Luke 9

Sa Nangibuunan Jesus Atta Disipuluna

(Mat. 10:5-15; Mrk. 6:7-13)

1Sin-aḻgawan ḵad, inayagan Jesus da nasawaḻan aḵ duwae disipuluna woḵ ittana dida'ḵ ḵaḻabbongan ḵan ḵabooḻane amaḻyaw atta losane aḻan ya angaan atta saḵit, 2pun imbuunna dida ta umoyda iwaḻagawag ampangatan Apudyus ya ḵaanonda da saḵit. 3Pune sadi binilinna dida woḵ ḵanana, “Adi ḵayu angawit aḵ suḻḵud, baḵaḻ, maḵan, pilaḵ ḵan ansuḵatanyu'ḵ silup atta ngaimane ayanyu. 4Ngaimane ammangili ḵan diḵayu si boḻoyda, inggaw ḵayu inggana'ḵ tenanyu sadi ye ili. 5Nu awad ili'ḵ ayanyu ya adidapun diḵayu mangiliyon, tenanyu. Ḵad nu inḵayun, ipaḻpagyu da gabu'tta dapanyu ta igammuwondae dida asi ḵigad si madusaanda te adidapun dingngoḻ diḵayu.”

6Pun nallibbat da disipuluna woḵ nanggaḵayda'tta losane ili ta iwaḻagawagda Ambaḻu we Damag ya ḵaanonda da saḵit.

Sa Nasaliduduwan Herod

(Mat. 14:1-12; Mrk. 6:14-29)

7Dingngoḻ ḵad Herod we gobernor atte probinsiya'd Galilee mipanggob atta ḵingwan da Jesus, nasaliduduwan te ḵanan da udum, “Siya'ḵ John we Ambobonyag we natagu ḵasin.” 8Da udum ḵad ḵananda, “Siya'ḵ Profeta Elijah we nampaila.” Ḵanan os da udum, “Osa'tta profeta we ummuli si awe.” 9Yaḵon ḵanan Herod, “Impapungtuḻḵu uḻun John. Ḵad ngai sanate tagu we uguugudondae angwa'tta nakaskasdaaw?” Inggan ni sadi, ḵinuttuḵuttumna inonae angabot ḵan Jesus.

Sa Namaḵanan Jesus Atta Lummabos Aḵ Limallibu

(Mat. 14:13-21; Mrk. 6:30-44; Jhn. 6:1-15)

10Nipauli ḵad da apostol, imbagada ḵan Jesus da ḵingwada woḵ nampabuḻun aḵ Jesus ḵan dida si ili'd Bethsaida ta umabusda. 11Dingngoḻ ḵad da amoamode tagu ummayan da Jesus, tinun-udda dida. Pun inayagana dida woḵ intuttuduna mipanggob atte ampangatan Apudyus ya sa inonae angaan atta saḵit.

12Mummasdom ḵad, ummadani da nasawaḻan aḵ duwae apostolna ḵan siya woḵ ḵananda, “Bilinom da tagu ta umoyda angngit aḵ ḵanonda ḵan umiyananda'tta adani ye ili te anna taḵu'tte bumbummaaw.”

13Yaḵon ḵanana ḵan dida, “Diḵayu amaḵan ḵan dida.”

Ḵananda ḵan siya, “Abuse limae tinapay ḵan duwae nidawise ugadiw anna ḵan diḵani. Maḵwa nu inḵani ngumina'ḵ ḵanon da annae amode tagu.” 14Imbagada ḵaḵna te umoye limallibu da laḻaḵi, adipun niyiyap da bubai ya da abeng.

Pun ḵanan Jesus atta disipuluna, “Patuḵduwonyu taḻbubungon dida'ḵ sillilimampuḻu.” 15Pun sa ḵingwada, pinatuḵduda losan dida. 16Pune sadi, innaḻan Jesus limae tinapay ya sa duwae ugadiw woḵ nantangad ad langite nanggappiya ḵan Apudyus. Pun binisbisaḵna tinapay ḵan ugadiw woḵ innatodna'tta disipuluna ta iwaḻasda. 17Pun nanganda losan woḵ nassugda. Nagangputda ḵad, dinagup da apostol da nabun-an. Pun napnu nasawaḻan aḵ duwae aḵḵubaw.

Sa Nangipaigammuwan Peter Ḵan Jesus

(Mat. 16:13-23; Mrk. 8:27-33)

18Sin-aḻgawan ḵad atte ummabus da Jesus ya da disipuluna, nalluwaḻu. Pun ḵananae nangimus ḵan dida, “Ngaiyaḵ atte ḵasomsomḵan da tagu?”

19Ḵananda, “Siḵa'ḵ John we Ambobonyag. Da udum, ḵanandae siḵa'ḵ Profeta Elijah. Da udum os, ḵanandae siḵa osa'tta profeta si awe ye ummuli.”

20Pun ḵanan Jesus we nangimus ḵan dida, “Diḵayu ḵad, ngaiyaḵ atte ḵasomsomḵanyu?”

Ḵanan Peter, “Siḵa Kristu we imbuun Apudyus.”

21Binilin Jesus didae adida paat ibaga sadi'tta ngaimane tagu.

Sa Matoyan Ya Sa Umuliyan Jesus

(Mat. 16:21-23; Mrk. 8:31-33)

22Ḵanan Jesus, “Saḵone Abeng Di Tagu, ḵasapuḻane ampaḵaḻamaḵ. Idiyanaḵ atta pallakayon da Judyu, da papangat da papadi ya da mimistulun ni lintog ya gongatonaḵ. Yaḵon sa miḵaḵlu we aḻgaw, taguwon Apudyus saḵon.”

Da Ambalin Aḵ Disipulun Jesus

(Mat. 16:24-28; Mrk. 8:34—9:1)

23Pune sadi, ḵanan Jesus, “Ngaimane piona mitun-ud ḵan saḵon, ḵasapuḻane an-awidana long-agna, buḵudona de krosna'tte inaḻgaw ya mitun-ud ḵan saḵon. 24Te ngaimane angipatog atte long-agna, matoy. Yaḵon sa angiḵatoy atte pammatina ḵan saḵon, itton Apudyus ḵan siya biyag aḵ inggana. 25Te ngai ḵad ain maganab ni tagu nu anḵuwana da losane binaḵnang atte lubung yaḵon taḻaḵona ḵalidodwana ya madusa'ḵ inggana? Naippun! 26Ngaimane angibain ḵan saḵone Abeng Di Tagu ya da tuttuduḵ, ibainḵu bos dida nu mipauliyaḵ ad luta. Atte sadi ye timpu nu mipauliyaḵ, midayaw aḵ Amaḵ, da anghelna ya saḵon. 27Yaḵon ibagaḵ ḵan diḵayu ḵatuttuwaan, awad da udum ḵan diḵayu we adipun matoy inggana'ḵ ilanda ampangatan Apudyus.”

Sa Nambaliwan Ni Ḵatollongan Jesus

(Mat. 17:1-8; Mrk. 9:2-8)

28Naḻaḵpus ḵad de sindumingguwan atte nangibag-an Jesus atta sadi, inayagana'ḵ Peter, John ya aḵ James woḵ nanagadada'tte beleg ta umoyda alluwaḻu. 29Pune sadi, nalluwaḻu ḵad aḵ Jesus, naobos bosaḻna ya amod de itaḵ ḵan siling ni silupnae isun di nanguliyatyate ḵilat. 30-31Baag-en naila da duwae tagu we summiling os, da Moses ḵan Profeta Elijah we maḵaug-uggudda ḵan Jesus. Pun inug-uggudda madam-ane matoyan Jesus ad Jerusalem ta mituttuwa da panggob Apudyus. 32Ḵad amod suyop da Peter yaḵon bummangonda ḵad, innilada'ḵ Jesus we nallangḻang ya da duwae tataḵdog atte daḻnigna.

33Madam-an ḵade tenan da Moses aḵ Jesus, ḵanan Peter ḵan siya, “Apu, atopay baḻun ni annaan taḵu sina. Nu iyunudnu angwa ḵani'ḵ tuḻu we sigay ta ḵuwam osa, ḵuwan Moses osa ya ḵuwan Profeta Elijah osa.” Ippun igammuna si inugudna.

34Sa nangibag-an Peter, nalibuuwanda woḵ naḵimtan da apostolna. 35Pune sadi, dingngoḻda gingae naḻpu'tte libuu we ḵanana, “Annaya abengḵu we piniliḵ. Dongngonyu da ibagana.” 36Nagangput ḵade nan-ugud, innilan da apostol we ummabus aḵ Jesus. Sa sadi ye timpu, adidapun paat imbaga da innilada atta ngaimane tagu.

Sa Namaḻyawan Jesus Atte Aḻan

(Mat. 17:14-18; Mrk. 9:14-27)

37Mabigat ḵad, nan-osog da Jesus atte beleg woḵ niyabot da ummamdane tagu. 38Unipun, inninggaw tagu we nampoḵawe nandagdagu woḵ ḵanana, “Mistulu, ilam ḵappos abengḵu we laḻaḵi ta ḵadaguwam ḵan badangam te abus aḵ abengḵu. 39Ilam ḵad, naaḻanan. Ampaḵapaḵaḻamona te antuḵituḵing ya mabilaw ḵan antataḻbutab sungadna, ḵad adinapun tenan. 40Nandagdaguwaḵ atta disipulum ta paḻyawonda aḻan ḵan siya yaḵon adidapun lamog.”

41Ḵanan Jesus atta tagu, “Diḵayu we ippun pammatiyu ḵan lawwelawweng somsomoḵyu we tagu si sanae lunap! Ḵamaan ni inggawaḵ ḵan diḵayu ya asi ḵayu amati? Ḵamaan ni ampatinggaan ni anusḵu ḵan diḵayu?” Ḵanana'tte aman ni abeng, “Idatongnu abengnu ḵan saḵon.”

42Ummadani ḵad abeng, pinittuwaḵ ni aḻan woḵ nabilaw. Yaḵon sinuppaḵan Jesus ḵan pinaḻyawna aḻan woḵ lummin-awa abeng. Pun innatod Jesus si amana. 43Pune sadi sintataag da tagu'tte ḵabooḻan Apudyus.

Sa Nangipigwaan Jesus Nangibag-an Si Matoyana

(Mat. 17:22-23; Mrk. 9:30-32)

Sissiya ḵade nataag da tagu, ḵanan Jesus atta disipuluna, 44“Adiyu maliwatan da ibagaḵ ḵan diḵayu, saḵone Abeng Di Tagu, mipuḻangaḵ atta ḵabusuḻḵu si umali ye aḻgaw.” 45Yaḵon adidapun naawatan piona ḵanan ya nitaḻu ḵan dida ta adida maawatan. Ḵad maḵimutdae angimus ḵan siya mipanggob si sana.

Sa Ḵangatuwan

(Mat. 18:1-5; Mrk. 9:33-37)

46Nansosongbatan da disipulun Jesus nu ngai ḵangatuwan ḵan dida. 47Yaḵon inigammun Jesus somsomoḵda, pun innaḻana abeng woḵ pinasiḵadna si daḻnigna. 48Ḵanana ḵan dida “Ngaimane ammangili'tte isuna annae abeng gapu'tte pammatina ḵan saḵon, saḵon minangilina. Ḵad sa ammangili ḵan saḵon, minangilina bos nangibuun ḵan saḵon. Ngaimane ḵababaan ḵan diḵayu losan, siya ḵangatuwan.”

Da Adipun Sumullagi

(Mrk. 9:38-40)

49Ḵanan John ḵan siya, “Mistulu, innilani tagu we pinaḻyawna da aḻan mipagapu si ngadannu. Pun pinadasni igimau te daḵampun aḵ buḻun taḵu.”

50Yaḵon ḵanan Jesus, “Adiyu igimau te ngaimane adipun sumullagi ḵan diḵayu, buḻunyu.”

Da ISamaria

51Madam-an ḵad mipauliyan Jesus ad langit, simsimmoḵnae umoy ad Jerusalem. 52Pun imbuunna da udum ta umunada si ili'tte probinsiya'd Samaria#9:52 Sa awe, da iSamaria ya da Judyu, nansassangada. Gapu'tte sadi, umadin da Judyu angoy ad Samaria si umoyda'd Jerusalem we maḻpu'tte probinsiya'd Galilee. Pasigda allipat. ta isaganada dumaḵngan Jesus. 53Yaḵon da tagu sidi, adidapun minangili'ḵ Jesus te igammudae umoy ad Jerusalem. 54Innilan ḵad da disipulanae da James ḵan John da ḵingwan da iSamaria, ḵananda ḵan Jesus, “Apu, piome bilinonni apuye maḻpu'd langit ta soggona dida?”

55Nansinagung aḵ Jesus woḵ sinuppaḵana dida. 56Pun ummoyda'tte sabali ye ili.

Da Ambalin Aḵ Disipulun Jesus

(Mat. 8:19-22)

57Nanadtaddaḻanda ḵad, inninggaw tagu we ḵanana ḵan Jesus, “Mistulu, naḵasaganaaḵe ambalin aḵ disipulum ya mitun-ud ḵan siḵa'tta dinumane ayam.”

58Ḵanan Jesus, “Da mutit awad da lunguge inggawanda ya da sissiwit awad os da suḵbutda. Yaḵon saḵone Abeng Di Tagu, naippun boḻoyḵu'ḵ iyyaḵ masuyopan.”

59Ḵanan Jesus atte osae tagu, “Tun-udonaḵ.”

Yaḵon ḵanana, “Apu, Iyyaḵ yan ilibon aḵ amaḵ.”

60Ḵanan Jesus ḵan siya, “Awad da adipun amati ḵan saḵone isudan natoy, dida asi umoy angilibon atta natoyda.#9:60 Isudan natoy si sinagung Apudyus te adidapun amati ḵan Apu Jesus. Yaḵon inḵa ya iwaḻagawagnu ampangatan Apudyus.”

61Inninggaw os osae ḵanana, “Apu, tun-udoḵ siḵa. Yaḵon uwayonaḵ yan ta iyyaḵ ampaḵada'tta susunudḵu.”

62Ḵanan Jesus, “Sa andaḻnoḵe antawitawili, naippun anun ni ḵewaaḻona. Isuna bos mitun-ud ḵan saḵone antawitawili, naippun anuna si ampangatan Apudyus.”

Currently Selected:

Luke 9: kml

Highlight

Copy