Génesis 21
21
Isaac onace
1Ha Ñanderuete ojapopa Sára rehe he’i hagueichaite.
2Ha Sára ig̃uaig̃uiete riréma hyeguasu ha ome’ẽ Abrahámpe ita’ýra, Ñanderuete he’i hague árape.
3Ha Abraham ombohéra ita’ýrape Isaac, Sára imembyva’ekue ichupe g̃uarã.
4Ha ombotývo 8 ára (día) Abraham oikytĩ’o Isaac pire’i, Ñanderuete he’i haguéicha ichupe.
5Ha Abraham oguereko ramo 100 áño, onace ita’ýra Isaac.
6Upéramo Sára he’i: Ñanderuete chembopuka, ha oimeraẽ ohendúva ko’ã mba’e opukáta chendive.
7Ha he’ive: Máva piko he’ineraka’e Abrahámpe, Sára omokambutaha imembyteévape, ame’ẽgui ichupe ha’e itujaite riréma.
Agar ha Ismael oñemosẽ Abraham rógagui
8Isaac okakuaa porã, ha’e opo’oha árape Abraham ojapo peteĩ karuguasu.
9Ha Sára ohecha pe Egiptoygua Agar memby, Abrahámgui imembyva’ekue, oñembohoryha imemby Isaac rehe.
10Upévare Sára he’i iména Abrahámpe: Emosẽ ko tembiguáipe imemby ndive, ko tembiguái membýpe noñeme’ẽmo’ãi ñane mba’erepy, ñame’ẽmbátagui che memby Isaácpe.
11Ha ko ñe’ẽ kóva oipy’ajopy Abrahámpe, ita’ýra Ismael rehehápe.
12Upémaramo Ñanderuete he’i Abrahámpe: Ani ndepochy pe mitãrusu ha Agar rehehápe; ejapo katu opaite mba’e Sára he’íva guive ndéve, Isaac rupi reguerekóta ne ñemoñareteéva.
13Ha pe tembiguái membyrégui ajapóta avei peteĩ tetã, ha’égui ne ñemoñare avei.
14Upémaramo Abraham opu’ã pyharevete, ha ojapyhy pan ha peteĩ yryru kavara pirekueguiguáva, omoĩ hag̃ua Agar ati’y ári, ha ome’ẽ ichupe avei pe mitãrusu, ha omondo hikuái hógagui. Agar oho ha oiko rei tetã ambueygua ramo Beerséba desiertoguasúre.
15Ha opa rire ichugui pe y oguerekóva imba’yrúpe, Agar omoñeno pe mitãrusúpe peteĩ yvyra guýpe,
16ha oho oguapy mombyrymi henondépe, peteĩ hu’y ñemombóicha, he’ígui: Ndahechaséi omano ramo che memby, ha oho oguapy upépe ha hasẽ.
17Ha Ñanderuete ohendu pe mitã rasẽ; ha hembiguái ohenói Agárpe yvága guive, ha he’i ichupe: Mba’éiko ojehu ndéve Agar. Ani rekyhyjétei, Ñanderuete ohendúgui ne membyrasẽ.
18Epu’ã, ehupi pe mitã, ha ejoko ichupe nde pópe, Che ajapóta ichugui peteĩ tetã ndetuicháva avei.
19Upévo Ñanderuete ohesape’a ichupe, ohecha hag̃ua pe ykua; ha oho ha omyenyhẽ ýgui hi’yryru ha omboy’u imembýpe omanombotavahína.
20Ha Ñanderuete oĩ ko mitã ndive; ha okakuaa, ha oiko pe desiertoguasúpe ha oiko ichugui hu’y poihára.
21Ha oiko Paran desiérto rehe; ha isy omomenda ichupe peteĩ Egiptoygua rehe.
Abraham ha Abimelec oñemoĩ peteĩ ñe’ẽme
22Ha umi ára umívape pe mburuvicha, Abimelec, ha Ficol, isoldádo ruvicha ndive, oñe’ẽ hikuái Abrahámpe, ha he’i: Ñanderuete ningo oĩ nendive opaite mba’e rejapóva guivépe.
23Upévare ko’ág̃a eme’ẽna ne ñe’ẽ Ñanderuete rérape, nderejapomo’ãiha mba’eve ivaíva cherehe térã che ra’y rehe térã iñemoñarenguéra rehe, py’aporã reheve roiko haguéicha nendive, péicha nde reiko jevýta chendive ha che retãyguakuéra ndive.
24Ha Abraham he’i: Che ame’ẽta ndéve che ñe’ẽ Ñanderuete rérape.
25Ha Abraham oñe’ẽ Abimelécpe peteĩ ykua rehe, Abimelec rembiguaikuéra oipe’ava’ekue ichugui.
26Ha Abimelec he’i: Ndaikuaái mávapa ojapóra’e ko’ã mba’e, ha nde ndereikuaaukái chéve avei, ha che nahenduiete voi mba’eve ko ára peve ko’ã mba’ére.
27Ha Abraham ogueru ovecha ha vakakuéra, ome’ẽ hag̃ua Abimelécpe; ha mokõivéva oñembopy’apeteĩ.
28Upéramo Abraham omboyke 7 ovechara’y kuña ijovecha atýgui.
29Ha Abimelec oporandu Abrahámpe: Mba’éiko rejapose umi 7 ovecha kuña remboykeva’ekuégui.
30Ha ha’e ombohovái ichupe: Regueraháta che pógui ko’ã 7 ovecha kuña, rehechakuaa haguére che ajo’o hague ko ykua kóva.
31Péicha rupi ombohéra pe yvy oĩháme hikuái Beerséba; upépe ha’ekuéra oñoñe’ẽme’ẽgui Ñanderuete renondépe.
32Ha oñembopy’apeteĩ rire hikuái Beersébape; opu’ã Abimelec ha Ficol, isoldádo ruvicha, oho jevy hag̃ua hikuái Filisteayguakuéra retãme.
33Ha Abraham oñotỹ peteĩ tamarísco yvyra Beersébape, ha ohenói upépe Ñanderuete réra, oikovéva tapia g̃uarã.
34Ha Abraham oiko Filisteayguakuéra retãme heta ára pukukue.
Currently Selected:
Génesis 21: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
