uMataayi 11
11
UYoohani uMwozyi akuvhatuma avhasundikwa vhaakwe kwa Yeesu
(uLuuka 7:18-35)
1Lwe uYeesu aamala kuvhalajizya avhasundikwa vhaakwe 12, aheepa paala. Ahasogola kukumusya nu kuvhasambiilizya avhantu izwi ilya Mulungu mu nkaaya izya mu Galilaaya.
2Lwe uYoohani uMwozyi akunziilwe mu jeela, ahiivwa zye uChilisiti akuvhomba. Pe ahavhatumiilizya avhasundikwa vhaakwe, 3inga vhamuvhuziilizye uYeesu kuuti, “Vhuli, iwe we we Chilisiti we avhakuvhwi vhátili aliyinza, pamo tuguliilile uwunji?” 4UYeesu ahavhaamula ahati, “Sogooli mumuvhuuzye uYoohani zyonti zye mukuzilola nu kuzyivwa. 5Avhantonko vhakulola havhili, na vhantendya vhakujenda na vha mambombo vhakuzelupa. Havhili vhoope avhakuutwi vhakwivwa, na vhafwe vhakuzyuha na vhapiina vhakulumbiililwa Izwi iLyinza.#11:5 Imbombo zye uYeesu akuzitaha mu hansi iha zye avhakuvhwi vhákuvile kuuti uChilisiti alizivhomba. Vhaazya uYisaayi 26:19; 29:18-19; 35:5-6; 61:1. 6Alosiitwe umuntu we akuniitiha ine ishisita amaganigani.”
7Lwe avhasundikwa avha Yoohani vheepa, uYeesu ahanda kulivhuuzya ivhungaana ilya vhantu vhaala izya Yoohani uMwozyi. Ahati, “Mwásogooye kwenya ishooni kwi ilaala? Mwásogooye kwenya isole lye inkungu yikuliyinzaanya? 8Inga te she shiyo, pe mwásogooye kwenya ishooni? Mwásogooye kumwenya umuntu we ázwaye amenda aga nsavho? Mumanye kuuti, avhantu vhe vhakuzwala amenda aga nsavho vhakutendama mu nyumba izya shimwene. 9Ishi pe mwásogooye kwenya ishooni? Vhuli, mwásogooye kumwenya umukuvhwi? Nalyoli mwe muumwo! Nkuvhavhuuzya kuuti, uweene mupiti kuluusya umukuvhwi. 10Uweene we ásimviliilwe mu Vhusimbe uVhufinjile kuuti, ‘Yeenya, ndimusonteelezya umuvhomvi waane, akulongolele kulingaanya idala lye ulituuha.’#11:10 uMalaaki 3:1”
11UYeesu ahati, “Nalyoli nkuvhavhuuzya kuuti, ku vhantu vhonti atahafumila naalumo we mupiti kumuluusya uYoohani uMwozyi. Ileelo umuntu we munsi nkaani mu vhumwene uvhwa Mulungu, we mupiti kuluusya uYoohani. 12Kwandila insiku zye uYoohani uMwozyi átalisile kulumbiilila kufishila ileelo, uvhumwene uvhwa Mulungu vhukuyimvilwa nkaani. Vhoope vhe vhali na maha, vhakulinga kuvhugoma. 13Nkuyanga vhwevhulo, mwe pe avhakuvhwi vhonti ni ndajizyo izya Moose zihakuvhwa kufishila ahavhaliilizyo aha Yoohani. 14Ishi inga mukwitiha uvhukuvhwi vhwavho, uYoohani we wu Eeliya,#11:14 UEeliya: AVhayuuda vhahasuvhilaga kuuti aliyinza havhili umukuvhwi uEeliya, kusengaanya kwinza ukwa Chilisiti. Vhaazya uMalaaki 3:1; 4:5-6. ula we avhakuvhwi vháyanzile kuuti aliyinza. 15We ali na makutwi, atejeelezye!”
16Pe uYeesu ahajendeelela kuyanga ahati, “Imbaholanye ni shooni avhantu avha havhaliilizyo iha? Vhali inza avhaana vhe vhatendiime kupukuta pa nsokooni, vhamo vhakuvhavhilishila avhamwavho vhakuti,
17‘Twávhahomeeye ilonji,
ileelo mutímvile!
Havhili twávhateleleeye inyimbo izya vhuswimiilizu,
ileelo mutálosiizye!’
18“Nkuvhaholanya vhwevhulo, mwe pe uYoohani áyinzile, atahalyanga, poosye kumwela, avhantu vhátili, ‘Ali ni mpepo inkandamanu.’ 19Niine ne Mwana wa Aadamu ninzile, nkulya nu kumwela, avheene vhakuti, ‘Uno mupafu havhili wu shimwela. Havhili mumanyani uwa vhasonchezya musonko na vhatalamalandu avhanji!’ Ileelo uvhushindamu uvhwa njeele vhukuloleha kuuti vhwa nalyoli ku vhugolosu uvhwa mbombo zyakwe.”
UYeesu akuvhasoha avhantu avha mu nkaaya zye zikuhaana kumwitiha
(uLuuka 10:13-15)
20Pe uYeesu ahanda kuvhapilila avhantu avha mu nkaaya zye ávhomvile amafindango aminji, mwe pe avhantu ivho vhatápindusile. 21Ahayanga ahati, “Mwasheela imwe mwe vhantu avha mu nkaaya iya Kolaziini ni ya Betisaayida!#11:21 IKolaziini ni Betisaayida zyáli nkaaya izya Vhayuuda. Avhantu avha mu nkaaya izyo vhahayilolaga kuuti vhagolosu kuluusya avhantu avha mu nkaaya izinji inza iya Tiilo ni ya Siidoni. Vhahayilolaga isho, mwe pe vháamile Vhayuuda havhili vhantu vha Mulungu. Yeenya, amafindango ge mbomvile kuli imwe, inga apele gavhombehaje mwe mu nkaaya iya Tiilo ni ya Siidoni, avhantu avha mu nkaaya izyo, nkandi vházwaye amagunila nu kuyipaha ilota kulolesya kutonta uvhutalamalandu vhwavho. 22Nalyoli nkuvhavhuuzya kuuti, isiku ilya vhulonzi, imwe muliposheela isunde ipiti kuluusya avhantu avha mu nkaaya iya Tiilo ni ya Siidoni! 23Niimwe mwe vhantu avha mu nkaaya iya Kapelanawuumu, vhuli, mukusiivha kuuti muliizuvha kufishila ku mwanya? Ndaali! Te yihaavhe vhwevhulo, mulisumbwa pansi kufishila ku vhuzimu.#11:23 Ku vhuzimu: Vhaazya mu Ntantiho izya Mazwi aMajeni. Nkuyanga isho, mwe pe amafindango ge mbomvile kuli imwe, inga gapele gavhombehaje mwe mu nkaaya iya Sodooma,#11:23 ISodooma nkaaya ye uMulungu áyilonzile kuzya vhutalamalandu uvhwa vhantu vhaakwe. Vhaazya uVhwandilo 19:24-29. inkaaya iyo, nkandi yiliipo kufishila ileelo. 24Nalyoli nkuvhavhuuzya kuuti, isiku ilya vhulonzi, imwe muliposheela isunde ipiti kuluusya avhantu avha mu nkaaya iya Sodooma!”
Kumutwalila uYeesu amaligo
(uLuuka 10:21-22)
25Ahavhaliilizyo iho uYeesu ahajendeelela kuyanga kuuti, “We Taata, Mwene wa ku mwanya na pa nsi, nkukusalifwa. Nkukusalifwa, mwe pe imbombo izi uvhazyisile avhantu vhe vhakuyilola kuuti vhali nu vhushindamu uvhwa njeele nu kuuti vhasambiilile, ileelo uvhalolesiizye apazelu avhantu vhe vhakuyiisya inza avhaana avhansi. 26Nalyoli Taata, isho vwe usungwilwe.
27“UTaata waane ampiiye ivintu vwonti. Ataliipo we amumanyile uMwana, nkandi we Taata weeka. Havhili, ataliipo we amumanyile uTaata, nkandi we Mwana weeka, nu muntu wonti we uMwana asungwilwe kumulolesezya.
28“Nzaaji kuli ine imwe mwenti mwe mukuyimvilwa nu kunyatula amaligo amamwamu, ine kwe mbape ulutuuzyo. 29Mwitishe kulongolwa niine, ngati nkambaku zye zipinyiilwe ni ijooko, musambiilile kuli ine, mwe pe ine ne mutonsu havhili njisiizye mu mwoyo waane, pe niimwe kwe muvhe nu vhutehamu mu mooyo giinyu. 30Ijooko lyane litonsu,#11:30 Ijooko lyane litonsu: Ipa, uYeesu akutusambiilizya kuuti, tumusuvhilaje uweene weeka, mwe pe akutulongozya nu kutuloota nu kutuguulila nu kuutupa amaha aga kuvhomba zye uMulungu akwanza. woope umuligo waane mupupuusu.”
Currently Selected:
uMataayi 11: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
