Génesis 15
15
Ñanderuete he’i ome’ẽtaha Abrámpe ita’yrarã
1Ko’ã mba’e rire Ñanderuete oñe’ẽ Abram ndive techapáy rupive (visión), ha he’i ichupe: Ani rekyhyje, Abram; Che voi ningo ne mo’ãha ha ne rembiapo repy me’ẽha.
2Ha Abram he’i: Che Ruete, che Jára, mba’éiko reme’ẽta chéve, ndarekóigui che ra’yteéva, ahejapáne opaite che mba’e Eliézer, pe Damascoguápe, oñangarekóva opaite che mba’e rehe.
3Ha Abram he’ive: Ema’ẽna, Nde nereme’ẽigui chéve che ra’yrã, opaite mba’e aguerekóva guive opytapáta peteĩ che rembiguáipe, onaceva’ekue che rógape.
4Upéi Ñanderuete he’i ichupe: Ne rembiguáipe ndopytamo’ãi ne mba’erepyeta reheve, nde ra’y uvei opytáta ne mba’erepy jararã ramo.
5Ha ogueraha ichupe okápe, ha he’i ichupe: Ema’ẽna árare, ha eipapa umi jasytata, reipapakuaa piko. Ha he’i ichupe: Peichaitéta ne ñemoñarenguéra.
6Abram ojerovia Ñanderuetére ha upévare ojeguereko ichupe hekoporãva ramo.
7Ha Ha’e he’i ichupe: Che ningo nde Jára roguenohẽva’ekue Ur, Caldeaygua retãgui, ame’ẽ hag̃ua ndéve ko yvy kóva ne mba’erã ramo.
8Ha Abram he’i: Che Ruete, che Jára, mba’éichapa aikuaáta ko yvy kóva opytataha chemba’erã ramo.
9Ha Ñanderuete he’i ichupe: Egueru chéve peteĩ vaquillóna, oguerekóva mbohapy áño, ha peteĩ kavara, oguerekóva mbohapy áño, ha peteĩ ovecha mácho oguerekóva mbohapy áño, ha peteĩ jeruti ha peteĩ pykasu.
10Ha ha’e ojuka ko’ã hymba ha omboja’o mbyte rupi, ha imbyterekuéra omoĩmba ojovái; umi guyra katu nomboja’ói.
11Ha umi yryvu oguejyse umi hymba re’õngue ári, Abram katu omondýi oikóvo.
12Ha pe kuarahy oguejývo Abram hopehyieterei, ha oke, upejave okyhyjeiterei peteĩ ypytũ ndetuicha oúvagui.
13Upéramo Ñanderuete he’i Abrámpe: Añete ningo ne ñemoñarenguéra oikóta ambue tetãme ha ipoguýpe ohasa asýta 400 áño pukukue.
14Ha upe tetã ojopy asýta ichupekuéra, Che voi katu ahaviráta ichupekuéra osẽkuaa peve upe tetãgui mba’erepyeta reheve.
15Ha nde rehóta nde rukuéra omanova’ekue rendápe py’aguapýpe, ha reñeñotỹta ndetujaite riréma.
16Ha ne ñemoñarenguéra ñemoñare irundyha (generacion irundyha) ou jevyva’erã ko’ápe; ko’ág̃a Amorguakuéra reko ñaña nahenyhẽi gueteri che renondépe.
17Ha ojehu oike riréma pe kuarahy ha iñypytũmbáma ramo, ojehecha peteĩ tatakua hatatĩva, ha peteĩ tata rendy ohasa umi tymba oñemboja’ova’ekue pa’ũ rupi.
18Upe ára upévape Ñanderuete oñemoĩ peteĩ ñe’ẽme Abram ndive, ha he’i: Ne ñemoñarenguérape ame’ẽta ko yvy, Egípto ysyry guive Éufrates ysyry peve:
19umi Cengua yvy, umi Cenezgua yvy, umi Cadmongua yvy,
20umi Hetgua yvy, umi Ferezgua yvy, umi Refaygua yvy,
21umi Amorgua yvy, umi Canaangua yvy, umi Gergesgua yvy ha umi Jebusgua yvy.
Currently Selected:
Génesis 15: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
