Panagnaan 11

Pallun manusiyaꞌ lay pinaekahan meꞌ Tuhan

1Na ni bay awwal jaman, disu du pallun manusiyaꞌ. 2Hangat da enseg song pa mataallaw, lay na sila nakka kapantayan luha inawnan Saynal, sampay ndooy na sila bay maglahat. 3-4Song hallom, lay na baw sila isun, yuk da, “Buwat teꞌ la tabi daira mehe ddas ka disu lumaꞌ langkaw banahan gantaꞌ ngabut sampay pa taꞌ langit. Meꞌ looy ilay, tanyag na awon tabi ni sikaliput junyaꞌ. Boꞌ yaꞌ na kitabi magkanatan ni sikaliput junyaꞌ. Anu kam, ngaddoꞌ tabi pesak boꞌ pinasuꞌ man buwat halo-blak paeka. Lahat tuu tu, kulang eka batu man tabi buwat.” Dari siꞌ, yaꞌ na taambat halo-blak bay pabuwat da. Meꞌ da bay nangon, lay kinanjiꞌ ka kitlan palikot.

5Na sasang da siꞌ buwat daira looy ddas ka lumaꞌ langkaw na, pinaimanan na pin sila meꞌ Tuhan. 6Pag ndaꞌ Tuhan meꞌ looy na akka da, yaꞌ ya kamahapan.#(11.6) Yaꞌ tatantu ta oy sabap Tuhan yaꞌ kasulutan ni pabuwatan da. Meꞌ kasohean ngahati yaꞌ sila bay ngasip ni panohoan Tuhan nohoꞌ manusiyaꞌ ngalataan junyaꞌ. Ndaun juran 1.28 ka 9.1. Dari yuk na, “Meꞌ sila itu disu bangsa du sampay dambuwaꞌ pallun, ituu tu bohoꞌ panagnaan ni mimon pabuwatan takaya da. San gi ina mintu oy garaꞌ da, yaꞌ na sina luu saꞌ tapabuwat da. 7Anu kam, duwai doꞌ kitabi ngahalin pallun da mari meka na jinisan pallun da. Meꞌ looy ilay, yaꞌ na sila sikahati-kahati.”

8-9Na lay jaꞌ siꞌ halin Tuhan pallun da, lay na tagongan da buwat daira looy, sampay lay na sila magkanatan ni sikaliput junyaꞌ man kahandak Tuhan. Kuwan daira looy, lay na inawnan Babel. Hatiyan Babel, “sikalingu” batan ndooy na man Tuhan bay maekahan pallun da.

Siga panubuꞌ si Sem

10Na balik ta pa bay jaman si Sem, salsila panubuꞌ na meꞌ tuu: Luu jaꞌ siꞌ duwan taun paddus dunuk looy, sasang si Sem mag-umu dahatus taun, anakan na ya lalla, yana si Alpaksad. 11Paddus si Alpaksad bay pinamaddihan, lay gi pasampun umu si Sem lima hatus taun, maka luu gi ga anak na sarī, danda-lalla.

12Kuwan si Alpaksad, pag taabut tallumpuꞌ-liman taun umu na, anakan na ya lalla, yana si Sela. 13Paddus si Sela bay pinamaddihan, lay gi pasampun umu si Alpaksad mpat hatus tallun taun, maka luu gi anak na sarī, danda-lalla.

14Kuwan si Sela, pag taabut tallumpūꞌ taun umu na, anakan na ya lalla, yana si Ebel. 15Paddus si Ebel bay pinamaddihan, lay gi pasampun umu si Sela mpat hatus tallun taun, maka luu gi anak na sarī, danda-lalla.

16Kuwan si Ebel, pag taabut tallumpuꞌ-mpat taun umu na, anakan na ya lalla, yana si Peleg. 17Paddus si Peleg bay pinamaddihan, lay gi pasampun umu si Ebel mpat hatus tallumpūꞌ taun, maka luu gi anak na sarī, danda-lalla.

18Kuwan si Peleg, pag taabut tallumpūꞌ taun umu na, anakan na ya lalla, yana si Reyu. 19Paddus si Reyu bay pinamaddihan, lay gi pasampun umu si Peleg duwa hatus siyam taun, maka luu gi anak na sarī, danda-lalla.

20Kuwan si Reyu, pag taabut tallumpuꞌ-duwan taun umu na, anakan na ya lalla, yana si Serug. 21Paddus si Serug bay pinamaddihan, lay gi pasampun umu si Reyu duwa hatus pitun taun, maka luu gi anak na sarī, danda-lalla.

22Kuwan si Serug, pag taabut tallumpūꞌ taun umu na, anakan na ya lalla, yana si Nahol. 23Paddus si Nahol bay pinamaddihan, lay gi pasampun umu si Serug duwa hatus taun, maka luu gi anak na sarī, danda-lalla.

24Kuwan si Nahol, pag taabut duwampuꞌ-siyam taun umu na, anakan na ya lalla, yana si Tera. 25Paddus si Tera bay pinamaddihan, lay gi pasampun umu si Nahol dahatus sapu-siyam taun, maka luu gi anak na sarī, danda-lalla.

Salsila ga si Tera

26-27Kuwan si Tera, nagnaꞌ man pitumpūꞌ taun umu na, lay na ya anakan tallu lalla, yana ga si Ibram, si Nahol ka si Haran. Kuwan si Haran, anakan na lalla, yana si Lut. 28Sugaꞌ si Haran siꞌ tu, masi gi mmaꞌ na llum, lay na matoy ni daira man na bay pinamaddihan, yana Ul ndooy ni lahat bangsa Kaldiya.

29-30Na kuwan anak si Tera, yana si Ibram, lay kapahanda ni disu danda inawnan si Saray. Sugaꞌ si Ibram siꞌ tu yaꞌ gi bay anakan batan man si Saray yaꞌ hanak. Kuwan anak si Tera, yana si Nahol, lay sitampu ka kamanakan na si Milka. Kuwan si Milka ilay ka danganakan na si Iska, yana ga anak si Haran.

31Hallom maka hallom na, lay na baw palakka ga si Tera man Ul ndooy ni lahat bangsa Kaldiya. Lakka mandooy, maksud da maglayin pa Kanan. Ilooy siꞌ bay boo si Tera yana anak na si Ibram ka iwan na si Saray, sampay mpu na si Lut, yana anak si Haran. Sugaꞌ pag taabut ga si Tera daira inawnan Haran, lay na sila pasangkod ndooy. 32Maka ndooy na man si Tera bay matoy pag taabut duwa hatus liman taun umu na.

Currently Selected:

Panagnaan 11: sjm

Highlight

Copy