Panagnaan 37

Salsila si Yusup ka ga danganakan na

1Na kuwan si Yaꞌkub siꞌ tu, lay na jaꞌ tamban ndooy ni Kanan, lahat man mmaꞌ na bay magsampihan.

2Ituu batnaa yana salsila ga anak si Yaꞌkub, yana si Yusup ka ga danganakan na.

Na jaman si Yusup mag-umu sapu-pitun taun, daran ya mmeꞌ ngipat ga baanan hayop ni siga danganakan na ma yaꞌ dambuwaꞌ nneꞌ. Sila ilay yana anak mmaꞌ na ka ga nda na si Bilha ka si Silpa. Na siga danganakan si Yusup siꞌ tu daran buwat maat. Dari kuwan si Yusup, tamūd numbung ni mmaꞌ da.

3Na kuwan si Yaꞌkub siꞌ tu, pabiddaꞌ aseꞌ na ni si Yusup man ga anak na kasohean batan si Yusup bay pinamaddihan ni katoa na na. Ni kaaseꞌ na ni si Yusup, lay gi sohoꞌ na tinahian juba alatan. 4Pag liling ga siyaka na pabiddaꞌ aseꞌ mmaꞌ da ni siyali da, ilooy ma kinagigitan na ya. Dari pagpōꞌ-pagpōꞌ bitsala da ni si Yusup, kasla na jaꞌ.

5Pag-anu siꞌ, luu disu sangom, lay na baw si Yusup ngupi. Pag tuntut na upihan na ni siga danganakan na, lay gi magdaruhun duga da niiya. 6Batan yuk si Yusup ninsila, “Pakale doꞌ kam ni upihan ku. 7Njawom pandapat ku, lay kitabi konoꞌ makkos umpungan pawoy ni huma. Pag-anu siꞌ, bbuwatan umpungan ku konoꞌ lay nangge paintong. Kuwan umpungan bi, bbuwatan da lay ngaliput umpungan ku, boꞌ da sujud labbasakayi ni umpungan ku.”

8Dari iya halling siga danganakan na baw siꞌ tu, “Ā, bahasa dari sultan na baw ko mintu marintahan kami, hāꞌ?” Dari ilooy ma magdaruhun na duga da man sabapan upihan ma bay tuntut na.

9Pag-anu siꞌ, lay na baw balik ngupi si Yusup, boꞌ na nuntut balik ni ga siyaka na, yuk na, “Lay na baw ku la ngupi pabalik. Njawom pandapat ku, mataallaw, konoꞌ, ka buwan sampay na potean sapu-dambuwaꞌ lay sujud ni awpan ku.”

10Pag-anu, mmaꞌ da pun lay du tuntutan na upihan na. Sugaꞌ gam pin lay gi ya kinalasuhan meꞌ mmaꞌ na, yuk na, “Upihan oy doꞌ ina meꞌ naa? Saula-ula labba man aku ka nneꞌ nu sampay ga danganakan nu mintu pasōng sujud ni awpan nu!” 11Dari siꞌ, yaꞌ na kuhi banti dangkiꞌ siga danganakan na niiya. Sugaꞌ kuwan mmaꞌ da baw siꞌ tu, papiha-piha na pin bong oy kamaatunan bay upihan si Yusup.

Si Yusup binoo pa Ejip

12Pag-anu, luu disu llaw, likutan ga siyaka na ndooy ni Sekem ngipat ga baanan hayop mmaꞌ da, 13yuk si Yaꞌkub man si Yusup, “Toꞌ, patuhut doꞌ ko man ga danganakan nu pilay pa Sekem. Lay na silay sila ndooy ngipat ga baanan hayop tabi.”

Tampung si Yusup, “Ohoꞌ Maꞌ, pilay sa ku.”

14Tugun mmaꞌ na siꞌ, “Ndaun doꞌ bong mahap du kahalan ga siyaka nu ka ga baanan hayop tabi. Pag-anu, boꞌ nu moleꞌ maan aku.” Dari lay na ya lumān lakka man lumaꞌ da ni Labbak Hebron song pa Sekem.

15Takka jaꞌ siꞌ ya pa Sekem, lataꞌ na man na miha sila. Pag lay ya takita meꞌ disu lalla ndooy, tilaw na ni si Yusup, “Oy siꞌ tu Nges piha nu?”

16Yuk si Yusup, “Ga siyaka ku ka ga baanan hayop kami. Katoonan nu bong nnoy man da?”

17Halling lalla looy, “Lay na silay siꞌ palakka. Takale ku siꞌ yuk da, song pilay sila pa Dotan.” Dari lay du patuhut si Yusup ni ga siyaka na sampay lay na du sila taabut na tapit pa Dotan.

18Tā lagi siꞌ, takita da na si Yusup pasōng pa mman da. Dari halloman na siꞌ yaꞌ gi takka, bbuwatan da isun mapatoy iya. 19Yuk da padangan-padangan, “Alu na lalla pangupi. 20Anu kam, papatoy tabi na, boꞌ labuꞌ tabi pa jawom tagaꞌ naa ma yaꞌ bohean. Yuk tabi mintu, ‘Lay na sinabbat leꞌ halimaw.’ Ndaꞌ tabi teꞌ bong oy toklas bay upihan na.”

21Lipara, pag takale meꞌ si Ruben, lay ya miha jalan man na nabang si Yusup. Dari yuk na, “Daa ba papatoyun bi. 22Daa na kitabi numpahan lahaꞌ na. Gam na labuun bi na jaꞌ pa jawom tagaꞌ naa. Biyahun bi na jaꞌ ya matoyan dī na ntuu ni lahat yaꞌ magjama. Sugaꞌ daa jaꞌ bonoun bi.” Ngkon si Ruben bay halling meꞌ looy, luu niyat na nabang si Yusup, boꞌ pinabeleng pa mman mmaꞌ da.

23Luu jaꞌ siꞌ takka si Yusup pa mman ga siyaka na, ilooy ma lay magti hinagtuꞌ-hagtuꞌ meꞌ da inurusan juba na, ilooy siꞌ ma alatan. 24Pus meꞌ looy, lay na ya llabuꞌ pa jawom tagaꞌ looy ma yaꞌ bohean.

25Pag-anu siꞌ, lay na sila ningkōꞌ ndooy mangan. Yaꞌ gi siꞌ hallom, sasang si Ruben yaꞌ luu ndooy, ngita na sila baanan padadagang, bangsa Ismail, moo barang da taꞌ untaꞌ lakka man Giliyad song pilay pa Ejip. Ga untaꞌ da siꞌ llop leꞌ lampa-lampahan, jinisan uliꞌ ka insallan hamut. 26Dari yuk si Juda ni ga danganakan na, “Yaꞌ du bitu tabi koleꞌ paluntungan mapatoy siyali tabi. Boꞌ na, husaꞌ lagi tabi napuk mayat na. 27Gam na ya paballihan tabi ni baanan bangsa Ismail looy. Daa jaꞌ ya papatoy tabi. Ndang-ndang danganakan tabi du ya, isi tabi.” Dari siꞌ lay na du kuhi ga danganakan na.

28Pag tapit jaꞌ ga padadagang looy siꞌ, yana bangsa Ismail looy man Midiyan, lay na hinelaꞌ si Yusup meꞌ siga danganakan na man jawom tagaꞌ looy. Pag-anu, boꞌ lay paballihan da pa mman ga padadagang looy, duwampūꞌ dublun pilak porol. Pag lupus, lay na ya binoo pa Ejip.

29Pag beleng si Ruben, lay du ya pa tagaꞌ looy. Pag ndaꞌ na, yaꞌ na luu si Yusup. Ni kasusa na baw siꞌ tu, lay na ga geret na badjuꞌ na, 30boꞌ na sonse pa mman ga danganakan na, yuk na, “Uy la, yaꞌ na luu ariꞌ tabi ndooy! Pooy na tu la?”

31Dari bbuwatan da, lay numbaliꞌ kambing boꞌ lay talloban da juba si Yusup jawom lahaꞌ na. 32Pag-anu, boꞌ binoo meꞌ da juba na pa mman mmaꞌ da sambayan da halling, “Maꞌ, ndaun doꞌ ba ituu bay tatammu kami. Saꞌ gi kitu ituu juba si Yusup?”

33Dari takila na siꞌ meꞌ mmaꞌ da, sampay yuk na, “Inaa na bina juba na! Uy la, lay na bilay si Yusup sinabbat meꞌ halimaw! Lay na bilay sinalik-salik!” 34Dari ni kaehe dukka si Yaꞌkub, lay magti nganggeret badjuꞌ na, boꞌ na matuk pamakoy kasap. Boꞌ tud bay hallom ya maglindu. 35Ga anak na siꞌ tu mimon, danda-lalla, luu na pin pasōng pa mman na ngug-ngugan iya, sugaꞌ yaꞌ na du bay takoleꞌ da. Gam pin yuk na, “Ā, yaꞌ na bitu takoleꞌ lindu ku ngkod-ngkoran ku yaꞌ gi bay kapatuhut ni anak ku pa ahirat.” Dari mag-ulawi na pin mmaꞌ da.

36Na kuwan si Yusup siꞌ tu, tud lay na du binoo meꞌ baanan padadagang looy man Midiyan pilay pa Ejip. Takka ndooy, lay na ya paballihan da pa mman si Potipal. Iya ilay kapitan siga sundalu ma nganjagahan astanaꞌ sultan bangsa Ejip.

Currently Selected:

Panagnaan 37: sjm

Highlight

Copy