يوحنا 19
19
ئِسْرَائِيلِيْين رزُّوْن اَذ صلّْبن سِيذِيثْنغ عِيْسَى
1يُوْوِي بِيلَاطُوْس عِيْسَى حمَا اَث ؤُوْثن ڒْعَسْكَار س وسْغُوْن. 2مُوْذن-اَس يجّن ن تَّاج ن يسنَّانن ݣِّين-اَس-ث خ وزدْجِيف نّس. ݣِّين خَاس اَسڒْهَام ذ اَزݣّوَاغ.#19.2 ذَانِيتَا أُو عَاوذ ذِي لْأَيَا 5 نْزمَّر أَ نِينِي اَزݣّوَاغ نِغ ݣْرُوْنَا. 3تْقرَّابن غَارس شَّاثن-ث س يسقِّيڒن، قَّارن-اَس سَّلَام آي اَزدْجِيذ ن أَيث-إِسْرَائِيل. 4ئِفّغ-د عَاوذ بِيلَاطُوْس ينَّا-ٱسن: "خْزَرث، أَذَاوم ثِيذ سُوفْغغ حمَا اَذ تسّْنم بلِّي نش وَار ذَايس ؤُفِيغ بُو شَان تُّهْمث." 5سّنِّي يفّغ عِيْسَى غَار بَارَّا س تَّاج نِّي ن يسنَّانن ذ وسڒْهَام نِّي اَزݣّوَاغ. ينَّا-ٱسن بِيلَاطُوْس: "هَاقَا بْنَاذم نِّي."
6وَامِي ث ࢲْرِين اَرُّوْيَاس ن ڒْفُقَهَا ذ يعسَّاسن، تْعيَّاضن س جّْهذ قَّارن-اَس: "صلّب-يث! صلّب-يث!"
ينَّا-ٱسن بِيلَاطُوْس: "إِيْسِيم-ث كنِّيو صلّْبم-ث، نش وَار ذَايس ؤُفِيغ بُو شَان تُّهْمث."
7أَرِّين خَاس يسْرَائِيلِيْين نَّان-اَس: "غَارْنغ يجّن ن ڒْقَانُوْن. عْلَاحْسَاب ڒْقَانُوْن نِّي يتْخصَّا اَذ يمّث مِينْزِي نتَّا يتَارَّا يخف نّس ذ مِّيس ن أَربِّـي."
8وَامِي يسْڒَا بِيلَاطُوْس اَوَاڒ-أَ يݣّْوذ كْتَار. 9يُوْذف عَاوذ غَار ڒقْصَر نّس ينَّا-ٱس إِ عِيْسَى: "مَانِيس شك؟" عِيْسَى وَار خَاس يَارِّي شَا.
10ينَّا-ٱس بِيلَاطُوْس: "مَا وَار كِذِي ثسِّيوِيڒذ شَا؟ مَا وَار ثسِّينذ بلِّي غَارِي جّْهذ اَذَاش ضڒْقغ نِغ اَش صلّْبغ؟"
11ئِنْدق-د عِيْسَى ينَّا-ٱس: "وَار غَارك بُو جّْهذ خَافِي إِلَّا مڒَا يمُّوْش-اَش زِي أَربِّـي. عْلَاحْسَاب مَانَايَا، ونِّي إِي ذَايِي د يُوْوِين غَارش، غَارس دّْنُوْب كْتَار زَّايك."
12سّنِّي يرزُّو بِيلَاطُوْس اَذَاس يضْڒق. وَلَكِن يسْرَائِيلِيْين تْعيَّاضن س جّْهذ قَّارن: "مڒَا ثْضڒْقذ إِ ورْيَاز-أَ اَتَاف وَار ثدْجِيذ شَا ذ اَمدُّوْكڒ ن قَيْصَر.#19.12 قَيْصَر نتَّا ذ اَزدْجِيذ ن يرُوْمَانِيْين. ذ نِثْنِي إِي يحكّْمن خ أَيث-إِسْرَائِيل ذِي ڒْوقْث نِّي. مَارَّا ونِّي يتَارَّان يخف نّس ذ اَزدْجِيذ نتَّا ضد إِ قَيْصَر."
13وَامِي يسْڒَا بِيلَاطُوْس اَوَاڒ-أَ يسُوْفغ عِيْسَى، ئِقِّيم بِيلَاطُوْس خ ڒْكُرْسِي ن ڒحْكَام ذݣ يِجّن ن ومْشَان قَّارن-اَس <سَّحَا ن وزْرُو.> س وَاوَاڒ ن يسْرَائِيلِيْين قّارن-اَس <ݣَبَّاطَا.> 14نْهَار نِّي ذ جّمْعَا غَار جْوَايه ن ثنْعَاش، سوْجَاذن إِ ڒْعِيذ اَمقّْرَان. ينَّا-ٱسن بِيلَاطُوْس إِ يسْرَائِيلِيْين: "هَاقَاوم اَزدْجِيذ نْوم."
15وَلَكِن تْعيَّاضن س جّْهذ قَّارن: "إِيْسِي-ث إِيْسِي-ث، صلّب-يث!"
ينَّا-ٱسن بِيلَاطُوْس: "مَا ٱذ صلّْبغ اَزدْجِيذ نْوم؟"
أَرِّين خَاس اَرُّوْيَاس ن ڒْفُقَهَا نَّان-اَس: "وَار غَارْنغ بُو وزدْجِيذ إِلَّا قَيْصَر!"
16سّنِّي يسلّم-اَسن-ث حمَا اَث صلْبن خ صَّلِيب، يْسِين عِيْسَى.
ئِرُوْمَانِيْين تْصلَّابن سِيذِيثْنغ عِيْسَى خ صَّلِيب
17ئِفّغ عِيْسَى يَارْبُو صَّلِيب س يِيخف نّس يرُوْح غَار يِجّن ن ومْشَان قَّارن-اَس <أَمْشَان ن جُمْجُمَا.> س وَاوَاڒ ن يسْرَائِيلِيْين قّارن-اَس <ݣُوْلْݣُوْطَا.> 18مَانِي ث صلّْبن، صلّْبن اَكِذس ثْنَاين نّغْنِي، سَّا ذ سَّا، عِيْسَى ذِي ڒْوسْط. 19يُوْرَا بِيلَاطُوْس ذݣ يجّن ن ثڒْوِيحت، يݣِّي-ت غَار وزدْجِيف ن عِيْسَى خ صَّلِيب ثُوْرَا ذَايس: <عِيْسَى زِي نَاصِرَا، أَزدْجِيذ ن أَيث-إِسْرَائِيل.> 20ثَڒْوِيحت نِّي غْرِين-ت اَطَّاس ن يسْرَائِيلِيْين مِينْزِي اَمْشَان مَانِي إِي صلّْبن عِيْسَى يُوْذس ثَنْدِينْت. ثَڒْوِيحت نِّي تُوْغَا ثُوْرَا س لْعِبْرِيَا ذ لَاتِينِيَا ذ ثْيُوْنَانِيث.
21نَّان-اَس اَرُّوْيَاس ن ڒْفُقَهَا ن يسْرَائِيلِيْين إِ بِيلَاطُوْس: "وَار تَارِي شَا، <أَزدْجِيذ ن أَيث-إِسْرَائِيل.> أَرِي: <أَرْيَاز-أَ ينَّا نش ذ اَزدْجِيذ ن أَيث-إِسْرَائِيل.>"
22ينَّا-ٱسن بِيلَاطُوْس: "نش مِين ؤُرِيغ، قَا ؤُرِيغ-ث."
23وَامِي ڒْعَسْكَار صلّْبن عِيْسَى، يْسِين اَرُّوْض نّس بْضَان-ث خ اَرْبعَا ن ثْسقَّار كُڒ اَعسْكْرِي ييْسِي ثَسْغَارْث نّس. يْسِين عَاوذ تْشَامِّير، تْشَامِّير نِّي يصْنع-يث وذرَّاز.#19.23 أَذرَّاز ونِّي يزدْجْݣن ثَضُوْفْث يخدّم زَّايس. 24نَّان إِ وَايَاوْيَا، وَار ث نتْشَارِّيݣ شَا، أَخَاس نݣّ لْقُرْعَا بَاش أَ نسّن وِي ث غَا ييْسِين. أَمُّو يكمّڒ وَاوَاڒ ن لْكِتَاب:
<بْضَان اَرُّوْض ينُو جَارَاسن،
ݣِّين لْقُرْعَا خ ڒغْضَا ينُو.>
أُو ذ مَانَايَا إِي ݣّين ڒْعَسْكَار.
25زَّاث إِ صَّلِيب ن عِيْسَى ثْبدّ يمَّاس ذ خَاتْشس ذ مَرْيَم ثَمْغَارْث ن كْرِيفَاس ذ مَرْيَم ثَمَݣْدَالِيث. 26وَامِي يࢲْرَا عِيْسَى يمّاس يبدّ اَكِذس ومحْضَار نِّي إِي خَاس يعِيزّن اَطَّاس، ينَّا-ٱس: "آ يمَّا، أَقَاث ذِين مِّيم!" 27ينَّا-ٱس عَاوذ إِ ومحْضَار نِّي: "أَقَات ذِين يمَّاش!" سّنِّي يُوْوِي-ت ومحْضَار نِّي غَار ثدَّارْث نّس.
ڒْموْث ن سِيذِيثْنغ عِيْسَى
28منْبَعْد إِ مَانَايَا يسّن عِيْسَى بلِّي كُڒْشِي يكْمّڒ، ينَّا: "أَقَايِي فُّوْذغ." س وَاوَاڒ نِّي يفّغ مِين د يُوْسِين ذِي لْكِتَاب.#19.28 خْزَر لْكِتَاب ن زَّبُوْر، ئِزْڒِي وِيس 69، لْأَيَا 22. 29ذِنِّي يجّن ن وغرَّاف يشُّوْر س وَامَان وضِيڒ ذ يسمَّامن. سْغضْصن سْپُونْخَا ذݣ وَامَان وضِيڒ نِّي، ݣّين-ت خ وكشُّوْض#19.29 أَكشُّوْض-أَ يُوْسَا-د زݣ يِجّن ن اَرْبِيع يݣَّا اَم ؤُزُوْي. ؤُشِين-اَس-ت غَار وقمُّوْم نّس. 30وَامِي يقَّاس عِيْسَى اَمَان نِّي، ينَّا: "ئِتْوَاكمّڒ!" ئِسَذَار اَزدْجِيف نّس، ئِسلّم بُوْحْبڒ نّس.
31يوْقع مَانَاينِّي إِضنَّاظ ن ڒْعِيذ اَمقّْرَان. خ مَانَايَا يسْرَائِيلِيْين تَّارن-اَس إِ بِيلَاطُوْس اَذَاسن رْزن يضَارن إِ يِنِّي يتْوَاصلّْبن اَذ د سهْوَان دَّات نْسن زِي صَّلِيب. ݣِّين-اَسن اَمنِّي حمَا وَار تْغِيمِي دَّات نْسن خ صَّلِيب ذِي نْهَار ن سّبْث ن لْعِبَادَا مِينْزِي نْهَار ن سّبث نِّي ذ اَمقّْرَان اَطَّاس. 32ؤُسِين-د ڒْعَسْكَار رْزِين يضَارن إِ ومزْوَارُو ذ وِيس ثْنَاين إِي كِذس يتْوَاصلّْبن. 33وَامِي رُوْحن غَار عِيْسَى، وَار ذَاس رْزِين بُو يضَارن مِينْزِي ؤُفِين-ث يمُّوْث. 34وَلَكِن يجّن زِي ڒْعَسْكَار نِّي يشُوْكّ-يث غَار وغزْذِيس نّس س يِجّن ن وكشُّوْض ذَايس ثِيشّط ن وُوْزّڒ، ؤُزّْڒن-د زَّايس ذغْيَا يذَامّن ذ وَامَان اَطَّاس. 35ونِّي يࢲْرِين مَانَاينِّي يشْهذ خَاس، أُو مِين يشْهذ نِيشَان إِي يدْجَا. ئِسّن بلِّي مِين يقَّار ذ لْحَقِيقَا أُو يشهّذ بَاش اَزَّايس ثَامْنم ؤُڒَا ذ كنِّيو. 36يوْقع مَانَايَا حمَا اَذ يكمّڒ مِين د يُوْسِين ذِي لْكِتَاب: <وَار زَّايس يتْرزِّي ؤُڒَا ذ يجّن ن يِيغس.> 37ثُوْسَا-د ذݣ يِجّن ن لْأَيَا نّغْنِي: <أَذ خْزَرن غَار ونِّي يتْوَاشُوْكّن.>
يُوْسف ذ نِيْكُوْدِيْم نطّْڒن سِيذِيثْنغ عِيْسَى
38منْبَعْد إِ مَانَايَا، يجّن قَّارن-اَس يُوْسف زِي ثنْدِينْت ن أَرِيمَاتْيَا يرُوْح يتَّار-اَس إِ بِيلَاطُوْس اَذ ييْسِي دَّات ن عِيْسَى. نتَّا يُوْسف ذ اَمحْضَار ن عِيْسَى وَلَكِن وَار د يسْبيّن شَا يخف نّس يݣّْوذ زݣ يسْرَائِيلِيْين. وَامِي يقْبڒ بِيلَاطُوْس، يرُوْح يُوْسف ييْسِي دَّات ن عِيْسَى. 39يُوْسَا-د ڒَا ذ نِيْكُوْدِيْم، أَرْيَاز نِّي تُوْغَا إِݣ يݣِّين زِّيَارَا يجّن ن ثْوَاڒَا س دْجِيڒث غَار عِيْسَى. ڒخُّو يُوْوِي-د اَكِذس شَان تخْلِيطَا ذَايس أَرْبعَا و ثْڒَاثِين كِيلُو ن مُوْرّْ#19.39 مُوْرّْ نتَّا ذ اَمَان ن يِجّن ن ثْشجَّارْث ذَايْسن ڒفْوَاح. ذ وكشُّوْض ن لْعُوْد#19.39 لْعُوْد نتَّا ذ يجّن ن ثْشجَّارْث، أَكشُّوْض نّس ذَايس ڒفْوَاح اَطَّاس. تݣّن-ت يسْرَائِيلِيْين إ يِنِّي يمُّوْثن. 40سّنِّي يْسِين دَّات ن عِيْسَى كفّْنن-ت س ڒشْفن ذ لْعِيطَر نِّي، مَامّش تݣّن يسْرَائِيلِيْين إِ يِنِّي يمُّوْثن. 41ذݣ ومْشَان نِّي مَانِي صلّْبن عِيْسَى ذِنِّي يجّن ن جَرْدَا. ذِي جَرْدَا نِّي ذَايس يجّن ن ونْضڒ ذ جْذِيذ يݣَّا اَم يِيفْرِي، وَار ذَايس ينْضِيڒ حَدّ. 42نْهَار نِّي تُوْغَا ذ جّمْعَا، ئِسْرَائِيلِيْين سوْجَاذن إِ نْهَار ن سّبْث ن لْعِبَادَا. خ مَانَاينِّي نضْڒن عِيْسَى ذݣ يِيفْرِي نِّي ن ونْضڒ مِينْزِي يُوْذس.
Currently Selected:
يوحنا 19: ريف
Highlight
Share
Copy
Want to have your highlights saved across all your devices? Sign up or sign in
