मत्ती 27

ईसू की पिलातुस का हामे पेसी

(मरकुस 15:1; लूका 23:1–2; यहुन्ना 18:28–32)

1जद्याँ भाग-फाट्याँ वीं हारई मुक्य याजकाँ अन दाना नेता ईसू ने मार नाकबा को बच्यार किदो। 2वाँकाणी ईसू ने बाँदन लेजान पिलातुस हाकम ने हूँप दिदो।

यहूदा को मरणो

(थरप्या तका का काम 1:18–19)

3 # थर 1:18,19 जद्याँ ईसू ने धोकाऊँ पकड़ाबावाळे यहूदो देक्यो के, ईसू दोसी ठेरायो ग्यो हे, तो वो पछतायो अन तीस चाँदी का सिक्का मुक्य याजकाँ अन दाना नेता का नके पाच्छा लेग्यो। 4अन क्यो, “में बना दोस का मनक ने मारबा का वाते पकड़ान पाप किदो!”

तो वाँकाणी क्यो, “माँने कई? थूँ थारी जाणे।”

5तद्याँ वो वणा सिक्का ने मन्दर में फेंकन परोग्यो अन जान आपणाँ खुद के फाँसी लगा दिदी।

6मुक्य याजकाँ वणा सिक्का ने लेन क्यो, “आने मन्दर का भण्डार में राकणा हव कोयने, काँके ओ लुई को मोल हे।”

7ईं वाते होच-बच्यार करन वणा सिक्काऊँ बारवास्याँ ने गाड़बा का वाते कुमार को खेत मोल ले लिदो। 8ईं वाते वो खेत आज तईं “लुई को खेत” बाजे हे।

9तद्याँ ज्यो बचन परमेसर का आड़ीऊँ बोलबावाळे यरमिया क्यो हो वो पूरो व्यो के, “वणा चाँदी का तीस सिक्का लिदा, अन ईं वीं सिक्का हा, ज्याँने इजराएल का मनकाँ वींका मोल में देबा का वाते ते किदा हा। 10अन जस्यान परबू मने हुकम दिदो हो वस्यानीस वणा वाँ सिक्काऊँ कुमार को खेत मोल ले दिदो।”

पिलातुस को ईसुऊँ सवाल

(मरकुस 15:2–5; लूका 23:3–5; यहुन्ना 18:33–39)

11जद्याँ ईसू हाकम पिलातुस का हामे ऊबा हा, तो हाकम वाँकाऊँ पूँछ्यो, “कई थूँ यहूदियाँ को राजो हे।”

ईसू वींने क्यो, “थूँ खुदई केरियो हे।”

12जद्याँ मुक्य याजकाँ अन दाना नेता वींपे दोस लगारिया हाँ, तो वणी कई जवाब ने दिदो।

13ईंपे पिलातुस वींने क्यो, “कई थूँ ने हुणरियो हे के, ईं थाँरा विरोद में कतरी गवायाँ देरिया हे?”

14पण ईसू वाँने एक भी जवाब ने दिदो, अणीऊँ हाकम पिलातुस ने भी घणो अचम्बो व्यो।

ईसू ने मोत की सजा

(मरकुस 15:6–15; लूका 23:13–25; यहुन्ना 18:39; 19:16)

15हाकम पिलातुस को फसे का तेवार पे आ रीत ही के, लोगाँ का वाते कणी एक ने जेळ मेंऊँ जिंने वीं छाता हाँ, छोड़ देतो हो। 16वीं टेम वाँका वटे बरब्बा नाम को एक नामी मनक जेळ में हो।

17ईं वाते जद्याँ मनक भेळा व्या, तो पिलातुस वाँने क्यो, “थाँ कई छावो हो के, मूँ थाँका वाते किंने छोड़ दूँ? बरब्बा ने कन ईसू ने ज्यो मसी बाजे हे?” 18काँके वो जाणतो हो के, वणा ईसू ने रिस्याँ बळता तका पकड़वायो हे।

19जद्याँ पिलातुस न्याव की गाद्दी पे बिराज्यो तको हो तो वाँकी लुगई वींने ओ हमच्यार खन्दायो, “थूँ वणी धरमी मनक का मामला में भेळा मती रेज्ये। काँके में आज हपना में वाँका वाते घणो दुक जेल्यो हे।”

20मुक्य याजकाँ अन दाना नेता लोगाँ ने हिकावा लागा के, वीं बरब्बा ने मांगे, अन ईसू ने मरबा देवे।

21हाकम पिलातुस वाँने पूँछ्यो, “अणा दुयाँ मूँ किंने छावो हो के, मूँ थाँका वाते छोड़ दूँ?”

वाँकाणी क्यो, “बरब्बा ने।”

22हाकम पिलातुस वाँने पूँछ्यो, “पछे ईसू ने, ज्यो मसी बाजे हे, वींको कई करूँ?”

हारई वाँने क्यो, “वींने हूळी पे चढा दो!”

23हाकम पिलातुस वाँने पूँछ्यो, “काँ, वणी कई खोटो काम किदो हे?”

पण वीं ओरी हाका-हूक करन केबा लागा, “वींने हूळी पे चढा दो।”

24 # वे.वि 21:6–9 जद्याँ पिलातुस देक्यो के, कई फायदो कोयने पण ईंका हामे ओरी हाका-हूक वेबा लागी हे, तो वाँकाणी हतेळी में पाणी लेन भीड़ का हामे आपणाँ हात धोया अन क्यो, “मूँ ईं धरमी का लुईऊँ बना दोस को हूँ, थाँईस जाणो।”

25हाराई लोगाँ जवाब दिदो, “ईंकी मोत की जवाबदारी माँ अन माकाँ छोरा-छोरी लेवा हा।”

26ईंपे वणी बरब्बा ने वाँका वाँते छोड़ दिदो, अन ईसू के कोड़ा लगान हूळी पे चढाबा वाते हूँप दिदो।

ईसू की रोळ करणी

(मरकुस 15:16–20; यहुन्ना 19:2–3)

27तद्याँ हाकम पिलातुस का सपायाँ ईसू ने किला में लेग्या अन हारी फोज वाँका च्यारूँमेर भेळी वेगी। 28अन वणा वाँका गाबा उतारन वाँने दरबारी गाबा पेराया। 29अन काँटा को मुकट गूँतन वाँका माता पे मेल्यो, अन वाँका जीमणा हात में कामड़ी दिदी अन वाँका आगे जुकन वाँकी रोळ करन क्यो, “हो यहूदियाँ का राजा, अमर रेवे!” 30अन वींपे थूँक्यो अन वाईस कामड़ी लेन वाँका माता पे ठोकबा लागा। 31जदी वणा वाँकी रोळ करन, वींका दरबारी गाबा उतार्या अन वींने आपणाँ खुद का गाबा पेरा दिदा अन पछे वींने हूळी पे चड़ाबा ने लेग्या।

ईसू ने हूळी पे चढाणा

(मरकुस 15:21–32; लूका 23:26–43; यहुन्ना 19:17–27)

32बारणे जाती दाण वाँने समोन नाम को एक कुरेन को रेबावाळो मनक मल्यो वणा वींने पकड़्यो अन जोर नाक्यो के, वो ईसू की हूळी उठान चाले। 33पछे वीं वणी जगाँ पे ज्यो गलगता ईंको मतलब कपाळ की जगाँ बाजे हे वटे पोछ्याँ, 34#भज 69:21तो वणा ईसू ने कड़वी चीज मलायो तको अंगूरा को रस पिबा का वाते दिदो, पण वणा वींने छाकन पिणो ने छायो।

35 # भज 22:18 तद्याँ वाँकाणी ईसू ने हूळी पे चढा दिदो अन गोट्याँ नाकन वाँका गाबा बाँट लिदा। 36अन वटे बेटन पेरो देबा लागा। 37अन वींकी सजा की पाटी वाँका माता पे लगाई के, “ओ यहूदियाँ को राजा ईसू हे।”

38तद्याँ ईसू का हाते दो चोर ने एक जींमणी पाल्ड़े अन दूजाने डावी पाल्डे, हूळ्याँ पे चड़ाया ग्या। 39#भज 22:7; 109:25गेला में आबाजाबा वाळा मातो ठणकान वींकी नन्दयाँ कररिया हा, 40#मत्ती 26:61; यहु 2:19अन ओ केरिया हाँ, “ए मन्दर ने हल्ड़ाबावाळा अन तीन दन में बणाबावाळा, आपणाँ खुद ने तो बंचा ले। यद्याँ थूँ परमेसर को पूत हे, तो हूळीऊँ रेटे उतर आ।”

41ईं तरियाँ मुक्य याजकाँ अन मूसा का नेमा ने हिकाबावाळा अन दाना नेता हाते मलन रोळ कर-करन केरिया हाँ, 42“अणी ओरा ने बंचाया, पण आपणाँ खुद ने ने बंचा सके। ओ तो इजराएल को राजा हे, अबे हूळीऊँ उतरन आवे तो आपाँ ईंपे विस्वास करा। 43#भज 22:8अणी परमेसर पे विस्वास राक्यो हे यद्याँ वो ईंने छावे हे, तो अबे ईंने बंचा ले, काँके अणी क्यो हो के, ‘मूँ परमेसर को पूत हूँ।’ ” 44ईं तरिया चोर भी ज्यो वाँका हाते हूळ्याँ पे चड़ाया ग्या हा, वींकी नन्दया कररिया हाँ।

ईसू की मोत

(मरकुस 15:33–41; लूका 23:44–49; यहुन्ना 19:28–30)

45दपराँ का बारा बज्याँ लेन तीन बज्या तईं वीं हारा देस में अन्दारो रियो। 46#भज 22:1तीन बजाँ का भड़े ईसू कल्ड़ी हाका-भार मेलन क्यो, “एली, एली, लमा सबकतानी?” ईंको मतलब “हो मारा परमेसर, हो मारा परमेसर थाँ मने काँ छोड़ दिदो?”

47ज्यो वटे ऊबा हाँ, वणा मूँ कतराई ओ हुणन क्यो, “वो तो एलिया ने बलारियो हे।” 48#भज 69:21वाँका मूँ एक तरत दोड्यो, अन रुँई का फूबाँ ने खाटा अंगूरा का रस में डबोक्यो अन लाकड़ी पे मेलन वींने सुकायो।

49पण दूजाँ क्यो, “ठम जावो, देको एलियो, ईंने बंचाबा आवे हे के ने।”

50तद्याँ ईसू ज्योरऊँ हाका-भार करन जीव छोड़ दिदो।

51 # निर 26:31–33 अन वणीस दाण मन्दर को परदो ऊपरेऊँ हेठे तई फाटन दो टुका वेग्यो। धरती हालगी अन छाँटा फाटगी। 52अन अटा तईं कबराँ खुलगी, अन मरिया तका पुवितर मनकाँ मेंऊँ नरई पाच्छा जीवता वेग्या। 53अन वीं करबा मेंऊँ निकळ आया अन ईसू के पाच्छा जी उठबा केड़े पुवितर नगर यरूसलेम में ग्या अन नरई ने दिकई दिदा।

54तद्याँ रोमी सेनापती अन ज्यो वींका हाते ईसू के पेरो देरियो हाँ, भूकम अन ज्यो कई व्यो हो, वींने देकन घणा दरपग्या अन क्यो, “हाँचई में ओ परमेसर को पूत हो।”

55 # लूका 8:2,3 वटे नरई लगाया ज्यो गलीलऊँ ईसू की सेवा-चाकरी करती तकी वाँका हाते आई ही, वीं छेटीऊँ ओ देकरी ही। 56वाँका मूँ मरियम मगदलीनी, अन याकूब अन योसेस की माँ मरियम, अन जबदी का छोरा की बई ही।

ईसू ने गाडणा

(मरकुस 15:42–47; लूका 23:50–56; यहुन्ना 19:38–42)

57जद्याँ हाँज वीं तो युसुप नाम को अरमतिया को एक रिप्यावाळो मनक आयो, वो खुदई ईसू को चेलो हो। 58वो पिलातुस का नके जान ईसू की लास मांगी। ईंपे पिलातुस हुकम दे दिदो के, लास ईंने दे दिदी जावे। 59युसुप लास लिदी अन वींने नवा धोळो पसेवड़ा में लपेटी, 60अन वाँने आपणी नुई कबर में मेली, ज्यो वणी मोटी छाट में बणई ही, अन कबर का बाणा पे मोटो भाटो आड़ो देन परोग्यो। 61मरियम मगदलीनी अन दूजी मरियम वटे कबर का हामे बेटी ही।

ईसू की कबर की रुकाळी

62दूजे दन ज्यो त्यारी का दन का केड़े को दन हो, मुक्य याजकाँ अन फरीसी पिलातुस का नके भेळा वेन क्यो, 63#मत्ती 16:21; 17:23; 20:19; मर 8:31; 9:31; 10:33,34; लूका 9:22; 18:31–33“हो माराज, माने आद हे के, वो भटकबावाळो जद्याँ वो जीवतो हो, तो वणी क्यो हो के, ‘मूँ तीन दनाँ केड़े पाछो जी उटूँ।’ 64ईं वाते हुकम दो के, तीजा दन तईं कबर की रुकाळी करी जावे, अस्या ने वे के, वाँका चेला आन वींने चुरा लेजा अन लोगाऊँ केबा लागा के, ‘वो मरिया तका मेंऊँ जी उट्यो हे। तद्याँ यो धोको पेल्या का धोकाऊँ भी मोटो वेई।’ ”

65पिलातुस वाँने क्यो, “थाँ पेरा का वाते रुकाळ्या ले जावो अन आपणी हमज का जस्यान रुकाळी करो।” 66तद्याँ वीं रुकाळ्या ने हाते लेन पराग्या। अन भाटा पे मोर लगान कबर की रुकाळी किदी।

Currently Selected:

मत्ती 27: एम टी आर

Highlight

Copy