Génesis 9
9
Ñanderuete oñembopy’apeteĩ Noe ndive
1Ñanderuete ohovasa Noe ha ita’yrakuérape, ha he’i ichupekuéra: Peñemoña ha peñemboheta, pemyenyhẽ meve ko yvy.
2Yvy ape árigua mymbakuéra oñemondýi ha okyhyjéta pendehegui; ha mayma guyra árare ovevéva, ha opaite mba’e omýiva guive yvy apére ha pirakuéra yguasúpe oĩva, opytapáta pende poguýpe.
3Opaite mba’e omýiva ha oikóva guive, peiporúta pene rembi’urã ramo; ha péicha avei umi ka’avo hovyũva guive, ame’ẽmba peẽme pene rembi’urã ramo.
4Ani pe’u mymba ro’o huguy reheve, huguýpe oĩ hi’ánga.
5Añetehápe ajerure jevyva’erã pende rekové ruguy mayma mymbágui, kuimba’e ha kuña pógui; taha’e ha’éva upe oporojukáva ojejuka jevyva’erã.
6Upe oñohẽva hapicha ruguy, huguy oñeñohẽ jevyva’erã avei ambue hapicha po rupi, kuimba’e ha kuña ojejapógui pende Ruete ra’ãngáicha.
7Peẽ peñemoña ha peñemboheta pemyenyhẽ meve yvy ape tuichakue.
8Upéramo Ñanderuete oñe’ẽ Noe ha ita’yrakuérape ha he’i ichupekuéra:
9Péina ápe, Che añemoĩ peteĩ ñe’ẽme penendive ha pene ñemoñarenguéra ndive;
10ha opaite umi oikovéva penendive: Guyrakuéra, mymbakuéra ha opaichagua mymba hesaitéva oĩva guive yvy apére, ha osẽva’ekue pe barcoguasúgui penendive.
11Añemoĩta penendive peteĩ ñe’ẽme ha ndajukapaveiva’erã to’okuéra amaguasu rupi, ha ndoikoveimava’erã amaguasu ohundipa jevy hag̃ua ko yvy kóva.
12Ha Ñanderuete he’i: Che amoĩta peteĩ techaukaha (señal), chéve ha peẽme g̃uarã ha mayma oikovéva penendivépe g̃uarã, ára atyguasukuéra rupi.
13Che jy’y (árco de Noe) amoĩta arai rehe, ha pévata che ñe’ẽ ame’ẽmava peẽme techaukaha ramo, Che ha ko yvy ndive g̃uarã.
14Ha ojehuva’erã ambou vove arai yvy apére, che jy’y ojekuaáta umi arai rehe.
15Ha chemandu’áta che ñe’ẽme’ẽ rehe, oĩvahína penendive ha opaichagua to’o oikovéva ndive g̃uarã; ha ndoikoveimava’erã ambue amaguasu ohundipa hag̃ua opaichagua to’o oikovéva.
16Upe jy’y oĩta arai rehe, ha ahecha vove chemandu’áta che ñe’ẽme’ẽ rehe ame’ẽmava’ekue opaite yvyariguápe g̃uarã.
17Ha Ñanderuete he’i Noéme: Kóa ningo pe ñe’ẽme’ẽ techaukaha ramo, amoĩva’ekue chendive ha mayma yvyariguakuéra ndive g̃uarã.
Noe oka’u ramoguare
18Ha Noe ra’ykuéra, Sem, Cam ha Jafet osẽva’ekue pe barcoguasúgui; ha Cam ningo Canaan ru.
19Ko’ã mbohapy Noe ra’ygui, henyhẽmba ko yvy tuichakue.
20Uperire Noe oñepyrũ omba’apo yvy rehe, ha oñotỹ peteĩ parralty;
21ha ho’úvo pe víno omonga’u ichupe, ha oka’u jave ha’e oñemboi ikoty ryepýpe.
22Ha Cam, Canaan ru, ohechávo itúvape oĩ jave opívo oho omombe’u hag̃ua ityvyrakuérape, upejave ha’ekuéra oĩmba okápe.
23Upéramo Sem ha Jafet ojapyhy itúva ao, ha omoĩ ijati’y ári, ha oike oguevívo hikuái, oñuã hag̃ua itúva rete, upéicha ndohechái hikuái itúva rete ijopivoha.
24Ha Noe opáyvo oka’uhágui ha oikuaávo mba’épa ojapóra’e hese ita’ýra imitãvéva,
25he’i: Nde Canaan repyta maldecído; reikóta nde ryke’ykuéra rembiguái ramo.
26Ha he’ive: Toñemomba’eguasu Sem Jára, ha Canaan toiko hembiguái ramo,
27Ñanderuete toiko Sem rógape, ha Ha’e tomyasãi Jafet yvy apére, Canaan katu toiko hembiguái ramo.
28Ha Noe oikove pe amaguasu rire 350 áño.
29Ha Noe oikove rire 950 áño, omano.
Currently Selected:
Génesis 9: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
