Juan 3

Nicodémo oñandu Hesúpe

1Oikova’ekue peteĩ kuimba’e hérava Nicodémo, ha’e peteĩ fariséo, ha’e ningo avei peteĩva umi mburuvicha (71) Judaygua omyakãva (karai anciáno) apytégui.

2Nicodémo ou pyhare jave Hesu rendápe, ha he’i ichupe: Mbo’ehára, ore ningo roikuaa rejuha Ñanderuetégui reporombo’e hag̃ua, avavete ndaikatúigui ojapo ko’ã techaukaha (señal) Nde rejapóva, Ñanderuete oĩ’ỹrõ hendive.

3Hesu ombohovái ichupe: Añetehápe, añetehápe ha’e ndéve upe onace jevy’ỹva ndaikatúi oike Ñanderuete retãguasúpe ha ndohechaiva’erã avei ichupe.

4Nicodémo oporandu Hesúpe: Mba’éicha piko peteĩ kuimba’e okakuaapa rire ha itujáma rire, ikatúne oike pyahu isy ryépe onace jevy hag̃ua.

5Hesu ombohovái ichupe: Añetehápe, añetehápe, ha’e ndéve upe onace’ỹva y ha Pytu Porãmbávagui ndaikatúi oike Ñanderuete retãguasúpe.

6Upe onacéva kuimba’e ro’ógui ningo to’o, ha upe onacéva Pytu Porãmbávagui ningo pytu porã.

7Ani rehecharamo ha’e haguére ndéve: Opavave tekotevẽ onace pyahu jevyva’erãha.

8Pe yvytu oipeju oipejusehápe, ha nde rehendu hyapu, ndereikuaáinte katu moõguipa ou ni moõpa oho, upéicha ningo ojehu avei opaite onace pyahúva Pytu Porãmbávagui.

9Upérõ Nicodémo oporandu: Mba’éicha piko upéva ikatu oiko.

10Hesu ombohovái ichupe ha he’i: Nde ningo mbo’ehára herakuã tuicháva Judayguakuéra apytépe ha ndereikuaái piko ko’ã mba’e ko’ãva.

11Añetehápe, añetehápe, che ha’e ndéve: Umi mba’e roikuaáva roñe’ẽ ha umi mba’e rohecháva roikuaauka peẽme, opaichavérõ peẽ ndapeipotái ore ñe’ẽ.

12Che ha’e ramo peẽme umi mba’e yvyariguáva rehe peẽ ndapegueroviái, mba’éicha piko pegueroviáta Che ha’e ramo peẽme yvága rehegua mba’e.

13Avave ndojupíri yvágape, upe yvágagui oguejyva’ekuémante, ha kóva ningo pe yvyarigua Ra’y, (Daniel 7,13).

14Ha Moises omopu’ã haguéicha peteĩ mbói ra’ãnga desiértope, upéicha oñemopu’ãva’erã avei pe yvyarigua Ra’y,

15opavave ojeroviáva guive hese ohupityva’erã pe tekove tapia g̃uarãva.

16Ñanderuete ohayhuetégui opaite tetãyguakuérape Ha’e ome’ẽ Ita’ýra peteĩetévape, opaite ojeroviáva guive hese ani hag̃ua oñehundi, oguereko hag̃ua uvei pe tekove tapia g̃uarãva.

17Ñanderuete ningo nomboúi ita’ýrape ko yvy ape ári ombojovake hag̃ua kuimba’e ha kuñakuérape, osalva hag̃ua uvei opavave ojeroviávape guive hese.

18Upe ojeroviáva guive hese noñembojovakemo’ãi, upe ojerovia’ỹva hese katu oñembojovakéma oñehundi hag̃ua, ndojeroviái haguére Ñanderuete Ra’y peteĩete réra rehe.

19Kóva ningo pe ñembojovake oúva Tesape rupi ko yvy ape ári, tetãyguakuéra ohayhuve pe pytũme tesapégui, ha ndohechaséi hembiapokuéra ivaiha.

20Umi ojapóva mba’evai ndohayhúi pe tesape, ha nog̃uahẽi tesape rendýpe, ani hag̃ua ojehecha hembiapo vaikuéra.

21Umi ojapóva pe añetegua ou tesape rendýpe, ojehechauka hag̃ua hembiapo porã, ojejapóva Ñanderuete pu’aka rupi.

Juan Bautísta ombotuicha Hesúpe

22Ko’ã mba’e oiko rire, Hesu oho hemimbo’ekuéra ndive Juda retãme, upépe opyta hikuái ha oporobautiza.

23Juan oporobautiza avei Enónpe, Salim ypýpe, oĩgui heta y upépe, ha heta og̃uahẽ ojebautizauka hag̃ua.

24Upérõ noñemoingéi gueteri Juánpe cárcelpe.

25Upérõ Juan remimbo’ekuéra oñepyrũ oñoñe’ẽ’api peteĩ Judaygua ndive pe bautísmo rehe.

26Upévare ou hikuái Juan rendápe ha he’i ichupe: Mbo’ehára, pe oĩva’ekue nendive Jordan mboypýri, pe nde reñe’ẽ porãva’ekue rehe oréve, Ha’e ningo ko’ág̃a oporobautizahína ha opavave ou joa hendápe.

27Ha Juan ombohovái ichupekuéra ha he’i: Avave ndohupitýi mba’eve noñeme’ẽi ramo ichupe yvágagui.

28Peẽ voi ningo peikuaa porã che ha’e hague: Che ndaha’éi pe Crísto, añemboúnte henonderãme.

29Pe hembirekorãva, péva pe menarã; pe ohayhúva pe menarãme omoirũ ichupe ha ovy’a ohendu guive iñe’ẽ, ha pe vy’a péva che ahupitýma ko’ág̃a.

30Ha’e oñembotuichaveva’erã ohóvo, che katu añemomichĩveva’erã (añyñýi) ahávo.

Pe oúva yvágagui ituichave

31Pe oúva yvatégui ningo ituichave opaite ambue mba’égui.

32Umi mba’e Ha’e ohecha ha ohendúmava Ha’e oikuaauka, upéicha ramojepe ndogueroviáiri hikuái iñe’ẽ.

33Upe ohendúva ichupe ha ojeroviáva iñe’ẽre, upévamante omoañete Ñanderuete ñe’ẽ.

34Pe Ñanderuete ombouva’ekue oñe’ẽ Ñanderuete rembipotáre ha Ñanderuete ome’ẽ pe Pytu Porãmbáva takate’ỹ’ỹre opavave ojeroviáva guivépe Hesu Crístore.

35Ñanderuete ohayhu Ita’ýra Hesu Crístope, ha omoĩma opaite mba’e ipópe.

36Pe ojeroviáva Hesu Crísto rehe oikove tapia g̃uarã, upe iñe’ẽrendu’ỹva Hesu Crístope katu ndohechamo’ãi pe tekove tapia g̃uarãva, Ñanderuete ñemyrõ ha ijehavirarã (icastigorã) ndojeimo’ãi ichugui.

Currently Selected:

Juan 3: ÑÑP2015

Highlight

Copy