Luke 15

Sa Nataḻaḵe Karnero

(Mat. 18:12-14)

1Adu da andadagup atta bugis ya da ḵabasbassuḻane ummoy nandongoḻ si tuttudun Jesus. 2Pun da Pharisee ya da mimistulun ni lintog ḵanandae nallili, “Ilanyu ḵad annae tagu! Ngaipana pione maḵaug-uggud atta ḵabasbassuḻan ya taḵon ay os ḵaḵan midoga bos ḵan dida!”

3Pune sadi, inug-uggud Jesus annae pani ḵan dida woḵ ḵanana, 4“Awatna, nu awad karneron ni osa ḵan diḵayu'ḵ singgasut ya mataḻaḵ osa, ngai ḵamman ḵoona? Tenana da siyampuḻu ya siyam atte bumbummaaw ta umoyna sington nataḻaḵ inggana'ḵ odasana. 5Ḵad nu odasana, amod de layadna ya buḵudonae umoyon. 6Dumatong ḵad, ayagana da buḻbuḻunna ḵan daḻnigna ya ḵanana, ‘Anggangganas taḵu te indasaḵ pos pagay nataḻaḵe karneroḵ!’ ” 7Iyyanungus Jesus ḵanan, “Annaya ibagaḵ ḵan diḵayu, ḵatti bose amod de ganas Apudyus ya da anghelna'd langit atte osae ḵabasbassuḻane ambabawi'tta basuḻna ya agaynae angwa nu sa ganasda'tta siyampuḻu ya siyame naun-unane tagu we adidapun ḵasapuḻane ambabawi'tta basuḻda ya adidapun agaye angwa.”

Sa Nataḻaḵe Palata

8Pinagatupan Jesus we nangipani woḵ ḵanana, “Awatna nu awad bubai'ḵ awad simpuḻu'ḵ palatana,#15:8 Sa ossaane palata, siya tangdan si sin-aḻgaw atte timpun Jesus. ya tinaḻaḵna osa, ngai ḵamman ḵoona? Aaddi ye siya ḵoona tonggana silaw ya ummanae anagad si boḻoyna ya singsingtona inggana'ḵ odasana. 9Ḵad nu odasana, ayagana da buḻbuḻunna ḵan daḻnigna ya ḵanana, ‘Maḵagangganas ḵayu ḵan saḵon te annae indasaḵ pos pagay nataḻaḵe palataḵ!’ ” 10Ḵanan Jesus we nangiyanungus, “Annaya ibagaḵ ḵan diḵayu, ḵatti bos gangganas ni bubai si nangdasana si nataḻaḵe palatana, anggangganas aḵ Apudyus ya da anghelna nu awad ambabawi'tta basuḻna ya agaynae angwa taḵon ay ossaane ḵabasbassuḻan.”

Sa Nataḻaḵe Abeng

11Pun imbagan os Jesus annae pani woḵ ḵanana, “Inninggaw tagu we duwa da abengnae laḻaḵi. 12Ḵanan ni udidi, ‘Ama, ittom ud billayḵu'tta laḵsunnu.’ Pune sadi ḵingwan ḵad ni amada, binillayna'tta ansunud da ḵuḵuwana.

13“Naḻaḵpus ḵad sin-aḵitane aḻgaw, ingnginan ni udidi da losane billayna woḵ ummoy atte adayu we ili. Dummatong ḵad sidi, ginastuna pilaḵna'tta gaggatunge antatagu. 14Naamin ḵad nagastu pilaḵna, dummatong ummamdane inggi'tte losane ili ye inninggawana ḵad naippun nabun-an ḵan siya. 15Pune sadi ummoy lummabbu si osa'tta umili sidi woḵ siya ḵewaaḻna umoy antangḵon atta boḻoḵ.#15:15 Da Judyu, adidapun antangḵon baḵon nu ḵanon boḻoḵ te ibelangda da boḻoḵ aḵ adipun ampoḻḵas sigun atte ugalida. Ilanyu Leviticus 11:7-8 ya Deuteronomy 14:8. Sa sinḵuwa'tta boḻoḵ, da Gentil. 16Gapu ta nauḻauḻat, piona oḵyane angan atta ḵanon da boḻoḵ yaḵon naippun nangitod ḵan siya.

17“Nansomsomoḵ ḵad ḵanana, ‘Losan atta anḵewaaḻon amaḵ pasige ansawaḻda'tte maḵan ḵad annaaḵ ay sinae mamattoy atte inuḻat. 18Iyyaḵon ay ta iyyaḵ ḵan amaḵ ya ḵanaḵ ḵan siya, “Ama, naḵabasuḻaḵ ḵan Apudyus ya ḵan siḵa. 19Adiyaḵpun ogon mibelang aḵ abengnu yaḵon nu maḵwa ibelangnu ud saḵone osa'tta anḵeḵewwaaḻom.” ’

20“Naabus ḵade simsimmoḵna sadi, nallibbate nipauli si igaw amana. Sissiya ḵad si adayu, intap amana woḵ amod de daguna. Pun nanoddaḵe ummoy niyabot ḵan siya woḵ ḵinawoḻna ḵan inogoḵana. 21Pun ḵanan ni abengna, ‘Ama, naḵabasuḻaḵ ḵan Apudyus ya siḵa. Adiyaḵ oḵyan ogon ibelang aḵ abengnu.’

22“Yaḵon inayagan amana sammiluna woḵ ḵanana, ‘Agaganyu! Inḵayu aḻan ḵabaḻuwane silup ta isilupyu ḵan siya. Ḵad singsinganyu ya ḵapatusanyu. 23Ḵad inḵayu aḻan antabae baḵa ta ansida taḵu ḵan anggangganas taḵu. 24Te sa annae abengḵu isun di natoy yaḵon annae natagu. Nataḻaḵ yaḵon annae naodasan.’ Pune sadi insaḻaddae nanggangganas.

25“Yaḵon inninggaw panguḻu we abengna'tte pappayaw. Ḵesan ḵad atte ili, dingngoḻnae andi da anḵanḵanta ḵan ansasala, 26pun inayagana osa'tta sammilun amana woḵ inimusna nu ngai ḵoonda. 27Pun ḵanana, ‘Aḵ sunudnu awade dummatong. Pun siya nangisidaan amayu si antabae baḵa te pinadatongnae naippun naḵwa ḵan siya'ḵ lawweng.’

28“Yaḵon summanga panguḻu woḵ adinapun pione lumnoḵ. Pune sadi, lummawa amada woḵ nandagdagu we angayag ḵan siya. 29Yaḵon ḵananae summongbat, ‘Pigan tawone nanḵewaaḻaḵe isun da musassum ḵad tinuttuwaḵ losan da bilinnu. Yaḵon adiḵapun paat nangitod taḵon ay ubbun di kalding ta awad pay oḵyan naḵagangganasaḵ atta buḻbuḻunḵu. 30Sinsadi ḵad atte dummatong abengnu we nanangtangga'tta ḵuḵuwam atta puta, siya gay asim insid-an atte antabae baḵa taḵu!’

31“Pun ḵanan amana, ‘Abeng, inniinggawḵa ḵan saḵon. Losane awad ḵan saḵon, gagangaye siḵa anginḵuwa ḵan dida. 32Yaḵon ḵasapuḻane anggangganas taḵu te sa annae sunudnu isun di natoy yaḵon natagu. Nataḻaḵ yaḵon naodasan.’ ”

Currently Selected:

Luke 15: kml

Highlight

Copy