Matéo 5
5
Hesu omombe’u Ñanderuete rembipota peteĩ cérro ári guive
1Ha Hesu ohechávo hetãygua aty ndetuicháva, ojupi peteĩ yvytýpe ha oguapy rire, hemimbo’ekuéra ou hendápe.
2Ha Hesu oñepyrũ oñe’ẽ ha ombo’e ichupekuéra he’ívo:
3Ipy’a rory umi oikuaáva imboriahuha ipytu porãme, imba’e ningo Ñanderuete retãguasu.
4Ipy’a rory umi imba’embyasýva, Ñanderuete voi omoangapyhyva’erã ichupekuéra (Apocalípsis 21,4).
5Ipy’a rory umi ipy’a porãva hapichakuéra ndive, oñeme’ẽva’erã ichupekuéra ko yvy kóva imba’erã ramo.
6Ipy’a rory umi iñembyahýiva ha ijy’uhéiva ñembojovake heko pegua rehe, oñemohyg̃uatãva’erã ichupekuéra.
7Ipy’a rory umi oporoporiahuverekóva, ha’ekuéra ohupityva’erã poriahuvereko.
8Ipy’a rory umi ipy’apy potĩ joheipyréva, ha’ekuéra ohechava’erã Ñanderuetépe.
9Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.
10Ipy’a rory umi ojeperseguíva justícia rehehápe, imba’eva’erã Ñanderuete retãguasu.
11Pende py’a rory pende rapicha pendeja’o ramo, pendepersegui ramo ha japúpe oñe’ẽvai ramo penderehe che réra rayhupápe.
12Pevy’aite ha tapendepy’a roryete, ituichágui pe jopói (regálo) peguerekóva yvágape, péicha omuñava’ekue avei hikuái umi profetakuérape, oikomava’ekue peẽ mboyve guaréva.
Hesu Crísto rehegua oikova’erã juky ha tesape ramo
13Peẽ ningo pe juky ko yvy ári; pe juky nahe’ẽvéi ramo, mba’épepa oñemohe’ẽ jevýne. Mba’everã ndojeporukuaavéi, oñemombo hag̃uántema okápe, yvyariguakuéra opyrũmba hag̃ua hese.
14Peẽ ningo tetãyguakuéra resape; pe táva oñemopu’ãva cérro ru’ãme ndaikatúi oñemi.
15Avave nomyendýi peteĩ tataindy omoĩ hag̃ua peteĩ mba’yru guýpe, tataindy renda árinte uvei, ohesapepa hag̃ua oĩva guive pe óga ryepýpe.
16Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.
Hesu Crísto ombo’e Ñanderuete rembiapoukapy oñeme’ẽva’ekue Moises rupi
17Ani peimo’ã Che aju hague ambyai hag̃ua Moises rembiapoukapy, ni profetakuéra ñe’ẽngue, ajapopa ha amyenyhẽmba hag̃ua hekópente.
18Añetehápe Che voi ha’e peẽme, opa peve ára ha yvy, ndojeimo’ãi peteĩ létra michĩva ni peteĩ létra pehẽngue (jepe) Moises rembiapoukapykuéragui, oikopava’erã katu (ojehai hagueichaite).
19Upévare oimeraẽ omboykéva peteĩ Moises rembiapoukapy michĩetéva jepe ha péicha ombo’e ramo avei hapichakuérape ojapo hag̃ua, ojeguerekova’erã michĩvéva ramo Ñanderuete retãguasúpe. Ha upe ojapóva ha ombo’éva hekoitépe katu ojeguerekóta ituichavéva ramo Ñanderuete retãguasúpe.
20Che voi ha’e peẽme, pende reko naiporãvéi ramo umi kuatiahaihára ha fariseokuéragui, mba’evéicharõ ndapeikemo’ãi Ñanderuete retãguasúpe.
Hesu oñe’ẽ pohýi
21Pehenduva’ekue umi ñe’ẽ oje’eva’ekue ymaguarépe: Ani peporojuka, ha upe oporojukávape oñembojovakeva’erã.
22Che katu ha’e peẽme: Oimeraẽ ipochýva ityke’ýra ndive, oñembojovakeva’erã itáva mbojovakeharakuéra renondépe; ha umi he’íva ityke’ýrape ndevýro, oñembojovakeva’erã hetã mbojovakeharakuéra renondépe, ha umi he’íva ndetarova, ho’ava’erã aña retã ratápe opa’ỹvape.
23Upévare nde regueru ramo Ñanderuete rendápe ne remime’ẽ ikuave’ẽmby rendápe, ha upejave nemandu’a ramo nde ryke’y naiporãveiha nendive,
24eheja ne remime’ẽ pe kuave’ẽmby renda renondépe ha tereho eñemoĩ porã jevy raẽ nde rapicha ndive, ha upéi eju ha eme’ẽ ne kuave’ẽmby (remime’ẽ).
25Eiko porãke nderehe ija’e’ỹva ndive, reime aja hendive tapére, ani hag̃ua nderehe ija’e’ỹva nemoĩ mbojovakehára pópe, ha pe mbojovakehára nemoĩ tahachi pópe, ha’e nemoinge hag̃ua cárcelpe.
26Añetehápe ha’e ndéve, neresẽmo’ãi upégui remyengoviapa peve opaite pirapire redevéva guive.
Hesu Crísto ha pe mendare rehegua ñemongy’a
27Pehendu ningo oje’e hague: Ani remongy’a ne mendare reko.
28Che katu ha’e peẽme, oimeraẽ omañáva peteĩ kuña rehe ha oñenoséva hendive, upéva oñenóma voi hendive ipy’apýpe, ha omongy’áma imendare reko.
29Upévare nde resa akatúa nemoñepysãngáta ramo tembiapo vaípe, eipe’a ha emombo mombyry, iporãve oñehundi peteĩ nde rete rehegua, oñemombo rãngue opaite nde rete reheve aña retãme.
30Ha nde po akatúa nemoñepysãngase ramo tembiapo vaípe, eikytĩ ha emombo mombyry; iporãve ningo ndéve, oñehundi peteĩ nde rete reheguáva oñehundi rãngue opaite nde rete aña retãme.
Hesu Crísto ha pe mendare jepoi kuatiañe’ẽ
31Oje’eva’ekue avei: Upe opoíva hembirekógui, tome’ẽ ichupe peteĩ mendare jepoi rehegua kuatiañe’ẽ.
32Che katu ha’e peẽme: Upe opoíva hembirekógui, ndaha’éi ramo mendare ñemongy’a rupi, ombyai imendare reko, ha upe omenda jevýtava hese ombyai avei imendare reko.
Ani repyrũ ne ñe’ẽ rehe
33Pehendu ningo avei oje’e hague yma pende ypykuérape: Ani repyrũ ne ñe’ẽ reme’ẽmava’ekuére Ñanderuete rérape, ejapopa katu hekoitépe repromete haguéicha Ñanderuetépe.
34Che katu ha’e peẽme, anítei peme’ẽ pene ñe’ẽ yvága rehe, péva ningo Ñanderuete guapyhaguasu voi;
35ni ko yvy kóva rehe, péva Ñanderuete py renda; ni Jerusalen rehe, péva ningo Ñanderuete tavaguasu;
36ni peme’ẽ pene ñe’ẽ pene akã rehe, ndaikatúigui nde remomorotĩ térã remohũ peteĩ ne akã rague jepe.
37Peje uvei: Néi, néi, térã nahániri, nahániri; pejeve ramo péva árigui, péva ou añáguima.
Ehayhu nderehe ija’e’ỹvape
38Peẽ pehendúma oje’e hague: Tesa, tesa rekovia; ha tãi, tãi rekovia.
39Che katu ha’e peẽme: Ani pemyengovia pe mba’evai ojejapóva penderehe; oimeraẽ penenupãva pende rova akatúape, pemoĩ avei ichupe pende rova asu peguáva.
40Oime ramo ndeguerahaséva mbojovakehára rendápe oipe’a hag̃ua nde kamisa, eheja avei ichupe ne póncho.
41Ha oime ramo peteĩ ndejopýva reho hag̃ua 1500 métro hendive, tereho hendive 3.000 métro.
42Nde rapicha ojerure ramo reipytyvõ hag̃ua ichupe ani reñemboyke ichugui.
43Peẽ pehendúma oje’e hague: Ehayhu nde rapichápe, ha nderehe ija’e’ỹvape katu nderehayhuiva’erã.
44Che katu ha’e peẽme: Pehayhu penderehe ija’e’ỹvape, ha peñembo’e umi pendeperseguíva rehe,
45peiko hag̃ua Ñanderuete yvága pegua ra’ykuéra ramo. Ha’e ningo oheja pe kuarahy ohesape opaite iñañáva ha heko potĩva ári, ha ha’e omongy heko porãva ha heko vaívape g̃uarã.
46Peẽ pehayhu ramo umi penderayhúvapente, mba’eichagua pene rembiapo porã repy piko oñeme’ẽkuaa peẽme. Umi mondahakuéra jepe ohayhu hapichápe omoirũva ichupekuéra hembiapo vaípe.
47Ha pemomaiteírõ pende ryke’ykuérapente, mba’e piko iporãva pejapo. Ndojapóipa péicha avei, umi tetã ambueyguakuéra.
48Upéicha ramo tapendereko porãke Ñanderuete, yvágape oĩva, heko porãite háicha avei.
Currently Selected:
Matéo 5: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
