uMataayi 14
14
Kufwa ukwa Yoohani uMwozyi
(uMaaliko 6:14-29; uLuuka 9:7-9)
1Ahavhaliilizyo iho umwene uHeelodi#14:1 UHeelodi: Vhaazya mu Ntantiho izya Mazwi aMajeni. ahiivwa inongwa izya Yeesu. 2Pe ahavhavhuuzya avhavhomvi vhaakwe ahati, “Uno wu Yoohani uMwozyi azyusile! Ye nongwa ali na maha aga kuvhomba amafindango.”
3UHeelodi áyanzile vhwevhulo, mwe pe ápezile amulemile uYoohani nu kumukunga mu jeela kuzya Heloodiya we áali mushi wa munine waakwe uFiilipo. 4Ávhomvile vhwevhulo, mwe pe uYoohani ahamupililaga uHeelodi kuuti, “Indajizyo izya Moose zitakwitishila kuuti iwe umunyatule umushi wa mukulu waaho.”#14:4 aVhalaawi 18:16; 20:21 5Pe uHeelodi ahanza kumugoga uYoohani, ileelo ahoogopa ivhungaana ilya vhantu, mwe pe vhámwitisile kuuti mukuvhwi.
6Lwe isiku ilya shikulukuulu isha kupaapwa uHeelodi lyafiha, umwana umulindu uwa Heloodiya ahimba ingʼoma pa vhantu vhe vhálanjiliilwe, ahamuhondezya nkaani uHeelodi. 7Pe uHeelodi ahafinga nu kulapa kuumupa umulindu uyo ishintu shonti she angamulaavha. 8Lwe unyina amupanzya izya kuyanga, umulindu uyo ahamuvhuuzya uHeelodi ahati, “Nkulaavha umpe panaapa itwe ilya Yoohani uMwozyi mwi isiniya.” 9Umwene ahaswimiililwa nkaani, ileelo, mwe pe álafile pilongolela ilya vhajeni, ahalajizya kuuti vhaamupe itwe ilya Yoohani uMwozyi. 10Pe uHeelodi ahamusonteelezya umuntu wumo, kusogola kumudumula uYoohani itwe mu jeela. 11Ahalileeta mwi isiniya nu kuumupa umulindu uyo, woope ahaamupa unyina. 12Pe avhasundikwa avha Yoohani vhahasogola kushinyatula ishaala nu kushisyila. Pisinda, vhahasogola kumuvhuuzya uYeesu zyonti zye zyáfumiiye.
UYeesu akuvhaliisya avhantu 5,000
(uMaaliko 6:30-44; uLuuka 9:10-17; uYoohani 6:1-14)
13Lwe uYeesu ayiivwa zyonti izyo, aheepa paala ni ivhooti, ahasogola kukwilu kwe kutáamile avhantu. Ileelo lwe ivhungaana ilya vhantu lyamanya, lihamulandata ulwa pansi kufuma mu nkaaya nu kusogola kwe áamile. 14Lwe uYeesu ayiiha mwi ivhooti, ahavhalola avhantu ivhungaana ipiti nkaani, ahavhafwila uvhwila nu kuvhaponia avhavhinu vhaavho.
15Lwe haafiha hamazuuvha, avhasundikwa vhaakwe vhahasogola ku kwakwe, vhahamuvhuuzya vhahati, “Ipa pe pi ilaala, havhili uvhusiku vhwaakwila. Ulilaje ivhungaana ili ilya vhantu, vhasogole mu ntala, vhayikalile ishaakulya.” 16UYeesu ahavhaamula ahati, “Vhatakwanzilwa kwepa. Vhapi mweneemwe ishaakulya.” 17Vhahamwamula vhahati, “Iswe tutali nasho naashimo ipa, nkandi ge makaati gasaano ni nswi zivhili.” 18UYeesu ahavhavhuuzya ahati, “Ndeeteli vwenevwo ipa.” 19Pe ahavhalajizya avhantu ivho kuuti vhatendame pa masole. Ahanyatula amakaati gasaano igo ni nswi zivhili izyo, aheenya ku mwanya, ahamusalifwa uMulungu. Ahamensulanya, ahaavhapa avhasundikwa vhaakwe, vhoope vhahavhagavhila avhantu ivho. 20Avhantu vhonti vhahalya, vhahiikuta. Avhasundikwa vhaakwe vhahavhungaaniha ivwalila, vihiizula ivitundu 12. 21Avhantu vhe vháliiye, vháali avhanaavuli 5,000 ishi ishisita kuvhaazya avhantanda na vhaana.
UYeesu akujenda pa minzi pamwanya
(uMaaliko 6:45-52; uYoohani 6:16-21)
22Ahavhaliilizyo hanaaho, uYeesu ahavhalajizya avhasundikwa vhaakwe kuuti vhinjile mwi ivhooti, vhalongolele kusogola kwi isyila ilya sumbi uwa Galilaaya, lwe uweene akulilaga ivhungaana ilya vhantu. 23Lwe alilaga ivhungaana ilya vhantu, uYeesu ahazuvha weeka pi igamba kumulaavha uMulungu. Lwe haafiha hamazuuvha, ahavha weeka pi igamba. 24Ahavhaliilizyo iho ivhooti lyápezile lyafiha pahati pa sumbi, ileelo amavhilingwa gahaliyuvhanyaaga, mwe pe inkungu yihavugulaga kulungamana nalyo. 25Ahavhaliilizyo he inkanda zikwanda kuvhilishila, uYeesu ahafuma akujenda pa minzi pa sumbi, akwinza kwe avhasundikwa vhaakwe vháali. 26Ileelo lwe vhamulola uYeesu akujenda pa minzi pamwanya, vhahatetema, vhahati, “Umuzimu!” Vhahahoola nkaani kwi lyoga. 27Ileelo uYeesu ahavhavhuuzya ahati, “Mutogopaje! Gomaaji umwoyo! Neene.” 28Pe uPeeteli ahayanga ahati, “We Mwene, inga ndinga weewe, mbuuzya, ininze kuli iwe she nkujenda pa minzi pamwanya.” 29UYeesu ahamwamula ahati, “Nzaaga.” Pe uPeeteli ahiiha mwi ivhooti liila, ahajenda pamwanya pa minzi kusogola kwa Yeesu. 30Ileelo lwe aalola inkungu impiti, ahoogopa. Ahataliha kudwivha, pe ahahoola ahati, “We Mwene, mpoha!”
31Naluvhiilo, uYeesu ahagolosya inyoovhe nu kumulema, ahamuvhuuzya ahati, “We wa lwitiho ulunsi, shooni she uli na maganigani?” 32Lwe uYeesu nu Peeteli vhinjila mwi ivhooti, inkungu yiila yihaleha kuvugula. 33Pe avhasundikwa vhe vháali mwi ivhooti, vhahamusugamilila uYeesu vhahati, “Nalyoli iwe we Mwana wa Mulungu!#14:33 UMwana wa Mulungu: Vhaazya mu Ntantiho izya Mazwi aMajeni. ”
UYeesu akuvhaponia avhavhinu mu Jenesaleeti
(uMaaliko 6:53-56)
34Lwe uYeesu na vhasundikwa vhaakwe vhalamba usumbi uwa Galilaaya, vhahafiha mu nkaaya iya Jenesaleeti.#14:34 IJenesaleeti nkaaya yimo mu shigavho isha nsi isha Galilaaya. 35Lwe avhantu avha mu nsi iyo vhaamanya kuuti wu Yeesu, vhahavhizya inongwa zyakwe imbazu zyonti. Pe avhantu vhahavhaleeta vhonti vhe vháali vhavhinu kwa Yeesu. 36Vhahamulambiilizya uYeesu kuuti avhavhinu vhaleme poosye lye likoopi ilya mwenda waakwe vhweleele. Pe avhavhinu vhonti vhe vhálemile, vhahapona.
Currently Selected:
uMataayi 14: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
