Panagnaan 33

Sitammu si Esaw ka si Yaꞌkub

1Na yaꞌ gi siꞌ hallom, pag ndaꞌ si Yaꞌkub, luu na pasōng pa mman na si Esaw ka baanan jama na mpat hatus. Dari bbuwatan si Yaꞌkub, lay sohoꞌ na siga anak na saliꞌ-saliꞌ pa mman ga nneꞌ da. 2Bay pinaduhuꞌ meꞌ na yana ga nda na ma ata sikaduwa, yana ga si Bilha ka si Silpa ka ga anak da, boꞌ pasunuꞌ si Liya ka ga anak na. Kuwan si Rakel ka anak na si Yusup, lay ni dambulihan. 3Kuwan si Yaꞌkub, lay paruhuꞌ man sila sikamimon sampay lay gi ya sujud min pituꞌ lān na pasōng pa mman danganakan na.

4Kuwan si Esaw baw siꞌ tu, magti sonse pa mman si Yaꞌkub ngakkop sambayan na ngūk sampay sikatangis na sila. 5Pag takita si Esaw ga karandahan looy kaniya-kaniya ka ga anak da, tilaw na, “Soy ilay ga jama looy ni dambulihan nu?”

Tampung si Yaꞌkub, “Ilooy ilay Kaꞌ, ga anak-nda ku, ladjikiꞌ man Tuhan ni kaaseꞌ na niyaku.”

6Pag-anu, ilooy ma pasōng na si Bilha ka si Silpa ka ga anak da sambayan da pakokoꞌ ni awpan si Esaw. 7Pasunuꞌ si Liya ka ga anak na pakokoꞌ. Katapusan, yana si Rakel ka si Yusup lay du pakokoꞌ.

8Tilaw si Esaw, “Batōy nu lay la ga baanan hayop looy siꞌ ma bay paruhuꞌ nu?”

Tampung si Yaꞌkub, “Ningkau silay Kaꞌ, tandaꞌ aseꞌ ku ningkau.”

9Sugaꞌ yuk si Esaw, “Meka na du bilay Diꞌ niyaku. Ningkau na ilooy.”

10Yuk si Yaꞌkub, “Saꞌ ba Kaꞌ meꞌ naa, arapun bong ko bana-bana maasean aku, kaddoun na. Ilooy ilay man ku masampang kau. Meꞌ naa batnaa kahōpan nu na ku, sibuꞌ du parasahan ku ka bay ngita luwa Tuhan kiyum-kiyum niyaku. 11Kaddoun na ba. Ilooy ilay man ku masampang kau. Ndang-ndang lay na du ku sinupaatan meꞌ Tuhan maka luu gi du maglabi.” Dari pagka sigi-sigi ngalogos si Yaꞌkub, lay na kuhi ngaddoꞌ si Esaw, 12sampay yuk na, “Sūng tabi na.”

13Sugaꞌ yuk si Yaꞌkub, “Daa doꞌ ko ha Kaꞌ. Ndaun doꞌ ba ga anak kami. Lamma na sina. Maka subay ayad meꞌ ku mamikihan ga bili-bili naa sampay kasohean kahayop-hayopan naa ma masi maduruꞌ ga anak da. Bong ina mintu pasu-pasu ku na baw, banti lay na baw mintu matoy kasohean, batan yaꞌ gi tatatas da bong magti kami mmeꞌ ningkaam ni llaw tuu du. 14Sugaꞌ bong anu Kaꞌ, duhuꞌ na doꞌ ko, boꞌ kami sa patuhut pooy-pooy na tangkas-tangkas kami ka ga anak ku sampay ga kahayop-hayopan naa. Ndang-ndang ina, song hallom, takka du sina kami pilay pa mman nu ndooy ni Seyil.”

15Yuk si Esaw, “Bong meꞌ naa, mbanan ku na doꞌ kasohean tindog ku ngahongan kau.”

Iya tampung si Yaꞌkub, “San daa na ba Kaꞌ. Ilooy du lay siꞌ bay puhung ku, bong pin ku kahōpan nu jaꞌ.”

16Dari siꞌ, lay na kuhi si Esaw sampay lay na ya pabeleng pa Seyil ni llaw looy du. 17Sugaꞌ bbuwatan ga si Yaꞌkub, lay nigpang pa lahat disu. Sampay ndooy na ya bay buwat lumaꞌ maka lay gi ya matangge siga pasindungan kahayop-hayopan na. Labba mandooy, lahat looy lay na inawnan Sukkot, hatiyan na, “siga pasindungan.”

18Na hallom maka hallom na, lay na baw ga si Yaꞌkub palakka man Sukkot maglayin pilay pa daira inawnan Sekem ndooy ni Kanan. Ni bay kalakka da man Paddan-Aram ngabut sampay katakka da pa Sekem, yaꞌ du sila bay kongoy-kongoy. Ndooy siꞌ, lay na sila matangge ga lumaꞌ luna da ni poan daira looy. 19Tanaꞌ mman da bay patannaꞌ yana tanaꞌ paglūng si Hamol, mmaꞌ disu lalla inawnan du si Sekem. Yaꞌ gi hallom, lay na taballi meꞌ si Yaꞌkub. Hagaꞌ na dahatus dublun pilak porol. 20Ndooy siꞌ, lay na baw si Yaꞌkub nambak batu binuwat pangulbanan, boꞌ lay inawnan meꞌ na El Elohe Israil, hatiyan na, “Tuhan yana Tuhan ma sinumba meꞌ si Israil.”

Currently Selected:

Panagnaan 33: sjm

Highlight

Copy