Panagnaan 35

Pabeleng si Yaꞌkub pa Betel

1Na sasang ga si Yaꞌkub masi gi ndooy ni Sekem, lay na baw magpalman Tuhan niiya, yuk na, “Aku na situ Tuhan ma bay nammuhan kau ndooy ni Betel jaman nu bay malahiyan kakaꞌ nu si Esaw. Batnaa, pabeleng na ko pa Betel, maka ndooy na ko maglahat, boꞌ nu buwat pangulbanan man bi numba aku.”

2Yaꞌ gi siꞌ sila bay palakka man Sekem, yuk si Yaꞌkub ni paglūng na sampay na mimon jama na, “Bong luu tuhan-tuhan bi, labbahan bi na. Maka mandi na kam, boꞌ sayin na kam ka pamakoy ma yaꞌ lamaꞌ man bi muwan sipat doman kam sutsiꞌ pa Tuhan. 3Batnaa, lakka na tabi mantuu song pilay pa Betel. Takka ndooy, buwat na ku pangulbanan man tabi numba Tuhan. Iya ilay bay nabang aku jaman ku njawom bahaya mehe. Maka luu na pin ya ngunungan aku paninggai-paninggai jaꞌ ku.”

4Pag-anu siꞌ, lay na pa-ntan da mimon tuhan-tuhan da sampay ga anting-anting man da magjimat pa mman si Yaꞌkub. Luu jaꞌ siꞌ mman na, lay na labbong na ni diyoꞌ poon kayu mehe ndooy ni Sekem. 5Pag lakka da man Sekem, yaꞌ na luu jama mandooy bay ngonse sila mawos, batan mimon jama ni siga daira lahat looy lay na bay pinatakkahan tawu meꞌ Tuhan.

6Pag-anu siꞌ, lay na takka ga si Yaꞌkub pilay pa Betel, yana kawman bay pinag-awnan Luz maruhuꞌ ndooy ni Kanan. 7Ndooy siꞌ, lay na du ya nambak batu binuwat pangulbanan. Sampay lay na baw awnan na lugar looy El Betel, batan ndooy na man Tuhan bay nammuhan iya jaman na bay malahiyan kakaꞌ na.

8Na sasang ga si Yaꞌkub maglahat ndooy ni Betel, lay na matoy si Debora, yana danda looy ma bay tukang ngipat si Ribeka man kadikiꞌ na. Dari lay na ya kinubu ndooy ni labbak Betel ndiyoꞌ poon kayu mehe. Kuwan poon kayu looy, lay na awnan da Allon-Bakut, hatiyan na, “poon kayu mman magtangisan.”

9Na balik ta pa bay kalakka si Yaꞌkub man lahat matoa na ndooy ni Paddan-Aram, song hallom, lay na baw ya takka pa Kanan. Ndooy siꞌ, lay na baw ya tinammuhan meꞌ Tuhan pabalik. Maka lay gi ya sinupaatan. 10Yuk Tuhan niiya, “Labba man batnaa, awon nu saꞌ na si Yaꞌkub, si Israil na.” Dari ndooy na poonan Tuhan bay ngawnan iya si Israil. 11Maka yuk Tuhan niiya, “Aku na situ Tuhan Sangat Kawasa. Buwanan ta sina ko panubuꞌ lipat man lipat. Batan kau na sina mintu poonan disu bangsa balkanan sampay tabeꞌ na jinisan bangsa ningkaam. Maka luu du sina mintu siga sultan pōꞌ man siga panubuꞌ nu.” 12Maka yuk Tuhan, “Lahat tuu ma bay janjiꞌ ku ni Boꞌ nu Ibrahim ka mmaꞌ nu si Isahak, dean ku sina mintu ningkau sampay ga panubuꞌ nu.” 13Pus Tuhan bay magpalman, lay na ya pabeleng pa jataꞌ.

14Na balik ta pa sibuwa si Yaꞌkub bay tinammuhan meꞌ Tuhan jaman na bay malahiyan Kaꞌ na Esaw, lay ya matangge batu tahaꞌ ndooy. Maka lay gi tumpahan na ka insallan maka tubaꞌ anggul man na maehe Tuhan. 15Boꞌ ilooy na silay waktu man si Yaꞌkub bay ngawnan lahat looy Betel. Hatiyan na, “Lumaꞌ Tuhan,” sabap ndooy na man Tuhan bay magpalman niiya.

Kapatoy si Rakel

16Na song hallom, lay na baw halin ga si Yaꞌkub man Betel song pilay pa disu daira inawnan Eprat. Jaman looy siꞌ, ndang battong si Rakel. Lawak-lawak gi siꞌ sila man Eprat, taabut na man si Rakel maddi, boꞌ tud bay kaawran ya. 17Sugaꞌ san ya kabisahan maddi, lay gi du baw kaluwa anak na. Dari yuk baliyan na, “Pagamgamun na atay nu, batan luu na baw balik anak nu lalla.” 18Salla na, magkamatoy-matoy na baw si Rakel bay kabisahan. Tapit jaꞌ siꞌ ya makkat, lay doꞌ awnan na anak na si Ben-oni. Sugaꞌ meꞌ Yaꞌkub na baw bay ngawnan iya, yana si Benjamin.

19-20Pus meꞌ looy, lay na du matoy si Rakel sampay lay na ya kinubu. Ni kokan kubu na, luu batu tahaꞌ bay patangge si Yaꞌkub. Ngabut sampay batnaa masi luu batu looy yana pangindanan ni kubu si Rakel.

Na pus meꞌ looy, lay na sila pawus pa Eprat, yana Betlehem na ni batnaa. 21Lakka mandooy, lay na baw ga si Israil halin pa dambilaꞌ kawum inawnan Migdal-Edel. Luu jaꞌ siꞌ sila ndooy, lay na baw sila matangge siga lumaꞌ luna da.

22Sasang ga si Yaꞌkub ni lahat looy, lay na baw magkamuklahan anak na ma siyaka, yana si Ruben, ka si Bilha, yana disu nda si Yaꞌkub ma bay ata da. Pag tasayu si Yaꞌkub, tud bay lasu ya.

Siga anak si Yaꞌkub ma lalla

23Na eka anak si Yaꞌkub ma lalla, sapu-duwa.

Kuwan ga anak na ka si Liya, ilooy ma siyaka yana si Ruben. Pasunuꞌ si Simiyun, boꞌ si Libay, boꞌ si Juda, boꞌ si Isakal, boꞌ si Zebulun.

24Anak na ka si Rakel yana ga si Yusup ka si Benjamin.

25Anak na ka ata si Rakel, yana si Bilha, yana ga si Dan ka si Naptali.

26Anak na ka ata si Liya, yana si Silpa, yana ga si Ged ka si Asel.

Dari ilooy na silay siꞌ ga anak si Yaꞌkub. Sila bay pinamaddihan ndooy ni Paddan-Aram sarī man si Benjamin.

Kapatoy si Isahak

27Pag-anu siꞌ, lay na palanja ga si Yaꞌkub pa lumaꞌ mmaꞌ na si Isahak ndooy ni Mamre, tapit pa Kiriyat-Alba, yana daira ma pinag-awnan Hebron ni batnaa. Maka ndooy na du silay man Boꞌ na Ibrahim bay maglahat. 28Na pag taabut dahatus umpūꞌ taun umu si Isahak, 29lay na ya patuhut ni kabboꞌ-bboan na ndooy ni ahirat ni kasangkad toa na na. Dari siꞌ, lay na ya kinubu meꞌ ga anak na si Esaw ka si Yaꞌkub.

Currently Selected:

Panagnaan 35: sjm

Highlight

Copy