يوحنا 14
14
سِيذِيثْنغ عِيْسَى نتَّا ذ اَبْرِيذ غَار أَربِّـي
1"ئِتْخصَّا كنِّيو وَار تْخيِّيقن شَا وُوْڒَاون نْوم. أَمْنث زِي أَربِّـي، أَمْنث عَاوذ زَّايي. 2ثَدَّارْث ن بَابَا ذَايس اَطَّاس ن يخَّامن. مَعْلِيك وَار يدْجِي شَا اَمنِّي، إِڒِي نِّيغ-اَوم-ت. أَذ رَاحغ نش اَذَاوم سْوجْذغ اَمشَان. 3خْمِي غَا رَاحغ اَذَاوم سْوجْذغ اَمشَان نِّي، أَذ د ذوْڒغ عَاوذ اَكنِّيو يْسِيغ اَكِذِي حمَا اَذ تِيڒِيم كنِّيو مَانِي غَا يڒِيغ نش. 4مَانِي غَا رَاحغ ثسّْنم اَبْرِيذ."
5ينَّا-ٱس تُوْمَا: "آ سِيذِي، وَار نسِّين شَا مَانِي غَا ثْرَاحذ، مَامّش غَا نسّن اَبْرِيذ؟"
6ئِنْدق-د عِيْسَى ينَّا-ٱس: "نش ذ اَبْرِيذ، نش ذ لْحَقِيقَا، نش ذ ثُوْذَارْث. وَار د يتِيس ؤُڒَا ذ يجّن غَار بَابَا إِلَّا زَّايي. 7مڒَا ثسّْنم-اَيِي، أَتَاف اَذ تسّْنم ؤُڒَا ذ بَابَا عَاوذ. قَا ڒخُّو ثسّْنم-ث ثࢲْرِيم-ث."
8ينَّا-ٱس فِيلِيپَّـاس: "آ سِيذِي، سْمظْهَار-اَنغ-د بَابَاش أُو صَافِي يكْفَا-يَانغ."
9ينَّا-ٱس عِيْسَى: "قَاع ڒْوقْث-أَ إِي كِوم كِّيغ عَاذ وَار ذَايِي ثسِّينذ شَا آ فِيلِيپَّـاس؟ ونِّي إِي ذَايِي يࢲْرِين، يࢲْرَا بَابَا. مَايمِّي ذَايِي ثتَّارذ اَذَاوم د سْمظْهَارغ بَابَا؟ 10مَا وَار تِيمْنذ شَا بلِّي نش اَقَايِي ذِي بَابَا، بَابَا اَقَاث ذَايِي؟ أَوَاڒن إِي ذَاوم قَّارغ وَار ثن قَّارغ شَا نش، ذ بَابَا إِي ذَايِي إِي ثن يقَّارن. نتَّا يخدّم ڒخْذَايم نّس. 11أَمْنم-اَيِي نش اَقَايِي ذِي بَابَا، بَابَا اَقَاث ذَايي، نِغ اَمْنم زِي ڒخْذَايم نِّي س يِيخف نْسنْت. 12أَقَا تسْڒَام ڒْحَقّ: ونِّي زَّايي يُوْمْنن، أَتَاف اَذ يݣّ ڒخْذَايم إِي خدّْمغ نِغ كْتَار مِينْزِي نش ݣُّوْرغ غَار بَابَا. 13مَارَّا مِين غَا ثتَّارم عْلَاحْسَاب يسم ينُو اَث خذْمغ حمَا اَذ يتْوَاسمْغَار بَابَا س مِّيس. 14مِين ذَايي غَا ثتَّارم عْلَاحْسَاب يسم ينُو، أَث خذْمغ.
سِيذِيثْنغ عِيْسَى يسڒْمَاذ خ أَرُّوْح يقدّْسن
15مڒَا تْحِبِّيم-اَيِي كنِّيو، ݣّث زِي ڒُوْصِيَاث ينُو. 16نش اَذ تَّارغ إِ بَابَا حمَا اَذَاوم يُوْش لْمُعَاوِن نّغْنِي حمَا اَكِذْوم يتِيڒِي إِ ڒبْدَا. 17لْمُعَاوِن نتَّا ذ أَرُّوح ن لْحَقِيقَا. وَار ثْزمَّر دُّنشْت اَث تقْبڒ، مِينْزِي نتَّاث وَار ث تْوِيڒِي شَا وَار ث ثسِّين شَا. وَلَكِن كنِّيو ثسّْنم-ث مِينْزِي يقِّيم اَكِذْوم أُو اَذ يِيڒِي ذَايوم. 18وَار كنِّيو تِجِّيغ شَا ذ يـيُوْجِيڒن، أَغَارْوم د عقْبغ. 19شْوِيت ن ڒْوقث إِݣ يقِّيمن وَار ذَايِي ثْࢲرّ شَا دُّنشْت-أَ، وَلَكِن كنِّيو اَذَايِي ثࢲرم. وَامِي نش دَّرغ، ؤُڒَا ذ كنِّيو اَذ تدَّرم. 20ذِي نْهَار نِّي اَذ تسّْنم بلِّي نش اَقَايي ذِي بَابَا، كنِّيو ذَايِي، نش ذَايْوم. 21ونِّي غَار دْجَانْت ڒُوْصِيَاث ينُو يخدّم زَّايْسنْت، أَتَاف يتْحِبَّا-اَيِي. ونِّي ذَايي يتْحِبَّان، أَتَاف اَث يحِبّ ؤُڒَا ذ بَابَا. أَث حِبّغ ؤُڒَا ذ نش، أَذَاس د سْمظْهَارغ يخف ينُو."
22ينَّا-ٱس يَهُوْذَا (مَاشِي يَهُوْذَا إِسْخَرْيُوْطِي): "آ سِيذِي، مَايمِّي غَا د ثْسظْهَارذ يخف نّش إِ نشِّين، دُّنشْت لَّا؟"
23ينَّا-ٱس عِيْسَى: "ونِّي ذَايِي يتْحِبَّان، أَتَاف اَذ يخْذم زݣ وَاوَاڒ ينُو. أَث يحِبّ بَابَا، أَ نْرَاح غَارس نش ذ بَابَا، غَارس إِي غَا نزْذغ. 24ونِّي وَار ذَايِي يتْحِبِّين، أَتَاف وَار يخدّم شَا زݣ وَاوَاڒ ينُو. أَوَاڒن-أَ إِي تسْڒَام وَار دْجِين شَا ينُو لَّا، ن بَابَا إِي ذَايِي-د يسّكّن.
25ثِمسْڒَايِين-أَ نِّيغ-اَوم-ثنْت أُو نش عَاذ اَقَايِي اَكِذْوم. 26لْمُعَاوِن نِّي نتَّا ذ أَرُّوْح يقدّْسن، أَثِيذ يسّكّ بَابَا عْلَاحْسَاب يسم ينُو اَذَاوم يسڒْمذ كُڒْشِي اَكنِّيو يسْفكَّر مَارَّا مِين ذَاوم نِّيغ.
27تِيجّغ-اَوم ڒهْنَا، تِيشّغ-اَوم ڒهْنَا ينُو. وَار ذَاوم ث تِيشّغ شَا اَم ث تِيشّ دُّنشْت. ئِتْخصَّا ؤُڒَاون نْوم وَا تْخيِّيقن وَار تݣّْوْذن شَا. 28ثسْڒَام قَا نِّيغ-اَوم: نش اَذ ؤُيُوْرغ، أَذ د عقْبغ غَارْوم. مڒَا ثْحِبِّيم-اَيِي، أَتَاف كنِّيو اَذ تْفَرْحم بلِّي اَذ رَاحغ غَار بَابَا مِينْزِي بَابَا ذ اَمقّْرَان خَافِي. 29نش نِّيغ-اَوم-ت ڒخُّو قْبڒ مَا ٱذ يوْقع، بَاش خْمي غَا يوْقع كنِّيو اَذ تَامْنم. 30وَار كِذْوم سِّيوِيرغ شَا نش عَاذ اَطَّاس مِينْزِي لْمُفْسِيد#14.30 ذِي لْكِتَاب ن لْأَصل لْحَاكم قَّارن-ث إِ لْمُفْسِيد، يعْنِي إِبْڒِيس. نِّي اَمقّْرَان ن دُّنشْت-أَ يتَاس-د. وَار غَارس بُو ثْزمَّار خَافِي. 31لَّا، نش تݣّغ زِي مِين ذَايِي يوصَّا بَابَا حمَا دُّنشْت-أَ اَذ تسّن قَا نش تْحِبِّيغ بَابَا. كَّرث سَّانِيتَا، يَالَّه أَ نْرَاحم."
Currently Selected:
يوحنا 14: ريف
Highlight
Share
Copy
Want to have your highlights saved across all your devices? Sign up or sign in
