Matthew 11

Sa Imbagan Jesus Atta Disipulun John We Ambobonyag

(Luk. 7:18-35)

1Ginangput ḵad Jesus binilin da nasawaḻan aḵ duwae disipuluna, ummoyon woḵ ummoy nantuttudu ya iwwaḻagawagna Ambaḻu we Damag atta adani ye ili.

2Aḵ John ḵade Ambobonyag, sissiya si babaḻḻudan. Pun dingngoḻna ḵad da ḵingwan Kristu, imbuunna da udum atta disipuluna 3ta umoyda an-imus ḵan Jesus, ḵananda, “Siḵa pagay inkarin Apudyus we umali baḵon nu awad udum aḵ uuwayonni?”

4Ḵanan Jesus, “Mipauli ḵayu ḵan John ya ibagayu da innilayu ḵan dingngoḻyu. 5Da naḵuḻap, maḵailada, da napilay, maḵataddaḻanda, da naleprosy, naḵaan saḵitda, da natuḻong, maḵadongoḻda, da natoy, nataguda ḵasin ḵad miwaḻagawag Ambaḻu we Damag atta ḵapus.#11:5 Isaiah 35:5-6; 61:1. 6Ḵad ibagayu bos ḵan siyae pian tagu we adipun anduwaduwa si mipanggob ḵan saḵon.”

7Nipauli ḵad da disipulun John, insaḻad Jesus we nan-ugud atta amode tagu mipanggob ḵan John. Ḵanana, “Ngai ummoyyu innila si bumbummaaw? Sa potawe mibibbibbid? Naid. 8Ngai ummoyyu innila nu? Innilayu ḵad ain tagu we nansilup atte ampatoge silup? Naid. Te da nansilup atta ḵaḵnat babaḵnangda ya da boḻoy da ari inggawanda. 9Pun ngai ummoyyu innila nu? Osa ḵad aine profeta? On, ibagaḵ ḵan diḵayu, daldallu nu sa profeta. 10Te aḵ John nibaga si nigili ye Ugud Apudyus we ḵanana, ‘Dongngonyu! Awad de ibuunḵu we umun-una nu siḵa ta umoyna isagana daḻane ayom.’ ”#11:10 Malachi 3:1. 11Pun pinagatupan Jesus woḵ ḵanana, “Ibagaḵ ḵan diḵayu ḵatuttuwaan, losan atta nibuḵnag naippun tummoḵwaḻ aḵ nangatngatu nu aḵ John we Ambobonyag sina'd luta yaḵon sa ḵamḵama'tte ampangatan Apudyus nangatngatu nu siya. 12Inggan ni nangisaḻdan John we Ambobonyag we nangiwaḻagawag inggana sinsadi, awad da angipatut angiwaḻagawag atte ampangatan Apudyus ya awad os da angipatut midoga'tte ampangatana.#11:12 Awad da duwae piona ugudon anna: 1) Awad da angipapati ye sumullagi'tte ampangatan Apudyus ya awad os da naḵḵonaḵḵone angiyadi nu maḵwae midogada sidi. 2) Awad da angipapati ye angiwaḻagawag atte ampangatan Apudyus ya awad os da naḵḵonaḵḵone angiyadi nu maḵwae midogada sidi. 13Te losane inggilin da profeta ya sa lintoge inggilin Moses, imbagada mipanggob si ampangatan Apudyus inggana si timpun John. 14Ḵad nu tinuttuwayu imbagada, maawatanyu we aḵ John de Profeta Elijah we nipadtu we umali.#11:14 Malachi 4:5. 15Diḵayu we andodongngoḻ, sosomḵonyu da dingngoḻyu.”

16Pinagatupan os Jesus woḵ ḵanana, “Ngai angipaniyaḵ atta tagu sinsana? Isudan abenge an-ay-ayam atta pappawayan. Ḵad ḵanandae angiyip-ipḵaw atta asin-abbengda,

17“ ‘Nanadoḵ ḵani,

yaḵon adiḵayupun nanangni.

Pun nanḵanḵanta ḵani'tta ḵanḵanta'tta bagungon,

yaḵon adiḵayupun os naḵadomdom.’

18Dida da mipaniyan da tagu sinsana te ummali ḵad aḵ John we Ambobonyag, nallaun ya adipun os uminum si bayas, ḵananyu, ‘Ngaipana ḵoon ḵaḵnat? Naaḻanan!’ 19Ḵan saḵone Abeng Di Tagu, ummaliyaḵ ḵade maḵainum ya maḵaḵan, ḵananyu, ‘Ilanyu, siya ḵad bartekero ya botaḵan! Maḵabuḻbuḻun atta andadagup atta bugis ya da udume ḵabasbassuḻan.’ Yaḵon ilanyu ḵad, mipailae ustu ḵinalaing Apudyus atta biyag da losane angunud atte ḵinalaingna.”

Sa Anguwisan Apudyus Atta Tagu

(Luk. 10:13-15)

20Pune sadi, sinang-an Jesus da umili ye nangwaana'tta adu we nakaskasdaaw te adidapun imbabawi da basuḻda ya adidapun agaye angwa. 21Ḵanana, “Ḵaddagu ḵayu we iChorazin ya diḵayu we iBethsaida! Te nu ḵingwaḵ ad Tyre ḵan Sidon#11:21 Da iTyre ḵan iSidon atte awe, sa ugalida nandindinamage dida ḵaḻawengan. Sa ḵanan da profeta atte mipanggob si dusada maḵwae mabasa'tta Isaiah 23:1-18, Ezekiel 26-28:19, Amos 1:9-10. da nakaskasdaawe isun da ḵingwaḵ atta iliyu, dagus nine nansilupda'tta saḵu ya iggada da dapuḻ atta uḻuda ta ipailadae imbabawida da basuḻda ya iyyagaydae nangwa. Diḵayu ḵad, taḵon ay nu innilayu, adiḵayupun nambabawi'tta basuḻyu. 22Yaḵon ibagaḵ ḵan diḵayu, nu dumatong anguwisan Apudyus atta losane tagu, nadagdagson dusayu nu sa dusan da iTyre ya iSidon.

23“Diḵayu ḵade iCapernaum, sosomḵonyu ḵad aine midayaw ḵayu'd langit? Naid! Sa maḵwa, aaddi ye miballu ḵayu'd Hades, sa igaw da natoye madusaanyu! Te nu ad Sodom oḵyan nangwaaḵ atte nakaskasdaawe isun da ḵingwaḵ atta iliyu, dagus nine nambabawida'tta basuḻda ya adimpun nin oḵyan Apudyus dinadail ilida ḵad awad oḵyane sissiya'd Sodom sina inggana sinsadi. 24Yaḵon ibagaḵ ḵan diḵayu we nu dumatong anḵuwisan Apudyus atta losane tagu, nadagdagson dusayu nu da iSodom.”#11:24 Ilanyu footnote si Matthew 10:15.

Sa Anggappiyaan Jesus

(Luk. 10:21-22)

25Sa sadi ye timpu, ḵanan Jesus we nalluwaḻu, “Ama, ipangatam da losan sina'd luta ya ad langit. Anggappiyaaḵ ḵan siḵa te adimpun impaigammu ḵatuttuwaan atta nalalaing ḵan naadaḻane tagu, siya nangipaigammuwam da napakumbaba ya da antaḻgode isudan abeng. 26On, ḵingwam ḵaḵna te siya piniom.”

27Pun ḵanan Jesus atta tagu, “Innatod Amaḵ we Apudyus ḵan saḵon da losane ḵabooḻan ḵan laing. Iniiggammuna saḵon ya naippun udum aḵ nangigammu ḵan saḵon. Ḵaḵna bos aḵ Amaḵ we naippun angigammu ḵan siya malaksid ḵan saḵon ya da ngaimane tagu we pioḵ angipaigammuwan.”

28“Diḵayu losane naayong ḵan ampaḵaḻam, awwayyu ḵan saḵon ta paillongoḵ diḵayu. 29Unudonyu da bilinḵu ḵan an-adaḻ ḵayu ḵan saḵon te naanusaḵ ḵan napakumbabaaḵ woḵ maillongan ḵayu. 30Te da biline ittoḵ ḵan diḵayu we tuttuwaonyu, allasu ya allangpaw.”

Currently Selected:

Matthew 11: kml

Highlight

Copy