uYoohani 17

UYeesu akumulaavha uMulungu

1Lwe uYeesu aamala kuyanga na vhasundikwa vhaakwe zyonti izyo, aheenya ku mwanya, ahalaavha ahati, “We Taata, ahavhaliilizyo haafiha. Uvhalolesye avhantu uvhushindamu vhwane ine ne Mwana waaho, inga niine ne Mwana waaho imbalolesye uvhushindamu vhwaho vwe vhuli. 2Izyo zikuvhombeha, mwe pe umpiiye amaha aga kuvhakonzya avhantu vhonti, inga mbape vhe vhakuniitiha uvhulanzi uvhwa shiima. 3Uvhulanzi uvhwa shiima uvhwo vhukuposheelwa kwi idala ilya vhantu kukumanya kuuti iwe we Mulungu weeka uwa nalyoli, havhili kumanya niine kuuti ne Yeesu Chilisiti ne untumile ku kwavho. 4Ine ndolesiizye uvhushindamu vhwaho ku vhantu vhonti kutuushila ku mbombo ye wánsonteleziizye kuyivhomba. 5Ishi we Taata, ulolesye uvhushindamu vhwane, inga avhantu vhavhulole uvhushindamu vhwe náali navhwo lwe náali pooka niiwe lwe insi yishiili kupelwa.”

UYeesu akuvhalaavhila avhasundikwa vhaakwe

6UYeesu ahajendeelela kulaavha ahati, “We Taata, navhamanyisya izina lyaho avhantu vhonti vhe waampiiye pa nsi ipa. Ivho vhaamile vhaaho, wampa vhenevho, havhili vhalandasite izwi lyaho. 7Ishi vhaamanya kuuti ivintu vwonti vwe umpiiye, vifumile kuli iwe, 8mwe pe mbavhuziizye amazwi gonti ge wámbuziizye. Vhoope vhagaposheleeye, havhili vhamanyile kuuti nalyoli mfumile ku kwaho, havhili vhitisile kuuti iwe we unsonteleziizye. 9Nkuvhalaavhila ivho, mwe pe vhantu vhaaho. Ntakuvhalaavhila avhantu vhonti, nkandi vhevhaala vhe umpiiye. 10Avhantu vhonti vhe vhaane, niiwe vhaaho, havhili avhantu vhonti vhe vhaaho, niine vhaane. Uvhushindamu vhwane vhulolesile ku vhantu kutuushila ku kwavho. 11Ishi nkwinza kuli iwe, te mbe havhili mu nsi umu. Ileelo avheene kwe vhajendeelele kuvha mu nsi umu. We Taata Mufinjile, nkulaavha uvhaguulile kwi izina lyaho lye umpiiye, inga vhavhe ishintu shooka inza vwe ine niiwe tuli ishintu shooka. 12Lwe indi pooka navho, navhagulilaga kwi izina lyaho lye umpiiye. Navhagulilaga ahinza, ataliipo we ateezile, nkandi wewuula weeka we akwanzilwa kuteega, inga zilunjishe zye zisimviilwe mu Vhusimbe uVhufinjile.#17:12 iZabuuli 41:9-10; 55:12-15; 109:4-15; uYisaayi 57:12-13

13“We Taata, ishi indi mwi idala nkwinza kuli iwe. Nkuvhavhuuzya avhasundikwa vhaane zyonti izi she indi mu nsi, inga vhavhe nu luseshelo nkaani muhati zyavho, inza vwe niine indi nu luseshelo. 14Mbavhuziizye izwi lyaho, ileelo avhantu avha mu nsi vhavhavitiliilwe, mwe pe te vha mu nsi umu, inza vwe niine te ne wa mu nsi umu. 15We Taata, ntakulaavha kuuti uvheefwe mu nsi umu, nkandi kuuti uvhaguulile nu Muvhiivhi ula uSeetano. 16Avheene te vha mu nsi umu, inza vwe niine te ne wa mu nsi umu. 17We Taata, uvhazelufwe kwi idala ilya vhwanalyoli vhwaho. Izwi lyaho vhwe vhwanalyoli. 18Inza vwe wánsonteleziizye ine mu nsi, vhwevhulo, niine navhasonteelezya mu nsi. 19Nkuyifumwa kukuvhombela iwe ku zyavho, inga vhoope vhayifumwe kuli iwe mu vhwanalyoli.”

20UYeesu ahajendeelela kulaavha, ahati, “Ntakuvhalaavhila vhanaavha vheeka, nkandi na vhanji vhe kuuti vhaniitishe ku zye ivha vhalisambilizyaga. 21Nkukulaavha kuuti vhonti ivho vhavhe ishintu shooka, inza vwe niiwe Taata uli muhati yaane, niine indi muhati yaaho. Nkuvhalaavhila vhavhe muhati yiitu, inga avhantu vhonti mu nsi vhiitishe kuuti iwe we unsonteleziizye. 22Uvhushindamu vhwe umpiiye, niine mbapiiye avhasundikwa vhaane, inga vhavhe ishintu shooka inza vwe niine niiwe tuli ishintu shooka. 23Ine indi muhati zyavho, niiwe uli muhati yaane. Nkulaavha kuuti vhavhe ishintu shooka, inga avhantu vhonti vhe vhatanitisile vhamanye kuuti iwe unsonteleziizye, havhili vhamanye kuuti uvhakunzite avhasundikwa vhaane inza vwe unkunzite ine.

24“We Taata, nkwanza kuuti vhe umpiiye, vhavhanje pooka niine pe nkuvha, inga vhavhulolaje uvhushindamu vhwe umpiiye, mwe pe wánkunzite kufuma lwe ni nsi yishiili kupelwa. 25We Taata uMugolosu, avhantu avha mu nsi vhatakumanyile. Ileelo ine nkumanyile, havhili vhoope avhasundikwa vhaane vhamanyile kuuti iwe we unsonteleziizye. 26Mbamanyisiizye izina lyaho, havhili kwe njendeelele kuvhomba vhwevhulo, inga vhakundane inza vwe unkunzite ine, havhili niine imbe muhati zyavho.”

Currently Selected:

uYoohani 17: nih

Highlight

Copy