Juan 5
5
Hesu omonguera peteĩ ijapávape Betésda y rembe’ýpe
1Ko’ã mba’e rire Hesu oho jevy Jerusalénpe, og̃uahẽmbotámagui ambue arete ára.
2Oĩ ningo Jerusalénpe, pe Ovecha rokẽ ypýpe, peteĩ yrenda, hérava hebréo ñe’eme Betésda, he’iséva jeporiahuvereko róga, ha upépe oĩ 5 ogaguyguasu.
3Upépe ningo oñeno heta hasýva, hesatũva, ikarẽva, ijapáva, oha’ãrõvahína pe y omýirõ g̃uarã.
4Peteĩ ángel sapy’a py’a oguejy Ñanderuete rekohágui ha omomýi pe y. Ha upe oike raẽva pe y oñemomýi jave, okuera opytávo oimeraẽ mba’asy oguerekóvagui.
5Umíva apytépe ningo oĩ peteĩ kuimba’e 38 áñoma hasy hague.
6Ha Hesu ohechávo ichupe oñenohahína ha oikuaávo oĩha upéicha areitereíma, oporandu ichupe: Rekuerasépa.
7Ha pe hasýva he’i Hesúpe: Karai, ndaipóri ikatúva chepytyvõ ajepoi hag̃ua ýpe omýi jave, ha ajepoise jave, ou ambue ha itenonde cherehe.
8Upérõ Hesu he’i ichupe: Epu’ã, ehupi nde rupa ha eguata.
9Ha upevovete pe kuimba’e okuera, ojapyhy hupa ha oñepyrũ oguata.
10Ha umi Judaygua he’i pe hasyva’ekuépe: Ko ára kóva ningo sábado, ndaijái ndéve reraha hag̃ua nde rupa nde apére.
11Ha’e katu he’i ichupekuéra: Pe chemonguerava’ekue ningo he’i voi chéve: Ehupi nde rupa ha eguata.
12Oporandu hikuái ichupe: Máva piko upe kuimba’e he’íva ndéve: Ejapyhy nde rupa ha eguata.
13Pe kuimba’e hasyva’ekue ndoikuaái katu mávapa ra’e upe omonguerava’ekue ichupe. Hesu ojeímagui umi tetãygua apytégui.
14Uperiremi Hesu ojohu ichupe Ñanderuete rogaguasúpe ha he’i ichupe: Ema’ẽ porã, rekueráma, anive reñemoangaipa, ani hag̃ua ojehu ndéve mba’e ivaivéva.
15Upérõ pe hasyva’ekue oho umi Judayguakuéra rendápe ha he’i ichupekuéra: Hesu chemonguerákuri.
16Upévare umi Judaygua opersegui Hesúpe, Ha’e omonguera haguére ichupe sábado árape.
17Hesu katu he’i ichupekuéra: Che ru ningo ko’ág̃a peve omba’apohína, ha che avei.
18Upévare umi Judayguakuéra oñeha’ãmba ojuka hag̃ua Hesúpe, Ha’e nomomba’éi haguére pe sábado ára, ha he’i haguére avei Ñanderuete ituvateeha, Ha’e oñembojojávo péicha Ñanderuete rehe.
Hesu Ñanderuete Ra’y
19Hesu katu ombohovái ichupekuéra, he’ívo: Añetehápe, añetehápe, ha’e peẽme, pe Ta’ýra ijehegui rei ndaikatúi ojapo mba’eve, pe ohecháva Itúva ojapóvamante; opaite mba’e Ha’e ojapóva ningo, Ita’ýra ojapo avei.
20Pe Túva ohayhúgui Ita’ýrape, ohechauka ichupe opaite mba’e ojapóva guive, ha ohechaukáta peẽme mba’e ituichavéva gueteri, peẽ pehecharamóvagui.
21Pe túva omoingove jevy háicha omanova’ekuépe, peichaite avei Ita’ýra, Ha’e omoingove avei Ha’e oipotávape guive.
22Ñanderuete nombojovakemo’ãi avavépe, Ha’e ome’ẽmbáma Ita’ýrape pe ñembojovakerã.
23Opavave omomba’e hag̃ua pe Ta’ýrape, oñemomba’e háicha Ñanderuetépe. Upe omomba’e’ỹva Ta’ýrape, nomomba’éi avei Ñanderuetépe, Ha’e voi ombou Ita’ýrape ko yvy ape ári.
24Añetehápe, añetehápe, Che ha’e peẽme: Upe ohendúva ha ojeroviáva pe chembouva’ekue rehe, oguerekóma pe tekove tapia g̃uarãva, noñecondenamo’ãi, ohasámagui omanóva apytégui oikovéva apytépe g̃uarã.
25Añetehápe, añetehápe, Che ha’e peẽme: Oúta pe hóra ha og̃uahẽma voi, umi omanova’ekue ohendúta ha iñe’ẽrendúta Ñanderuete Ra’y ñe’ẽme ha oikoveva’erã tapia g̃uarã.
26Pe Túva oikove háicha ijehegui voínte, péicha ome’ẽ avei Ita’ýrape pe tekove (añeteguáva) oikove hag̃ua avei ijehegui.
27Ha Ñanderuete ome’ẽ pu’aka Ita’ýrape oporombojovake hag̃ua, Hesu ha’égui yvyarigua Ra’y.
28Anítei pehecharamo ko mba’e, katuete oúta pe hóra opaite umi omanova’ekue ohendúvo Hesu Crísto ñe’ẽ oporohenoimbávo iñeñotỹha rendágui,
29osẽva’erã opaite umi hembiapo porãva oikove jevy hag̃ua, ha umi hembiapo vaíva oñemoingoveva’erã avei, oñecondena hag̃ua.
30Chejehegui rei ndaikatúi Che ajapo mba’eve, ahendu háichante aporombojovake ha che ambojovake hekoitépe, ndahekáigui che rembipota, pe chembouva’ekue rembipotánte uvei.
31Che voínte amoañete rire che ñe’ẽ, che ñe’ẽ ndovaleiva’erãmo’ã.
32Ambue katu omoañete che ñe’ẽ ha oiko che rechahare ramo, ha opaite mba’e Ha’e he’íva guive cherehe hi’añete ha hekoitépe.
33Peẽ ningo peñembou Juan rendápe, ha ha’e oikuaauka peẽme pe añetegua.
34Che katu naikotevẽi yvyarigua techahare, Che ha’énte ko’ã mba’e ko’ãva peẽ pejesalva hag̃ua.
35Juan oikova’ekue tataindy ramo omimbi hag̃ua ha peẽ pevy’aseva’ekue sapy’amínte jepe hesape rendýpe.
36Che katu aguereko ambue techahare tuichavéva Juángui; umi tembiapo che Ru ome’ẽva’ekue chéve ajapo hag̃ua, ohechauka che Ru chembou hague.
37Ha upe chemboúva, che Ruete voi, Ha’e opytáma che rechahare ramo, ha Ha’e omoañetehína che ñe’ẽ. Ijuruteégui napehendúi araka’eve iñe’ẽ, ni ndapehechái gueteri ichupe.
38Ha iñe’ẽ ndopytái pende py’apýpe, peẽ ndapejeroviáigui opaite umi Ha’e ombouva’ekue rehe peẽme.
39Peẽ peitypeka (peipyguara, peheka) Ñanderuete kuatiañe’ẽre, hi’ag̃ui peẽme pejohutaha ipype pe tekove tapia g̃uarãva, ha añetehápe Ñanderuete kuatiañe’ẽ che rechahare voi.
40Peẽ katu napeg̃uahẽséi che rendápe peikove hag̃ua.
41Che ndaipotái tetãyguakuéra chembotuicha.
42Che ningo poikuaa porã, ha aikuaa avei peẽ ndapehayhuiha Ñanderuetépe.
43Che aju che Ru rérape, ha peẽ nachemog̃uahẽi, ambue katu ou ramo héra reípe, upévape peẽ pemog̃uahẽ porãta (pe anticrísto).
44Mba’éicha piko ikatu pejerovia, peẽ voi peñembotuicha ramo oñondive, ha pe ñembotuicha oúva Ñanderuetégui ndapehekái.
45Ani peimo’ã chejurumy’ỹitaha (pomoĩ vaitaha) che Ruete renondépe, Moises voi katu penemoĩ vaíta, peẽ pemoĩ ramo jepe pende esperánza hi’ári.
46Peẽ añetehápe peguerovia rire Moises ñe’ẽ, peẽ pejeroviava’erãmo’ã avei cherehe. Cherehe voi ningo ha’e oñe’ẽmava’ekue (Deuteronómio 18,15).
47Peẽ ndapegueroviái ramo umi ñe’ẽ ha’e ohaiva’ekue Ñanderuete kuatiañe’ẽme, mba’éichapa pejeroviáta che ñe’ẽ rehe.
Currently Selected:
Juan 5: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
