iMbombo izya Vhatumwa 13
13
Avha Saavhuli nu Balinaaba vhakusaavhulwa
1Mu shivhanza isha mu Antiyookiya mwámile avhakuvhwi na vhasambiilizi. Ivho vháali vhe vha Balinaaba nu Simiyooni (we vhahatinji uNiigeli#13:1 UNiigeli kwe kuuti uMwilu.) nu Luukiyo uwa ku Kileene nu Manayeeni (we ásunjiliilwe pooka nu mwene uHeelodi) nu Saavhuli. 2Isiku limo lwe vhonti ivho vhakumupuuta uMwene uYeesu nu kuyiima kulya,#13:2 Kuyiima kulya: Vhaazya mu Ntantiho izya Mazwi aMajeni. uMupepo uMufinjile ahavhavhuuzya ahati, “Munsavhulile avha Balinaaba nu Saavhuli ku mbombo ye mbitiiye.” 3Lwe vhamupuuta uMulungu nu kuyiima kulya havhili, vhahavhavhiishila inyoovhe avha Balinaaba nu Saavhuli kuvhaloota, pe vhahavhaleha kuuti vhasogole.
UPaavhuli akudalinkana nu Eelima umukuvhwi uwa ilenga
4Pe lwe uMupepo uMufinjile avhasonteelezya avha Balinaaba nu Saavhuli, vhahasogola mu nkaaya iya Selewukiya. Kufuma ipo vhahashuula ni meeli kusogola mu nkaaya iya Salaami, insi iya Kiipulo ye yáamile pahati pa sumbi. 5Lwe vhaafiha ukwo, vhahalumbililaga izwi ilya Mulungu mu masinagoogi. Vháamile pooka nu Yoohani we vhahatinji uMaaliko, umutuuli waavho.
6Vhahashuula mu nsi yonti iya Kiipulo, vhahafiha mu nkaaya yimo iya umwo ye vhahatinji iPaafo. Ukwo vhahamwaga uMuyuuda wumo umulozi, umukuvhwi uwa ilenga, izina lyakwe vhahatinji uBali-Yeesu. 7Áamile nu Selugiyo uPaavhuli umupiti uwa shigavho isha nsi isha Kiipulo, we áamile muntu uwa njeele nkaani. Pe umupiti uyo ahavhiita avha Balinaaba nu Saavhuli, kuuti vhasogole ku kwakwe inga atejeelezye izwi ilya Mulungu. 8Ileelo uBali-Yeesu umulozi (izina lyakwe mu Shiyunaani wu Eelima), ahadalinkana na vha Balinaaba nu Saavhuli, ahalinga kumusonganya umupiti uyo, inga atahiitishe insambiilizyo zyavho kuzya Yeesu.
9Pe uSaavhuli,#13:9 Saavhuli lizina ilya Shiyuuda. Izina ilya Paavhuli lya Shiluumi. we izina lyakwe ilyamwavho vhahatinji uPaavhuli, she ayizuuye uMupepo uMufinjile, ahamuzyamila uEelima, 10ahamuvhuuzya ahati, “Iwe we mwana wa Mukwalanzi, we mulugu uwa zyonti izya nalyoli pilongolela ilya Mulungu! Uyizuuye uvhushevu uvhwa kuhopenkanya avhanji nu vhuvhiivhi vhwonti. Shooni she utakuleha kupuvwa amadala amagolosu aga MWENE uMulungu? 11Ishi, uMWENE kwe aakupe isunde, kuuti uvhe we ntonko, te uvhulole uvhuzelu uvhwa izuvha ku havhaliilizyo hamo.”
Naluvhiilo, ishiisi shihamudinda uEelima ku minso, ahaleha kulola, ahanda kupulumba kulondola umuntu uwa kumulema inyoovhe, inga amulongole. 12Umupiti ula lwe aalola zye zyavhombeha, ahamwitiha uMwene uYeesu. Havhili ahasukumila nkaani insambiilizyo zye ázyivuuye kuzya Mwene uYeesu.
UPaavhuli akulumbiilila mu Antiyookiya iya Pisidiya
13UPaavhuli na vhamwavho vhaheepa ni meeli ku Paafo, vhahafiha mu nkaaya iya Peelige mu wilaaya iya Pamufiiliya. Ileelo uYoohani uMaaliko ahavhaleha kunuukwo, ahagaluha ku Yelusaleemu. 14Pe uPaavhuli nu Balinaaba vhaheepa ku Peelige, vhahajendeelela nu vhulendo, vhahafiha mu nkaaya iya Antiyookiya ye yáali papiipi ni nsi iya Pisidiya. Isiku ilya Sabaato,#13:14 ISabaato: Vhaazya mu Ntantiho izya Mazwi aMajeni. vhahinjila mwi isinagoogi, vhahatendama. 15Lwe vhatendama, umuntu wumo ahavhaazya mwi ikalaata ilya ndajizyo izya Moose, na mu mazwi aga vhakuvhwi. Pe avhapiti avha isinagoogi vhahasonteelezya umuntu kwa Paavhuli nu Balinaaba, avhavhuuzye ati, “Vhamwitu, inga muli ni izwi ilya kuvhavhuuzya avhantu kuvhagomwa amooyo, muyanje.”
16Pe uPaavhuli ahimiilila, ahavhahandanizya ni nyoovhe kuuti vhamutejeelezye, ahavhavhuuzya ahati, “Mwe vhantu vha mu Isilayeeli, niimwe mwe vhanji mwe mukumunyila uMulungu, tejeelezyi! 17UMulungu wiitu swe Vhaisilayeeli we ávhasavhuuye avhataata vhiitu. Ahavhaliilizyo he vhahatendamaga ku vhujeni mu nsi iya Miisili, ahavhavhiiha kuvha luho ulupiti nkaani. Pisinda, ahavhalongozya nu kuvheefwa mu Miisili ku maha gaakwe amapiti. 18Ahavhajimbiilila ku havhaliilizyo aha maaha 40 ishi mu luugwa. 19Ahazilovwa inkolo 7 mu nsi iya Kanaani, ahaavhapa avhataata vhiitu insi iyo yivhe yaavho. 20Zyonti izyo zyávhombesile ku havhaliilizyo aha maaha ge gáfishiiye 450 ishi.
“Pisinda, uMulungu ahaavhapa avhataata vhiitu avhaamuzi avha kuvhalongozya, kufishila mu havhaliilizyo aha mukuvhwi uSaamweli. 21Pe vhahalaavha kuuti vhavhe nu mwene. UMulungu ahaavhapa uSaavhuli, umwana wa Kiishi, uwa mu luho ulwa Benjamiini, woope ahakonzya ku havhaliilizyo aha maaha 40. 22Pe uMulungu ahamwefwa uSaavhuli, ahamusaavhula uDaavhudi avhe wu mwene waavho. UDaavhudi uyo, uMulungu ahamuhomeshezya ahati, ‘Namulola uDaavhudi umwana wa Yeese, akuwuhondezya umwoyo waane, havhili we kwe avhombaje zyonti zye nkwanza zivhombeshe.’#13:22 1 uSaamweli 13:14; iZabuuli 89:20
23“Kufuma mu mpaapo izya mwene uDaavhudi, mwe uMulungu avhaleteeye aVhaisilayeeli uMuposhi uYeesu, inza vwe áfinzile. 24Lwe uYeesu ashiili kwanda imbombo yaakwe, uYoohani álongoleeye kuvhalumbiilila aVhaisilayeeli vhonti kuuti, vhatonte uvhutalamalandu vhwavho nu kwozelwa. 25UYoohani lwe akumaliilizya imbombo yaakwe, ahavhavhuzyaga avhantu kuuti, ‘Mukusiivha kuuti ine ne naanu? Ine te ne we wula we mukumuguliilila! Ileelo uweene akwinza, inga ine natuuha we ntahondeeye poosye kuvha ne muvhomvi waakwe, uwa kuzevwa nu kusatula inkusa izya vilyatu vwakwe.#13:25 Kusatula inkusa izya vilyatu vwakwe: Mu maata aga Vhayuuda, umujeni inga ayinjila mu nyumba, umuvhomvi ahamusatulaga inkusa nu kwozya ivinama vwakwe. Imbombo iyo yáamile ya muvhomvi uwa pansi nkaani.’”
26UPaavhuli ahajendeelela kuyanga kuuti, “Mwe vhamwitu, mwe vhaana avha luho ulwa Aabulahamu,#13:26 UAabulahamu: Vhaazya mu Ntantiho izya Mazwi aMajeni. niimwe mwe vhanji mwe mukumunyila uMulungu, iswe swenti swe uMulungu atuleteeye izwi ili ilya vhuposhi. 27Avhantu vhe vhahaaya mu Yelusaleemu pooka na vhapiti vhaavho vhatámumanyile uYeesu kuuti we Muposhi. Havhili vhatágamanyile na mazwi aga vhakuvhwi kuzya Yeesu, ge vhakuvhaazya insiku zyonti izya Sabaato. Vhahagalunjisya kwi idala ilya kumulonga uYeesu. 28Pooka nu kuuti vhatályazile izwi ilya nalyoli lye likulolesya kuuti yihondeeye kumugoga uYeesu, ileelo vhahamulaavha nkaani uPilaato amulonje kuuti vhamugoje. 29Lwe zyalunjiha zyonti zye uYeesu ásimviliilwe mu Vhusimbe uVhufinjile, vhahamwisya pa shihovhenkanyo, vhahamusyila mu mbiipa. 30Ileelo uMulungu ahamuzyusya. 31UYeesu woope ahayilolesya insiku inyinji ku vhantu vhe ásogooye pooka navho kufuma ku Galilaaya, kusogola ku Yelusaleemu. Ivho vhe vhahoome vhaakwe ku vhantu vhiitu aVhaisilayeeli.
32“Iswe tukuvhalumbiilila Izwi iLyinza, kuuti ziila zye uMulungu áfinzile ku vhataata vhiitu, 33avhomvile kuli iswe swe vhazukulu vhaavho. Avhomvile zyenezyo kwi idala ilya kumusaavhula#13:33 Kumusaavhula: Izwi ili ku Shiyunaani lumo kwe kuuti kumuzyusya. uYeesu, inza vwe yisimviilwe mu Zabuuli iya vhuvhili kuuti,
‘Iwe we Mwana waane,#13:33 UMwana waane: Vhaazya uMwana wa Mulungu mu Ntantiho izya Mazwi aMajeni.
ileelo ili navha ne Taata waaho.’#13:33 iZabuuli 2:7
34Havhili uMulungu ahamuzyusya uYeesu, inga atahafishile kuvhola. Kuli izyo, uMulungu átili,
‘Ndiivhapa imwe uvhuloote uvhufinjile uvhwa nalyoli
vhwe náfinzile kuumupa uDaavhudi.’#13:34 uYisaayi 55:3
35“Woope uDaavhudi ásimvile apamwavho kuuti,
‘Te uhitishile kuuti umuvhili uwa Mufinjile waaho
vhufishile kuvhola.’#13:35 iZabuuli 16:10”
36UPaavhuli ahajendeelela kuyanga kuuti, “UDaavhudi lwe avhomba zyonti zye uMulungu ahasiivhaga ku vhantu avha havhaliilizyo haakwe, ahafwa. Vhahamusyila mu mbiipa zya vhayise, ahavhola. 37Ileelo ula we uMulungu ahamuzyusya, uweene atahavhola.
38“Ishi imwe vhamwitu, mumanye kuuti kutuushila kwa Yeesu uyo we mukulumbiililwa, mukuswilwa uvhutalamalandu vhwinyu. 39Wonti we akumwitiha uweene, akuvhaazilwa kuuti mugolosu, inongwa zye zitangavhombeha kutuushila kuzilandata indajizyo izya Moose. 40Muvhe minso, zitahinze zivhaaje zye zisimviilwe mwi ikalaata ilya vhakuvhwi kuuti,
41‘Yeenyi, imwe mwe muli ni isuufwo,
musukumile nu kuteejela ukutali.
Nkuyanga isho, mwe pe ndivhomba zimo mu manda giinyu,
zye te muhiitishe naalumo,
poosye inga umuntu angavhalondovholela.’”
42Avha Paavhuli nu Balinaaba, lwe vhaakwepa mwi isinagoogi, avhantu vhahavhalambiilizya kuuti vhagalushe iSabaato ye yikwinza, inga vhayanje amazwi igo havhili. 43Lwe avhantu vhasogola kuhaaya, aVhayuuda avhinji, pooka na vhantu vhe te Vhayuuda ileelo vhínjiiye mu shipuuto isha Vhuyuuda, vhahavhalandata avha Paavhuli nu Balinaaba. Avhatumwa vhavhili ivho vhahayangaga navho kuvhagomwa amooyo, kuuti vhajendelelaje kusuuvhila uvhwila uvhwa Mulungu.
44Isiku ilya Sabaato lye lihalandata, avhantu avhinji nkaani avha mu nkaaya yiila vhahinza kutejeelezya izwi ilya Mwene uYeesu. 45Ileelo aVhayuuda lwe vhaalola avhantu vhavhungiine ivhungaana ipiti, vhahavha nu mwone. Vhahanda kuhaana amazwi ge uPaavhuli ahayangaga nu kumusaamula. 46Pe avha Paavhuli nu Balinaaba vhahavhaamula aVhayuuda ivho ku vhudandamazu vhahati, “Yáhondeeye izwi ilya Mulungu lilumbiililwe suuti kuli imwe mwe Vhayuuda. Ileelo mwalihaana, nu kuyilola kuuti mutahondeeye kuvha nu vhulanzi uvhwa shiima shiima. Ishi, twavhaleha, twasogola ku vhantu vhe te Vhayuuda, 47mwe pe uMwene uYeesu átulajiziizye átili,
‘Nkuvhiisile kuvha we vhuzelu ku vhantu vhe te Vhayuuda,
inga uvhatwalile uvhuposhi kufishila mwe insi yihasilila.’#13:47 uYisaayi 49:6 Mwi ikalaata ilya Yisaayi, amazwi iga gakumutaha uYeesu. Mwi ikalaata ili, amazwi iga gakuvhataha na vhalumbiilizi vhuulo.”
48Avhantu vhe te Vhayuuda, lwe vhiivwa amazwi igo, vhahaseshela, vhahalitiima izwi ilya Mwene uYeesu. Vhonti vhe vhasavhuliilwe kuvha nu vhulanzi uvhwa shiima shiima, vhahamwitiha uMwene.
49Izwi ilya Mwene lihajendeelela kukumuha mu nsi yiila yonti. 50Ileelo aVhayuuda vhahavhasonjeelezya avhantanda avha mushinzi vhe te Vhayuuda vhe vhahamunyilaga uMulungu, na vhapiti avha nkaaya iyo. Ivho vhahavhasonjeelezya avhantu kuuti vhavhayimvwe avha Paavhuli nu Balinaaba, vhahavhashimbizya mu nsi yaavho. 51Pe avha Paavhuli nu Balinaaba vhahavhapupulila ulusuuto lwe lwámile mu vinama vwavho kuvhahaana,#13:51 Vhahavhapupulila ulusuuto lwe lwámile mu vinama vwavho kuvhahaana: Kwe kulolesya kuuti uMulungu avhahaanile avhantu ivho, mwe pe vhavhahaanile avhatumwa vhaakwe. vhahasogola mu nkaaya iya Ikooniya. 52Ileelo avhalandati avha Yeesu avha pa Antiyookiya vhahaseshelaga nkaani, nu kwizula uMupepo uMufinjile.
Currently Selected:
iMbombo izya Vhatumwa 13: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
