Luke 13

Sa Angibabawiyan Atta Basuḻ

1Sa nangituttuduwan Jesus atte sadi, inninggaw da ummoy ḵan siyae nangug-uggud atta naḻpu'tte probinsiya'd Galilee ye impagongat Gobernor Pilate si nangidatunanda'ḵ ayam ḵan Apudyus. 2Ḵanan Jesus ḵan dida, “Atte ḵasomsomḵanyu, ḵaḵna nanḵaḵatoyda te nadagdagson da basuḻda nu da udume naḻpu'tte probinsiya'd Galilee? 3Naid! Annaya ibagaḵ ḵan diḵayu, nu adiyu ibabawi da basuḻyu ya adiyu agaye angwa, madusa ḵayu we ḵama ḵan dida. 4Isuna bos da nasawaḻan aḵ waḻu we tagu we natoy atte niḵuḻ-uban ni antaḵnange boḻoy ad Siloam. Atte ḵasomsomḵanyu, nadagdagson basuḻda nu da losane iJerusalem? 5Naid! Annaya ibagaḵ ḵan diḵayu, nu adiyu ibabawi da basuḻyu ya adiyu agaye angwa, madusa ḵayu we ḵama ḵan dida.”

Sa Ḵayu We Fig

6Pune sadi, inug-uggud Jesus ḵan dida pani woḵ ḵanana, “Inninggaw tagu we nammuḻa'ḵ ḵayu we fig si lutana. Ummoyna ḵad innila nu namunga, naippun bungana. 7Ḵanana'tte nanangḵon si ḵayu, ‘Ilam ḵad, ḵaḵlun tawonnae ummoyḵu innila nu namunga yaḵon ippun indasaḵ aḵ bungana! Gabbaom ay ta adina bos ay aminon lawa luta.’

8“Yaḵon ḵanan ni nanangḵon, ‘Apu, anusanta yan sintawon ta asuwasoḵ yan ya abunuwaḵ. 9Ḵad nu amunga'ḵ tawon, baḻuna bos. Yaḵon nu adipun pagay, gabbaoḵ.’ ”

Sa Bubai Ye Nilaḻaḵod Ni Aḻan

10Sin-aḻgawan ḵade sa umillongan, nantuttudu'ḵ Jesus atte sinagoga. 11Inninggaw bubai ye nilaḻaḵod ni aḻan atte nasawaḻan aḵ waḻu we tawon ya adipun maḵauyad. 12Innilan ḵad Jesus, inayagana woḵ ḵanana, “Ina, mapuḵayanḵa'tte sanate ampaḵaḻamam!” 13Pun impatay Jesus da imana ḵan siya woḵ daguse nauyad woḵ nandaydayaw ḵan Apudyus.

14Yaḵon summanga pangat ni sinagoga te sa umillongan ḵinaan Jesus sadi ye saḵit. Pun ḵanan ni pangat atta tagu, “Onom aḻgaw oḵyane abus anḵewaaḻan taḵu. Pun sana oḵyan da aḻgawe umaliyanyu ta paḵaanyu da saḵityu, daḵampun atte umillongan da Judyu.”#13:14 Exodus 20:8-11.

15Summongbat aḵ Jesus woḵ ḵanana, “Diḵayu we ḵapappailae anuttuwa ḵan Apudyus, adiyupun ḵamman umoy uḵasan baḵa baḵon nu donkeyyu ya ummoyyu pinainuman atte umillongan? 16Pun sinsadi, anna ḵan ditaḵu annae bubai ye ganaḵ Abraham we nampaḵaḻamon Satan si nasawaḻan aḵ waḻu we tawon. Ḵasapuḻan ḵammane mapuḵayan atte ampaḵaḻamana si umillongan?” 17Pun da losane sumullagi ḵan Jesus nababbainanda'tte sanae songbatna ya amod de layad da ḵaaduwane tagu'tta losane nakaskasdaawe ḵingwana.

Sa Pani Atte Bukoḻ Ni Mustasa Ya Sa De Yeast

(Mat. 13:31-33; Mrk. 4:30-32)

18Pun ḵanan Jesus, “Ngai mipaniyan ni ampangatan Apudyus? Ngai angipaniyaḵ? 19Mipani'tte buḵoḻ ni mustasae immuḻan ni tagu si umana. Dummaḵoḻ ḵad, nambalin aḵ ḵayu we lamog da sissiwit sumuḵbutan da pangana.”#13:19 Sa kalasin ni mustasae nimuḻa'tta ilin da Judyu daḵodaḵoḻ nu sa nimuḻa sina'd Philippines. Sa ḵataḵnangan umoye 12 feet. 20Pun ḵanan os Jesus, “Ngai da udume angipaniyaḵ atte ampangatan Apudyus? 21Siya isun ni de yeast we inḵamos ni bubai si adu we arina ta bumtaḻ losane niḵamsana.”

Sa Ansuḻpite Lewangan

(Mat. 7:13-14, 21-23)

22Pun pinagatupan Jesus we ummoy ad Jerusalem yaḵon nansadang atta siyudad ḵan ḵinailin di ili ye nilausana ta antuttudu. 23Inninggaw ḵananae nangimus ḵan siya, “Apu, aḵit ḵamman da matagu?”

Pun ḵanan Jesus, 24-25“Iggayu ḵabooḻanyu we lumnoḵ atte ansuḻpite lewangan ad langit atte sissiyae anna gundawayyu. Te dumatong timpu we iyonob ni simboḻoy lewangan ya amod da angipadas lumnoḵ yaḵon annaya ibagaḵ ḵan diḵayu we ippun maḵaḻnoḵ. Taḵon ay nu asi ḵayu anḵugḵug ya ḵananyu, ‘Apu, buḵtam ud lewangan ta lumnoḵ ḵani.’ Asina ḵanan, ‘Ippun igammuḵ ḵan diḵayu ya sa naḻpuwanyu.’ 26Ḵad asiyu ḵanan, ‘Daḵampun ḵamman aḵ diḵani da naḵaḵan ḵan naḵainum ḵan siḵa? Ḵad nantuttuduḵa bose mismu'tta ilini!’ 27Yaḵon asina ḵanan, ‘Annaya ibagaḵ ḵan diḵayu, ippun paat igammuḵ ḵan diḵayu ya sa naḻpuwanyu. Inḵayun, diḵayu losane angwa'tta lawweng!’ 28Ilanyu ḵad da Abraham, Isaac ya aḵ Jacob ya da losane profeta we nidoga si ampangatana, sin-iibil ḵayu ya ngumalitod da babayu'tte sangayu te diḵayu ḵad, miballu ḵayu. 29Yaḵon awad da adu we tagu we maḵaḵan atte ampangatan Apudyus we naḻpu'tte dumingitan ḵan mipisongan init ya maḻpu'tta ḵapon ad lagud ya ad daya. 30Sinsadi adu da tagu we nangatu we mipababa ya da nababae tagu, mipangatuda si umali ye aḻgaw.”

Sa Ayat Jesus Atta IJerusalem

(Mat. 23:37-39)

31Imbagan ḵad Jesus sadi, dummatong da udume Pharisee woḵ ḵananda ḵan Jesus, “Nabaḻbaḻu nu tenam sina te aḵ Herod ḵad, piona siḵa gongaton.”

32Yaḵon ḵanan Jesus ḵan dida, “Inḵayu ibaga si sanate nasiḵape pagatupaḵe amaḻyaw atta aḻan ya angaan atta saḵit da nasaḵit yaḵon daḵampun aḵ manunnuwan te madam-ane gangputoḵ ḵewaaḻḵu. 33On adiyaḵpun matoy sina yaḵon pagatupaḵ inggana'ḵ dumatongaḵ ad Jerusalem te adipun maḵwae matoy profeta atte igawe lasinna'd Jerusalem.”

34Pune sadi ḵanan Jesus, “Atoḵayupaye iJerusalem, diḵayu nanggongat atta profeta ḵan namatubatu'tta imbuunna! Nangampigae pioḵ dagupon diḵayu ta ayyuwanaḵ diḵayu we isun ni analsaliponponan ni mangaḻaḵ atta issiwna'tta payaḵna yaḵon adiyupun pion. 35Ilanyu ḵad, diḵayu mabaḻaw te tenan Apudyus diḵayu ya mabaawan temployu. Annaya ibagaḵ ḵan diḵayu we inggana sinsadi, ippun ogon ilanyu ḵan saḵon inggana'ḵ dumatong timpu we asiyu ḵanan, ‘Madaydayaw oḵyan umali ye imbuun Apudyus!’ ”#13:35 Psalm 118:26.

Currently Selected:

Luke 13: kml

Highlight

Copy