iMbombo izya Vhatumwa 17
17
Ivho mu nkaaya iya Tesaloniiki
1Avha Paavhuli nu Siila lwe vheepa ku Fiilipi, vhahatuuha mu nkaaya iya Amufipooli ni ya Apoloniya, vhahafiha mu nkaaya iya Tesaloniiki. Pa Tesaloniiki ipo páamile isinagoogi. 2UPaavhuli ahinjilaga mwi isinagoogi inza vwe gáamile amaata gaakwe. Ku havhaliilizyo aha Sabaato zitatu ahavhalumbililaga kutuushila mu Vhusimbe uVhufinjile. 3Ahalondovholaga nu kuvhahomeshezya kuuti uChilisiti akwanzilwa kuyimba nu kuzyuha. Ahavhavhuzyaga ahatinji, “UYeesu we nkumulumbiilila kuli imwe, wu Chilisiti.” 4AVhayuuda vhamo vhahagiitiha amazwi igo. Vhoope vhe te Vhayuuda avhinji vhe vhahamunyilaga uMulungu, pooka na vhantanda avhinji avhashindamu, vhahiitiha. Vhonti vhahavha pooka nu Paavhuli nu Siila.
5Ileelo aVhayuuda vhe vhatítisile, umwone wuhavhalema, vhahavhasonjeelezya avhantu avhavhiivhi kufuma mu nsokooni, pe vhahavhavhungaaniha avhantu avhinji nu kwanda kupela ivho ipiti mu nkaaya yonti. Vhahayigoma inyumba iya Yaasoni, vhahavhalondola avha Paavhuli nu Siila, inga vhavhatwale pi ivhungaana ilya nkaaya. 6Lwe vhatavhaaga, vhahamulema uYaasoni pooka na vhamwavho vhamo, vhahavhatwala ku maha ku vhapiti avha nkaaya, uku vhakuzuma ahalanga kuuti, “Avhantu ivha vhe vhakupela ivho ipiti mu nsi zyonti. Ishi vhinzile mu nkaaya yiitu. 7UYaasoni we avhaposheleeye ku kwakwe. Vhonti vhakusuufwa indajizyo zye uKayisaali#17:7 UKayisaali: Vhaazya mu Ntantiho izya Mazwi aMajeni. azivhiisile, vhakuti, aliipo umwene uwunji we vhakuti uYeesu.” 8Avhapiti avha nkaaya iyo pooka ni ivhungaana ilya vhantu, lwe vhiivwa inongwa izyo, vhahasaaga nkaani. 9Avhapiti ivho vhahavhavhuuzya avha Yaasoni na vhamwavho kuuti vhafumwe ivwa kuyipinjiha, pe vhahavhitishila kuuti vhasogole ku kwavho.
Avha Paavhuli nu Siila mu nkaaya iya Belooya
10Uvhusiku, avhiitisi vhahavhavhuuzya avha Paavhuli nu Siila kuuti vhasogole ku nkaaya iya Belooya. Lwe vhaafiha kuula, vhahinjila mwi isinagoogi. 11Avhantu avha ku Belooya vháamile vhatehamu kuluusya avha ku Tesaloniiki. Avheene vhahalyitiha izwi ilya Mwene uYeesu ku mwoyo wonti, vhahenyelezyaga uVhusimbe uVhufinjile amanda gonti, inga vhahomeshezye inga zye avha Paavhuli nu Siila vhakuyanga zya nalyoli. 12AVhayuuda avhinji pooka na vhanaavuli na vhantanda avha Shiyunaani avhashindamu, vhahamwitiha uYeesu.
13Ileelo aVhayuuda avha ku Tesaloniiki, lwe vhaamanya kuuti uPaavhuli akulumbiilila izwi ilya Mulungu ku Belooya, kwope vhahasogola, vhahapela ivho ipiti nu kusonjeelezya ivhungaana ilya vhantu. 14Pe avhamwavho avha ku Belooya vhahamunyatula uPaavhuli naluvhiilo, vhahamuvhuuzya kuuti asogole na vhamo ku luvhazu kwa sumbi, ileelo uSiila nu Tiimoti vhahasyala ku Belooya. 15Vhaala vhe vhámusindishiiye uPaavhuli, vhahamufisya mu nkaaya iya Aseene. Lwe vhakugaluha, uPaavhuli ahavhalajizya vhavhavhuuzye avha Siila nu Tiimoti kuuti, vhamulandate naluvhiilo.
UPaavhuli akuyanga na vhantu avha ku Aseene
16UPaavhuli lwe akuvhaguliilila avha Tiimoti nu Siila mu Aseene, ahalola inkaaya iyo yili ni viholanyo ivwinji. Pe umwoyo waakwe wuhaviitwa nkaani. 17Kuli izyo, ahayangaga mwi isinagoogi na Vhayuuda na vhantu avhanji vhe vhahamunyilaga uMulungu. Havhili amanda gonti, ahayangaga na vhantu vhe ahahomaanaga navho ku nsokooni.
18Mu nsokooni umwo, mwámile avhasambiilile vhamo vhe vhahatinji aVhaepikuleewo#17:18 AVhaepikuleewo vhahatinji, hinza mu vhutendamo uvhwa muntu kuyisansamusya ni zya mu nsi, havhili vhatahanzaga amayimba. Vhahitihaga insambiilizyo izya vhalungu avha Shiyunaani. na Vhasitoyiiki.#17:18 AVhasitoyiiki vhahashindihaga nkaani kusivhiilila izya mwi itwe. Vhahahaanaga insambiilizyo izya kuyisansamusya ni zya mu nsi, ileelo vhahasiivhaga kuuti hinza kuyikonzya nu kuvhomba inyinza nu kuvhomba zye zikwanzilwa kwa muntu. Ivho vhahanda kuvhuzilizanya nu Paavhuli. Vhamo vhahati, “Umuntu we akuyangaana uno akwanza kuuti vhuli?” Vhamo vhahati, “Yikuloleha kuuti akulumbiilila izya vhalungu avhajeni.” Vháyanzile isho, mwe pe uPaavhuli ahalumbililaga Izwi iLyinza kuzya Yeesu nu kuzyuha. 19Pe avhasambiilile ivho, vhahamutwala uPaavhuli pa lukuvhato lwavho lwe vhahatinji iAlewopaago. Pe vhahamuvhuuzya vhahati, “Insambiilizyo injeni izyo zye ukuvhasambiilizya avhantu, tuvhuuzye niiswe tuzimanye. 20Twivuuye kuuti, waleeta insambiilizyo injeni, tukwanza kumanya vwe zili.” 21Vhámuvhuziizye vhwevhulo, mwe pe aVhaseene na vhanji vhonti vhe vhahatendamaga umwo vhatahavhombaga ishinji naashimo, nkandi lye lipangwi ilya kuyanga nu kutejeelezya inongwa injeni.
22Pe uPaavhuli ahimiilila pahati pa lukuvhato ulwo, ahati, “Mwe vhantu vha mu Aseene! Nkulola kuuti mulemeleeye nkaani inongwa izya shipuuto. 23Lwe nkutuuha mu nkaaya ino, mvivhwenyi iviholanyo vwe mukuvipuuta. Havhili nshivhwenyi ishifinjilo isha kufumwizya impuutile she shisimviilwe amazwi ge gakuti: KWA MULUNGU WE ATAMANYISILE. Ishi, uMulungu uyo, we mukumupuuta ishisita kumumanya, we nkwanza kuvhalumbiilila.
24“UMulungu uyo, we ahapela insi na vwonti vwe vili muumwo, havhili wu Mwene uwa ku mwanya na pa nsi. Uweene atakutendama mu nyumba imfinjile zye zikuzengwa na vhantu. 25Atakuvhombelwa na vhantu fwe akwanza shimo ku kwavho, mwe pe uweene we akuuvhapa avhantu uvhulanzi nu mwuyu ni vintu vwonti. 26Kufuma kwa muntu wooka, ahapela inkolo izya vhantu vhonti, kuuti vhatendame mu nsi yonti. Kufuma hali ahavhavhiishila amanda na pa kutendama. 27UMulungu ahavhomba vhwevhulo, inga avhantu vhamulondole, lumo vhangamwaga kwi idala ilya kupulumba. Ileelo uweene atali ukutali nu muntu wonti, 28inza vwe umuntu wumo áyanzile kuuti, ‘Iswe muhati yaakwe mwe tukutendama nu kujenda nu kuvha swe vhapuuma.’ Havhili vhamo mu vhasimvi vhiinyu avha nyimbo vhátili, ‘Iswe swe vhaana vhaakwe.’”
29UPaavhuli ahajendeelela kuyanga kuuti, “Mwe pe iswe swe vhaana vha Mulungu, tutakwanzilwa kusiivha kuuti, uMulungu aholiine ni shiholanyo she vhagomvile ku sahaabu poosye ku mpiiya, poosye ku mavhwe. Iviholanyo ivwo vikugombwa ku vhumanyi ni njeele izya vhantu. 30Amanda aga hali, ge avhantu vhahavhombaga uvhupukupuuku uvhwo, uMulungu áyivhiisile fwe atahalolaga. Ileelo ishi akuvhalajizya avhantu vhonti kwonti kuuti vhapindushe. 31Akuvhalajizya isho, mwe pe avhiisile isiku lye alivhalonga avhantu vhonti mu vhwanalyoli, kwi idala ilya muntu we amusavhuuye. UMulungu avhahomesheziizye avhantu vhonti izyo, kwi idala ilya kumuzyusya umuntu uyo.”
32Avhantu avha mu lukuvhato ulwo, lwe vhiivwa vwe uPaavhuli ayanga izya kuzyuha, vhamo vhahanda kumujevhula. Ileelo vhamo vhahamuvhuuzya vhahati, “Tukwanza kutejeelezya havhili inongwa izyo.” 33Pe uPaavhuli ahavhaleha, aheepa pa lukuvhato. 34Avhantu vhamo vhahamwitiha uYeesu, vhahanda kumulandata uPaavhuli. Muli ivho áliipo uDiyoniisiyo we áali mu lukuvhato ulwa Alewopaago nu mwantanda wumo, we izina lyakwe áali wu Damaali, pooka na vhanji.
Currently Selected:
iMbombo izya Vhatumwa 17: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
