मत्ती 21

यरूसलेम में ईसू को आणो

(मरकुस 11:1–11; लूका 19:28–40; यहुन्ना 12:12–19)

1जद्याँ ईसू अन वींका चेला यरूसलेम का नके पोछ्याँ अन जेतुन का मंगरा पे बेतफगे का नके आया, तो ईसू दो चेला ने ओ केन खन्दाया, 2“आपणाँ हामे वाळा गाम में जावो! वटे जाताई थाँने एक गदेड़ी बंदी तकी मेली, अन वाँका नके वींको एक बाछरो बंद्‍यो तको मली। वींने खोलन मारा नके ले आवो। 3यद्याँ कुई थाँकाऊँ पुच्छे, तो केज्यो के, ‘परबू ने ईंकी सावना हे,’ तद्याँ वो तरत वींने खोलन थाँका हाते खन्दा देई।”

4यो ईं वाते व्यो के, ज्यो बचन परमेसर का आड़ीऊँ बोलबावाळा का मुण्डाऊँ बोल्या ग्या हा, वीं पूरा वेवे हे के,

5“सिय्योन की छोरीऊँ केवो,

‘देक, थारो राजो थाँका नके आवे हे।

वो भलो हे अन गदेड़ी पे बेटो तको हे

वो गदेड़ी का बाछरा पे बेटो हे।’”

6चेला जान, जस्यान ईसू वाँने क्यो हो, वस्यानीस किदो। 7अन गदेड़ी अन वींका बच्या ने लान, वींपे आपणाँ गाबा नाक्या काँके ईसू को वींपे बेटणो हो। 8तद्याँ नरई लोग-बागाँ आपणाँ गाबा गेला में बसा दिदा अन दूजाँ लोगाँ रूँकड़ाऊँ डाळ्याँ काटन गेला में नाक दिदी। 9#भज 118:25,26जीं मनक आगे हा अन जीं पाच्छे हा वीं केरिया हा,

“दाऊद का वंसज ने होसाना।

धन्न हे वाँने जी परबू का नामऊँ आवे हे,

हरग में होसाना।”

10जद्याँ वीं यरूसलेम में आया, तो हारई नगर में हाका-हूक बेवा लागी, अन लोग-बाग केबा लागा, “ओ कूण हे?”

11लोग-बागाँ क्यो, “ओ गलील का नासरत नगर को परमेसर का आड़ीऊँ बोलबावाळो ईसू हे।”

मन्दरऊँ लेण-देण करबावाळा ने बारणे काड़णा

(मरकुस 11:15–19; लूका 19:45–48; यहुन्ना 2:13–22)

12ईसू परमेसर का मन्दर में जान वीं हारई ने, ज्यो मन्दर में लेण-देण को काम कररिया हाँ, वाँने बारणे काड़ दिदा, अन विदेसी रिप्या बदलबावाळा का तकता अन परेवड़ा बेचबावाळा की दकाना ने उलटी कर नाकी। 13#यसा 56:7; यर 7:11अन वाँकाऊँ क्यो, “सास्तर में लिक्यो हे, ‘मारो घर परातना को घर केवाई।’ पण, थाँ ईंने ‘चोरा को ठाणो’ बणा दिदो हे।”

14तद्याँ आंदा अन लुला-लंगड़ा, मन्दर में वाँका नके आया, अन वाँने वणी हव किदा। 15पण जद्याँ मुक्य याजकाँ अन नेमा ने हिकाबावाळा अणा, मोटा कामाँ ने, ज्यो वाँकाणी किदा, अन छोरा-छोरी ने मन्दर में, “दाऊद का वंसज ने होसाना बोलता तका देक्यो, तो वीं गुस्सा में आग्या।” 16#भज 8:2अन ईसू वाँने केवा लागा, “कई थूँ हुणे हे के, ईं कई केवे हे?”

ईसू वाँने क्यो, “कई थाँ सास्तर में ने भण्यो, ‘छोरा-छोरी अन दूद पिवता फोरा बाळकाँ का मुण्डाऊँ थाँ घणी जे-जेकार करई हे’?”

17तद्याँ ईसू वाँने छोड़न नगर का बारणे का गाम बेतनियाँ पूग्यो अन रात वटेईस रियो।

बना फळ को अंजीर को रूँकड़ो

(मरकुस 11:12–14,20–24)

18भाग-फाट्याँ जद्याँ ईसू यरूसलेम सेर में आरियो हो, तो वींने भूक लागी। 19हड़क का आड़ी वणी एक अंजीर को रूँकड़ो देकन वो वींका भड़े ग्यो, तो वींने पान्दड़ा ने छोड़ वींमें ओरू कई ने मल्यो। तो ईसू रूँकड़ा ने क्यो, “अबे थाँरे में कदी कई फळ ने लागी।” अन वो रूँकड़ो तरत हुकग्यो। 20ओ देकन चेला होच-बच्यार में पड़ग्या अन क्यो, “ओ अंजीर को रूँकड़ो अतरी जट कस्यान हुकग्यो हे?”

21 # मत्ती 17:20; 1 कुरि 13:2 ईसू वाँने जवाब दिदो, “मूँ थाँकाऊँ हाचेई केवूँ हूँ, यद्याँ थाँ विस्वास राको अन भेंम ने करो, तो थाँ बेस ओईस ने करो, ज्यो ईं अंजीर का रूँकड़ा का हाते किदो हे, पण यद्याँ ईं मंगराऊँ भी केवो, ‘अटूँ उड़ जा, अन समन्द में जा पड़,’ तो वो वे जाई। 22अन थाँ परातना में ज्यो भी विस्वासऊँ मांगो, वो हारोई थाँने मली।”

ईसू का हक पे सवाल

(मरकुस 11:27–33; लूका 20:1–8)

23ईसू मन्दर में ऊबा वेन उपदेस हुणारिया हा, तो मुक्य याजक अन यहूदी नेता वाँका नके आन पूँछ्यो, “थूँ ओ किंका हकऊँ करे हे? अन थने ओ हक कूणी दिदो हे?”

24ईसू वाँने जवाब दिदो, “मूँ भी एक बात पूँछणी छावूँ हूँ, यद्याँ वाँ मने बतावो, तो मूँ भी थाँने बताऊँ के, ईं काम किंका हकऊँ करूँ हूँ। 25बतावो यहुन्ना को बतिस्मो कटेऊँ आयो? हरग का आड़ीऊँ कन मनकाँ की आड़ीऊँ?”

तद्याँ वीं एक-दूजाऊँ केबा लागा, “यद्याँ आपाँ केवा ‘हरग का आड़ीऊँ,’ तो वो आपाऊँ केई, ‘पच्छे थाँ वींपे विस्वास काँ ने किदो?’ 26अन यद्याँ केवाँ, ‘मनकाँ का आड़ीऊँ,’ तो आपाँने मनकाँ की टोळी की दरप हे, काँके वी हाराई यहुन्ना ने परमेसर का आड़ीऊँ बोलबावाळो माने हे।”

27ईं वाते वणा ईसू ने जबाव दिदो, “माँ ने जाणा।”

तो ईसू भी वाँकाऊँ क्यो, “तो मूँ भी थाँने ने बताऊँ के, ईं काम किंका हकऊँ करूँ हूँ।”

दो छोरा की केणी

28“थाँ कई होचो हो? कणी मनक का दो बेटा हे, वो मोटा बेटा का नके जान क्यो, ‘हे बेटा आज के दन अंगूरा का बाग में जान काम कर।’ 29पण वणी जबाव दिदो, ‘मूँ ने जाऊँ,’ पण पछे पछताण परोग्यो। 30पछे बाप दूजाँ छोरा का नके जान अस्यानीस क्यो। बेटे जबाव दिदो ‘हाँ मूँ जाऊँ,’ पण ने ग्यो। 31बतावो अणा दुयाँ मूँ कणी बाप की बात मानी?”

वाँकाणी क्यो, “पेले बेटे।”

ईसू वाँने क्यो, “मूँ थाँने हाचेई केवूँ हूँ के, कर लेबावाळा अन वेस्या थाँकाऊँ पेल्या परमेसर का राज में जाई। 32#लूका 3:12; 7:29,30काँके यहुन्नो बतिस्मो देबावाळो धरम को गेलो बतातो तको थाँका नके आयो अन थाँ वींपे विस्वास ने किदो, पण कर लेबावाळा अन वेस्या वींपे विस्वास किदो अन पछे भी थाँ ओ देकन पापऊँ मन ने फेरिया अन ने वींको विस्वास किदो।”

अंगूरा का बाग के जमींदार की केणी

(मरकुस 12:1–12; लूका 20:9–19)

33 # यसा 5:1,2 ईसू क्यो, “एक ओरी केणी हुणो। एक जमींदार हो, जणी अंगूरा को एक बाग लगायो, वींके च्यारूँमेर हड़ो किदो, वींमें रस को कुण्ड भी बणायो अन वींमें एक डागळो बणायो अन हिंजारिया ने हिजारे देन परोग्यो। 34जद्याँ हाँक पाकबा की टेम वी, वाँकाणी आपणाँ थोड़ाक दासा ने वींकी हाँक को हिस्सो लेबा का वाँते हिंजारिया का नके खन्दाया। 35पण हिंजारिया वींका दासा ने पकड़न किंने मारया-कुट्या, अन किंने मार नाक्या, अन किंके भाटा की ठोकी। 36पछे वणी पेल्याँऊँ भी हेला दासा ने खन्दाया, अन वणा वाँका हाते भी वस्यानीस किदो। 37अन्त में वणी आपणाँ एकाएक पूत ने वाँका नके ओ होचन खन्दायो के, ‘वीं मारा पूत को तो मान करी।’

38“पण वीं हिंजारिया वीं छोरा ने देकन एक-दूजाऊँ क्यो, ‘ओ तो ईं बाग का मालिक को छोरो हे ज्यो जगाँ-जादाद को वेबावाळो मालिक हे। आवो ईंने मार नाका अन ईंकी जगाँ-जादाद ले लेवा।’ 39ईं वाँते वणा वींने पकड़्यो अन बागऊँ बारणे काड़न मार दिदो।

40“ईं वाते ईसू वाँने पूँछ्यो, जद्याँ बाग को मालिक आई, तो वो हिंजारिया का हाते कई केरी?”

41वाँकाणी वाँने क्यो, “वो वीं हत्यारा ने मार नाकी अन बाग ने दूजाँ ने हिजारे दिदे, ज्यो टेम-टेम पे वींने हाँक को हिस्सो देतो रेई।”

42 # भज 118:22,23 ईसू वींने क्यो, “कई थाँ पवितर सास्तर में ओ ने भण्यो के,

“‘जणी भाटा ने राज कारीगर बेकार जाण्यो हो,

वोईस खुणा को खास भाटो बणग्यो।

ओ परबू का आड़ीऊँ व्यो,

अन मारी नजर में मोटी बात वीं?’”

43“ईं वाँते मूँ थाँकाऊँ केऊँ हूँ के, परमेसर को राज थाँकाऊँ ले लिदो जाई अन अस्या लोगाँ ने दे दिदो जाई, ज्यो वींकी राज का वाते हाक लाई। 44ज्यो ईं भाटा पे पेड़ी, वो वखर जई अन जिंपे वो पड़ी वो वींने पीस देई।”

45मुक्य याजकाँ अन फरीसी वींकी या केणी हुणन हमजग्या के, “यो आपणाँ बारा मेंईस केरियो हे।” 46ईं वाते वणा वींने पकड़णो छायो, पण वीं मनकाऊँ दरपग्या, काँके मनक वींने परमेसर का आड़ीऊँ बोलबावाळो मानता हा।

Currently Selected:

मत्ती 21: एम टी आर

Highlight

Copy