लूका 4

ईसू की परक

(मत्ती 4:1–11; मरकुस 1:12–13)

1ईसू पुवितर आत्माऊँ भरन यरदन नंदीऊँ पाच्छा आया अन आत्मा वाँने हुन्ना काकड़ में लेग्यो। 2अन वटे सेतान चालीस दनाँ ईसू की जाँच-परक करतो रियो। वणा दनाँ में ईसू कई ने खादो, अणा दनाँ केड़े वाँने जोरकी भूक लागी।

3तो सेतान ईसुऊँ क्यो, “यद्याँ थूँ परमेसर को पूत हे, तो अणी भाटाऊँ के, रोटी बणजा।”

4 # वे.वि 8:3 ईसू वींने क्यो, “पुवितर सास्तर में लिक्यो हे, ‘मनक बेस रोट्याऊँईस जीवतो ने रेई।’”

5तद्याँ सेतान ईसू ने नरोई ऊसे लेग्यो। वणी ईसू ने घड़ीभर में दनियाँ का हाराई राज बताया। 6अन सेतान ईसुऊँ क्यो, “मूँ अणा हाराई को अदिकार अन मेमा थने दे देऊँ, काँके यो मने हूँप्यो तको हे। मूँ जिंने छावूँ, वींने दे सकूँ हूँ। 7यद्याँ थूँ मारा पगा में पड़न मने माने, तो ईं हाराई थाँरा वे जाई।”

8 # वे.वि 6:13 ईसू वींने जवाब दिदो, “पुवितर सास्तर में लिक्यो हे के, ‘थूँ आपणाँ परबू परमेसर ने नमण कर अन बेस वाँकीईस सेवा कर।’”

9तद्याँ सेतान वींने यरूसलेम में लेग्यो अन वींने मन्दर की हारऊँ ऊसी जगाँ ऊपरे ऊबो किदो अन क्यो, “यद्याँ थूँ परमेसर को बेटो हे, तो अटूऊँ कुद जा। 10#भज 91:11,12काँके पुवितर सास्तर में लिक्यो तको हे के, ‘परमेसर थाँरो ध्यान राकबा का वाते हरग-दुताँ ने आग्या देई।’ 11वीं थने आपणाँ हाताऊँ तोक लेई, अस्यो ने वे के, थाँरा पगाँ के भाटा की लाग जावे।”

12 # वे.वि 6:16 ईसू वींने जबाव दिदो, “पुवितर सास्तर में यो भी लिक्यो हे के, ‘थूँ आपणाँ परबू परमेसर की कदी परक मती करज्ये।’” 13पछे सेतान हारी तरियाऊँ परकन हव मोका के आबा तईं ईसू का नकेऊँ परोग्यो।

गलील में ईसू की सेवा

14ईसू पुवितर आत्मा की तागतऊँ भरन गलील में आया अन वटे वाँकी बाताँ अड़े-भड़े हारीई परदेस में फेलगी। 15ईसू वाँका परातना घर में उपदेस देबा लागा अन हाराई मनक वींकी बड़ई करता हा।

नासतर में ईसू ने ने मानणा

(मत्ती 13:53–58; मरकुस 6:1–6)

16ईसू नासरत नगर में ग्यो, जटे वाँको लालण-पालण व्यो हो। वो रीत के जस्यान आराम का दन में परातना घर में ग्यो अन धरमसास्तर भणबा का वाते ऊबो व्यो। 17परमेसर का आड़ीऊँ बोलबावाळा यसाया की किताब वींने दिदी गी अन वो वींने खोलन भणबा लागग्यो जटे लिक्यो तको हो के, 18#यसा 61:1,2“परमेसर की आत्मा मारा ऊपरे हे। काँके वणा मने गरीब मनकाँ ने हव हमच्यार हूँणबा का वाते चुण्यो हे। वणीस मने खन्दायो हे के, मूँ केदयाँ ने छुड़ाबा को अन आन्दा ने देकबा का सन्देस को परच्यार करूँ अन दब्या तका मनकाँ ने ऊँसा उठऊँ। 19अन हेलो पाडूँ के, परमेसर की दया दिकावा को जुग आग्यो हे।”

20पसे वणी किताब बन्द करन सेवा-चाकरी करबावाळा का हात में दिदी अन रेटे बेटग्यो अन परातना घर का हाराई मनक वींने देकबा लागा। 21तद्याँ ईसू वाँकाऊँ क्यो, “आज ईं सास्तर को यो बचन पूरो व्यो जस्यान थाँ हुणरिया हो।”

22हाराई लोगाँ ईसू की बड़ई किदी अन जी दया की बाताँ वींका मुण्डाऊँ निकळी ही, वाँने हुणन अचम्बो किदो। वी केबा लागा, “कई यो युसुप को बेटो ने हे?”

23ईसू वाँकाऊँ क्यो, “थाँ मारा पे या केवत जरुर केवो, ‘हे वेद पेल्याँ आपणाँ खुद ने साबत कर। अन यो भी केवो के, कफरनहूँम में ज्यो कई किदो हे वींका बारा में माँ हुण्यो हे, वस्योईस आपणाँ नगर में भी कर।’”

24 # यहु 4:44 मूँ थाँकाऊँ हाँची कूँ हूँ के, “कुई भी परमेसर का आड़ीऊँ बोलबावाळो आपणाँ खुद का गाम में मान ने पाई।” 25अन मूँ थाँकाऊँ हाँची केऊँ हूँ के, “जद्याँ एलिया का दनाँ में हाड़ा तीन वर तईं बरका ने वरी, अन हाराई देस में जोरदार काळ पड़्यो, तो इजराएल में घणी विदवा लुगायाँ ही।” 26पण एलिया ने सेदा देस का सारपत नगर की रेबावाळी विदवा लुगई ने छोड़न किंका भी नके ने खन्दायो ग्यो। 27अन परमेसर का आड़ीऊँ बोलबावाळा एलीसा का दनाँ में इजराएल देस में नरई कोड़्या मनक हा, तद्याँ भी सिरिया देस का रेबावाळा नामान ने छोड़न किंने भी हव ने किदो ग्यो। 28यो हूँणन परातना घर का हाराई मनक घणा गुस्सा में आग्या। 29वीं ऊबा वेग्या अन ईसू ने नगरऊँ बारणे काड़ दिदा अन जणी मंगरी ऊपरे वाँका नगर बस्यो तको हो, वींने वींपे लेग्या के, वींने मंगरी का ठेट ऊपरेऊँ रेटे नाक दा। 30पण ईसू वाँका बचमेंऊँ निकळन पराग्या।

हुगली आत्मा धस्याँ तका मनक ने हव करणो

(मरकुस 1:21–28)

31पसे ईसू गलील परदेस का कफरनूम नगर में ग्या अन आराम का दन मनकाँ ने उपदेस देबा लागा। 32#मत्ती 7:28,29मनक वींका उपदेस हूँणन अचम्बो करबा लागा, काँके वो हक के हाते बोलतो हो। 33वटे परातना घर में एक मनक हो, जिंमें हुगली आत्मा ही। वो जोरऊँ हाका करन केवा लागो, 34“हो नासरत का ईसू, थूँ माँकाऊँ कई छावे हे? कई थूँ माँको नास करबा ने आया हे? मूँ जाणूँ हूँ थूँ कूण हे, थूँ परबू परमेसर को पुवितर मनक हे।”

35ईसू वींने तापड़न क्यो, “छानो रे, अन अणी मनकऊँ बाणे निकळजा।” वणी हुगली आत्मा वींने हाराई मनकाँ हामे रेटे पटक्यो अन वींके कई नकसाण ने किदो अन वींमूँ बारणे निकळगी। 36हाराई मनक अचम्बो करबा लागा अन एक-दूजाऊँ केबा लागा, “या कस्यी बात हे? वो अदिकार अन सामरत का हाते हुगली आत्माने आदेस देवे हे अन वाँ भी निकळ जावे हे।” 37अन ईंका केड़े ईसू का बारा में अड़े-भड़े का गामाँ में बाताँ वेबा लागगी।

समोन पतरस का हवजी ने हव करणा

(मत्ती 8:14–17; मरकुस 1:29–34)

38ईसू परातना घरऊँ उटन समोन का घरे ग्या, वींका हवजी ने ताव आरियो हो। ईं वाते वणा वाँका वाते ईसुऊँ अरज किदी। 39ईसू जी वीके हराणे ऊबा रेन अदिकारऊँ ताव उतरबा का वाते क्यो वणीस दाण वींको ताव उतरग्यो अन वाँ वाँकी सेवा-चाकरी करबा लागी।

घणा माँदा मनकाँ ने हव करणा

40जद्याँ दन आतबाने हो तो हंगळा लोग-बाग नरई माँदा मनकाँ ने ईसू का नके लाया। ईसू जी एक-एक के माता पे हात मेलन वाँने हव कर दिदा। 41हुगली आत्मा घणा जणा मेंऊँ ओ हाँको करती तकी यु बोलती तकी निकळी, “थूँ परमेसर का पूत हे।” पण ईसू वाँने तापड़न वाँने बोलबा ने दिदी, काँके वीं जाणती ही के, “ईसूइस मसी हे।”

परातना घर में उपदेस

(मरकुस 1:35–39)

42ईसू वेगा भाग-फाट्याँ घरऊँ निकळन कणी हून्नी जगाँ में पराग्या। लोग वाँने होदता-होदता वाँके नके पराग्या अन वाँकाऊँ परातना करन क्यो के, “वीं वाँने छोड़न ने जावे।” 43पण ईसू वाँने क्यो, “मने दूँजा नगराँ में भी परमेसर का राज को हव हमच्यार हूणाणो हे। काँके मूँ अणी काम का वातेईस खन्दायो ग्यो हूँ।” 44अन वो यहुदया परदेस का परातना घर में हव हमच्यार हुणाबा लागो।

Currently Selected:

लूका 4: एम टी आर

Highlight

Copy