ലൂക്കോച്ചു 9

ഏച്ചു പന്തിരാണ്ടു ബൊവുകെട്ടിയളെ ചൊല്ലിബുണ്ടു

1ഏച്ചു തന്റ പന്തിരാണ്ടു ബൊവുകെട്ടിയളെ തന്നാത്തെക്കു ബുളിച്ചിച്ചു അയിരക്കു ഒക്കാ പേയളെ ഉദുക്കുവനുമു ബരുത്തപുടിച്ചെരളെ ചാരിമാടുവനുമുകീന്റ ചഗുത്തിമു അദിഗാരമു കൊടുത്തു. 2ഈച്ചിരന്റ നാടുനെപറ്റികീന്റ നല്ലബാക്കു നെരേയക്കു പറേഞ്ചുകാട്ടികൊടുപ്പനുമു കട്ടപുടിച്ചെരളെ ചാരിമാടുവനുമു അദു അയിരളെ ചൊല്ലിബുട്ടു. 3അയിര പോവടെക്കു അദു അയിരണ്ടൊന്റ: “നീങ്ക പോന്റ പൊരുബൊവ്വിലി ബടിയോ, ജോളിഗെയോ, ഒട്ടിയോ പിട്ടോ, പയിച്ചെയോ പണമോ എടുപ്പനാഗയ്. രാണ്ടു കുപ്പെയമു എടുപ്പനാഗയ്. 4നീങ്ക പോവടെക്കു ആരെങ്കില നിങ്കളെ തങ്കട കുള്ളുക്കു കൂട്ടിനെങ്കി ആ ജാഗ ബുട്ടു പോന്റബരെ ആ കുള്ളിലിതന്നെ ഇക്കൊണു. 5എന്റെങ്കി ആരുമു നിങ്കളെ കൂട്ടക്കി ആ ജാഗ ബുട്ടു പോവടെക്കു നിങ്കട കാലില പൊടി ഒദാറികാമി. നിങ്കട ബാക്കു അയിര കേട്ടിരാത്തെനെകോണ്ടു ഈച്ചിര അയിരളെ ബിദിപ്പു എന്റ കാരിയത്തെക്കു അയിനൊരു അടിയളമായിക്കൊട്ടു.”

6അങ്ങാണെ ഏച്ചുന്റ ബൊവുകെട്ടിയ ഒക്കാ നാടുകായെമു പോച്ചു ഈച്ചിരന്റ നല്ലബാക്കു നെരേയക്കു പറേഞ്ചുകൊടുപ്പനുമു അവുടില ബരുത്തപുടിച്ചെരളെ ചാരിമാടുവനുമു ചെയിദരു.

എരോദാറാജാവുന്റ പേടി

7ഏച്ചു ചെയിന്റ കാരിയമൊക്ക ഗെലീലെ നാടദിഗാരിയാന എരോദാറാജാവു കേട്ടിന്തു. കുറെ മയിച്ചെര ഏച്ചുനെപറ്റി: “ഓഗെന്നാനു ചത്തെരണ്ട ഇടേലിന്തു ഉഗിരുപുറാന്തുകീന്റു” എന്റു പറേഞ്ചെനെ കേട്ടിന്തിച്ചു എരോദാവുക്കു പേടിയാനയ്. 8കുറെ മയിച്ചെര ഏച്ചുനെപറ്റി: “ഏലിയാവു ബന്തുകീന്റു” എന്റുമു ബേറെ കുറെ മയിച്ചെര: “പണ്ടില തമ്മടിയളിലി ഒരുത്തെയ് ഉഗിരുപുറാന്തുകീന്റു” എന്റുമു പറേഞ്ചരു.

9എന്റെങ്കി എരോദാവു: “ഓഗെന്നാനുന്റ തിലെ ബെട്ടി കൊന്റെയെയ് നാനാന്റു. പിന്നെ ആരുനെപറ്റിയാന്റു നാനു ഇങ്ങാണൊക്ക കേട്ടിക്കിന്റെയെയ്” എന്റു പറേഞ്ചൊണ്ടു ഏച്ചുനെ മെലേവബേണ്ടി പേച്ചാടിത്തു.

ഏച്ചു അഞ്ചായിര മയിച്ചെരക്കു തിമ്മ കൊടുക്കിന്റു

10ഏച്ചു ചൊല്ലിബുട്ട അപ്പോച്ചോലെര മടാങ്കിബന്തിച്ചു താങ്ക ചെയിദ ഒക്കാ കാരിയമു ഏച്ചുന്റൊന്റ പറേഞ്ചരു. ഏച്ചു അയിരളെ കൂട്ടികോണ്ടു ആരുക്കുമു അറിപ്പിയദെ ബേത്തുച്ചയിദെ എന്റ ജാഗത്തെക്കു പോയിത്തു. 11എന്റെങ്കി ഏനെ അറിഞ്ചൊണ്ടു നെരേയ അദുനെ തടാക്കികോണ്ടു അദുന്റ ബൊവ്വെയെ പോനരു. അയിര തന്നാത്തെക്കു ബന്തപ്പൊ ഏച്ചു അയിരളെ കൂട്ടിത്തു. അദു അയിരക്കു ഈച്ചിരന്റ നാടുനെപറ്റി പറേഞ്ചുകൊടുപ്പനുമു ചുഗാകാണത്തെരളെ ചാരിമാടുവനുമു ചെയിദു.

12നേരബൂവനാന ചമേയത്തി പന്തിരാണ്ടു ബൊവുകെട്ടിയ ബന്തിച്ചു ഏച്ചുന്റൊന്റ പറേഞ്ചരു: “ഇമ്മത്തേ, ഏനൊരു ബറാണ്ടമന്റമാന്റു. അയിനെകോണ്ടു ഈ നെരേയളെ അടുക്കകീന്റ കുന്റുക്കു ചൊല്ലിബുട്ടുക്കാത്തെ. അയിര പോച്ചു തിന്റുകുടിച്ചിടുവ കീന്റെനെമു അന്തിക്കു കിടാപ്പകീന്റ ജാഗത്തിനെമു തടാക്കൊട്ടു.”

13എന്റെങ്കി ഏച്ചു തന്റ ബൊവുകെട്ടിയണ്ടൊന്റ: “നീങ്കതന്നെ അയിരക്കു തിമ്മ കൊടുമി” എന്റു പറേഞ്ചു.

അയിങ്കു ബൊവുകെട്ടിയ അദുന്റൊന്റ: “എങ്കട കയിലി അഞ്ചു ഒട്ടിമു രാണ്ടു മീനുമു അല്ലദെ ബേറെ ഒന്റുമു കാണി. ഇത്തെനയിര നെരേയക്കു തിമ്മകൊടപ്പകീന്റെനെ നാങ്ക പോച്ചു എടുത്തൊണ്ടു ബരോണെന്റാച്ചു നീ പറേന്റെയെയ്” എന്റു കേട്ടരു. 14അവുടെ അഞ്ചായിരത്തെനെ ആണങ്ക ഇന്തരു.

ഏച്ചു ബൊവുകെട്ടിയണ്ടൊന്റ: “നെരേയളെ അയിമ്പെദു മയിച്ചെരണ്ടത്തെനെകീന്റ ഗുഡ്ഡെഗുഡ്ഡെയായി ഉളേപ്പിമി” എന്റു പറേഞ്ചു. 15ഏച്ചു പറേഞ്ചപല്ലെതന്നെ അയിര ഒക്കായിനെമു ഉളേപ്പിച്ചരു. 16പിന്നെ ഏച്ചു ആ അഞ്ചു ഒട്ടിമു രാണ്ടു മീനുമു എടുത്തിച്ചു ചൊറുഗത്തെക്കു മെലേഞ്ചൊണ്ടു ഈച്ചിരങ്കു നന്നി പറേഞ്ചുകാന്റു ഒടിച്ചു. എന്റിച്ചു അയിനെ നെരേയക്കു കൊടുപ്പബേണ്ടി ബൊവുകെട്ടിയണ്ട കയിക്കു കൊടുത്തു. 17ഒക്കായിമു അയിരണ്ട ഇട്ടപല്ലെ ബാറുനിറേച്ചു തിന്റരു. ബാക്കിയേറിനെനെ അയിര പന്തിരാണ്ടു കുക്കെ നിറേച്ചുമു എടുത്തരു.

പത്തുറോച്ചു ഏച്ചുനെ കിറുത്തു എന്റു ഗൊത്തുമാടിന്റൊയ്

18ഒരു ജിന ഏച്ചു ഒരുത്തെനെ പുറാത്തിച്ചൊണ്ടിന്തു. അദുന്റ ബൊവുകെട്ടിയ അദുന്റൊന്റ ഇന്തരു. ആ ചമേയത്തി ഏച്ചു അയിരണ്ടൊന്റ: “മയിച്ചെര എന്നെ ആരെന്റു പറേന്റൊരു” എന്റു കേട്ടു.

19അയിങ്കു ബൊവുകെട്ടിയ അദുന്റൊന്റ: “കുറെ മയിച്ചെര പല്ല ‘നീ നീരുക്കു മുക്കി ഏന്തെപ്പിക്കിന്റ ഓഗെന്നാനു’ എന്റു പറേന്റൊരു, ബേറെ കുറെ മയിച്ചെര പല്ല ‘നീ ഏലിയാവു’ എന്റു പറേന്റൊരു, പിന്നെ കുറെ മയിച്ചെര പല്ല ‘പണ്ടില തമ്മടികാറെരളിലി ഒരുത്തെയ് ഉഗിരുപുറാന്തൊണ്ടു ബന്തുകീന്റു’ എന്റു ഇഞ്ഞെപറ്റി പറേന്റൊരു” എന്റു പറേഞ്ചരു.

20അയിങ്കു ഏച്ചു അയിരണ്ടൊന്റ: “എന്റെങ്കി നീങ്ക എന്നെ ആരെന്റു പറേന്റെരി” എന്റു കേട്ടു. അയിങ്കു പത്തുറോച്ചു പറേഞ്ചയ്: “നീ ഈച്ചിര ചൊല്ലിബുട്ട കിറുത്തുവാന്റു.”

ഏച്ചു താനു ചായിന്റെനെപറ്റി പറേന്റു

21പിന്നെ ഏച്ചു അയിരണ്ടൊന്റ: “ഈ കാരിയ ആരുന്റൊന്റമു പറേവനാഗയ്” എന്റു കനാമായി പറേഞ്ചു. 22പിന്നെ അദു അയിരണ്ടൊന്റ പറേഞ്ചു: “മയിച്ചമഗെനാച്ചു ബന്ത എനാക്കു പലേ ബുദ്ദിമുട്ടുമു തരിക്കൊണ്ടി ബരുവൊയ്. നാടുകാറെരമു ബലിയ കനെലാടിയമു നേമകാറെരമു എന്നെ ബേണ്ടെന്റു ബെപ്പനുമു എന്നെ കൊല്ലുവനുമു ചെയിവൊരു. എന്റെങ്കി മൂന്റാമത്തില ജിന നാനു ഉഗിരുപുറാന്തു ഏന്തെപ്പെയ്.”

23പിന്നെ ഏച്ചു ഒക്കാ നെരേയണ്ടൊന്റമു പറേഞ്ചു: “ആരെങ്കില എന്റ ബൊവുകെട്ടിയാവ അലാന്തെങ്കി അയിനു മുല്ലെലായി തന്നെമു തനാക്കു കീന്റെനെമു ബേണ്ടെന്റു ബെക്കൊണു. കുരിച്ചിലി തറേച്ചു കൊല്ലുവബേണ്ടി കൊണ്ടുപോന്റെരളെപല്ലെ തനാക്കുബന്റ ബങ്കപ്പാടു അയിനു ഒക്കാ ജിനാമു തരിച്ചൊണ്ടു എന്റ ബൊവ്വെ ബരോണു. 24ഒരു മയിച്ചെയ് തന്റ ഉഗിരുനെ രെച്ചിപ്പ പേച്ചാണെങ്കി അയിന്റ ഉഗിരു അയിങ്കു നട്ടമാവൊയ്. എന്റെങ്കി എന്റ പേരിലി ആരെങ്കില തങ്കട ഉഗിരുനെ നട്ടമാക്കിനെങ്കി അയിനു തന്റ ഉഗിരുനെ രെച്ചിപ്പൊയ്. 25ഒരു മയിച്ചെങ്കു ലോഗമൊക്ക കിട്ടിനദെമു തന്റ ഉഗിരുനെ നട്ടമാക്കുവനുമു അയിനെ കാണദെമാടുവനുമു ചെയിദെങ്കി അയിങ്കു എന്ന ഉബഗാര? 26ആരെങ്കില എന്നെപറ്റിമു എന്റ ബാക്കുനെപറ്റിമു നാണിച്ചെങ്കി മയിച്ചമഗെനാച്ചു ബന്ത നാനു എന്റമു എന്റ അപ്പെന്റമു ചുദ്ദമത്ത ദേവദൂദെരണ്ടമു ബുളാങ്കിന്റ ബെളിച്ചത്തി ബരുവടെക്കു അയിരളെ മെലേഞ്ചൊണ്ടുമു നാണിപ്പെയ്. 27പിന്നെ ഏച്ചു അയിന്റൊന്റ ഇങ്ങാണെ പറേഞ്ചു: എന്റെങ്കി ഈച്ചിര നെരേയളെ നടാത്തിന്റെനെ മെലേന്റബരെ ഊടെ കീന്റെരളിലി കുറെ മയിച്ചെര ചാഗരു എന്റു നാനു നേരാച്ചുമു നിങ്കടൊന്റ പറേന്റെയ്.”

ഏച്ചുന്റ മേലൊക്ക ബുളാങ്കിന്റൊയ്

28ഏച്ചു ഈ കാരിയ പറേഞ്ചിച്ചു എട്ടു ജിന കവുഞ്ചപ്പൊ അദു പത്തുറോച്ചുനെമു ഓഗെന്നാനുനെമു ആക്കോബുനെമു കൂട്ടികോണ്ടു പുറാത്തിപ്പബേണ്ടി ഒരു മലേക്കു അത്തികോണ്ടു പോയിത്തു. 29ഏച്ചു പുറാത്തിച്ചൊണ്ടിപ്പടെക്കു അദുന്റ മുഗാറുക്കു മാറ്റബന്തയ്. അദുന്റ കുപ്പെയ ബെളുത്തിച്ചു ഇടിമിന്നെലുന്റ ബെളിച്ചപല്ലെ മിനുങ്കുവ കൂടിന്തയ്. 30എമ്മടെക്കു രാണ്ടു ആണങ്ക അദുന്റൊന്റ പറേഞ്ചുകിടാപ്പകൂടിന്തരു. അയിര മോച്ചെമു ഏലിയാവുമു ആയിന്തരു. 31ബുളാങ്കിന്റ ബെളിച്ചകീന്റെരളാച്ചാന്റു അയിര ബന്തെയെയ്. ഈച്ചിര അലാക്കിന്റപല്ലെതന്നെ ഏച്ചു എത്തെനെമു ബിരേന്റു എരുച്ചലേമിലിന്തു ചാവു എന്റെനെപറ്റി അയിര അദുന്റൊന്റ പറേഞ്ചുകിടാന്തരു.

32പത്തുറോച്ചുക്കുമു അയിന്റൊന്റ ഇന്തെരക്കുമു റാക്കു ചൊക്കിപോയിന്തയ്. അയിര റാങ്കിയേന്തെച്ചപ്പൊ ബുളാങ്കിന്റ ബെളിച്ചകീന്റ ഏച്ചുനെമു അദുന്റൊന്റ നിന്റുകീന്റ രാണ്ടു ആണങ്കളെമു മെലേഞ്ചരു. 33മോച്ചെമു ഏലിയാവുമു ഏച്ചുനെ ബുട്ടു പോവടെക്കു പത്തുറോച്ചു ഏച്ചുന്റൊന്റ: “ഇമ്മത്തേ, നാമു ഊടെ കീന്റെയെയ് എത്തെനെ നല്ലെയെയ്! നാങ്ക മൂന്റു കുടിലു മാടിന്റ. ഒന്റു നീക്കുമു ഒന്റു മോച്ചെക്കുമു ഒന്റു ഏലിയാവുക്കുമു” എന്റു പറേഞ്ചയ്. പത്തുറോച്ചു താനു എന്നെനെപറ്റി പറേന്റെയെയ് എന്റു അറിയദെയാന്റു ഇങ്ങാണൊക്ക പറേഞ്ചെയെയ്. 34അയിനു ഇങ്ങാണെ പറേഞ്ചൊണ്ടിപ്പടെക്കു ഒരു മാവുകാരു ബന്തിച്ചു അയിരളെ മറേച്ചയ്. എമ്മടെക്കു അയിര പേടിച്ചുപോനരു.

35മാവുകാരിലിന്തു ഒരു ഓച്ചെമു അയിരക്കു കേട്ടുബന്തയ്: “നാനു തടാക്കിയെടുത്ത എന്റ മഗെനാന്റു ഏനു. ഏനു പറേന്റെനെ കേട്ടിരുമി.” 36ആ ഓച്ചെ നിന്റപ്പൊ ഏച്ചുനെ ഒരുത്തെനെ മാത്തിരമെ അയിര മെലേഞ്ചെയെയ്. ആ ബൊവുകെട്ടിയ താങ്ക മെലേഞ്ച ഈ കാരിയത്തിനെപറ്റി കുറെ ജിനാബരെ ആരുന്റൊന്റമു പറേയദെ തങ്കട മനാത്തിയേ ബെച്ചരു.

പേയിപുടിച്ച ഒരു ചിക്കെനെ ഏച്ചു ചാരിമാണ്ടു

37പിറ്റുജിന ഏച്ചുമു അദുന്റ മൂന്റു ബൊവുകെട്ടിയമു മലേലിന്തു ഉദുഗിക്കൊ ബന്തപ്പൊ ബലാബരി നെരേയ ഏച്ചുവാത്തെക്കു ബന്തരു. 38അയിരണ്ട ഇണ്ടിലിന്തു ഒരുത്തെയ് അയ്യബുളിച്ചൊണ്ടു പറേഞ്ചയ്: “ഗുരുവേ, എന്റ മഗേന്റൊന്റ ബാറുകത്തെലു കാട്ടിച്ചു അയിനെ രെച്ചിക്കൊണു. ഇമ്മത്തേ, അയിനു എന്റ ഒരേവൊരു മഗെനാന്റു. 39പേയി അയിന്റ മേലിലി ഉളാഗുവടെക്കൊക്ക അയിനു ബലാമായി അയ്യബുളിക്കിന്റൊയ്. പേയി അയിനെ ഉറുണ്ടാടിപ്പിപ്പനുമു അയിന്റ ബായിലിന്തു നിരെ ബരുത്തുവനുമു ചെയിന്റൊ. അവൊ അയിനെ ഒരുന്നമു ബുട്ടുപോഗദെ അയിനെ കാണദെമാടുവ പേച്ചാണ്ടൊ. 40ഈ പേയിനെ അയിന്റ മേലിലിന്തു ഉദുക്കുവ നാനു ഇഞ്ച ബൊവുകെട്ടിയണ്ടൊന്റ പറേഞ്ചെയ്. എന്റെങ്കി അയിരക്കു അയിങ്കു പറ്റുവകാണി.”

41അയിങ്കു ഏച്ചു അയിരണ്ടൊന്റ: “ഇപ്പൊണില മയിച്ചെര നമ്പെലു കാണത്തെരളുമു ആഗത്തമനാകീന്റെരളുമാന്റു. നിങ്കട ഈ പേച്ചാട്ടമൊക്ക പൊറുത്തൊണ്ടു എത്തെനെ ജിന നാനു നിങ്കടൊന്റ ഇക്കൊണു? ഇഞ്ച മഗേനെ ഇങ്കു കൂട്ടികോണ്ടു ബാ” എന്റു ഏച്ചു ആ മയിച്ചെന്റൊന്റ പറേഞ്ചു.

42ആ മയിച്ചെയ് ചിക്കെനെ ഏച്ചുവാത്തെക്കു കൂട്ടികോണ്ടു ബരുവടെക്കുതന്നെ പേയി അയിനെ നിലാത്തെക്കു ബൂത്തിച്ചു ഉറുണ്ടാടിപ്പിച്ച. എന്റെങ്കി ഏച്ചു പേയിനെ പഡാക്കിത്തു. അങ്ങാണെ അദു ചിക്കെനെ ചാരിമാടിച്ചു അയിനെ അയിന്റ അപ്പെങ്കു കൊടുത്തു.

ഏച്ചു താനു ചായിന്റെനെപറ്റി പിന്നെമു പറേന്റു

43ഒക്കായിമു ഈച്ചിരന്റ അദിച്ചെയ ചഗുത്തി മെലേഞ്ചിച്ചു അദിച്ചെയപട്ടുപോനരു. ഏച്ചു ചെയിദെനെ മെലേഞ്ചെരളൊക്കായിമു അദിച്ചെയപട്ടൊണ്ടു നിന്റിപ്പടെക്കു ഏച്ചു തന്റ ബൊവുകെട്ടിയണ്ടൊന്റ പറേഞ്ചു: 44“നാനു പറേന്റ ഈ ബാക്കു നീങ്ക ബെടുപ്പായി കേട്ടിരുമി. മയിച്ചമഗെനാച്ചു ബന്ത എന്നെ എദിരാളിയണ്ട കയിക്കു കിട്ടുവ ചമേയമായികീന്റൊയ്.” 45എന്റെങ്കി ഏച്ചു പറേഞ്ച ഈ കാരിയ ബൊവുകെട്ടിയക്കു ഗൊത്താവകാണി. അയിരക്കു ഗൊത്താഗത്തപല്ലെ അയിന്റ അറുത്ത മറേഞ്ചിന്തയ്. ആ കാരിയത്തിനെപറ്റി അദുന്റൊന്റ കേളുപ്പ അയിരക്കു പേടിയായിന്തയ്.

മുന്തിനെയെയ് ആരു?

46ബൊവുകെട്ടിയണ്ട ഇണ്ടിലി തങ്കളിലി ഒക്കായിക്കിന്തുമു മുന്തിനെയെയ് ആരു എന്റു ഒരു തറുക്ക ബന്തയ്. 47ഏച്ചു അയിരണ്ട മനാത്തില നിനേപ്പു ഗൊത്തുമാടിച്ചു ഒരു ചെറിയ പുള്ളെനെ എടുത്തിച്ചു തന്റ അരിഗെ നില്ലിപ്പിച്ചു. 48എന്റിച്ചു അദു ബൊവുകെട്ടിയണ്ടൊന്റ പറേഞ്ചു: “എന്റ പേരിലി ഇങ്ങാണത്ത മക്കളെ കൂട്ടിന്റെര എന്നെയാന്റു കൂട്ടിന്റെയെയ്. എന്നെ കൂട്ടിക്കൊകീന്റെര എന്നെ ചൊല്ലിബുട്ടദുനെമു കൂട്ടിക്കൊകീന്റൊരു. നിങ്കളിലി ഒക്കായിക്കിന്തുമു താവുന്തെര ഒക്കായിക്കിന്തുമു മുന്തിനെരളാവൊരു.”

ഏച്ചുന്റ പേരിലി നടാക്കിന്റ അദിച്ചെയ

49ഓഗെന്നാനു ഏച്ചുന്റൊന്റ പറേഞ്ചയ്: “ഇമ്മത്തേ, ഒരുത്തെയ് ഇഞ്ച പേരിലി പേയളെ ഉദുക്കിന്റെനെ നാങ്ക മെലേഞ്ച. അയിനു എങ്കളെപല്ലെ ഇഞ്ച ബൊവുകെട്ടി അല്ലത്തെനെകോണ്ടു നാങ്ക അയിനെ തടുത്ത.”

50ഏച്ചു അയിന്റൊന്റ: “അയിനെ തടുക്കൊണ്ടമി. നിങ്കക്കു എദിരു നില്ലത്തെയെയ് നിങ്കട ആളാന്റു” എന്റു പറേഞ്ചു.

ചമെരിയെ നാടിലെര ഏച്ചുനെ തള്ളിപറേന്റൊരു

51ഈച്ചിര തന്നെ ചൊറുഗത്തെക്കു കൂട്ടിന്റ ചമേയ അടുക്കമാനയ് എന്റു ഏച്ചുക്കു ഗൊത്താനയ്. അയിനെകോണ്ടു അദു എരുച്ചലേമുക്കു പോവബേണ്ടി മനാമാടിത്തു. 52അദു തനാക്കു മുല്ലെലായി കുറെ മയിച്ചെരളെ ചൊല്ലിബുട്ടു. അയിര അദുനെ കൂട്ടുവബേണ്ടി ചമെരിയെകാറെര ബദുക്കിന്റ ഒരു കുന്റുക്കു പോനരു. 53എന്റെങ്കി ഏച്ചു എരുച്ചലേമുക്കാന്റു പോന്റെയെയ് എന്റു ചമെരിയെകാറെര ഗൊത്തുമാടിനെനെകോണ്ടു അയിര അദുനെ തങ്കട കുന്റുക്കു കൂട്ടുവകാണി. 54ഏനെ അറിഞ്ചിച്ചു ബൊവുകെട്ടിയളാന ആക്കോബുമു ഓഗെന്നാനുമു ഏച്ചുന്റൊന്റ: “കറുത്താവേ, [ഏലിയാവു ചെയിദപല്ലെ] മോടഗേരത്തിന്തു തീ ബരുത്തിച്ചു അയിരളെ കാണദെമാടുവ നാങ്ക പറേവപോന്റ. അയിങ്കു നീക്കു മനാകീന്റൊനോ” എന്റു കേട്ടരു. 55എന്റെങ്കി ഏച്ചു തിരിഗിമെലേഞ്ചൊണ്ടു അയിരളെ പഡാക്കിത്തു. [“നീങ്ക ആരുന്റ നുവേലിലി നടാക്കിന്റെന്റു നിങ്കക്കു ഗൊത്തുകാണി. 56മയിച്ചമഗെനാച്ചു ബന്ത നാനു മയിച്ചെരണ്ട ഉഗിരുനെ കാണദെമാടുവനല്ല അയിരളെ രെച്ചിപ്പനാന്റു ബന്തെയെയ്” എന്റു അദു അയിരണ്ടൊന്റ പറേഞ്ചു.] പിന്നെ ഏച്ചുമു ബൊവുകെട്ടിയളുമു ബേറൊരു കുന്റുക്കു പോനരു.

ബൊവുകെട്ടിയ കട്ടപ്പാടു തരിക്കിന്റെരളാഗൊണു

57അയിര പോയികോണ്ടിപ്പടെക്കു ഒരുത്തെയ് ഏച്ചുന്റൊന്റ: “നീ എവുടെക്കു പോനദെമു നാനുമു ഇഞ്ചൊന്റയെ ബന്റെയ്” എന്റു പറേഞ്ചയ്.

58അയിങ്കു ഏച്ചു അയിന്റൊന്റ: “കുറുനലിയക്കു ഇപ്പ മടേമു മോടഗേരത്തില പുള്ളുപുറാവിയക്കു ഗൂടുമു കീന്റൊയ്. എന്റെങ്കി മയിച്ചമഗെനാച്ചു ബന്ത എനാക്കു കിടാന്തു റാങ്കുവബരെ ജാഗകാണി” എന്റു പറേഞ്ചു.

59ഏച്ചു ബേറൊരുത്തെന്റൊന്റ: “എന്റൊന്റ ബാ” എന്റു പറേഞ്ചു.

അയിങ്കു അയിനു ഏച്ചുന്റൊന്റ: “കറുത്താവേ, നാനു മുല്ലെ എന്റ കുള്ളുക്കു പോച്ചു എന്റ അപ്പെന്റ ചാത്തിര കവുപ്പകീന്റ കാരിയമൊക്ക ചെയിദുകാന്റു ബന്റെയ്” എന്റു പറേഞ്ചയ്.

60അയിങ്കു ഏച്ചു അയിന്റൊന്റ: “ചത്തെര തങ്കട ചത്തെരണ്ട ചാത്തിര കവുക്കൊട്ടു. എന്റെങ്കി നീ പോച്ചു ഈച്ചിരന്റ നാടുനെപറ്റി മയിച്ചെരണ്ടൊന്റ പറെ” എന്റു പറേഞ്ചു.

61ബേറൊരുത്തെയ് ഏച്ചുന്റൊന്റ: “ഇമ്മത്തേ, നാനു ഇഞ്ച ബൊവ്വെ ബന്റെയ്. എന്റെങ്കി നാനു മുല്ലെ പോച്ചു എന്റ കുള്ളിലികീന്റെരണ്ടൊന്റ പറേഞ്ചുകാന്റു ബന്റെയ്” എന്റു പറേഞ്ചയ്.

62അയിങ്കു ഏച്ചു അയിന്റൊന്റ പറേഞ്ചു: “നേഞ്ചിലുക്കു കയിബെച്ചുകാന്റു ബൊവ്വക്കെ തിരിഗിമെലേന്റ ഏവെനാനദെമു അയിനു ഈച്ചിരന്റ നാടുനെപറ്റി പറേവപറ്റിന ഒരുത്തെനല്ല.”

Currently Selected:

ലൂക്കോച്ചു 9: റാവുള

Highlight

Copy