Matthew 13

Sa Pani Atte Nawwagawag Atta Bukoḻ

(Mrk. 4:1-9; Luk. 8:4-8)

1Sa sadi ye aḻgaw, lummawa da Jesus si sadi ye boḻoy woḵ ummoy tummuḵdu si taḻantag ni baybay ta antuttudu. 2Gapu ta amoamod da tagu we nangaligummu ḵan siya, ummoy tummuḵdu'tte bangka woḵ inggaw da tagu'tte taḻantag. 3Pun imbagana ḵan dida da adu we banage impanina, ḵanana, “Inninggaw tagu we ummoy nawwagawag atta buḵoḻ. 4Iwwagawagna ḵad, naottag udum atte daḻan woḵ ummoy da sissiwit tinuḵtuḵan. 5Da udume buḵoḻe niwagawag, naottagda'tte bibbisil. Taḵon ay nu tummubuda, 6dummingit ḵad aḵ init naḻ-uyda woḵ naḻanguda te ammamaga luta ya adidapun ḵon lummamut. 7Da udum ḵad ose buḵoḻ, naottagda si laslasi woḵ taḵon ay nu tummubuda, nidisan tummubu da lasi woḵ pinsoḻda da muḻa ta adida dumaḵoḻ. 8Da udum ḵade buḵoḻ naottagda si alluta, pun tummubuda woḵ namungada. Da udume buḵoḻ, namungada'ḵ singgagasut, da udum sin-oonompuḻu ya da udum sintuḵlumpuḻu.” 9Ginangput ḵad Jesus inug-uggud annae pani, ḵanana, “Diḵayu we andodongngoḻ, sosomḵonyu da dingngoḻyu.”

Sa Panggob Da Pani

(Mrk. 4:10-12; Luk. 8:9-10)

10Pun ummadani da disipulu ḵan Jesus woḵ ḵananda, “Ngaipam ipani ye antuttudu'tta tagu?”

11Ḵanan Jesus, “Diḵayu ḵad, nipaigammu da banage adipun nipaigammu si awe mipanggob atte ampangatan Apudyus. Yaḵon ḵan dida, adinapun impaigammu. 12Te sa anuttuwa si dingngoḻna, amo madog-an an-aawatna inggana'ḵ aduadu maawatana. Yaḵon sa tagu we adinapun ḵoon dingngoḻna, taḵon ay awad ḵan siya, maḵaan. 13Siya gapunae ipaniḵe antuttudu ḵan dida te taḵon ay nu iillanda da ḵooḵ, adidapun maḵaimatun ya taḵon ay nu dodongngonda da ibagaḵ, adidapun maawatan. 14Da ḵaḵnae tagu, dida mituttuwaan ni impaigilin Apudyus ḵan Profeta Isaiah we ḵanana,

“ ‘Taḵon ay nu ummanda dodongngon, adidapun paat maawatan.

Ḵad taḵon ay os itotollongda da maḵwa, adidapun imatunan.

15Te tummungitong da somsomoḵda.

Antuḻtullongda ta adida dongngon da ḵatuttuwaan

ya ḵimitonda bos da atada ta adida maḵaila,

te nu maḵadongoḻda, maḵailada ya maḵaawatda ḵad

ansinagungda ḵan saḵon

ta pakawanoḵ da basuḻda.’ ”#13:14-15 Isaiah 6:9-10.

16Pinagatupan Jesus woḵ ḵanana, “Yaḵon ḵan diḵayu, pian ḵayu te lamogyu ilan da ḵooḵ ya dongngon da ibagabagaḵ. 17Ibagaḵ ḵan diḵayu ḵatuttuwaan, taḵon ay nu adu da profeta ya da naun-unane tagu si awe ye pionda ilan da iillanyu, adidapun innila dida. Taḵon ay os nu pionda dongngon da dodongngonyu, adidapun dingngoḻ dida.”

Sa Pion Ni Pani Atte Nawwagawag Atta Buḵoḻ Ḵanan

(Mrk. 4:13-20; Luk. 8:11-15)

18Pune sadi ḵanana, “Andongoḻ ḵayu ta ipaḵaawatḵu pion ni pani'tte mipanggob si nawwagawag ḵanan. 19Da naottag atte daḻan, mipanida'tta tagu we dongngonda mipanggob si ampangatan Apudyus yaḵon adidapun maawatan. Ummoy aḵ Satan ya ḵinaanna'tte somsomoḵda da ugude dingngoḻda. 20Da naottage buḵoḻ atte bibbisil, isuda da tagu we sillalaylayade angawat si Ugud Apudyus we dingngoḻda. 21Yaḵon adipun lummamut atta somsomoḵda. Amatida'ḵ sin-aḵitan, ḵad nu dumatong ampaḵaḻaman baḵon nu mapadasda gapu'tte amatiyanda si Ugud Apudyus, daguse iwaḻangda pammatida ḵan Apudyus. 22Da naottag atte laslasi, isuda da tagu we dingngoḻda Ugud Apudyus. Yaḵon gapu'tta binimbinsawda'tta biyagda si annae lubung ya piondae bumaḵnang, adidapun tungaguwon ugude dingngoḻda ḵad adipun mabaliwan da ugalida. 23Da naottag ḵad atte alluta, isuda da tagu we dongngonda Ugud Apudyus ya maawatanda ḵad ḵoonda da adu we ambaḻu we banage mas-oman Apudyus we isun da muḻae amunga'ḵ adu. Da udum singgagasut, da udum sin-oonompuḻu ya da udum sintuḵlumpuḻu.”

Sa Pani Atte Sabsabug

24Pun inḵasin Jesus imbaga pani'tta amode tagu woḵ ḵanana, “Mipani ampangatan Apudyus si osae tagu we ambabaḻu iyyosoḵnae pagoy si payawna. 25Masusuyopda ḵad atte sillabiyan, ummoy ni ḵabusuḻna iwwagawag buḵoḻ ni sabsabug atta niyosoḵe pagoy woḵ ummoyon. 26Naamin ḵad tummubu da pagoy ya annae amusbusda, nidisan os da sabsabug tummoḵwaḻ. 27Pun ummoy da sammilu'tte sinḵuwa si payaw woḵ ḵananda, ‘Apu, daḵampun ḵamman aḵ ambaḻu iyyosoḵ taḵu'tte payawnu? Dinu ḵad ain igammume naḻpuwan da sabsabug?’

28“Ḵanan ni Apu, ‘Sa ḵabusuḻ nangwa si ḵaḵnat.’

“Ḵanan da sammilu, ‘Piome inḵani ḵaanon da sabsabug?’

29“Ḵanana, ‘Naid te uni ḵad midoga mibagut da pagoy atta sabsabug nu bagutonyu dida. 30Samaḻnae midisan dumaḵoḻ da sabsabug atta pagoy inggana'ḵ iyyaani. Asiḵ ibaga'tta an-ani ta unaonda ḵaanon da sabsabug ya binobodda dida ta soggonda ḵad asidaot aniyon da pagoy ya impomponda si aḻangḵu.’ ”

Sa Pani Atte Buḵoḻ Ni Mustasa

(Mrk. 4:30-32; Luk. 13:18-19)

31Pun ḵasin os nangipani'ḵ Jesus woḵ ḵanana, “Sa ampangatan Apudyus mipani si buḵoḻ ni mustasae immuḻan ni tagu'tte umana. 32Siya ḵapeetan atta losane buḵoḻ yaḵon nu mimuḻa ya dumaḵoḻ, siya ambalin aḵ ḵataḵnangane matipoye isuna daḵoḻe ḵayu ya sumuḵbutan da sissiwit da pangana.”#13:32 Sa kalasin ni mustasae nimuḻa'tta ilin da Judyu daḵodaḵoḻ nu sa nimuḻa sina'd Philippines. Sa ḵataḵnangan umoye 12 feet.

Sa Pani Atte Yeast

(Luk. 13:20-21)

33Ḵanan os Jesus we nangipani, “Sa ampangatan Apudyus isuna de yeast we ampabotaḻe inḵamos ni bubai si adu we arina.”

Sa Panggob Jesus We Nangusar Atta Pani

(Mrk. 4:33-34)

34Sa ḵatuttuwaan, pasige impanin Jesus we nantuttudu'tta tagu. Adipun antuttudu ḵan dida nu adina ipani. 35Ḵingwana ḵaḵna ta mituttuwa impaibagan Apudyus atte profetanae ḵanana,

“Da pani, siya inoḵe maḵaugud ḵan dida.

Ibagaḵ ḵan dida da daampun mipaigammu'tte

inggan ni naḵwaan ni lubung.”#13:35 Psalm 78:2.

Sa Nangipaḵaawatan Jesus Si Pani Mipanggob Atte Sabsabug

36Pun tinenan Jesus da tagu woḵ nillumnoḵ si boḻoy. Ḵanan da disipulunae nibuḻun, “Ipaḵaawatnu ḵappos ḵan diḵani pani mipanggob si sabsabuge nidoga tummubu'tta pagoy.”

37Ḵanan Jesus, “Sa nangimuḻa'tta pagoy, saḵone Abeng Di Tagu. 38Ḵad sa payaw, siya annae lubung ya sa ambaḻu we iliḵ, dida da tagu we midoga si ampangatan Apudyus, ḵad da sabsabug, dida da tagun Satan. 39Ḵad sa ḵabusuḻe nangiwagawag si sabsabug, siya'ḵ Satan. Sa iyyaani siya anungus ni timpu ḵad da anghel an-ani. 40Sa maḵwa si sabsabuge dinagup da sammilu ta masgob, ḵatti bos maḵwa si anungus ni timpu. 41Te saḵone Abeng Di Tagu, ibuunḵu da anghelḵu ta umoyda dagupon da losane tagu we gapun ni maḵabasuḻan da buḻunda ya da losane adipun tumuttuwa'tta pinion Apudyus. Miyadayuda'tta tagu we ipangataḵ. 42Ḵad itop-aḻda dida si gumilgillayabe apuye adipun masobsoban, ḵad umibiibilda ḵan ngumalitod da babada gapu si ampaḵaḻamanda. 43Yaḵon da naun-unane tagun Apudyus, allangḻangdae isun di init si ampangatan Amada. Diḵayu we andodongngoḻ, sosomḵonyu da dingngoḻyu.”

Sa Pani Atte Buḻawan Ḵan Bongoḻ

44Pinagatupan Jesus woḵ ḵanana, “Sa ampangatan Apudyus mipani si buḻawane niḵaḻuube indasan ni osae tagu'tte uma. Gapu si layadna, ḵasinna tinab-unan woḵ ummoyna ingngina da losane ḵuḵuwana woḵ nipauli ta ngin-ana sadi ye umae nangdasana'tte buḻawan.

45“Sa osae mipaniyan ni ampangatan Apudyus isuna pumopoḻaḵe tagu we angngit atta ampapatoge bongoḻ. 46Innilana ḵad osae amod de patogna, ummoyon aḵ ḵuwada woḵ ingnginana da losane ḵuḵuwana ta ngin-ana sanae bongoḻ.”

Sa Pani Atte Tabuḵuḻ

47-48Pinagatupan Jesus woḵ ḵanana, “Sa ampangatan Apudyus mipani bos si tabuḵuḻe inuyud da anabuḵuḻ atte baybay inggana'ḵ mapnu'tta nankalakalasi ye ugadiw. Ḵad itaḵdangda ya tumuḵduda ta piliyanda. Da ambabaḻu we ugadiw iggada'tte aḵḵubaw ya iballuda da anḵaḻaweng. 49Ḵaḵna bos maḵwa'tte anungus ni timpu. Umoy da anghel piliyan da ḵabasbassuḻane tagu ta isinada dida'tta naun-unan. 50Ḵad iballuda dida si apuye adipun masobsoban ya amod de ibilda ḵan ngumalitod da babada te ampaḵaḻamda.”

51Ḵanan Jesus, “Maawatanyu ḵamman losan da anna?”

Ḵananda, “On, maawatanni.”

52Ḵanan Jesus ḵan dida, “Maawatanyu ḵammane nu awad mistulun ni lintog aḵ amati si ituttuduḵ mipanggob si ampangatan Apudyus, mipani'tte sinḵuwa si boḻoye igammunae angitoḵwaḻ ya angusar atte ḵaḵḵopya ḵan dadaane ḵuḵuwanae nitataḻu si gagappotana?”

Sa Nangidiyananda Ḵan Jesus

(Mrk. 6:1-6; Luk. 4:16-30)

53Ginangput ḵad Jesus intuttudu da sanae pani, ummoyon 54woḵ nipauli si mismu we ilinae dummaḵoḻana. Ummoy atte sinagoga ta antuttudu woḵ nasdaaw da nandongoḻ ḵan siya. Ḵanandae nan-asiimus, “Ngai nangaḻ-ana si laingna ḵan ḵabooḻanae angwa'tta nakaskasdaaw? 55Daḵampun ḵamman si abeng ni karpentero? Daḵampun ḵamman ḵan Mary inana? Ḵad daḵampun ḵamman aḵ siya sunud da James, Joseph, Simon ya aḵ Judas? 56Ḵad daḵampun ḵamman aḵ sunud da annae bubai ye anna ḵan ditaḵu? Ngai nin ay nangaḻ-ana si laingna ḵan ḵabooḻana?” 57Pun lummaweng somsomoḵda woḵ adidapun namati. Ḵanan Jesus ḵan dida, “Sa profeta mapatgan si sabali ye ili yaḵon adipun mapatgan atta mismu we ḵailiyana ya da ḵabaḻyanna.” 58Gapu ta adidapun amati, adinapun ḵingwa da adu we nakaskasdaaw sidi.

Currently Selected:

Matthew 13: kml

Highlight

Copy