iMbombo izya Vhatumwa 8
8
1Isiku liila lye vhámugozile uSiteefani, amayimba amapiti gahataliha mu shivhanza isha ku Yelusaleemu. Avhantu vhonti avha mu shivhanza vhahasataana mu nsi iya Yudeeya ni ya mu Samaliya. Ileelo avhatumwa vheeka vhe vhahasyala. 2Avhantu vhe vhahamushindihaga uMulungu vhahamusyila uSiteefani, nu kuloosya amaloosyo amapiti nkaani. 3Ahavhaliilizyo iho aha mayimba, woope uSaavhuli ahavhavwalanganyaaga avhantu avha mu shivhanza. Ahinjilaga mu nyumba zyavho, ahavhadendemulaga avhanaavuli na vhantanda nu kuvhakunga mu jeela.
UFiilipo akulumbiilila mu Samaliya
4Avhantu ivho vhe vhásatiine vhahanda kulumbiilila Izwi iLyinza ponti pe vhahasogolaga. 5UFiilipo#8:5 UFiilipo áamile wooka mu vhatuuli vhaala 7 vhe vhasimviilwe mu Mbombo izya Vhatumwa 6:5. woope ahasogola mu nkaaya iya Samaliya, ahanda kukumusya izya Chilisiti. 6Avhantu avhinji lwe vhiivwa amazwi ge uFiilipo ahalumbililaga nu kulola ivilolesyo vwe ahavhombaga, pe vhahamutejeelezya ku mwoyo wooka. 7Ahazipililaga impepo inkandamanu mu vhantu avhinji, lwe zikufuma zihazumaga ahalanga. Ahavhaponiaga avhinji vhe vháhataliiye, na vhantendya. 8Pe kuhavha uluseshelo nkaani mu nkaaya iyo.
USiimoni umulozi
9Mu nkaaya iyo iya Samaliya, mwámile umuntu wumo we áali mulozi, izina lyakwe vhahatinji uSiimoni. Ahavhasukumizyaga avhantu vhonti mu nsi iya Samaliya ku mayele aga vhulozi vhwe ahavhombaga, havhili ahayibaadaga kuuti uweene muntu umupiti. 10Avhantu vhonti, avhapiti na vhansi, vhahamutejelezyaga, vhahatinji, “Umuntu uno we maha aga Mulungu ge vhakuti aMaha aMapiti.” 11Avhantu vhahamutejelezyaga, mwe pe insiku inyinji ahavhasukumizyaga ku mbombo zyakwe izya vhulozi.
12Ileelo uFiilipo lwe alumbiilila Izwi iLyinza ilya vhumwene uvhwa Mulungu ni zya izina ilya Yeesu Chilisiti, vhahazyitiha, vhahoozelwa avhanaavuli na vhantanda. 13USiimoni woope ahamwitiha uYeesu, ahoozelwa, ahanda kumulandata uFiilipo kwonti. Ahasukumilaga lwe akulola ivilolesyo na mafindango amapiti ge uFiilipo ahavhombaga.
14Ku Yelusaleemu, avhatumwa avha Yeesu vhahiivwa kuuti avhantu avha mu Samaliya vhoope vhalyitisile izwi ilya Mulungu. Pe vhahavhasonteelezya avha Peeteli nu Yoohani kuukwo. 15Vhoope lwe vhaafiha, vhahavhalaavhila avhantu ivho kuuti vhamuposheele uMupepo uMufinjile, 16mwe pe atáliipo umuntu inga wooka muli ivho we uMupepo uMufinjile ámwishiiye. Vhózeliilwe kwe kwi izina ilya Mwene uYeesu vhweleele. 17Pe avha Peeteli nu Yoohani vhahavhavhiishila inyoovhe izya shipuuto, vhoope vhahamuposheela uMupepo uMufinjile.
18USiimoni lwe aalola kuuti avhantu ivho vhamuposheela uMupepo uMufinjile kwi idala ilya kuvhavhiishila inyoovhe izya vhatumwa, ahaavhapa impiiya avha Peeteli nu Yoohani, ahavhalaavha ahati, 19“Mumpe amaha igo niine, kuuti, inga umuntu wonti we namuvhiishila inyoovhe, woope aposheelaje uMupepo uMufinjile.”
20UPeeteli ahamwamula ahati, “Uteejele ukutali, iwe pooka ni mpiiya zyaho! Ukusiivha kuuti ungaakala ishikunjilwa isha Mulungu! 21Iwe utali pooka niiswe mu mbombo ino, mwe pe umwoyo waaho muvhiivhi pilongolela ilya Mulungu. 22Ishi, utonte imbiivhi zyaho izyo, umulaavhe uMwene uYeesu, kuuti akuswile ku nsiivho zyaho imbiivhi izyo. 23Nkuvhwenyi kuuti uli nu mwone nkaani, havhili imbiivhi zyaho zikulemeleeye.” 24USiimoni ahamwamula ahati, “Imwe mundaavhile kwa Mwene, inga zitahanaaje naazimo muli izyo zye mwayanga!”
25Avha Peeteli nu Yoohani lwe vhaafumwa uvhwahoome nu kulumbiilila izwi ilya Mwene uYeesu kuukwo, vhahanda kugaluha mu nkaaya iya Yelusaleemu. Lwe vhali mwi idala, vhahalumbililaga Izwi iLyinza mu nkaaya inyinji izya mu Samaliya.
UFiilipo akuyanga nu mupiti uwa ku Isyopiya
26Isiku limo, uhavhizya uwa MWENE uMulungu ahamuvhuuzya uFiilipo ahati, “Sogoola ku luvhazu ulwa kuntende kutuushila idala liila lye likufuma ku Yelusaleemu kusogola ku Gaaza.” (Idala ili lihatuuhaga mu luugwa.) 27Pe uFiilipo ahasogola, ahanda kujenda mwi idala ilyo. Ahavhaliilizyo hanaaho, mwi idala ilyo mwámile uMusyopiya wumo we áamile mu vhulendo uvhwa kuvhwela kuhaaya. Umuntu uyo áamile wu towaashi,#8:27 Utowaashi áamile mwanaavuli we vhámupaasile kuuti atapaapaje. Hali mu nsi zimo, avhanaavuli vhe vhahavhombaga imbombo mu nyumba iya samwene vhahavhombaga vhwevhulo. ahasengulaga ivintu ivwa mpiiya impiti ivwa Kandaake (Kandaake kwe kuuti, usamwene uwa nsi iyo iya Isyopiya). Umupiti uyo ápezile asogooye ku Yelusaleemu kumupuuta uMulungu, ishi ahavhwelaga kuhaaya. 28Lwe akuvhwela, átendiime mwi igeleeti lyakwe, ahavhazyaga mwi ikalaata ilya mukuvhwi uYisaayi.
29Pe uMupepo uMufinjile ahamuvhuuzya uFiilipo ahati, “Sogoola naluvhiilo halandate igeleeti liila, ulifishile.” 30Pe uFiilipo ahashimbiilila, ahalifishila. Ahiivwa umupiti uyo akuvhaazya mwi ikalaata ilya mukuvhwi uYisaayi, ahamuvhuziilizya ahati, “Amazwi igo ge ukuvhaazya, vhuli, ukugamanya?” 31Ahamwamula ahati, “Ingagamanya vhuli she ataliipo umuntu uwa kunsambiilizya amazwi iga?” Ahamulambiilizya uFiilipo kuuti ayinjile mwi igeleeti lyakwe muula, vhatendame pooka. 32UVhusimbe uVhufinjile uvhwo vhwe umupiti uyo ahavhazyaga, vhukuti,
“Vhámulongoleziizye ngati ngʼonzi ye vhakusogola kuyivhoola,
ápuumile vhweleele, inza ahagonzi
vwe hakupuuma lwe vhakuhatenda amasepe.#8:32 Vhakuhatenda amasepe: Mu nsi iya Isilayeeli, vhahasugaga ingʼonzi izya masepe amatali, amasepe igo vhahagombelaga amenda.
33Vhahamusuupizya nu kumuvhaazya kuuti mutalamalandu,
ileelo atávhomvile naashimo.
Umuntu nuumo atangapanga izya mpaapo zyakwe,
mwe pe vhámugozile she atapaafile.”#8:32-33 uYisaayi 53:7-8
34Umupiti uyo ahamuvhuuzya uFiilipo ahati, “Nkulaavha kuuti umbuuzye, amazwi iga umukuvhwi áyanzile kuzya naanu? Vhuli, ku zyakwe wuuyo, pamo kuzya muntu uwunji?” 35Pe uFiilipo ahandila mu Vhusimbe uVhufinjile vhunuuvhwo, kumulumbiilila Izwi iLyinza ilya Yeesu.
36Lwe vhakujenda mwi idala, vhahafiha pe páamile aminzi. Umupiti uyo ahamuvhuuzya uFiilipo ahati, “Yeenya, aminzi iga ipa! Shooni she shingandinda kuuti ntahoozelwe?” 37UFiilipo ahamwamula ahati, “Inga wamwitiha uYeesu Chilisiti ku mwoyo waaho wonti, ungoozelwa.” Umupiti uyo ahamwamula ahati, “Niitiha kuuti uYeesu Chilisiti Mwana wa Mulungu.#8:37 UMwana wa Mulungu: Vhaazya mu Ntantiho izya Mazwi aMajeni.”#8:37 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 37. Zyope iBiibiliya zimo izya manda iga zikuhaleha ahansi iha ishisita kusimba. 38Pe ahimiilisya igeleeti liila, vhahiiha, vhahinjila mu minzi, uFiilipo ahamwozya. 39Ileelo lwe vhaafuma mu minzi, naluvhiilo uMupepo uwa MWENE uMulungu ahamusompola uFiilipo. Umupiti uyo atahamulola havhili, ileelo ahajendeelela nu vhulendo vhwakwe ku luseshelo nkaani. 40UFiilipo woope ahaaga kwe ali mu nkaaya iya Azooto, aheepa ipo. Lwe ali mu vhulendo, ahatuuhaga mu nkaaya zyonti izya mwi idala kulumbiilila avhantu Izwi iLyinza, pe ahafiha mu nkaaya iya Kayisaaliya.
Currently Selected:
iMbombo izya Vhatumwa 8: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
