Lúcas 18

Peteĩ viúda oho mbojovakehára rendápe

1Hesu omombe’u ambue ñe’ẽ mbojoja, ohekombo’égui hemimbo’ekuérape ñañembo’e tapiava’erãha, ñañemokangy’ỹre.

2Ha Hesu omombe’u ko mba’e ichupekuéra: Peteĩ távape oiko peteĩ mbojovakehára, ndokyhyjéiva Ñanderuetégui ha nomomba’éiva hapichakuérape.

3Ha upe táva upévape oiko avei peteĩ viúda, manterei oúva hendápe he’ívo upe mbojovakehárape: Embojovake hekópe chéve, ko pléito aguerekóva cherehe ija’e’ỹva ndive.

4Upe mbojovakehára heta ára nopenái hese, upéi katu he’i ipy’apýpe: Ndakyhyjéi ningo Ñanderuetégui jepe ha namomba’éi avei che rapichakuérape,

5opáichavo ko viúda chemyangekõi mantereígui ambojovakéta, ani hag̃ua amo ipahápe ha’e ou cherova api.

6Ha Hesu he’i: Pehendúke pe mbojovakehára heko pegua’ỹva he’iva’ekue.

7Ha Ñanderuete piko nombojovakeichéne hembiporavo ha hese ija’e’ỹva pa’ũme, hembiporavo ojerure ramo ichupe ára ha pyharépe, ombojovake hag̃ua hekópe ipa’ũme, Ñanderuete hi’arénepa ombojovake hag̃ua.

8Che voi ha’e peẽme, Ñanderuete pya’e oúta ombojovake hag̃ua. Pe yvyarigua Ra’y ou jevývo ko yvy apére ojohúnepa umi ojeroviáva hese.

Peteĩ fariséo ha pe impuésto mbyatyhára

9Hesu ohekombo’e ko ñe’ẽ mbojoja rupi umi oñembotuicháva ha ojeroviáva heko porã rehénte, upévare Ha’e he’i ichupekuéra:

10Mokõi kuimba’e oho Ñanderuete rogaguasúpe oñembo’e hag̃ua, peteĩ fariséo ha peteĩ impuésto mbyatyhára.

11Upe fariséo ñembo’yhápe oñembo’e ipy’apýpe péicha: Che Ruete, che agradece ndéve che ndaha’éi hague ambue kuimba’ekuéraicha, che namondái, ndachereko vaíri, nambyaíri che mendareko, ni ndaikói ko impuésto mbyatyhára kóvaicha.

12Mokõi ára meme semánape che nda’úi mba’evete (ajuna), ame’ẽ pe diézmo opaite umi mba’e arekóvagui.

13Upe impuésto mbyatyhára katu ndoikeséi Ñanderuete rogaguasúpe, ha okápe oñembo’e ojesaupi’ỹre yvága gotýo, ha oinupã ipo ipyti’áre, he’i: Che Ruete cheperdonamína, che ningo mba’evai apohára.

14Che katu ha’e peẽme, kóva oho hógape py’aguapýpe, ambue ndaupéichai. Oimeraẽ oñembotuicháva ojeguerekova’erã mba’evérõ, ha oimeraẽ oñemomirĩva oñembotuichava’erã katuete.

Hesu ohovasa mitãmíme

15Ojegueru Hesu rendápe umi mitã michĩva Hesu opoko hag̃ua hesekuéra, ha hemimbo’ekuéra ohechávo péva ipochy hikuái umi mitã rerekua ndive.

16Hesu katu ohenói ichupekuéra ha he’i: Peheja mitãkuéra tou che rendápe ha ani pejoko ichupekuéra, Ñanderuete retãguasúpe ningo oike ha’ekueraichagua voínte.

17Añetehápe Che ha’e peẽme, upe oñemomba’e’ỹva mitãicha Ñanderuete retãguasúre, ndoikemo’ãi ipype.

Peteĩ karia’y imba’e retáva oñe’ẽ Hesu ndive

18Ha peteĩ karai anciáno oporandu Hesúpe: Mbo’ehára imba’e porãmba jepéva, mba’épa ajapova’erã ahupity hag̃ua pe tekove tapia g̃uarãva.

19Ha Hesu ombohovái ichupe: Mba’érehepa nde ere Che chemba’e porãha, ndaipóri mba’e iporãva, Ñanderuete añoitémante.

20Nde reikuaa voi Moises rembiapoukapykuéra: Ani rembyai mendare, ani rejuka, ani remonda, ani ndejapu nde rapicha rehe, emomba’e nde ru ha nde sýpe.

21Ha’e katu ombohovái: Umi mba’e ningo ajapopa voi che mitãrusu ára guive.

22Hesu ohendúvo péva, he’i ichupe: Hemby gueteri ndéve peteĩ mba’e rejapoveva’erãva, evendepa reguerekóva guive ha eme’ẽ mboriahukuérape, ha nemba’e retáta yvágape, upéi eju che rendápe ha chemoirũ.

23Ha’e katu ohendúvo péva oñembyasyete ha oho, imba’e retaitereígui.

24Hesu oma’ẽvo hese he’i: Hasyete imba’e retáva oike hag̃ua Ñanderuete retãguasúpe.

25Ndahasyive peteĩ guéi ohasa hag̃ua ju resa rupi, peteĩ imba’e retáva oike hag̃ua Ñanderuete retãguasúpe.

26Ha umi ohendúva guive iñe’ẽ, ipy’andýi opytávo ha he’i hikuái: Máva piko péicharamo ikatúne ojesalva.

27Hesu katu he’i ichupekuéra: Kuimba’e ha kuñakuéra ndaikatúiva ojapo, Ñanderuete ikatu ojapo.

28Upéramo Pédro he’i ichupe: Ore ningo rohejapa ore mba’éva guive romoirũ hag̃ua ndéve.

29Hesu ombohovái ichupe: Añetehápe ha’e peẽme: Oimeraẽ ohejáva hóga, hembirekópe, ipehẽnguekuérape, itúvape ha isýpe, Ñanderuete retãguasu rehehápe,

30oñeme’ẽ jevyveva’erã ichupe mba’eporãve ko ára atyguasúpe, ha pe ambue ára atyguasúpe gueteri pe tekove tapia g̃uarãva.

31Upéi Hesu omoha’eño umi 12 hemimbo’ekuérape ha he’i: Péina ningo jaha Jerusalénpe, ojehupa hag̃ua opaite mba’e profetakuéra ohaimava’ekue Ñanderuete kuatiañe’ẽme yvyarigua Ra’y rehe.

32Ha’e ho’áta tetã ambueyguakuéra pópe, ha oñembohorýta hese, ha ojeja’óta ha ondyvúta hikuái hese,

33ha oinupã rire ichupe ojukáta hikuái ichupe, ha mbohapy ára rire katu oikove jevýta.

34Hesu remimbo’ekuérape katu nahesakãi mba’eve Hesu he’íva guive ichupekuéra, opyta mba’e ñemi ramo ichuguikuéra.

Hesu omonguera peteĩ hesatũvape

35Oñemoag̃uívo hikuái Jericógui, ojejohu hikuái peteĩ hesatũva ndive, oguapyvahína tape yképe, ojeruréva pirapiremi rehe.

36Ohendúvo heta ojehasahahína, ha’e oporandu mba’épa ojehu.

37Ha oje’e ichupe Hesu Nazaretgua ohasaha ohovohína.

38Upévo sapukaipópe he’i: Hesu, David ra’y, cheporiahuverekomína.

39Ha umi ohóva tenonde ipochy hendive ha okorõi ichupe okirirĩ hag̃ua, ha’e katu osapukái hatãve: David Ra’y, cheporiahuverekomína.

40Ha Hesu opytávo, ogueruka ichupe hendápe, ha og̃uahẽvo hendápe oporandu ichupe:

41Mba’épa reipota ajapo nderehe. Ha’e he’i: Che Jára, ahechase ningo.

42Upérõ Hesu he’i ichupe: Ehecha jevy. Nde rejeroviágui reñemonguera.

43Ha upevovete ha’e ohecha jevy ha oho Hesu rapykuéri, omomba’eguasúvo Ñanderuetépe. Ha hetãyguakuéra ohecháva guive, omomba’eguasu avei Ñanderuetépe.

Currently Selected:

Lúcas 18: ÑÑP2015

Highlight

Copy