YouVersion Logo
Search Icon

iMbombo izya Vhatumwa 12

12
UHeelodi akushiyimvwa ishivhanza isha ku Yelusaleemu
1Mu manda igo, umwene uHeelodi ahavhalema avhantu vhamo avha mu shivhanza, inga avhavhombe havhiivhi. 2Ahamugoga ni ipanga uYaakobu,#12:2 UYaakobu áamile mwana uwa Zebedaayi, havhili áamile wooka mu vhasundikwa 12 avha Yeesu. umunine uwa Yoohani. 3Lwe aalola kuuti izyo zyavhahondezya aVhayuuda, ahamulema nu Peeteli. Háamile havhaliilizyo aha nsiku izya shikulukuulu isha makaati ge vhataluziizye.#12:3 Ishikulukuulu isha makaati ge vhataluziizye: Vhaazya mu Ntantiho izya Mazwi aMajeni. 4Lwe amulema uPeeteli, ahamukunga mu jeela. Ahamutwala ku mpuga zine izya vhasikaali vhane vhane, kuuti vhaposhelezanyaaje kumuguulila. Ásiivile kuuti lwe ishikulukuulu shatuuha, pe amulonje uPeeteli pilongolela pa vhantu. 5Amanda igo ge uPeeteli ákunziilwe mu jeela, avhantu avha mu shivhanza vhahayikungulaga nkaani kumulaavhila kwa Mulungu.
6Uvhusiku, lwe lishiili isiku lye uHeelodi álivhiisile kumulonga uPeeteli, uPeeteli ákaasite mu jeela. Áamile pahati pa vhasikaali vhavhili, vhámukunzile inyoovhe zyakwe na manyoloolo gavhili. Pa mulyango uwa jeela páali avhasikaali avhamwavho vhe vhahamugulilaga.
7Naluvhiilo ahafumila uhavhizya uwa MWENE uMulungu ahinjila pe uPeeteli áamile, uvhuzelu vhuhalama muhati muula. Uhavhizya uyo ahamuyinzaanya uPeeteli ku luvhazu kumudaamusya, ahamuvhuuzya ahati, “Vhuuha naluvhiilo!” Amanyoloolo ge vhámukunjiiye uPeeteli mu nyoovhe gahalagala pansi! 8Pe uhavhizya uyo ahamuvhuuzya ahati, “Pinya ilamba lyaho, uzwale ni vilyatu.” UPeeteli lwe aamala kuvhomba vhwevhulo, uhavhizya ahamuvhuuzya ahati, “Zwala inkanzu yaaho, undandate!” 9Pe uPeeteli ahamulandata uhavhizya, kusogola kunzi ku jeela. Atámanyile kuuti izyo zye uhavhizya ávhomvile zyámile zya nalyoli, ahasiivhaga kuuti yáamile njozi iya pa minso amazelu. 10Vhahatuuha pa vhasikaali avha kwanda, na vha vhuvhili, vhahafiha ku mulyango uwa shijela uwa kufumila mu jeela, kwinjila mu nkaaya. Umulyango uwo wuhiiguha weeka, vhahafuma panzi. Lwe vhakujenda mwi idala, naluvhiilo uhavhizya ahamuleha uPeeteli.
11Pe uPeeteli ahamanya zye zifumiiye, ahati, “Ishi nalyoli naamanya kuuti uMWENE uMulungu andeteeye uhavhizya waakwe, kuuti amposhe mu nyoovhe izya Heelodi na mu mbiivhi zyonti zye aVhayuuda vhasuvhiiye kuzilola.”
12Lwe aamanya izyo, ahasogola ku nyumba iya Maliiya, umaayi uwa Yoohani we vhahatinji uMaaliko. Mu nyumba iyo vhávhungiine avhantu avhinji vhe vhahamulaavhaga uMulungu. 13UPeeteli ahiiguzya umulyango uwa lupitu ulwa nyumba iyo. Umulindu wumo umuvhomvi, izina lyakwe vhahatinji uLooda, ahasogola pa mulyango kutejeelezya kuuti wu naanu. 14Lwe ayiivwa kuuti lizwi lya Peeteli, ahagaluha ishisita kumwigulila, mwe pe áali nu luseshelo nkaani, ahashimbiilila mu nyumba. Ahavhavhuuzya avhamwavho ahati, “UPeeteli ayimiliiye pa mulyango!”
15Avhamwavho vhahamuvhuuzya vhahati, “Uli ni shipena!” Ileelo uweene ahavhuyiizya kuyanga kuuti ayivuuye lizwi lya Peeteli, pe vhahamuvhuuzya vhahati, “Pamo uyo wu havhizya waakwe.” 16Ahavhaliilizyo iho uPeeteli ahajendelelaga kwiguzya ku mulyango. Pe vhahasogola, vhahiigula umulyango, vhahalola kuuti wuuyo, vhahasukumila. 17UPeeteli ahavhahandanizya ni nyoovhe kuuti vhapuume, ahavhapanjila vwe uMWENE uMulungu amufumwizye mu jeela. Ahavhavhuuzya ahati, “Izi zye zivhombesile, mumuvhuuzye uYaakobu na vhamwitu.” Pe uPeeteli aheepa paala, ahasogola ukunji.
18Lwe kwasha, avhasikaali vhaala vhahavha ni lyoga nkaani, mwe pe vhatámanyile zye zyámwazile uPeeteli. 19UHeelodi ahalajizya avhasikaali kuuti vhamulondole nkaani uPeeteli. Ileelo lwe vhapootwa kumwaga, ahavhavhuziilizya vhaala vhe vhahamugulilaga. Lwe vhapootwa ilya kwamula, pe ahalajizya kuuti vhavhagoje. Pisinda, uHeelodi aheepa mu nsi iya Yudeeya nu kusogola mu nkaaya iya Kayisaaliya, ahatendama ukwo ku havhaliilizyo hamo.
Umwene uHeelodi akufwa
20UHeelodi ávhavitiliilwe nkaani avhantu avha mu nkaaya iya Tiilo, ni ya Siidoni. Pe avhantu avha mu nkaaya izyo vhahiima pooka kuuti vhasogole vhalolane nawo. Vhahivwana nu muntu wumo we vhahatinji uBulaasito, we ahimililaga inyumba iya mwene. Woope ahiima pooka navho. Vhahasogola kwa mwene, kulaavha kuuti kuvhe uvhutehamu, mwe pe inkaaya zyavho zihasuvhilaga ivwakulya kufuma mu nsi yaakwe.
21Lwe lyafiha isiku lye umwene uHeelodi ásavhuuye kuyanga navho, ahazwala amenda gaakwe aga shimwene, ahatendama pa shitengo shaakwe isha vhumwene, ahanda kuvhila pilongolela pa vhantu ivho na vhamwavho avhinji. 22Pe avhantu ivho vhahanda kuhoolela ku luseshelo vhahati, “Ili te lizwi lya muntu! Lizwi lya mulungu!” 23Lwe vhamutiima uHeelodi vhwevhulo, atahaamupa uMulungu uvhushindamu. Panaapo vhweleele, uhavhizya uwa MWENE uMulungu ahamusunda ku vhuvhinu uvhwa kuliiwa ni nchololo, ahafwa.
24Ileelo izwi ilya Mulungu lihajendeelela kukumuha mu vhantu, avhiitisi vhahonjelaga nkaani. 25Avha Balinaaba nu Saavhuli lwe vhaamala imbombo yaavho,#12:25 iMbombo izya Vhatumwa 11:30 vhaheepa ku Yelusaleemu pooka nu Yoohani we vhahatinji uMaaliko, vhahasogola ku Antiyookiya.

Highlight

Share

Copy

None

Want to have your highlights saved across all your devices? Sign up or sign in