Gà məmbəz nda gà akwa,

nda gà hədzək ti ta ge a riŋ ziŋziŋ.

20Pat tekeɗe, à div a asa tsa. Dite

kiye à mbìɗ a aba nduzzwa, kamala məmbəz a.

Gà dukw ata ta ge a ba fit dzekwiŋ,

na dite pat Batsah kwa ŋana a dere a ya.

Pat ata ka, ŋgwal ŋa ndzer, pat maŋgayaba.

Mezlibe ŋgar hinne.

21Kuɗa kəla ka, wur ana aka ɗə̀v zləm

a BATSAH kwa ŋa ya ka, a mbiliŋa.> «*fa*

22Piyer a gwaɗa a tar asa: «A kurum gà mburma Isərayel, iye ihər i gweɗe a kurum ŋa, dzum zləm a dukw ana i tsik a kurum a ya lele: Yesuw gà Nazaret ka, Mbulum na a slərra ŋgat a. Kamala taŋa ya, aka ge gà dukw mene à mburma ŋgiɗ pampam hinne nda ahər ŋgar, kamala meɗìfè à duwa a mburma ya tserdze mbaŋa. Kàa ŋgatum a gà dukw ata tserdze ya, ika magər kurum. 23Ama ta vəl a kurum vatwa aà makə̀ɗà ŋgat ka, kamala na Mbulum a tsik daga piŋŋe, a ta ge a ba ya dukw ŋgar. Ka vəlum ŋgat a ahər gà na tə sər Mbulum tsiye, tə ndwandway ŋgat aà dizl magə̀làwà ŋa. 24Ama Mbulum aka hitse à ŋgat i məməta ya, a mesife. Dite aka be à ŋgat i ahər mesewere are məməta ya asa. Aɗaba a ge a ba tsa, na à mìts a i məməta hiywe ya. 25Aɗaba taŋa na Dawda a tsik ahər piŋŋe ka, a gwa:

<I ŋgatawa a Batsah ga ŋa kəla pat ika miɗ gà.

Ŋgat ka, ahər mezime gà, dite ka, i təv

dukw ana tserdze ya ka, i dzedzer a asa tsiye.

26Aɗaba taŋa na gəzləŋ gà tekeɗe,

maràhà ŋa nda maŋgayaba fit a.

Dite nda bazlam gà tserdze ya,

i ndze a ka, barbararra.

Ku mege i mìt a tekeɗe ka, i dzele a tsa.

27Aɗaba ki ta miyek a à iye i biye a məməta tsa.

Dite ki ta vile a vatwa a wur ana i təv yak a

aà meze tsa asa.

28Kàa ɗifiŋ à vatwa ana a de a a təv mesife ya.

Ki ta viliŋ a maŋgayaba hinne,

aɗaba ana i sle aà mendze i təv yak a.> «*fb*

29Piyer a gwaɗa a tar asa, «Gà damər gà, Yàa ŋgat vatwa aà mifefile a kurum ndərzakka nda təv batsah tsir kwa Əbay Dawda. Ama ŋgat ka, aka mət, tàa le ŋgat a biye. Dive ŋgar ɗa kinehe tekeɗe ka, kà sərakwa. 30Ama ŋgat akahər ata ka, mala məma à guma Mbulum, dite a sər ka, Mbulum aka tsikiŋ lele i sida ya ka, i ta vile a batsah Əbay gà a mìsle ŋgiɗ ilik ika magər gà ɓəza yak. 31Dawda aka sər dukw ana a ta ge a ba ika miɗ daga piŋŋe ya, ama a tsik bazlam ŋgar ata ka, aà mala məmbàlà à mburma ana Mbulum a gwa ka, i slir a kurumehe a, a mbilere a i məməta ya, i təv ana a gwa ka, tàa miyak à iye i məməta tsiye, dite slu ba gà tekeɗe, a ze a tsa asa ya.

32Mbulum aka mbəlara à Yesuw ana a tsik aà ŋgat a, a mesife ya, dite mər tserdze na gà ɓəzla sida ŋa ya. 33Mbulum Tsir ŋgar a zla ŋgat, a tike ŋgat aka tsèke ahər mezime ŋgar. Aka vəlar Mezite Mesife ŋgar ana a gwaɗar, i vilek a i sida ya. I dəba ŋa ya, ŋgat tekeɗe, a zazəɗ dərra a təv kwa ya. Aɗaba dukw ana kinehe kurum riŋ ihər ki tserekwim a, dite ndəna ki ŋgetwimer a ya ka, taŋa ka, megemir Mezite Mesife Mbulum ata a ge a ya. 34Aɗaba Dawda ka, aka tsəl a mbulum tsa. Ama ŋgat a gwa:

<Mbulum a gwaɗa a Batsah ga ŋa:

Ndza aka tsèke ahər mezime gà,

35haa a pat ana Yàa dzak gà ɓəzla mene are

aà huɗ sik yak, kamala bwitse ya dzekwiŋ.>*fc*

36Aɗaba taŋa kinehe tekeɗe ka, gà mburma Isərayel tə sər fit nda ndzer, Yesuw aaha kà ndwandwayum aà dizl magə̀làwà ŋa ya ka, ŋgat na Mbulum a ne dər BATSAH kwa ŋa, dite ka, mala məmbàlà à mburma ana Mbulum a gwa, i slir a kurumaha a asa ya.»

37Gà mburma ata tə tsaraka bazlam ata tsara ka, arəv a da aà tar a, ta ge magəɗa hinne. Ta gwaɗa a gà Piyer nda gà asiŋ gà ɓəzla meslire Mbulum ŋgiɗ: «Gà damər mər, dite mìi ge a dze ana, meme?» 38Piyer a gwaɗa a tar aakaha: «Mbəɗum à madzala gà gər kurum, dite ti tsilwiɓ à kurum a yam, nda zləm Yesuw Kiristi. I dəba ŋa ya, Mbulum à pìl a kurum a à bakal kurum, dite ka, ki ŋgetwim a Mezite Mesife Mbulum ana a vile a kurum a ya. 39Aɗaba Mbulum a vəl Mezite Mesife ŋgar ata i sida ya ka, agəra kurum aaha nda gà ɓəza kurum a, dite agəra gà mburma ana tserdze, ti ndze a ku mege i təv diriŋ a ya asa mbaŋa. Ama a vile a ka, ku mege i ŋga, a gà na Mbulum BATSAH kwa ŋa a zel a ter a ya tserdze.»

40Ama Piyer a tsik a tar bazlam ŋgiɗ pampam hinne asa, a mà a taraha à arəv, a waya na ta gəs bazlam ŋgar ata nda ndzer a, ti ya ba tsidze. A gwaɗa a tar: «Gəsum bazlam Mbulum ata a ta mbil a à mburma ya, dite ka, ka tə ndzum i təv gà mburma aaha ti ti dzeye ya tsa.» 41Gà mburma hinne ta gəs bazlam Piyer ata, ti tsilwiɓ à tar a yam. A pat ata ka, gà mburma ti sle a dəbuw makər, na tə sə̀kàhəha a təv gà ɓəzla magəsa Yesuw nda gəzləŋ ata ya. 42Tar ata tserdze ya, tə dzawa zləm a guma ana gà ɓəzla meslire Mbulum ata ti ɗifewa a tar dər a ka, lele nda metsehe. Tə ndzawa ba ka, say i təv ilik ŋa. Tə zəmawa ɗaf tekeɗe, i təv ilik ŋa asa. Dite ta hamawa aà Mbulum tekeɗe ka, i təv ilik ŋa asa mbaŋa.

Masəra ba ana ika magər gà ɓəzla magəsa Yesuw

nda gəzləŋ a

43Mbulum a gewa gà dukw mene à mburma ŋgiɗ pampam hinne nda ahər gà ɓəzla meslire ŋgar. Agəra taŋa gà mburma ana i fataya tserdze, arəv a da dər aà tar a, tə ndzawa ka, nda gà magəɗa. 44Gà ɓəzla magəsa Yesuw nda gəzləŋ, tə ndzawa ba i təv ilik ŋa, tar tserdze, tə dzayawa à ba gà dukw tar a fit, a təv ilik ŋa ya mbaŋa. 45Tə dzawa à gà gùvàh, nda gà dukw tar tserdze, dite tə dzàyawaba siŋgwe ŋa ika magər tar tits na duwa aka sle aà wura ya. 46Kəla pat ti yahawaba gər a təv ilik ŋa i ga Mbulum batsah ŋa na. Ti yahawaba gər aà mazəma ɗaf i gà ma tar ilik ilik tserdze. Tə zəmawa ka, nda gà maŋgayaba nda gəzləŋ ilik. 47Tə zàmbaɗawa dər aà Mbulum hinne, gà mburma tserdze ta waya tar. Kəla pat BATSAH kwa ŋa a sə̀kàhawaha à gà mburma ana a mbala à tar a, aka gà ɓəzla magəsa ŋgat ata nda gəzləŋ ilik a.

Currently Selected:

Gà Ɓəzla Meslire 2: gnd

Highlight

Copy