uMataayi 26
26
Avhalongozi avha Vhayuuda vhakupanzanya kumugoga uYeesu
(uMaaliko 14:1-2; uLuuka 22:1-2; uYoohani 11:45-53)
1Lwe uYeesu aamala kuyanga amazwi gonti igo, ahavhavhuuzya avhasundikwa vhaakwe ahati, 2“Inza vwe mumanyile, zyasyala insiku zivhili kufiha pa shikulukuulu isha Pasaaka.#26:2 IPasaaka: Vhaazya mu Ntantiho izya Mazwi aMajeni. Ine ne Mwana wa Aadamu kwe vhananiile, inga nkomeelwe pa shihovhenkanyo.”
3Ahavhaliilizyo iho, avhapiti avha vhapuuti#26:3 Avhapuuti: Vhaazya mu Ntantiho izya Mazwi aMajeni. na vhasongo avha Vhayuuda vhahavhungaana mu nyumba iya kukonzezya iya mupuuti umupiti we izina lyakwe vhahatinji uKayaafa. 4Vhahapanzanya kumulema uYeesu ku vhushevu nu kumugoga. 5Ileelo vhahapanzanya vhahati, “Tutahamuleme isiku ilya pa shikulukuulu, mwe pe avhantu vhanginza vhapele ivho.”
Umwantanda wumo akumwitiilizya uYeesu amafuta
(uMaaliko 14:3-9; uYoohani 12:1-8)
6Pisinda, uYeesu ahasogola mu nkaaya iya Besaniya, ahinjila mu nyumba iya Siimoni we ku vhwandilo áamile na mambombo. 7Lwe atendiime akulya ishaakulya, umwantanda wumo ahinza ku kwakwe na mafuta ge gakununshila ge gáamile ga nsavho nkaani. Amafuta igo gáamile mu nsupa ye vhagombeeye ivhwe ilya nsavho nkaani lye vhahatinji ialabaasita. Ahamwitiilizya uYeesu pi itwe kulolesya umushinzi. 8Lwe avhasundikwa vhaakwe vhazilola izyo, vhahaviitwa nkaani, vhahati, “Shooni she akuteezya amafuta iga vhweleele? 9Yeenya, amafuta iga twaamile tukazyaje nu kuposheela impiiya inyinji nkaani nu kuuvhapa avhapiina zyenezyo!” 10Lwe uYeesu azimanya zye vhahasiivhaga, ahati, “Shooni she mukumutamwa umwantanda uno? Uweene ambombela inyinza. 11Yeenya, avhapiina muli navho insiku zyonti, ileelo ine te mbe niimwe ahavhaliilizyo honti. 12Umwantanda uno anitiilizya amafuta pa muvhili waane, kunsengaanya pi isiku ilya kusyilwa kwane. 13Nalyoli nkuvhavhuuzya kuuti, mu nsi yonti pe vhalikumusya Izwi iLyinza, niili lye avhomba umwantanda uno kwe liyangwaje kumukumbuha.”
UYuuda akwanza kumwaniila uYeesu
(uMaaliko 14:10-11; uLuuka 22:3-6)
14Pe uYuuda uwa ku Kaalyoti, we áamile wooka mu vhasundikwa 12 avha Yeesu, ahasogola ku vhapiti avha vhapuuti, 15ahavhavhuziilizya ahati, “Kwe mumpe ishooni inga namwaniila uYeesu?” Pe vhahaamupa impiiya insavhaazya 30. 16Kufuma ahavhaliilizyo iho, uYuuda uwa ku Kaalyoti ahanda kulondola idala ilya kumwaniila uYeesu.
UYeesu akulya ishaakulya isha Pasaaka na vhasundikwa vhaakwe
(uMaaliko 14:12-26; uLuuka 22:7-23; uYoohani 13:21-30; 1 aVhakolinto 11:23-25)
17Isiku ilya kwanda ilya shikulukuulu isha makaati ge vhataluziizye,#26:17 Ishikulukuulu isha makaati ge vhataluziizye: Vhaazya mu Ntantiho izya Mazwi aMajeni. avhasundikwa avha Yeesu vhahinza ku kwakwe, vhahamuvhuziilizya vhahati, “Ukwanza tusengaanye kwoshi ukwa kuliila ishikulukuulu isha Pasaaka?” 18UYeesu ahavhaamula ahati, “Musogole mu nkaaya iya Yelusaleemu kwa muntu wumo, mumuvhuuzye muti, ‘UMusambiilizi atusonteelezya, akuti, “Ahavhaliilizyo haane hapalamiiye. Ine na vhasundikwa vhaane kwe tulye ishaakulya isha Pasaaka mu nyumba yaaho.”’” 19Avhasundikwa ivho vhahasogola nu kuvhomba inza vwe uYeesu ávhalajiziizye, vhahasengaanya ishaakulya isha Pasaaka.
20Lwe havha havhaliilizyo aha hamazuuvha, uYeesu ahatendama kulya ishaakulya pooka na vhasundikwa vhaakwe 12. 21Lwe vhakulya, uYeesu ahavhavhuuzya ahati, “Nalyoli nkuvhavhuuzya kuuti, wumo muli imwe kwe ananiile.” 22Avhasundikwa vhaakwe vhahaswimiililwa nkaani, vhahanda kumuvhuziilizya wooka wooka kuuti, “We Mwene, vhuli, neene?” 23UYeesu ahavhaamula ahati, “Ula we akusanzila ikaati pooka niine mu luvhiga, we kwe ananiile. 24Ne Mwana wa Aadamu kwe mfwe inza vwe nsimviliilwe mu Vhusimbe uVhufinjile. Ileelo asheela umuntu uyo we akunaniila. Yaamile kwashi ku kwakwe umuntu uyo, inga atápafwilwe.” 25Pe uYuuda we wa kumwaniila uYeesu, woope ahamuvhuziilizya ahati, “We Musambiilizi, vhuli, neene?” UYeesu ahamwamula ahati, “Iwe wayanga.”
Ishaakulya isha Mwene
(uMaaliko 14:22-26; uLuuka 22:14-23; 1 aVhakolinto 11:23-25)
26Lwe vhakulya, uYeesu ahanyatula ikaati, ahaliloota, ahalimensula, ahaavhapa avhasundikwa vhaakwe, ahavhavhuuzya ahati, “Nyatuuli mulye, uno we muvhili waane.” 27Havhili, ahanyatula ulupindi lwe lwáli ni divaayi, ahamusalifwa uMulungu, ahaavhapa, ahati, “Mumwele mwenti. 28Iga mavhanda gaane aga lufingwi#26:28 Ulufingwi: Vhaazya mu Ntantiho izya Mazwi aMajeni. ge gakwitiha kuzya vhantu avhinji, inga uMulungu avhaswile uvhutalamalandu vhwavho. 29Nkuvhavhuuzya imwe kuuti, te nkamwele havhili idivaayi, kufishila isiku liila pe ndimwela idivaayi impwa#26:29 Ndimwela idivaayi impwa: Lumo kwe kuuti, Ndimwela idivaayi vhupwa. pooka niimwe mu vhumwene uvhwa Taata waane.”
30Pe vhahateela ulwimbo ulwa kumutiima uMulungu.#26:30 Ulwimbo ulwa kumutiima uMulungu: Lwe aVhayuuda vhaamala kulya ishaakulya isha Pasaaka, vhahimbaga iZabuuli 113-118. Lwe vhaamala, vhaheepa paala, vhahasogola kwi igamba ilya Mazayituuni.
UYeesu akuyanga kuuti uPeeteli kwe amuhaane
(uMaaliko 14:27-31; uLuuka 22:31-34; uYoohani 13:36-38)
31Pe uYeesu ahavhavhuuzya avhasundikwa vhaakwe ahati, “Uvhusiku uvhwa ileelo imwe mwenti kwe munshimbile nu kundeha. Nkuyanga vhwevhulo, mwe pe yisimviilwe mu Vhusimbe uVhufinjile kuuti,
‘Ndimuhoma umudiimi,
ni ngʼonzi izya mu mpuga iyo zilisaata.’#26:31 uZakaliya 13:7
32“Ileelo lwe uTaata waane anzyusya, ndivhalongolela kusogola ku Galilaaya.” 33Ileelo uPeeteli ahati, “Poosye inga vhakukuleha vhonti, ine te nkuleshe inga hansi.” 34UYeesu ahamwamula ahati, “We Peeteli! Nalyoli nkukuvhuuzya kuuti, uvhusiku uvhwa ileelo lwe inkanda yishiili kuvhilishila, kuuti uvhe wankaana lutatu kuuti utamanyile.” 35Ileelo uPeeteli ahamwamula ahati, “Poosye inga nkwanzilwa kufwa pooka niiwe, ine te nkuhaane iwe.” Avhasundikwa avhamwavho vhoope vhahayanga vhwevhulo.
UYeesu akumulaavha uMulungu mu shilimbika isha Getisemaani
(uMaaliko 14:32-42; uLuuka 22:39-46)
36Pe uYeesu ahasogola na vhasundikwa vhaakwe pa shilimbika shimo she vhahatinji iGetisemaani. Lwe aafiha penepo ahavhavhuuzya avhasundikwa vhaakwe ahati, “Mutendame ipa, ine nasogola paala kumulaavha uMulungu.” 37Ahamunyatula uPeeteli pooka na vhaana vhavhili avha Zebedaayi, ahataliha kuswimiililwa nu kupulupuuta mu mwoyo. 38Pe ahati, “Umwoyo waane wuswimiliilwe nkaani, nkuvha ngati naakufwa, muvhe ipa, mudamulilaje pooka niine.”
39Ahasogola pilongolela hansi, ahagwa ishikupama, ahalaavha ahati, “We Taata, inga zingavhombeha, nkulaavha uyeefwe amayimba iga kuli ine.#26:39 Uyeefwe amayimba iga kuli ine: IShiyunaani shikuti, Ulupindi ulu lufupushe kuli ine. Ileelo utahavhombe inza vwe nkasiime ine, nkandi vwe ukasiime weneewe.” 40Pe uYeesu ahagaluha ku vhasundikwa vhaakwe, ahaaga vhakaasite utulo. Ahamuvhuziilizya uPeeteli ahati, “Vhuli, muposiitwe kudamulila pooka niine poosye isaala inga lyoka vhweleele? 41Damuuli, mumulaavhaje uMulungu, kuuti aavhape amaha, inga indingo zitahinze zivhapoote. Mukusungwa kuvhomba ahinza ileelo amavhili giinyu mayeyevhazu.”
42UYeesu ahasogola ulwa vhuvhili havhili kulaavha, ahati, “We Taata, inga amayimba iga gatangeepa kuli ine, pe zivhombeshe inza vwe ukasiime weneewe.” 43Ahagaluha havhili, ahaaga vhakaasite utulo, mwe pe aminso gaavho gáali mamwamu. 44UYeesu ahavhaleha havhili nu kusogola kulaavha ulwa vhutatu, ahavhuyiizya amazwi gegaala. 45Lwe agaluha havhili ku vhasundikwa vhaakwe, ahati, “Niishi mukaasite utulo nu kutuuzya? Yeenya, ahavhaliilizyo haafiha, ne Mwana wa Aadamu kwe vhambiishe mu nyoovhe izya vhatalamalandu. 46Vhuushi, tujendi. Yeenya, we akunaniila apalamiiye!”
UYeesu akulemwa
(uMaaliko 14:43-50; uLuuka 22:47-53; uYoohani 18:3-12)
47Ahavhaliilizyo hehaala uYeesu lwe akuyanga, uYuuda, we wooka mu vhasundikwa 12 ahafiha ni ivhungaana ipiti ilya vhantu vhe vháamile na mapanga ni nduugu. Avhantu ivho vháfumile ku vhapiti avha vhapuuti na vhasongo avha Vhayuuda. 48UYuuda we akumwaniila uYeesu, ápezile avhapiiye ishilolesyo, ávhavhuziizye átili, “Ula we namwofwa, we muhamulemaje.” 49Naluvhiilo uYuuda ahasogola kwa Yeesu ahati, “We Musambiilizi, mwakaata!” Ahamwofwa. 50UYeesu ahamwamula ahati, “We mumanyani, vhomba zye uyinziiye.” Pe avhantu vhaala vhahamulema uYeesu nu kumukunga. 51Wumo muli ivho vhe vháali nu Yeesu ahanyatula ipanga lyakwe, ahamudiba nu kumudumula ikutwi umuzya uwa mupuuti umupiti. 52Ileelo uYeesu ahamuvhuuzya ahati, “Galusya ipanga lyaho, mwe pe vhonti vhe vhakulema ipanga kugoga avhamwavho, vhoope vhaliifwa kwi ipanga. 53Vhuli, mutamanyile kuuti ingamulambiilizya uTaata waane kuuti anaavwe, woope angandeetela shiniishi avhahavhizya vhaakwe impuga impiti 12#26:53 Avhahavhizya vhaakwe impuga impiti 12: IShiyunaani shikuti ilegiyooni 12 izya vhahavhizya. Kwe kuuti avhahavhizya 72,000. nu kushila? 54Vhuli, inga navhomba vhwevhulo, pe zingalunjiha vhuli zye zisimviilwe mu Vhusimbe uVhufinjile kuuti isho vwe zikwanzilwa kuvha?”
55Pe uYeesu ahavhavhuziilizya avhantu ivho ahati, “Shooni she mwaninzila na mapanga ni nduugu, ngati mwinzile kumulema umupumula vintu? Insiku zyonti navhanga niimwe nkusambiilizya pa Nyumba iMfinjile, ileelo mutandemaga! 56Ileelo izi zyavhombeha, inga zye avhakuvhwi vhásimvile mu Vhusimbe uVhufinjile zilunjishe.” Pe avhasundikwa vhaakwe vhonti, vhahamuleha weeka nu kushimbila.
UYeesu pilongolela ilya vhalongozi avha Vhayuuda
(uMaaliko 14:53-65; uLuuka 22:54-55, 63-71; uYoohani 18:12-14, 19-24)
57Pe vhaala vhe vhámulemile uYeesu vhahamutwala kwa Kayaafa, umupuuti umupiti, kwe vhávhungiine avhasambiilizi avha ndajizyo izya Moose na vhasongo avha Vhayuuda. 58UPeeteli ahavhanga akulandata mwisinda ukutali, kufishila pa lupitu ulwa nyumba iya mupuuti umupiti. Pe ahinjila muhati, ahatendama pooka na vhavhomvi avha mupuuti umupiti, inga ayeenye amalandu aga Yeesu pe gakusilila.
59Pe avhapiti avha vhapuuti nu lukuvhato#26:59 Ulukuvhato: Vhaazya mu Ntantiho izya Mazwi aMajeni. lwonti ulwa Vhayuuda, vhahanda kulondola avhahoome avha kuhomeshezya izya ilenga, inga vhalyaje idala ilya kumugoga uYeesu. 60Ileelo vhatahavhwaga uvhuhomeshezi uvhwa ilenga naavhumo, poosye she vhínzile avhahoome avha ilenga avhinji. Pisinda, vhahinza avhahoome vhavhili, vhahati, 61“Umuntu uno átili, ‘Ine ingayimongola iNyumba iMfinjile nu kuyizenga havhili ku nsiku zitatu.’”
62Pe umupuuti umupiti ahimiilila pahati yaavho, ahamuvhuziilizya uYeesu, ahati, “Vhuli, utakuvhaamula avhantu ivha kulandatana na zye vhakukulonjeelela?” 63Ileelo uYeesu ahapuuma. Pe umupuuti umupiti ahayanga havhili ahati, “Twivwe lapa kwi izina ilya Mulungu uMulanzi, utuvhuuzye inga iwe we Chilisiti, uMwana wa Mulungu.” 64UYeesu ahamwamula ahati, “Iwe wayanga. Ileelo nkuvhavhuuzya mwenti kuuti, kwandila ishi kwe mundole ne Mwana wa Aadamu ntendiime ku luvhazu ulwa kundiilo#26:64 iZabuuli 110:1 ulwa Mulungu uwa Maha Gonti pa vhushindamu uvhupiti nkaani. Havhili kwe mundole nkwinza mu mavhingo.”#26:64 uDaaniyeeli 7:13 65Lwe umupuuti umupiti ayiivwa izyo, ahazeepula amenda gaakwe kulolesya kuuti avisiitwe, ahati, “Mwivwa vwe akumusaamula uMulungu! Tukwanza avhahoome avhanji vhaashi? Mwivwa mweneemwe vwe akusaamula! 66Pe ishi, imwe mukuti vhuli?” Vhahamwamula vhahati, “Uyo akwanzilwa kufwa!”
67Pe vhahamuswilila amati ku minso, vhahamuhoma ni mbuli. Vhamo vhahamukanza na makoofi, 68nu kumuvhuuzya kuuti, “We Chilisiti, twivwe kuvhwa, wu naanu we akuhoma?”
UPeeteli akumuhaana uYeesu
(uMaaliko 14:66-72; uLuuka 22:56-62; uYoohani 18:15-18, 25-27)
69Ahavhaliilizyo hehaala uPeeteli átendiime panzi pa luvhungaano. Pe umuvhomvi wumo umulindu ahapalamila kwa Peeteli, ahamuvhuuzya ahati, “Niiwe waamile pooka nu Yeesu uwa ku Galilaaya.” 70UPeeteli ahahaana pilongolela ilya vhaala vhonti, ahati, “Ntazimanyile izyo zye ukuyanga!”
71Pe uPeeteli aheepa paala, ahasogola pa mulyango uwa kufumila pa lupitu. Umuvhomvi uwamwavho umulindu ahamulola, ahavhavhuuzya avhantu vhe vháali paala ahati, “Umuntu uno aamile pooka nu Yeesu uMunaazaleeti.” 72UPeeteli ahahaana havhili ku shilapo ahati, “Ntamumanyile umuntu uyo!”
73Lwe ahavhaliilizyo hatuuha hansi, avhantu vhe vhímiliiye paala, vhahapalamila kwa Peeteli, vhahamuvhuuzya vhahati, “Nalyoli iwe we wooka mu vhantu ivho, poosye ahayanjile haaho hakulolesya kuuti ufumile ku Galilaaya!” 74UPeeteli ahanda kutipa nu kulapa, ahati, “Ntamumanyile umuntu uyo!” Ahavhaliilizyo hanaaho inkanda yihavhilishila.
75UPeeteli ahalikumbuha izwi ilya Yeesu lye átili, “Lwe inkanda yishiili kuvhilishila, kuuti uvhe wankaana lutatu.” Pe ahafuma panzi nu kukuuta ku vhuswimiilizu nkaani.
Currently Selected:
uMataayi 26: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
