Lukas 22

Siga Yahudi bagaraꞌ mapatoy si Isa

(Matiyu 26.1-5; Malkus 14.1-2; Yahiya 11.45-53)

1Na ni waktu looy siꞌ, tapit na masa paballangan Tinapay Yaꞌ Magpasulig ma pinag-awnan du paballangan Ngalingkaꞌ. 2Kuwan siga imam langkaw ka ga guru saraꞌ agama baw, buwatan da isun miha jalan man da mapatoy si Isa sipuk-sipuk mari yaꞌ luu hiluhalaꞌ. Batan tawu sila ni ga baanan jama ndooy.

Si Judas nipu si Isa

(Matiyu 26.14-16; Malkus 14.10-11)

3Na ni waktu looy du siꞌ, kuwan si Judas Iskariyut, yana disu njawom sikasapu-duwa mulit si Isa, lay na baw inasok meꞌ Ibilis. 4Dari siꞌ, lay ya pilay pa mman siga imam langkaw ka ga pa-mmean tukang jaga langga mehe. Maksud na muwan tipu-akka bong pooy meꞌ na katabang ninsila nungkuban si Isa. 5Dari siꞌ tud bay gāk sila sampay lay gi sila magtaayun ngandugangan si Judas. 6Si Judas siꞌ tu kasulutan du sampay lay na ya lakka miha lawang man na ma-ntan si Isa ninsila gantaꞌ yaꞌ tasayu jama.

Siga mulit si Isa manyap ni paballangan Ngalingkaꞌ

(Matiyu 26.17-25; Malkus 14.12-21)

7Pag-anu, taabut na llaw sibuwa ni paballangan Tinapay Yaꞌ Magpasulig. Dari ni llaw looy du siꞌ, mimon paglūng ni bangsa Yahudi saliꞌ-saliꞌ na numbaliꞌ disu anak bili-bili para paballangan Ngalingkaꞌ.

8Dari yuk si Isa ni ga si Pitel ka si Yahiya, “Duhuꞌ na doꞌ kam pilay manyap ni paballangan tabi supaya tahan tabi mangan kohap.”

9Yuk da, “Ohoꞌ, Tuwan. Sugaꞌ nnoy lay la man kami manyap?”

10Yuk si Isa, “Pag asok bi pa jawom daira, sitammu sina kam ka lalla manangkit boheꞌ mbuwaꞌ kibut. Pag-anu, patuhut jaꞌ kam niiya pa lumaꞌ man na paasok. 11Takka ndooy, yuk bi ni jama ma dapu lumaꞌ, ‘Tugun Tuwan Guru nohoꞌ ko tinilaw bong ninggai man bilik halliꞌ man na mangan ka ga mulit na para ni paballangan Ngalingkaꞌ.’ 12Pag-anu, pinakitahan du sina kam bilik mehe ni jataꞌ ddas ka ga tingkoan ka lamisahan na. Boꞌ ndooy na man bi manyap.”

13Dari lai na pilay ga mulit looy siꞌ pa jawom daira. Ndooy siꞌ, takita da na mimon pakaradjaan meꞌ ilooy ma bay pinamāꞌ meꞌ si Isa ninsila. Dari lay na sila buwat kohap halliꞌ paballangan Ngalingkaꞌ.

Katapusan waktu si Isa siharung-harung mangan ka ga mulit na

(Matiyu 26.26-30; Malkus 14.22-26; 1 Korin 11.23-25)

14Na pag taabut jaꞌ siꞌ waktu, siharung-harung na si Isa ka ga rasul na mangan. 15Pag-anu yuk si Isa ninsila, “Ndang ituu na situ karomanan ku banahan siharung-harung mangan ka kaam ni paballangan Ngalingkaꞌ padpad ku yaꞌ gi bay tumabbaꞌ njawom kabinsanaan. 16Baan ta kam banahan, ituu na situ katapusan ku mangan meꞌ tuu ni paballangan Ngalingkaꞌ ngkod-ngkoran yaꞌ gi binakbul kamaatunan na. Sakayi ku itu mangan ka kaam meꞌ tuu balik, noy mintu sarī na kahalan tabi njawom pamarinta Tuhan.”

17Pag-anu siꞌ, lay si Isa ngaddoꞌ mbuwaꞌ sawan tubaꞌ anggul boꞌ pinagsukuhan pa Tuhan. Yuk na ni siga mulit na, “Atu, magsing-sīng kam nginum. 18Baan ta kam, ituu na situ katapusan ku nginum tubaꞌ anggul. Sakayi ku itu nginum meꞌ tuu balik, noy bahau na kahalan tabi njawom pamarinta Tuhan.”

19Pag-anu, lay na baw ya ngaddoꞌ dambatang tinapay boꞌ pinagsukuhan pa Tuhan. Pag lupus, pinong-pōng meꞌ na boꞌ sinongan ni siga mulit na sambayan na halling, “Atu, ngaddoꞌ kam boꞌ kakanun bi. Ingatun bi ituu baran ku ma song pinaglillaꞌ kalnaꞌ kaam. Buwat kam tabiat meꞌ tuu bilang pangintoman bi niyaku.”

20Pag lupus da mangan, lay na baw ya ngaddoꞌ pabalik mbuwaꞌ sawan tubaꞌ anggul, boꞌ sinongan ni ga mulit na sambayan na halling, “Ingatun bi tubaꞌ anggul njawom sawan tuu yana lahaꞌ ku song tinumpahan kalnaꞌ kaam. Lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ. 21Sugaꞌ pakale kam. Luu situ ntuu batnaa disu soheꞌ tabi siharung-harung mangan song nipu aku. 22Sabana na, aku itu, yana Anak Manusiyaꞌ, ndang bay ginantaꞌ meꞌ Tuhan mastiꞌ pinapatoy jaꞌ. Sugaꞌ tud siya-siya silay mintu ilooy ma nipu aku.” 23Dari siꞌ, sitilaw-tilaw na ga mulit na bong soy sila kaaku nipu iya.

24Pag-anu, yaꞌ hallom, lay na ga sila magjawap bong soy sila patingkat. 25Dari yuk si Isa ninsila, “Daa kam ngakig tabiat siga sultan ka sagannap ma ngantanan kawasa-kapatut ni junyaꞌ tuu. Sila ina, meꞌ da buwat raayat da subay ga ata da. Sugaꞌ san meꞌ looy, ngawnan gi sila dī da tukang nulung jama njawom sakup da. 26Sugaꞌ kaam, daa kam ngakig sila. Arapun bong kam doman patingkat ni baanan bi, subay kam magpadiyoꞌ buwat dī bi siyali man sikamimon. Maka soysoy kam pa-mmean, subay ya buwat dī na tukang ngintu siga pagkahi na. 27Ni bandingan manusiyaꞌ, mas patingkat jama ma binotangan ni lamisahan man ilooy ma motangan iya. Sugaꞌ ningkitabi, saꞌ meꞌ looy. Akigun bi jaꞌ suntuan ku batan halloman ku bay dambuwaꞌ ka kaam, bbuwatan ku ngintu jama.

28“Kaam ina, labba man sibuwa, magkanaalla ngunungan aku njawom mimon katiksaan ku. 29Dari yana meꞌ Mmaꞌ ku bay muwanan aku kapatut magsultan, buwanan ta du sina kam kapatut hampit ni pagkasultan ku. 30Dari kaam ina mintu siharung-harung na du nginum-mangan ka aku njawom pamarinta ku. Maka pinatingkōꞌ na du sina kam mintu ni siga tingkoan sultan marintahan siga panubuꞌ lakka man siga anak si Israil sikasapu-duwa.”

Si Isa nunaꞌ si Pitel song maylu

(Matiyu 26.31-35; Malkus 14.27-31; Yahiya 13.36-38)

31Pag-anu yuk si Isa ni si Pitel, “Saymon, pakale ko. Lay na silay muhun Ibilis pa Tuhan nuway-nuwayan kaam sikamimon. Kainagon na ngalangkat pangando bi niyaku. 32Boꞌ kau na sina Saymon tiniluꞌ banahan meꞌ na. Kamasaꞌ lay na du silay siꞌ ko pakuhan ku duwaa supaya yaꞌ lungay pangando nu niyaku. Sugaꞌ san meꞌ looy, masi du sina ku tikutan nu samantalaꞌ. Sugaꞌ pag lay jaꞌ ko ina mintu nawbat sampay pabeleng pa mman ku, paintoman nu sa siga danganakan nu mari pataggu iman da.”

33Sugaꞌ yuk si Saymon Pitel, “Uy Tuwan, yaꞌ bina ko la tatikut ku! Aku bitu, atas ku paunung ningkau san gi man ku tajīl sampay pinapatoy!”

34Yuk si Isa, “Baan ta ko Pitel, sangom tuu du, yaꞌ gi sina mintu bay tingkauk manuk, ndang min tallu na ko bay maylu bahasa yaꞌ ku takila nu.” 35Pag-anu, yuk Isa ninsila, “Jaman bi ilay bay sohoꞌ ku lumān masaplag, bay kam baan ku yaꞌ na nohoꞌ moo sīn, bāg atawa sinilas sarī man ilooy ma patuk bi. Na halloman bi bay ngalataan lahat, bay kilay kam pingkaꞌ kakulangan oy maka oy na?”

Tampung da siꞌ, “Niyaꞌ la Tuwan.”

36Yuk si Isa lagi, “Sugaꞌ labba man batnaa, meka sina yaꞌ na ngahasi kaam. Sangkon bong luu sīn bi atawa bāg, boonun bi na. Maka bong yaꞌ luu bariꞌ bi, dagangan bi na pamakoy bi kasohean mari kam kaballi. 37Boꞌ aku, yaꞌ na hallom tasungkub na situ ku. Song binakbul na situ njataꞌ ku tunaꞌ looy njawom kitab, ilooy ma yuk na,

‘Binilang ya jama tabeꞌ ni sagannap ma ngalangga saraꞌ.’ ”#(22.37) Kitab Nabi Isaya 53.12.

38Pag-anu, yuk siga mulit na, “Tuwan, luu na bitu bariꞌ kami duwa.”

Yuk si Isa, “Saddong na sina.”

Si Isa maku duwaa ndooy ni Punu Jaytun

(Matiyu 26.36-46; Malkus 14.32-42)

39Pag-anu, lay na si Isa pōꞌ man Jerusalem sampay lumān pa Punu Jaytun meꞌ ndang tabiat na du. Kuwan ga mulit na, lay du mmeꞌ. 40Takka ndooy, yuk si Isa ninsila, “Maku na pin kam duwaa pa Tuhan mari yaꞌ tungkas iman bi pag mintu sinuwayan pangando bi niyaku.”

41Pag-anu siꞌ, lay doꞌ ya palawak-lawak dangkitiꞌ boꞌ na nangge ka tuut na maku duwaa pa Tuhan. 42Yuk na, “Maꞌ, bong siꞌ ko kuhi, hawasan nu na kamalasahiyan ma bay gantaꞌ nu njataꞌ ku. Sugaꞌ subay baw kahandak nu binean, saꞌ ga niyaku.”

43Pag-anu, luu na baw tulun malaikat man sulgaꞌ mabasagan iman na. 44San baw meꞌ looy, amu-amu ya maku na pin duwaa sabap meꞌ lassa hansu na atay na. Ni kaehe susa atay na, nongot na ga ya sampay ngattap na ga taꞌ tanaꞌ subay ga kattap lahaꞌ pinaduwai.

45Pag lupus na maku duwaa, lay na ya nangge boꞌ na pabeleng pa mman ga mulit na. Pag ndaꞌ na, tuli jaꞌ sila batan lungay na ga anggawtaꞌ da ni kasusa da.

46Dari yuk si Isa, “Uy la, tuli bitu kam! Matiꞌ kam ba. Maku na pin kam duwaa pa Tuhan mari yaꞌ tungkas iman bi.”

Si Isa sinungkuban

(Matiyu 26.47-56; Malkus 14.43-50; Yahiya 18.3-11)

47Na sasang na halling meꞌ looy, pag ndaꞌ na, luu na baanan jama pasōng pa mman da. Boꞌ luu du ni duhuan da si Judas, yana disu ni mulit si Isa sikasapu-duwa, moo sila. Takka jaꞌ siꞌ sila, lay gi pasōng si Judas ngūk si Isa. 48Sugaꞌ yuk si Isa baw siꞌ tu, “Uy Judas, ūk bitu hati man nu nipu Anak Manusiyaꞌ.”

49Pag takita siga mulit si Isa song sinungkuban na ya, ilooy ma nilaw na sila, “Tuwan, pooy na tu, tigad kami na sila?”

50Na yaꞌ gi san siꞌ bay katampung si Isa, magti lay tinigad meꞌ disu mulit si Isa tindog panghuluꞌ imam sampay lay na ga latak tinga na huwin pa kawnan.

51Sugaꞌ yuk si Isa, “Uy, daa ba!” Pag-anu siꞌ, pinurut na meꞌ na bay limpaꞌ tinga lalla looy sampay lay na du magti kaulian.

52Na baanan ga jama looy siꞌ ma song nungkuban si Isa yana siga imam langkaw ka ga pa-mmean siga tukang jaga langga mehe sampay siga matatoa ni agama.

Pag-anu, yuk si Isa ninsila, “Ongoy doꞌ kam ina pitu subay na pin moo ga kataliꞌ ka ga takaka? Ongoy kanna bi, mundu kitu ku? 53Aku bitu, llaw pa dangallaw na ku bay maglamud ka kaam ni langga mehe. Ongoy taggahaꞌ yaꞌ gi ku bay sungkuban bi ndooy? Kamasaꞌ, ndang ituu na baw situ waktu bay ginantaꞌ meꞌ Tuhan man bi buwat kahandak bi njawom lindom. Maka ituu na du situ masa man Ibilis, yana panghuluꞌ kalindoman, pinabiya madara kahandak na.”

Si Pitel maylu bahasa saꞌ iya soheꞌ si Isa

(Matiyu 26.69-75; Malkus 14.66-72; Yahiya 18.15-27)

54Pag-anu, lay na sungkuban da si Isa boꞌ na binoo pa lumaꞌ panghuluꞌ imam. Kuwan si Saymon Pitel, luu na pin patuhut man katāhan. 55Pag takka da pa lumaꞌ panghuluꞌ iman, luu na jama ningkōꞌ ni bihing api ni tangngaꞌ haman mapasuꞌ-pasuꞌ baran da. Si Pitel siꞌ tu, lay na du mmeꞌ ningkōꞌ ni bihing da. 56Na sasang na ningkōꞌ ndooy, ninag na dantaꞌ api niiya sampay takita na baw ya meꞌ disu tindog danda. Hangat na matong luwa si Pitel, yuk na, “Lalla tuu bitu dansoheꞌ du siꞌ ka lalla looy ma bay tasungkub.”

57Sugaꞌ lay jaꞌ maylu si Pitel, yuk na, “Uy, yaꞌ san bilay ya takila ku!”

58Pag-anu, yaꞌ gi hallom, luu na baw sarī ngita iya, boꞌ na halling, “Kau pun bitu dansoheꞌ du ka lalla looy.”

Sugaꞌ yuk si Pitel, “Uy, niyaꞌ bilay!”

59Pag-anu, magkulang-labi ga danjām, luu na baw disu māꞌ, yuk na, “Mattan du la lalla tuu bay soheꞌ na batan jama man Jalil du ya.”

60Sugaꞌ yuk si Pitel baw siꞌ tu, “Kau tu, yaꞌ bina tahati ku bong oy bitsala nu!”

Na yaꞌ gi san siꞌ ya bay lupus mitsala, ilooy ma tingkauk na du manuk. 61Maka ni waktu looy du, tineleꞌ na ya meꞌ Papuꞌ Isa sampay taintom na na bay tunaꞌ si Isa, ilooy ma yuk na, “Sangom tuu du yaꞌ lagi bay tingkauk manuk, ndang min tallu na ko bay maylu bahasa yaꞌ ku takila nu.” 62Pag-anu, lay magti pōꞌ si Pitel man jawom haman looy sampay tud bay ya nangis banahan ni kasasso na.

Si Isa sinuntuk sampay binuwat kalabbiyan

(Matiyu 26.67-68; Malkus 14.65)

63-64Na kuwan sila ma nganjagahan si Isa, buwatan da buwat iya kalabbiyan. Maka lay gi pakkos da mata na boꞌ da magsing-sīng nuntuk iya. Maka yuk da, “Tunaun teꞌ bong soy siꞌ bay nuntuk kau.” 65Boꞌ meka gi bitsala da maat man da bay madiyoꞌ iya.

Sinumariya na si Isa

(Matiyu 26.59-66; Malkus 14.53-64; Yahiya 18.19-24)

66Pag sayu, luu na kumpo-kumpo baanan ga pa-mmean agama ma ngantanan kapatut ngahukum inawnan Sanhidrin. Njawom baanan da, luu siga imam langkaw ka ga guru saraꞌ agama. Dari lay na si Isa binoo pa awpan da sinumariya. 67Yuk da niiya, “Baan teꞌ kami bong kau na Almasi, tukang nalamat ma bay njanjiꞌ meꞌ Tuhan.”

Yuk si Isa, “San kam ina binaan, yaꞌ du kam pitsayaꞌ. 68Maka bong luu tilaw ku ningkaam, yaꞌ du sina kam kuhi nampung. 69Sugaꞌ yaꞌ na situ hallom, ndooy na jaꞌ ku, yana Anak Manusiyaꞌ, ningkōꞌ ni bihing Tuhan Sangat Kawasa huwin pa kawnan na.”

70Pag-anu, yuk da sikamimon, “Ongoy, Anak Tuhan ko kina?”

Yuk si Isa, “Meꞌ halling sambat bi na siꞌ.”

71Dari yuk da, “Uy, san bitu yaꞌ na tabi miha jama bay kasakup ni bitsala na pangka pa Tuhan. Ndang-ndang lai na du takale tabi pōꞌ man jawom behe na mismu.”

Currently Selected:

Lukas 22: sjm

Highlight

Copy