MARKƏ 13

Yeesu waate wəra minti Kuli kə Pepeŋ bə ce yaŋ wəra

(Mat. 24.1-3; Liki 21.5-7)

1Bə minti Yeesu kəlaŋ warda giidə *Kuli kə Pepeŋ daŋ, hulum gud *kaa gə guuduŋa əsəŋ bə wəətu minti: «Hulum bə hateŋ, gosə gole la kəm mo, kuli toŋ wəra pisi hasi! Gosə gole pərki du pis-pisi la kəm mo!» 2Yeesu hərnu kel minti: «Kuli kəmtəŋ toŋ ŋəlnəm bə gole. Səma asə la wəra minti wə bə ce yaŋ wəra neŋneŋ keɗe, koo pərki də kumundu yaake bə malə-mele cəərə kumsu ada ba.»

3Adoro, wə ɗeŋ a isi warna kəəyə *pərki bə minti yə məntu Oliviyeŋ na bə harə-hare duru cəərə Kuli kə Pepeŋ na anəkay. Piyer, Zaki, Zaŋ daana Andere zeŋ warna duuru anə halaŋ, yə əsəŋ bə law ku minti: 4«Waate are la kəm mo, kel teŋ ɗe a ji haa kotnə mo? Karman maa ji mo bə ge dər minti kel teŋ máŋ wəra maŋ bə de kuyaŋ?»

Mele bə gud lasiŋ

(Mat. 10.17-22; 24.4-14; Liki 12.11-12; 21.8-19)

5Kəya Yeesu wəətənəy minti: «Aŋ jəə la wəra gə gunə-guni kir minti hulum a ləŋaŋ wəra ba. 6Gud maa mo kaa ablaw piti yaŋ bə ji kusri damdi té kəna ten ana. Mindi mindi mo bə waate yaŋ minti tó kəna *Hulum bə minti Pepeŋ ŋəmnuŋ! Kəya yə laŋte kaa yaŋ wəra ablaw faɗi.

7Aŋ bə əskiti sam anə duuriŋ də saraŋ máŋ-máŋiŋ daana nayto too-too-to'iŋ yaŋ gəm. Aŋ a jeme walka ba, gud maa mo kel teŋ kir ji, səma paapa kəm tewe də koŋ faɗi ba. 8Aŋ bə ase gidiirə kaa yaŋ bə piti cəərə gidiirə kaa gaalaŋa, seŋka mooto cəərə daalaŋ mooto gəm. Anə miirti bə seŋkaŋ daana tay bə jəəti yaŋ ta'-ta'i a koŋa. Kel teŋ gə ŋarə-ŋere haa də gəəli bə minti həlgəŋ fəlu a kəkəy bə minti a ɗele weŋ. 9Aŋ teŋ ha'aŋ, aŋ jəə la wəra gə gunə-guni cəərə kusrəŋa gəm. Yə bə ayaŋ yaŋ warna a ko bə jeme kəəti na, yə bə wətəŋ yaŋ giidə *kuli bə toose kə kaanə Ziwifiŋa gəm. Yə bə mantətaŋ yaŋ warna tiinə kaa kə dəməəməŋ na daana tiinə kəkamnaŋ na gud kel dəna. Aŋ ji kəmnə də kəkəy də kel katən wəra a niini haa də ko toŋ faɗi. 10Gud maa mo, gidiirə kaŋ keɗe doŋ kir iski *Kel pəsaŋ kəmarwaŋ wəra kəm. 11Bə minti yə humnuŋ ne bə ɗe a ko bə kəətiŋaŋ, aŋ a yaake ku tarməyaŋ bə ceme wəra minti aŋ ɗe a waate kəna minti harmə moŋ, ba. Aŋ koloŋ ne warna ada naŋ, aŋ waatə la haa kel gə minti Pepeŋ bə ayaŋ dəŋ faɗi. Gud maa mo aŋ bə waate kel haa paapa bay cəərəŋ ba, Tiiru Cetcetaŋ bə ayaŋ hel də hərəy haa tá. 12Seenə hulum derra'iŋ bə əyu yaŋ wəra a kaa kəman minti yə əwu la wəra, koo bar beebeŋ bə ji duuru haa bədoona gəm. Kəmar koncoŋ bə kole kuy yaŋ wəra cəərə kəmniŋa, yə bə jəy kel di yaŋ minti yə əwəy la wəra gəm. 13Kaŋ keɗe bə məlaŋ dərəŋ yaŋ wəra gud səmana. Səma hulum bə minti əsəŋ ne ŋəŋ ku kel teŋa hãã a me duŋ, wə seere yaŋ wəra.»

Lasi mooto-mootoŋ

(Mat. 24.15-25; Liki 21.20-24; 17.23; 21.8)

14Yeesu waataŋ pa minti: «Bə minti aŋ asaŋ karman bə jeeɗem-jeeɗem bə ɓalke ko bə ablaw-ablaw#13.14 Karman bə jeeɗem-jeeɗem toŋ haa kənaŋ, hulum kisirkiŋ. Matiye 24:15 ne bə əsə-isi a ko bə minti a paapa ko nuutu bə isiŋ baŋ, kaa gə minti giidə seŋka də Zudeŋaŋ gadtə la nuutu wəra a ko bə minti pərki adaŋ faɗi. (Hulum bə minti bə aŋke kel teŋaŋ, iskiy guudiy la wəra pisi!) 15Hulum bə minti a jəŋ ne apəya cəərə kuli nuutuŋaŋ, wə vaŋ ne wəra adawra, wə a kele giidu bə ɗe a he karman pəda. 16Hulum bə minti a jəŋ ne giidə aka naŋ, wə a hare akera bə ɗe a golde dəməəmə də ɓasi pəda gəm. 17Gəəliŋ ateŋa haa kə kəram gə məənəŋ daana kaayaŋ gə minti də kərməyi a kawaŋ! 18Aŋ toosə la kir minti kel teŋ kəya a awe dər ko bə pəəruŋa ba. 19Gud maa mo, a mele bə gud koŋ daŋ bə minti Pepeŋ jəŋ kar keɗe, hãã hebkənaŋ, sar lasi də minti ɗe a ji dər hiti toŋa jəŋ kəm hõy ba. Daalaŋ də deŋe taŋ kəya ɗe a ji hõy pəda gəm. 20Barkaŋ a ɗəkə la bə hare hiti bə ablaw toŋ wəra adoro baŋ, hulum sə a deŋe wəra anə məna ba. Səma, gud kaayaŋ gə minti wə a ŋəmnəy wəra minti yə jəə la kə toŋ, wə hərnu wəra adoro.

21Bədoona ana, kaa kəman waatənaŋ ne minti Kristu, *Hulum bə minti Pepeŋ ŋəmnuŋ yaŋ kənaŋ kumundu ba kanna a ko kəmana anəkay, aŋ a de kel neeteŋ ba. 22Gud maa mo, kaa gə minti bə ji kusri yaŋ minti té kəna Kristu, Hulum bə minti Pepeŋ ŋəmnuŋ, kumundu ba *kaa kə jogte ku mini kə Pepeŋ, bə pəəti diri yaŋ ablaw. Yə jəəti kar gə ŋili kaa yaŋ bə ge dər minti haa də səɓaki kə Pepeŋ, daana yə jəəti miɗi yaŋ gəm kir minti té sə a nakə laŋ, kaa gə minti Pepeŋ ŋəmnəy wəra a kusruŋ, té sə a ləŋəy wəra. 23Aŋ teŋ ha'aŋ, aŋ jəə la wəra gə gunə-guni gud bə minti ten waatənaŋ wəra ajewa haa kel keɗe faɗi.»

Hare bə Kormə Hulúm daŋ

(Mat. 24.29-36, 42; 25.13-15; Liki 12.36-38; 19.12-13; 21.25-33)

24Yeesu waataŋ pa minti: «Dər ko toŋ na, adoro də lasi taŋaŋ, cəwaŋ bə ge giziɓi wəra, leere bə kitir bə ji pəda gəm, 25seskaŋ bə awte yaŋ warda, səɓaki də apəyaŋ miirti yaŋ gəm. 26Kəya kaŋ ase *Kormə Hulúm yaŋ bə bi da dər kamraŋ da də səɓaki anə həm-həm daana dər məyana. 27Kəya wə ve *kaa kə digi kə Pepeŋ yaŋ wəra agev də seŋkaŋa waaɗe keɗe, a ko bə minti a məlaŋ guudə hãã warna a ko bə minti a haŋ ku adaŋ, bə tepe cəərə kaa gə minti Pepeŋ a ŋəmnəy wəraŋ a ko bə məna.

28Aŋ golə la cəərə gəlaɓiŋ. Bə minti kan gə suruŋ nəknu da ne wardaŋ daana wə əsəŋ ne bə veŋ, aŋ ase faɗi minti pisir wəra maŋ. 29Bədoona ana gəm, bə minti aŋ asaŋ kar teŋ ne kəya bə jiŋ, aŋ asə la wəra faɗi minti Kormə Hulúm wəra maŋ, wə wəra ku kəsarkaw nəətiŋa ɗaw. 30Gəəzi ten waataŋ, kaa gə minti kəm zugi hebkənaŋ bese wəra keɗe bay ase kel teŋ bə ji də diri ba. 31Tarmə pepeŋ daana seŋkaŋ bə ji ajew na pəda, səma kel katən bə ji yaŋ saksaki.

32Kormə Hulúm hare da dər hi muntu mo, dər cəwa məntə mo, hulum anə məna paapa bə asə-ase ba; koo kaa kə digi kə Pepeŋ, koo Kurmuyuŋ asaŋ bə gəm. Pep Abaŋ ɗaaməna bə asə-ase haa tó. 33Aŋ əsə la wəra gə gunə-guni daana gə ɗampə-ɗampe, gud maa mo ko toŋ tuli kotnə moŋ, paapa də dərəŋ ba. 34Kel teŋ gə ŋarə-ŋere haa bə kə hulum bə minti kooroŋ a gəryi warna tootoŋ ana. Wə yaakaŋ kuli nuutuŋ, wə əynu kel du kasi kaa kə joŋre nuutuŋa, wə əsəŋ mindi mindi mo wəra ku joŋre nuutuŋa. Kə hulum bə gole ku kuliŋ ha'aŋ, wə wəətunu minti wə əsə la wəra bə gunə-guni. 35Aŋ gəm, aŋ jəə la wəra gə gunə-guni! Gud maa mo, bərdə kuliŋ bi haa herheraŋ mo, duugŋ leŋ mo, siswiɗi mo, bəbəgi mo, aŋ paapa gə asə-ase ba. 36Bi nuutuŋ humnuŋ dərəŋ ne bokiŋ, aŋ jəə la kir minti wə a fəlaŋ a kina ba! 37Kel gə minti ten bə waataŋ dəŋa ha'aŋ, yə kə kaŋ keɗe: aŋ əsə la wəra gə gunə-guni!»

Currently Selected:

MARKƏ 13: KERNT05

Highlight

Copy