Panagnaan 24

Si Isahak pinahandān

1Na si Ibrahim siꞌ tu, tud toa laslas na maka ni mimon kahalan na, sinupaatan jaꞌ ya meꞌ Tuhan. 2Disu llaw, lay tawag na panghuluꞌ tindog na ma ngantanan kapatut ni mimon altaꞌ na. Luu jaꞌ siꞌ, yuk si Ibrahim niiya, “Bong anu, pahandān nu na anak ku. Tu ko. Ningkōꞌ doꞌ ko ni bihing ku. Nnaun tangan nu dambilaꞌ ndiyoꞌ paa ku sambayan nu napa.#(24.2) Bay jaman looy, tandaꞌ jama magbuli-bulihan sapa na binogbogan, subay ya ngannaꞌ tangan na dambilaꞌ ni diyoꞌ paa jama looy ma man na napa. 3Sapahan nu na pa Papuꞌ ku Tuhan, ilooy ma magbayaꞌ ni sulgaꞌ sampay ni junyaꞌ, basta daa pihān nu anak ku si Isahak nda bong kinawnan ntuu ni bangsa Kanan. 4Arapun pilay ko pa mman baanan kakampungan ku ni bay paglahat ku, boꞌ ndooy na pahandān nu anak ku.”

5Sugaꞌ tilaw tindog na baw siꞌ tu, “Pooy baw lay la bong ku mintu bay nammu danda, boꞌ yaꞌ baw kuhi mmeꞌ pitu? Subay na pin kilay mintu boo ku si Isahak pilay pa bay lahat nu?”

6Tampung si Ibrahim, “Amay-amay daa na ya boonun pilay 7batan tanaꞌ tuu itu yaꞌ taambanan. Lay na situ sapahan Tuhan ma magbayaꞌ ni sulgaꞌ ndean aku sampay ga panubuꞌ ku. Boꞌ iya silay mismu bay nohoꞌ aku pitu lakka man lahat lūng-kampung ku. Pag pilay nu ina mintu, Tuhan sa nampulnaꞌ palanan nu. Luu du sina mintu malaikat sohoꞌ Tuhan paruhuꞌ man kau. Iya sa nabangan kau mari tatammu nu danda man mahandān anak ku. 8Sugaꞌ bong baw danda looy mintu yaꞌ kuhi mmeꞌ ningkau, malaingkan yaꞌ na sina man nu karapatan san ko bay napa. Sugaꞌ daa jaꞌ baw boonun anak ku pilay.” 9Dari siꞌ, lay na tindog na napa pa Tuhan basta asip na na mimon panohoan tuwan na.

10Pag-anu, lay na ngaddoꞌ tindog looy siꞌ untaꞌ si Ibrahim sapū, boꞌ inuwanan meꞌ na altaꞌ ma hagaꞌ-hagaan jaꞌ man na nong buwan. Dari lay na ya lakka ka ga soheꞌ na song pilay pa bay paglahat si Ibrahim. Pag takka da pa Aram-Naharaim, lay sila patiluꞌ pa daira man si Nahol, yana danganakan si Ibrahim. 11Pag takka da, lay na sohoꞌ da palukuꞌ ga untaꞌ da ni bihing tagaꞌ ni poan daira looy. Katakka da siꞌ tu kohap na. Boꞌ ilooy na waktu man karandahan nganduk boheꞌ.

12Pag-anu siꞌ, kuwan panghuluꞌ tindog looy lay maku duwaa, yuk na, “Ū Papuꞌ, meꞌ kau Tuhan ma sinumba meꞌ tuwan ku si Ibrahim, llaw tuu bong siꞌ numan ni kahandak nu, tabangan doꞌ ku mari sampulnaꞌ maksud ku pitu. Junjung ku na ningkau, poun na timbang nu ni tuwan ku. 13Itu na ku nangge ni bihing tagaꞌ tuu ngagad karandahan daira tuu pōꞌ nganduk boheꞌ. 14Bong mintu ku bay muhun ni dangan mmeꞌ nginum, boꞌ lay du ku pinainuman sampay lay gi mintu painum na ga untaꞌ kami, ilooy na sipat iya na danda peneꞌ nu man mahandān ata nu si Isahak. Bong mintu bay na magkadarihan meꞌ looy, tumatandaꞌ na niyaku tud maaseꞌ ko ni tuwan ku.”

15Na yaꞌ gi san siꞌ lupus lalla looy maku duwaa, luu na pōꞌ disu budjang manangkit kibut. Awon na si Ribeka. Mmaꞌ na yana si Betuwel, anak si Nahol ka nda na si Milka. Kuwan si Nahol, yana danganakan si Ibrahim. 16Na si Ribeka ilay siꞌ, tud mahap danda maka yaꞌ gi bay lingkaan lalla. Yaꞌ gi siꞌ hallom, luu na ya palūd song pa tagaꞌ, boꞌ na ngisihan kibut na. Dak jaꞌ siꞌ ya moleꞌ, 17magti pasōng tindog si Ibrahim pa mman na sambayan na halling, “Ū Nang, mmeꞌ doꞌ ku la nginum.”

18Yuk danda looy, “Sigi ba Paꞌ. Nginum jaꞌ ko.” Dari siꞌ, magti lay labbahan na kibut na man na mainuman lalla looy.

19Lupus jaꞌ siꞌ lalla looy nginum, yuk danda looy, “Doꞌ ko ha Paꞌ. Painum ku doꞌ ga untaꞌ bi.” 20Dari ilooy ma lay na deꞌ-dēꞌ tumpahan na boheꞌ kibut na pa jawom panginuman hayop ndooy, boꞌ na magbelengan nganggayungan ga untaꞌ looy. 21Lalla looy siꞌ tu, yaꞌ na halling-halling, isu-isu maimanan danda looy man na mindoga bong tud lay du sinampulnaꞌ meꞌ Tuhan palanan na.

22Sso jaꞌ siꞌ ga untaꞌ looy, lay na tindog si Ibrahim mōꞌ disu simsim sammo ka duwa galang baga, mmas labbasakayi, boꞌ ndean danda looy. 23Maka yuk na, “Nang, soy siꞌ tu la mmaꞌ nu? Luu kilay bilik man kami ka ga soheꞌ ku mmeꞌ tuli ni lumaꞌ bi mintu sangom?”

24Pag tampung danda looy, “Mmaꞌ ku si Betuwel, yana anak Boꞌ Nahol ka Boꞌ Milka.” 25Maka yuk na, “Daa ko susa, luu du bilik man bi tuli maka meka du kinakan untaꞌ ndooy.”

26Pag-anu siꞌ, sujud du lalla looy numba Tuhan. 27Yuk na, “Tuhan, meꞌ kau Papuꞌ tuwan ku si Ibrahim, pudji mehe ningkau. Bana-bana du kanaalla ko numan janjiꞌ nu ni tuwan ku ni kaaseꞌ nu niiya. Lay na du ku bana patiluꞌ nu pa mman paglūng na.”

28Pag-anu siꞌ, lay na deꞌ-dēꞌ danda looy moleꞌ, boꞌ na nuntutan induꞌ-mmaꞌ na mimon ma bay magkadarihan niiya.

29-30Na sasang si Ribeka siꞌ nuntut bay halling tindog si Ibrahim niiya, luu du ndooy danganakan na lalla pakale, yana si Laban. Pag takita na simsim danganakan na ka siga galang looy ni langngon na, magti ya sonse pa tagaꞌ. Pag takka na, takita na na tindog si Ibrahim ka ga soheꞌ na masi nangge-nangge ndooy ka ga untaꞌ da. 31Dari yuk na ni tindog si Ibrahim, “Ū Langaꞌ, kau bina sinupaatan meꞌ Tuhan. Ongoy taggahaꞌ ntuu jaꞌ kam nangge-nangge ni poan? Tu kam. Yaꞌ na du lawak lumaꞌ kami maka luu du bilik ndooy ndang lay na patimmos ku tahan bi sa tuli. Maka luu du lugar man ngannaꞌ untaꞌ bi.”

32Dari lay na mmeꞌ lalla looy siꞌ ka ga soheꞌ na. Takka jaꞌ siꞌ sila, lay na hawasan ga si Laban ninsila uwanan da boꞌ lay na pinakan untaꞌ da. Boꞌ lay gi pinatanam meꞌ da lugar man da ngannaꞌ untaꞌ da. Pag-anu siꞌ, lay na boonan da ga lalla looy boheꞌ man da ngosoan battis da. 33Pag dutai da, lay na sila binotangan kinakan. Sugaꞌ yuk tindog si Ibrahim, “Yaꞌ gi ku la kakakan bong yaꞌ gi bay tapamāꞌ ku maksud ku bay pitu.”

Yuk si Laban baw siꞌ tu, “Na oy lay siꞌ la tuud bi?”

34Pag tampung na, “Aku tu tindog bboꞌ nu si Ibrahim. 35Iya ilay sukup supaat man Tuhan sampay dayahan na ga ya. Lay ya kaladjikian meꞌ Tuhan ga baanan bili-bili, ga sapiꞌ, ga untaꞌ ka ga kuraꞌ. Maka meka du dublun pilak porol na ka mmas na sampay ga ata danda-lalla. 36Iya ilay, san toa na nda na si Sara, lay gi kaladjikian anakan lalla. Dari mimon altaꞌ da, pinusaka na ni anak da. 37-38Aku itu, lay na ku sohoꞌ tuwan ku mihān anak na nda. Lay gi ku sinohoꞌ napa pa Tuhan, basta yaꞌ ku dari mihān anak na nda bong kinawnan ndooy ni bangsa Kanan. Arapun yuk na subay ku pitu pa bay paglahat na maruhuꞌ, pa mman siga kakampungan mmaꞌ na, boꞌ ku nohoꞌ mihān anak na nda ntuu. 39Dari tilaw ku ni tuwan ku, ‘Pooy lay la mintu bong yaꞌ kuhi danda looy mmeꞌ niyaku ngambanan lahat na?’

40“Pag tampung tuwan ku, ‘Daa ko susa. Luu du sina Tuhan ma inisbat meꞌ ku nabangan kau. Nohoꞌ du sina ya malaikat na duhuꞌ man kau nampulnaꞌ maksud nu.’ Maka yuk tuwan ku, ‘Nammu du sina ko danda ni kakampungan mmaꞌ ku man nu mahandān anak ku. 41Sugaꞌ bong sawpama lay puhunan nu danda ma tatammu nu, boꞌ yaꞌ matugut induꞌ-mmaꞌ na, malaingkan yaꞌ na du man nu karapatan san ko bay napa.’

42“Dari nsiniꞌ, pag takka ku pa tagaꞌ looy, lay ku maku duwaa, yuk ku, ‘Ū Papuꞌ, meꞌ kau Tuhan ma sinumba meꞌ tuwan ku si Ibrahim, bong siꞌ numan ni kahandak nu, sampulnaun na palanan ku batnaa. 43Itu na ku nangge ni bihing tagaꞌ tuu. Pag mintu pōꞌ karandahan nganduk boheꞌ, bong yuk ku mintu ni dangan, “Mmeꞌ doꞌ ku nginum,” 44boꞌ kuhi du ya sampay ga untaꞌ ku painum na lagi, inaa na sipat iya na danda peneꞌ nu man mahandān anak tuwan ku.’

45“Dari siꞌ, yaꞌ gi san ku bay lupus maku duwaa, luu na takka si Ribeka manangkit kibut nganduk boheꞌ. Na adak jaꞌ siꞌ ya moleꞌ, yuk ku niiya, ‘Ū Nang, mmeꞌ doꞌ ku la nginum.’ 46Pag-anu siꞌ, lay du magti labbahan na kibut na boꞌ na halling, ‘Sigi, nginum jaꞌ ko.’ Maka yuk na, ‘Doꞌ ko ha Paꞌ. Painum ku doꞌ untaꞌ nu.’ Dari siꞌ, lay na ku nginum. Kuwan iya, lay na mainum siga untaꞌ kami.

47“Pag-anu siꞌ, lay na baw ya tilaw ku bong anak soy ya. Pag bāꞌ na mmaꞌ na si Betuwel, anak bboꞌ na si Nahol ka bboꞌ na si Milka. Dari siꞌ, lay na dean ku simsim naa ni sammo na ka galang naa duwa ni langngon na. 48Pus meꞌ looy, lay na ku sujud muwan pagsukuhan ni Papuꞌ tuwan ku si Ibrahim. Batan lay na ku bana patiluꞌ Tuhan pa kakampungan tuwan ku. Maka man tabang Tuhan, mpu danganakan tuwan ku mismu lay tatammu ku.”

49Maka yuk tindog si Ibrahim ninsila, “Na bong gantaan kanaalla du kam maasean tuwan ku saltaꞌ na timaꞌ bi du anak na, pahandān ku na ya ni si Ribeka. Na bong baw gantaꞌ yaꞌ timaꞌ bi, baan bi jaꞌ ku mari ku kapagpamiki bong oy subay pabuwat ku.”

50Pag tampung si Laban ka mmaꞌ na si Betuwel, “Pagka tumatandaꞌ na mimon pakaradjaan looy siꞌ man kahandak Tuhan, san daa na kitabi magtahaꞌ bitsala. 51Dari na bina san boo nu na si Ribeka pilay. Sohoun na kinawin ka anak tuwan nu batan inaa bay ginantaꞌ meꞌ Tuhan ninsila.”

52Pag takale meꞌ tindog si Ibrahim meꞌ looy, ilooy ma sujud du ya numba Tuhan. 53Pag lupus, lay na ungkad na bay boonan da sampay lay na pōꞌ na jinisan babahan mmas ka pilak bana sampay jinisan pakayan hagaan, boꞌ lay ndean si Ribeka. Sampay danganakan na, si Laban, ka nneꞌ da lay du kaladjikian binuwanan altaꞌ hagaan. 54Pag-anu siꞌ, bohoꞌ lay na kuhi tindog si Ibrahim ka ga soheꞌ na nginum-mangan sampay lay na sila ndooy tuli sangom looy.

Pag batiꞌ da sayu, yuk tindog si Ibrahim, “Bong siꞌ kadarihan, muhun na kami la moleꞌ pa mman tuwan ku.”

55Sugaꞌ yuk danganakan si Ribeka ka nneꞌ da, “Bong anu ba, ntuu na doꞌ Sinnang ga sapū ngallaw boꞌ bi pilay.”

56Sugaꞌ iya tampung lalla looy, “Bong siꞌ kadarihan ningkaam, daa na kami lantanun bi ntuu. Ndang-ndang, Tuhan na du bay nampulnaꞌ maksud ku pitu. Tugutan bi na kami moleꞌ pa mman tuwan ku.”

57Pag tampung da baw siꞌ, “Bong meꞌ naa, linganan tabi doꞌ Sinnang. Ndaꞌ tabi teꞌ bong oy halling na.” 58Dari lay na linganan da si Ribeka. Luu jaꞌ siꞌ, tilaw da, “Pooy siꞌ Nang, mmeꞌ du ko ni lalla tuu?” Yuk na siꞌ, “Ohoꞌ ba, mmeꞌ ku.”

59Dari lay na si Ribeka tinugutan meꞌ ga induꞌ-mmaꞌ na mmeꞌ ni tindog si Ibrahim ka ga soheꞌ na. Maka luu gi disu danda ma tukang ngipat si Ribeka man kadikiꞌ na, lay du mmeꞌ. 60Pag-anu, lay gi si Ribeka pinakuhan supaat meꞌ mimon jama lumaꞌ na, yuk da, “Kamura-murahan Nang binuwanan du ko meꞌ Tuhan laksaꞌ-laksaan panubuꞌ. Maka kamura-murahan man tabang Tuhan, ā jaꞌ mimon banta da meꞌ da.”

61Pag-anu siꞌ, lay na panyap ga si Ribeka ka ga karandahan tindog na boꞌ da bakuraꞌ taꞌ siga untaꞌ mmeꞌ ni tindog si Ibrahim ka ga soheꞌ na.

62Na jaman looy siꞌ, kuwan si Isahak, lay maglahat ni Negeb huwin pa sātan ndooy ni Kanan. Iya siꞌ tu bahau jaꞌ takka man Beel-Lahay-Roy.

63Na pag takka ga si Ribeka pa lahat si Isahak, song lindom na lahat. Kuwan si Isahak baw siꞌ tu, luu na pin luman-lumān ngalangan-langan lassa na ni kahayangan. Sasang na ndooy, ngita na ya baanan untaꞌ song pa mman na. Dari lay ya pilay nampang sila. 64Takita jaꞌ siꞌ si Isahak meꞌ si Ribeka, lay ya duwai man taꞌ untaꞌ, 65boꞌ na nilaw tindog si Ibrahim, yuk na, “Soy lay la lalla looy pasōng pa mman tabi?”

Pag tampung na, “Ilooy na silay anak tuwan ku.” Dari magti si Ribeka nambunan luwa na ka turung na.

66Pag sitammu sila, lay na tinuntutan si Isahak meꞌ tindog na mimon kahalan ni bay palanan da. 67Dari siꞌ, lay na si Ribeka boo si Isahak pa lumaꞌ imuwa nneꞌ na si Sara sampay lay na sila kinawin. Boꞌ tud maaseꞌ ya banahan ni si Ribeka. Dari labba mandooy, lay na pakulang karukkaan na ni bay kapatoy nneꞌ na.

Currently Selected:

Panagnaan 24: sjm

Highlight

Copy