Matéo 3
3
Juan Bautísta
1Umi ára umívape Juan Bautísta, oñepyrũ omyasãi ñe’ẽ he’ívo:
2Peñembyasýke, pejapo haguére mba’evai ha pejevýke Ñanderuete rendápe, Ha’e oisãmbyhýtama hetãguasúpe.
3Hese oñe’ẽva’ekue pe proféta Isaías, he’i ramoguare: Oñehendu peteĩ oñe’ẽ hatãva desiértope: Pembosako’i mburuvichaguasu raperã, pemyatyrõ porã hape po’i ( Isaías 40,4).
4Juan oñemonde upérõ caméllo raguekuégui, ha iku’a jokuaha katu vakapígui, hembi’u tuku ha eíra ka’aguy.
5Upéramo ou joa hendápe Jerusalengua, Judeaygua ha pe Jordan jerekuevoyguakuéra.
6Ha ojebautizauka hikuái Jordan ysyrýpe ha pépe omombe’u hikuái iñangaipakuéra (hembiapo vaikuéra).
7Ha Juan ohechávo ouha heta fariséo ha saducéo ha’e obautizahápe, he’i ichupekuéra: Peẽ, mbói ñemoñare, mávapa penembo’e pekañýne hag̃ua pe pochyguasu oútavagui.
8Pehechauka raẽ uvei hi’a pende py’apýpe pe ñembyasy añeteguáva peiko vai haguére.
9Ha ani pejétei pendejupe: Abraham ningo ore ru, Che katu ha’e peẽme: Ñanderuete omopu’ãkuaaha Abrahámpe ita’yrarã ko’ã itágui jepe.
10Cháke, pe hácha oñemoĩma yvyra mátare: Opaite yvyra hi’a porã’ỹva ojeityva’erã ha oñemombova’erã tatápe.
11Che ningo pobautiza ýpe pejevy hag̃ua (Ñanderuete rendápe), upe oútava che rapykuéri katu ipu’akaiteve chehegui, ha ndaijái chéve ajora hag̃ua isapatusãnte jepe, Ha’e pendebautizáta Pytu Porãmbáva ha tatápe.
12Iñyrupẽ oĩma ipópe, omopotĩ porã hag̃ua ikóga’a; Ha’e ombyatýta pe trígo iñongatuhápe ha ohapýta pe kapi’i tata ogue’ỹvape araka’eve.
Hesu ojebautizauka
13Ha Hesu ou Galiléagui Juan rendápe, Jordan rembe’ýpe, ojebautizauka hag̃ua Juan po rupi.
14Ha Juan ojoko joko ichupe he’ívo: Che ningo pe aikotevẽva nde chebautiza, ha piko nde reju che rendápe.
15Hesu katu ombohovái ichupe: Ejapo katu ko’ág̃a. Iporã ningo ñande jajapopa opaite mba’e hekópe. Ha upévo ae omoneĩ ichupe Ha’e oipotávape.
16Hesu ojebautiza rire ha osẽvo ýgui ojepe’a pe yvága ha ojehecha Ñanderuete Pytu Porãitéva oguejyha oúvo pykasúicha Hesu ári.
17Ha Ñanderuete ñe’ẽ ou yvágagui he’ívo: Kóva ningo che Ra’y ahayhúva, chembohoryetéva.
Currently Selected:
Matéo 3: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
