यहुन्ना 16

1“ईं बाताँ में थाँकाऊँ ईं वाते क्यो हो, ताँके थाँ पाप ने पड़ो। 2वीं थाँने परातना घरऊँ बारणे काड़ देई, पण वा टेम आई जद्याँ कुई थाँने मार नाकी, अन अस्यान करन वी हमजी के, ‘आपाँ परमेसर की सेवा कररिया हे।’ 3वीं यो ईं वाते करी काँके, वीं बापू परमेसर ने ने जाणे अन ने मने जाणे हे। 4पण में ईं बाताँ ईं वाते थाँने क्यो के, जद्याँ अणाको टेम आई तो थाँने आद आ जई के, में थाँने पेल्याई के दिदो हो।

पुवितर आत्मा का काम

“में सरू में थाँने ईं बाताँ ईं वाते ने किदी, काँके मूँ थाँका हाते हो। 5अबे मारी टेम आगी हे के, मूँ मने खन्दाबावाळा का नके जाऊँ हूँ अन थाकामूँ कई माराऊँ ने पुच्छे के, ‘थूँ कटे जारियो हे?’ 6पण में ईं बाताँ थाँकाऊँ किदी हे, ईं वाते थाँका मन दकऊँ भरग्या हे। 7तो भी मूँ थाँकाऊँ सई केवूँ हूँ के, मारो जाणो थाँका वाते हव हे, काँके यद्याँ मूँ ने जाऊँ तो वो हण्डाळी थाँका नके ने आई। पण यद्याँ मूँ जाऊँ, तो वींने थाँका नके खन्दा देऊँ। 8जद्याँ वो आई तो वो साबत करी के, पाप, धारमिकता अन परमेसर का न्याव का बारा में दनियाँ का लोगाँ की होच गलत हे। 9वो पाप का बारा में ईं वाते बताई, काँके दनियाँ का मनकाँ को मारा पे विस्वास ने करणो पाप हे। 10वो धारमिकता की बात ईं वाते बताई, काँके मूँ बापू का नके जारियो हूँ अन थाँ अबे ओरी मने ने देक पावो। 11अन न्याव की बात ईं वाते बताई, काँके परमेसर पेल्याईं ते कर मेल्यो हो के, ईं दनियाँ का हाकम ज्यो सेतान हे, वो दोसी ठेरायो ग्यो।

12“मने थाँकाऊँ दूजी ओरी नरी बाताँ केणी हे, पण अबाणू थाँ वाँने सेण ने कर सको। 13पण जद्याँ हाँच की आत्मा आई, तो थाँने हारई हाँच को गेलो बता देई, काँके वाँ खुद का आड़ीऊँ ने केई पण ज्यो कई हूणी वो केई अन आबावाळी बाताँ थाँने बताई। 14वाँ मारी मेमा करी, काँके वाँ मारी बाताँ मूँ लेन थाँने बताई। 15ज्यो कई परमेसर को हे, वो हारोई मारो हे। ईं वाते में क्यो के, वाँ पुवितर आत्मा मारी बाताँ मूँ लेन थाँने बताई।

दुक सक में बदल जाई

16“थोड़ाक टेम केड़े थाँ मने ने देको अन पछे थोड़ीक टेम केड़े मने देको।”

17तद्याँ वाँका कुई चेला एक-दूजाऊँ क्यो, “यो कई हे ज्यो यो आपाऊँ केवे हे, ‘थोड़ीक टेम केड़े मने थाँ ने देको अन पछे थोड़ीक टेम केड़े थाँ मने देको,’ अन ‘यो ईं वाते के, मूँ बापू का नके जाऊँ हूँ’? 18अन या ‘थोड़ीक टेम केड़े’ ज्यो यो केवे हे, या कई बात हे? माँके हमज में ने आरियो हे के, यो कई केवे हे।”

19ईसू यो हमजन के, “वीं माराऊँ कई पूँछणा छारिया हे।” ईं वाते वणा क्यो, “कई थाँ एक-दूजाऊँ मारी ईं बाताँ का बारा पूँछरिया हो के, ‘थोड़ीक टेम केड़े थाँ मने ने देको अन पछे थोड़ीक टेम में मने देको’? 20मूँ थाँने सई-सई केवूँ हूँ के, थाँ रोवो अन होक करो, पण आकी दनियाँ राजी वेई। थाँने दुक वेई, पण थाँको दुक सक में बदल जाई। 21बाळक जणवा की टेम लुगई ने पिड़ा वेवे हे, काँके वाँके दुक की घड़ी हे। पण जद्याँ वाँ बाळक ने जनम दे देवे, तो वाँ अणी खुसीऊँ के, दनियाँ में एक बाळक जनम्यो हे, वीं दुक की घड़ी ने पाच्छी आद ने राके हे। 22ईं वाते थाँने भी अबाणू दुक हे, पण मूँ थाँकाऊँ पाछो मलूँ अन थाँको जीवड़ो खुसीऊँ भर जाई अन थाँकी खुसी थाँकाऊँ कुई ने कोस सकी।

23“वीं दन थाँ माराऊँ कई ने पूछो। मूँ थाँने सई-सई केवूँ हूँ यद्याँ मारा बापूऊँ कई मांगो तो वो मारा नामऊँ थाँने दी देई। 24अबाणू तईं थाँ मारा नामऊँ कई ने माग्यो, मांगो तो पावो अणीऊँ थाकी खुसी पुरी वे जाई।

दनियाँ पे जीत

25“में ईं बाताँ थाँकाऊँ केण्याँ में किदी हे। पण वाँ टेम आरी हे के, मूँ थाँकाऊँ पाच्छी केण्याँ में बाताँ ने करूँ। पण खुलन थाँने बाप का बारा में बताऊँ। 26वीं दन थाँ खुद मारा नामऊँ मांग सको अन मने या जरूत ने पड़ी के, मूँ थाँका वाते बापऊँ मांगू। 27मारा बापू तो खुदई थाँकाऊँ परेम करे हे, काँके थाँ माराऊँ परेम किदो अन यो भी विस्वास किदो हे के, मूँ परमेसर का आड़ीऊँ आयो हूँ। 28हा, मूँ परमेसर का आड़ीऊँ ईं दनियाँ में आयो अन अबे ईं दनियाँ ने छोड़न बापू का नके जारियो हूँ।”

29वाँका चेला क्यो, “देको, अबाणू थाँ खुलन बाताँ केरिया हो अन कुई केणी ने केरिया हो। 30अबे माँ जाणग्या के, थूँ हारोई जाणे हे अन ईंमें थाँकी मरजी कोयने हे के, कुई थाँकाऊँ कई पूछे। अणीऊँ माँ विस्वास करा हाँ के, थूँ परमेसर की आड़ीऊँ खन्दायो तको हे।”

31यो हुणन ईसू वाँने क्यो, “कई आकरी में थाँने विस्वास वेग्यो हे? 32देको, वा टेम आरी हे पण आगी हे के, थाँ हाराई अटने-वटने वेन आपणो आपणो गेलो नापो, अन मने एकलो छोड़ देवो। पण मूँ एकलो कोयने काँके बापू मारे लारे हे। 33में थाकाँऊँ ईं बाताँ ईं वाते किदी के, थाँने माराऊँ सान्ती मले, दनियाँ में तो थाँने दुक मल्यो हे पण हिम्मत राको, में दनियाँ ने जीत लिदी हे।”

Currently Selected:

यहुन्ना 16: एम टी आर

Highlight

Copy